Kadri Veseli zgjidhet kryetar i Kuvendit të Kosovës
Zëvendëskryetari i Partisë Demokratike të Kosovës, Kadri Veseli është zgjedhur kryetar i Kuvendit të Kosovës.
Veseli është propozuar në këtë post në bazë të marrëveshjes PDK-LDK për bashkëqeverisje. Procedura e votimit solli si rezultat 71 vota për 41 kundër dhe 1 abstenim.
Kryetari i Prishtinës, Shpend Ahmeti, nga Lëvizja Vetëvendosje, në rrjetin e tij social Facebook shkroi:
"Asgjë që mund të them tani nuk mund ta bëjë më të keq veprimin e disa njerëzve sot. Prandaj ju ftoj vetëm ta shikoni në orët në vijim dhe do ta keni ndjenjën edhe vetë. #kosova #kuvendi".
Ai reagoi edhe përmes rrjetit social Twitter, duke thënë se kjo çfarë po ndodh është "pika më e ulët".
Mustafa kryeministër, Veseli kryeparlamentar, Thaçi president më 2016
Marrëveshja për bashkëqeverisje, ndërmjet Partisë Demokratike të Kosovës dhe Lidhjes Demokratike të Kosovës parasheh ndarjen e pozitave kryesore.
Mediat kanë publikuar marrëveshjen e nënshkruar dhe raportojnë se lideri i LDK-së, Isa Mustafa, pritet të zgjidhet kryeministër i ri për mandatin 4 vjeçar.
Zëvendëskryetari i PDK-së, Kadri Veseli, do të jetë kryetar i Kuvendit. Kurse, nga viti 2016, kur presidentes Atifete Jahjaga t'i përfundojë mandati, lideri i PDK-së, Hashim Thaçi do të nominohet për president të ardhshëm të Kosovës.
Jahjaga takon Thaçin dhe Mustafën
Presidentja e Kosovës, Atifete Jahjaga, ka takuar gjatë ditës së sotme kryetarin e PDK-së, Hashim Thaçi dhe atë të LDK-së, Isa Mustafa, pas përmbylljes së marrëveshjes që bënë dy partitë për bashkë-qeverisje.
“Ata theksuan se marrëveshja ndërmjet tyre do të përmbushë edhe kriteret e përcaktuara kushtetuese dhe shoqërore për institucione përfshirëse e të përgjegjshme”, thuhet në komunikatën e publikuar nga kabineti i presidentes.
Zonja Jahjaga ka thënë gjithashtu se do të jetë në funksion të garantimit të funksionimit demokratik të institucioneve dhe në zbatim të plotë të Kushtetutës e të vendimeve të Gjykatës Kushtetuese.
