Zgjedhja e drejtorëve të klinikave të QKUK-së, edhe kësaj radhe ka shkaktuar mospajtime, si nga kandidatët që nuk arritën të përzgjidhen në krye të klinikave, po ashtu edhe nga sindikalistë të shëndetësisë, duke e vlerësuar se gjatë përzgjedhjes së kandidatëve ka pasur shkelje ligjore.
Doktoresha Sueda Latifi Hoxha, gjinekologe, është njëra nga kandidatet për drejtoreshë të Klinikës Gjinekologjike Obstetrike, e cila nuk është përzgjedhur si udhëheqëse.
“Nuk ka shkuar në rregull. Bazuar në të gjitha veprimet dhe aftësitë profesionale të cilat i kam dëshmuar gjatë 33 vjetëve në profesion, e 25 në arsim, kam konsideruar se jam lider i denjë dhe strategjik për udhëheqjen e klinikës gjinekologjike".
"Por, komisioni ka vendosur ndryshe, dhe duhet të respektohet vendimi. Por, sa është i denjë komisioni që të na vlerësojë, është një gjë që duhet të diskutohet. Konsideroj se më është bërë e padrejtë”, thotë Hoxha për Radion Evropa e Lirë.
Por jo edhe ministri i Shëndetësisë Ferid Agani, ka njohuri se është bërë ndonjë shkelje procedurale.
Zoti Agani pohon se në mesin e atyre që kanë konkurruar dhe nuk janë përzgjedhur, e konsideron si normale të ketë ankesa.
“Në mënyrë zyrtare ende nuk kam marrë asnjë ankesë. Nga anash kam marrë informata se është shpallë lista e drejtorëve dhe në mesin e atyre që kanë konkurruar, kanë pasur pakënaqësi e që e konsideroj se është normale".
"Por, në anën tjetër, jam i përkushtuar, siç kam qenë edhe deri tash, se lidhshmëria e procesit do të respektohet në tërësi, dhe në momentin që unë do të vërej ndonjë parregullsi, do të kërkoj nga sekretari që të ndërmerr masat e parapara ligjore”, thekson Agani.
Blerim Syla, kryetar i sindikatës së shëndetësisë, pohon se sindikata në fjalë ka pasur mjaft ankesa lidhur me përzgjedhjen e udhëheqësve të klinikave.
“Ne kemi shumë ankesa. Janë adresuar ankesat në këshillin e pavarur dhe në Ministrinë e Shëndetësisë. Se çka do të ndodhë, të shohim në ditët në vijim”, shprehet ai.
As ushtruesi i detyrës së sekretarit të përhershëm në Ministrinë e Shëndetësisë, Gani Shabani, i cili njëherazi edhe është përgjegjës për procedurën në fjalë, nuk ka përgjigje lidhur me këtë çështje.
“Raporti nga komisioni vlerësues ende nuk ka ardhur te ne”.
Derisa Nexhmedin Shala, anëtar i komisionit vlerësues për zgjedhjen e drejtorëve të klinikave, deklaron se janë përzgjedhë gjithë ata që i kanë përmbushur kriteret, bazuar në statutin e QKUK-së.
“Procesi ka qenë i rregullt, i bazuar në ligjet aktuale. Ankesa dhe zhurma ka pasur gjithmonë nga persona të caktuar që janë të pakënaqur dhe mendojë t’i realizojnë ambiciet e tyre përmes formave çfarë ata i mendojnë”, bën të ditur Shala.
Por jo edhe Xhemajl Selmani, kryetar i sindikatës së QKUK-së mendon kështu...
“Kanë bërë shkelje rreth afateve ligjore dhe shkelje që i kanë evidentuar aktivistët tonë që kanë marrë pjesë gjatë përzgjedhjes së drejtorëve. Gjitha ankesat, edhe të ndara, por edhe grupore që i kanë bërë doktorët, ne do t’i analizojmë dhe pastaj do të dalim me qëndrimin tonë. Mos të dalë që ne po kundërshtojmë gjithçka, por kësaj radhe janë duke u ankuar shumë”, thekson Selmani.
Zyrtarë në Qendrën Klinike Universitare, kanë deklaruar se as nuk e mohojnë e as nuk e pohojnë anulimin e këtij konkursi.
“Sa i përket anulimit, unë nuk e mohoj e as nuk e pohoj që do të ketë anulim. Një gjë dihet: komisioni ka vepruar në bazë të ligjeve në fuqi”, thotë Shpend Fazliu, zëdhënës në këtë institucion.
Sidoqoftë, klinikat brenda QKUK-së, për më shumë se dy vjet, udhëhiqen nga ushtrues detyre, gjë që konsiderohet si e kundërligjshme nga ekspertë shëndetësorë.
