Ferati: Pa Listën Serbe mund të dështojë votimi për Demarkacionin
Deputeti i Lidhjes Demokratike të Kosovës, Sadri Ferati ka thënë se mungesa e Listës Serbe në seancën e sotme mund të ndikoj drejtpërsëdrejti në rezultatin e votimit për ratifikimin e Marrëveshjes për Demarkacionin e kufirit me Malin e Zi.
“E dimë që marrëveshjet ndërkombëtare kërkojnë dy të tretat, pra 80 vota të deputetëve, dhe në këtë rast nëse deputetët e Listës serbë në tërësi apo me shumicë nuk marrin pjesë atëherë mund të parashikohet se nuk janë votat e mjaftueshme dhe do të presim si do të shkojmë më tutje”, ka thënë Ferati në një prononcim për Radion Evropa e Lirë.
“Gjasat janë që nëse nuk merr pjesë lista serbe partnerët e koalicionit kanë nevojë për konsultime, por nuk kam informacion se pse ka vonesa”, ka deklaruar ai.
Policia shoqëron deputeten e Vetëvendosjes, Donika Kadaj Bujupi
Deputetja e Lëvizjes Vetëvendosje, Donika Kadaj Bujupi është shoqëruar në polici. Lajmin e ka konfirmuar deputetja tjetër e Vetëvendosjes, Albulena Haxhiu e cila ka thënë shkurt se nuk e din arsyen pse, por policia ka arrestuar deputeten Kadaj-Bujupi.
Lëvizja Vetëvendosje ka reaguar përmes një postimi në rrjetin social Facebook.
Haxhiu: Nuk lejojmë që toka e Kosovës t’i falet Malit të Zi
Deputetja e Lëvizjes Vetëvendosje, Albulena Haxhiu ka deklaruar se subjekti politik të cilit ajo i përket do të kundërshtoj fuqishëm marrëveshjen me Malin e Zi për Demarkacionin, e cila sipas saj, i fal Malit të Zi mbi 8 mijë hektarë tokë.
“Nuk do të lejojmë që t’i falet toka e Kosovës askujt”, ka thënë Haxhiu. Sipas saj, kundërshtimi do të vazhdoj si në seancë ashtu edhe me protesta në rrugë. Këto komente, Haxhiu i ka bërë në momentin kur po futej në sallën e Kuvendit.
Në pritje të fillmit të seancës së Kuvendit
Kuvendi i Kosovës nuk është mbledhur ende në seancën e paralajmëruar, në të cilën pritet të votohet për ratifikimin e marrëveshjes për Demarkacionin e kufirit me Malin e Zi. Gazetari i Radios Evropa e Lirë njofton se në sallën e Kuvendit ende nuk kanë hyrë deputetët, pavarësisht paralajmërimeve se seanvca do të duhej të fillonte në ora 11.30.
Facebook Forum