Debati në sallën alternative të Kuvendit të Kosovës është zhvendosur drejt gjendjes së krijuar në raportin pushtet - opozitë, në fakt mbi masat sanksionuese të cilat parashihen ose jo me rregulloret e punës së Kuvendit, ndaj atyre deputetë të cilët pengojnë funksionimin e institucionit.
Autoritetet e rendit kanë shoqëruar për në polici dy deputete të Aleancës për Ardhmërinë e Kosovës, Time Kadriajn dhe Teuta Haxhiun.
Të dyja ligjvënëset dyshohet se kanë hedhur gaz lotsjellës gjatë ditës së sotme, në mjediset e Kuvendit të Kosovës.
Selimi: Deklarata e Thaçit e Mustafës, represion mbi opozitën
Deputeti i Lëvizjes Vetëvendosje, Rexhep Selimi ka reaguar ndaj kërkesës së zëvendëskryeministrit dhe liderit të Partisë Demokratike të Kosovës, Hashim Thaçi, i cili kërkoi miratimin e një deklarate me të cilën do të dënohej veprimi i opozitës në Kuvend.
Selimi tha se deklarata e Thaçit, por edhe e kryeministrit të Kosovës Isa Mustafa, paraqesin një represion politik mbi opozitën.
"Qeveria e Kosovës si në mandatin e Thaçit ashtu edhe në atë të Mustafës e kanë nxjerrë parlamentin e Kosovës në një mekanizëm shërbyes ndaj agjendës që nuk ka të bëjë me qytetarët e Kosovës", ka thënë Selimi. Andaj, opozita, ka vijuar ai, po përpiqet që ta kthejë Parlamentin në agjendën e duhur dhe jo në uzurpimin e tij.
Ambasadori britanik në Kosovë, Ruairi O'Conell, përmes një postimi në Facebook, ka reaguar ndaj situatës së krijuar në Kuvend dhe ka dënuar dhunën ndaj institucioneve.