Ende nuk është e qartë se në orën sa do të mund të nis seanca e sotme, duke qenë se nuk ka ende një vendim nga ana e Kryesisë së Kuvendit. Ligjvënësit janë duke pritur vendimin e Kryesisë brenda në Kuvend, kurse jashtë tij janë mbledhur mbështetës të forcave politike në opozitë.
Ndërtesa e Kuvendit është rrethuar nga frocat e rendit.
Ambasadori amerikan në Kosovë, Greg Delawie, ka folur para gazetarëve në mjediset e Kuvendit të Kosovës...
"Jam këtu për të mbështetur funksionimin normal të Kuvendit, dhe u zhgënjeva kur disa deputetë të Kuvendit hodhën gaz lotsjellës në Kuvend, sërish. Është zhgënjyese. Siç e dini, Kuvendi është dashur që ta miratojë sot buxhetin për vitin e ardhshëm dhe ka një listë të gjatë ligjesh të rëndësishme për shqyrtim, të domosdoshme për Kosovën".
Duke rikujtuar vizitën e sekretarit amerikan të shtetit, John Kerry, në Kosovë dhe thirrjet e tij për të shmangur aktet e dhunës nga Kuvendi, Delawie tha se është zhgënjyes fakti që njerëzit nuk i kanë dëgjuar thirrjet e tij.
Ambasadori amerikan ka shprehur shqetësimin e tij edhe me faktin se dy ligjvënës nga opozita, ndaj të cilëve është në fuqi masa e arrestit shtëpiak, ndjejnë se nuk e kanë për detyrim të ndjekin të njejtat rregulla dhe ligje që vlejnë për cilindo qytetar tjetër të Kosovës.
"Për fund do të doja të thosha diçka për rritjen e retorikës nacionaliste dhe ksenofobike ditët e fundit. Mendoj se Ballkani ka parë mjaft retorikë të tillë, dhe shpresoj të marrë fund përfundimisht", tha mes tjerash ambasadori amerikan.
Ai ka rikujtuar ligjvënësit se qytetarët e Kosovës janë ata që duan zhvillimin ekonomik dhe shtim të vendeve të punës, dhe shpërqëndrimi i Kuvendit nuk ndihmon në jetësimin e këtyre synimeve.
Përkrahësit e partive opozitare po qëndrojnë para Kuvendit të Kosovës, duke brohoritur kundër marrëveshjeve me Serbinë. Forca të shtuara të policisë janë të pranishme para hyrjes së Kuvendit.
