Brenda sallës së Kuvendit shihen forca të shtuara të sigurisë, derisa deputetët po zënë vendet e tyre, për të nisur seancën e planifikuar për sot. Opozita ka paralajmëruar sërish bllokim.
Autoritetet e rendit kanë shtuar masat e sigurisë përreth ndërtesës së Kuvendit të Kosovës dhe brenda saj, si edhe përreth ndërtesës së Qeverisë së Kosovës. Të gjithë personat që po hyjnë në Kuvend po u nënshtrohen masave të shtuara të kontrollimit.
Kundër Asociacionit dhe demarkacionit
Tri partitë politike në opozitë, Lëvizja Vetëvendosje, Aleanca për Ardhmërinë e Kosovës dhe Nisma për Kosovën, po kundërshtojnë ashpër marrëveshjen për ngritjen e Asociacionit të komunave të banuara me shumicë serbe, dhe atë për demarkacionin e kufirit me Malin e Zi, duke i cilësuar të dyja si të dëmshme për tërësinë territoriale të Kosovës.
Ato janë zotuar se do të pengojnë punimet në Kuvendin e Kosovës, deri në shfuqizimin e këtyre marrëveshjeve.
Deri më tash, në funksion të bllokimit, forcat politike në opozitë kanë përdorur gaz lotsjellës, vezë dhe gjësende të tjera.
18 nëntor
Më 18 nëntor, është arrestuar edhe deputetja Donika Kadaj Bujupi, nga Aleanca për Ardhmërinë e Kosovës.
Gjykata Themelore e Prishtinës, më 17 nëntor ka lëshuar gjithsej katër fletarrestime ndaj deputetëve të Kuvendit të Kosovës: Albin Kurtit, Albulena Haxhiut, Donika Kadaj-Bujupit dhe Faton Topallit.