Mustafa premton zhvillim ekonomik dhe sundim të rendit dhe ligjit
Mandatari për formimin e qeverisë së re të Kosovës ka shpalosur pikat kryesore të programit të tij qeverisës.
Në fjalimin e tij para deputetëve, Isa Mustafa premtoi një qeverise stabile, efikase të përqendruar në zhvillimin ekonomik dhe në kultivimin e partneritetit me faktorin ndërkombëtar.
Mustafa u zotua për vazhdimin e dialogut me Serbinë dhe zbatimin e marrëveshjeve të arritura.
Po ashtu, ai u zotua për krijimin e një ambienti të sigurt të sundimit të rendit dhe ligjit. Në pika të përgjithshme, Mustafa veçoi edhe angazhimet në fushën e arsimit e shëndetësisë.
Programi qeverisës, sipas Mustafës bazohet në katër parime kryesore.
Ai ka premtuar edhe ndryshimin e politikave tatimore si dhe lehtësime në raport me investimet e jashtme.
"Programi ynë qeverisës do të fokusohet në zhvillimin ekonomik dhe në përmirësimin e mirëqenies sociale, fuqizim dhe respektim të ligjit, integrimet në Bashkimin Evropian, shëndetësi modernen dhe të tjera".
"Sundimi i ligjit është përcaktues për qeverisjen e mirë. Qeveria do të punojë kundër krimit, terrorizimit korrupsionit dhe të gjitha dukurive negative", tha Mustafa, duke iu adresuar deputetëve të Kuvendit të Kosovës.
Konjufca: Qeveri katastrofale
Në pjesën e debateve, partitë opozitare e kanë cilësuar koalicionin e dy partive më të mëdha politike si kapje të shtetit dhe në dëm të interesave të qytetarëve të Kosovës.
Nënkryetari i Kuvendit nga radhët e Vetëvendosjes, Glauk Konjufca tha se ky koalicion paraqet katastrofë për Kosovën dhe se kjo qeveri nuk mund të premtojë tjetër, veç mjerimit.
"Koalicioni PDK - LDK është katastrofë për Kosovën. Është e vërtetë sepse ky është koalicion i dosjeve, është koalicion i shpërdoruesve të fondit 'Vendlindja thërret', me matrapazët e 3 për qindëshit", ka theksuar Konjufca.
Kadaj - Bujupi: Koalicion i komunistëve dhe nëntokës
Me një retorikë të ashpër është prezantuar edhe deputetja e Aleancës për Ardhmërinë e Kosovës, Donika Kadaj - Bujupi.
Sipas saj, ky koalicion është i panatyrshëm dhe njësoj do të jetë edhe qeverisja që do t'u premtojë qytetarëve të Kosovës.
"Sot Kosova ka në krye të legjislativit dhe ekzekutivit dy figura që gërshetojnë komunizmin, nëntokën dhe shërbimet sekrete. Është një kombinim Putin - Eskobar - Kastro, kështu që nuk mund të dalë asgjë e mirë nga ky kombinim", ka thënë Kadaj - Bujupi.
Limaj i befasuar me Thaçin
Kryetari i Nismës për Kosovën, Fatmir Limaj, duke folur në Kuvendin e Kosovës tha se pa marrë parasysh që ky koalicion i ka numrat, nuk do të thotë se ka çdo gjë.
Ai i bëri thirrje koalicionit PDK - LDK që të ketë kujdes me fuqinë që e ka.
Limaj shprehu befasinë e tij, duke thënë se një ndërrim të tillë të pozitave nuk e kishte pritur.
"Të gjitha i kam pritur, por jo edhe që Hashim Thaçi të hiqte dorë nga kryeministria e këtë t'ia falte profës", tha Limaj.