Tërhiqet ligji për Demarkacion – protestuesit festojnë

AAK: Demarkacioni duhet të rrëzohet me votën e deputetëve

Aleanca për Ardhmërinë e Kosovës, beson se marrëveshja e Demarkacionit me Malin e Zi, do të merr epilog me votimin në Kuvend, prandaj edhe beteja për rrëzimin e kësaj marrëveshjeje, sipas AAK-së, duhet të zhvillohet në Kuvend.

“Kundërshtimi politik e qytetar, për tash e një vit, duke përfshirë protestat, peticionin e mbi 200 mijë qytetarëve, gazin në Kuvend dhe plot aktivitete opozitare e qytetare, e kanë dhënë efektin e vet dhe sot një numër i mjaftueshëm i deputetëve e kanë kuptuar se marrëveshja është gabim, dhe prandaj vota e tyre do të jetë kundër”, thuhet në deklaratën me shkrim të AAK-së.

Demarkacioni, sipas AAK-së, duhet të rrëzohet me votën e të gjithë deputetëve, pa dallim partie politike, rajoni, apo etnie.

“Vota kundër është votë për Kosovën si një dhe e pandashme”, thuhet në deklaratë.

Qeveria tërheq ratifikimin e Demarkacionit

Qeveria e Kosovës ka marrë vendim që të tërheq nga rendi i ditës Projektligjin për ratifikimin e Marrëveshjes për Demarkacionin e kufirit me Malin e Zi.

Kryeministri i Kosovës, Isa Mustafa ka njoftuar kuvendin se në situatën e krijuar nuk mund të procedohet tutje me ratifikimin e kësaj marrëveshjeje.

"Tërheqja nuk nënkupton se ne do ta rishqyrtojmë apo rinegociojmë marrëveshjen, por do ta shqyrtojmë momentin kur do ta procedojmë sërish”, ka deklaruar Mustafa.

Protestuesit i brohorasin tërheqjes së ratifikimit të Demarkacionit

Menjëherë për vendimit të Qeverisë së Kosovës që të tërheq nga rendi i ditës ratifikimin e Demarkacionit me Malin e Zi, aktivistët dhe mbështetësit e Lëvizjes Vetëvendosje të tubuar para Kuvendit, kanë filluar të duartrokasin duke e shënuar këtë si një fitore të tyre.

Limaj: Tërheqja e Demarkacionit për mungesë të votave

Kryetari i partisë Nisma për Kosovën, Fatmir Limaj nuk është pajtuar me konstatimet e qeverisë dhe kryeministrit Isa Mustafa se tërheqja e ratifikimit të Demarkacionit ndërlidhet me presionet politike të opozitës. Limaj ka thënë se qeveria duhet ta pranoj se tërheqja e ratifikimit ndërlidhet me mungesën e Listës Serbe në Kuvend dhe votave te koalicionit për ratifikimin e marrëveshjes.

Në fund, Limaj ka ftuar qeverinë që të ulet me të gjitha subjektet relevante politike dhe të rifillojë procesi i shënjimit të vijës kufitare me Malin e Zi.