Konjufca: Nuk lejojmë punimet e Kuvendit
Shefi i Grupit Parlamentar të Lëvizjes Vetëvendosje, Glauk Konjufca ka thënë se mbeten të vendosur që të bllokojnë punën e Kuvendit të Kosovës. Ai ka konfirmuar se policia ka ndaluar deputetin e këtij subjekti politik, Fisnik Ismaili, por sipas tij, nuk dihen arsyet.
"Si duket, kanë vendosur ta arrestojnë gjithë opozitën", është shprehur Konjufca.
Lëvizja Vetëvendosje përmes një njoftimi në Facebook, ka deklaruar se është arrestuar deputeti Fisnik Ismaili, duke kërkuar lirimin e menjëhershëm të tij.
Ligjvënës nga radhët e opozitës janë duke u kontrolluar nga sigurimi i Kuvendit të Kosovës, pas hedhjes së gazit lotsjellës sot nga Lëvizja Vetëvendosje dhe Nisma për Kosovën, brenda në sallë.
Autoritetet e rendit duket se janë duke mbledhur prova nga salla, për gazin lotsjellës, dhe prandaj nuk po lejojnë hyrjen e deputetëve brenda saj.
Ndërkohë, në hapësirat e Kuvendit është duke u mbajtur edhe mbledhja e Kryesisë së Kuvendit, në të cilën pritet të vendoset për vazhdimin ose jo të seancës së sotme.
