Policia konfirmon arrestimin e deputetit Fisnik Ismaili
Policia e Kosovës ka konfirmuar se ka arrestuar deputetin e Lëvizjes Vetëvendosje, Fisnik Ismaili.
"Policia e Kosovës me zyrtarët e saj policor, ka filluar me kontrollin e personaliteteve në hyrje të Kuvendit të Kosovës, ku gjatë kontrollit tek deputeti Ismaili janë gjetur në posedim dy (2) bombola gazi, që dyshohen të jenë gaz lotsjellës", thuhet në komunikatën e policisë.
"Me vendim të Kryesisë së Kuvendit të Kosovës, bazuar në Rregulloren e Kuvendit të Kosovës është kërkuar hyrja e personelit të sigurimit në seancën e Kuvendit të Kosovës, të cilët konform autorizimeve ligjore kanë hyrë duke formuar kordon sigurie brenda në seancë".
Ligjvënës nga radhët e opozitës janë duke u kontrolluar nga sigurimi i Kuvendit të Kosovës, pas hedhjes së gazit lotsjellës sot nga Lëvizja Vetëvendosje dhe Nisma për Kosovën, brenda në sallë.
Autoritetet e rendit duket se janë duke mbledhur prova nga salla, për gazin lotsjellës, dhe prandaj nuk po lejojnë hyrjen e deputetëve brenda saj.
Ndërkohë, në hapësirat e Kuvendit është duke u mbajtur edhe mbledhja e Kryesisë së Kuvendit, në të cilën pritet të vendoset për vazhdimin ose jo të seancës së sotme.
Lëvizja Vetëvendosje përmes një njoftimi në Facebook, ka deklaruar se është arrestuar deputeti Fisnik Ismaili, duke kërkuar lirimin e menjëhershëm të tij.
