Në sallën alternative disa nga ligjvënësit opozitarë, të cilët Kryesia e Kuvendit nuk i kishte futur në listën e pezullimit, kanë hedhur gaz lotsjellës. Nuk është ende e qartë se cilët nga gjashtë deputetët, të cilët nuk u pezulluan, hodhi gazin.
Të gjithë të pranishmit në sallë dolën jashtë saj.
Seanca e Kuvendit të Kosovës pritet t'i vazhdojë punimet së shpejti, ndonëse nuk dihet ende në cilën sallë.
Deputetë nga radhët e opozitës kanë hedhur në orët e paradites gaz lotsjellës në sallën e zakonshme të seancave plenare, duke detyruar zhvendosjen e punimeve në një sallë alternative, në të cilën disa deputetë nga opozita gjithashtu arritën të hedhin gaz lotsjellës dhe të ndërprejnë punimet.
Pamje të përplasjeve mes mbështetësve të opozitës dhe njësiteve speciale të Policisë së Kosovës.
Autoritetet e rendit në Kosovë kanë shpjeguar përmes një komunikate se në orët e pasdites, një numër protestuesish të cilët qëndronin jashtë objektit të Kuvendit të Kosovës, "kanë filluar të shfaqin dhunë, duke hedhur mjete të ndryshme me ngjyrë si dhe mjete të forta drejt zyrtarëve policorë dhe drejt objekteve shtetërore".
"Si pasojë e dhunës së shfaqur nga ana e protestuesve, në disa lokacione të ndryshme janë dëmtuar pesë (5) vetura zyrtare, njërës prej tyre i është vënë zjarri nga persona të dyshuar".
"Protestuesit e dhunshëm gjatë shpërndarjes dhe lëvizjeve të tyre në lokacione të ndryshme kanë tentuar të bllokojnë dhe pengojnë qarkullimin e trafikut, duke vendosur mjete të ndryshme në rrugë, duke përfshirë edhe kontejnerë mbeturinash", thuhet mes tjerash në komunikatën e policisë, në të cilën gjithashtu raportohet për 3 protestues të arrestuar.
