Гьал къоязда МахIачхъалаялда волонтераз тIобитIана къватIахъ рукIунел гьаби кутул цIуниялде ахIулеб автопробег ва митинг. Гьеб тадбир гIуцIаразул рагIабазда рекъон Дагъистаналда гьел хIайваназдехун цIакъго вахIшияб бербалагьи буго. ЧIван гурони гьезул тIалаб гьабулеб, къватIахъа гьел ккун нахъе рачун, гьел хьихьизе сагIалъаби гьарулел гьечIо шагьаразул нухмалъиялъги. Гьеб киналъулго бицана «Эркенлъи» радиоялъе МахIачхъалаялда гьел къватIул кутузулги гьабзазулги тIалаб гьабулеб «ЗооЛайф» жамгIияб гIуцIиялъул нухмалъулей Ольга Рябкиналъ.
Дагъистаналъул филармониялъул мина биххизабизехъин бугин абураб хабаралъ рахIат хвезабун буго Маданияталдеги искустсствоялдеги хурхен бугел чагIиги гурониги гIадатиял гIадамалги лъугьун руго щиб гьабунги гьеб цIунун хутIиялъе хIаракат бахъизе кколин абун. Интернеталда гьеб мина цIунун хутIизе бокьараз хасал къокъабигицин гIуцIун руго, гIагараб заманалда гьеб суалалда тIасан республикаялъул тIалъиялъухъе кагътал хъвазе хIадурулел руго гьел чагIи.
23 маялда МахIачхъалаялда викъарав жамгIияв хIаракатчи МухIамадов МухIамад диваналъ 2 июналдалъагIан жанив тIамизе хIукму къотIун букIана. Жанив тIамураб заман лъугIаниги гьев къватIиве виччалев гьечIо низам цIунулез. Гьелда хурхун разигьечIолъи загьир гьабулеб буго республикаялъул жамгIиял идарабазул вакилзабаз ва туснахъалда хадур халкколеб жамгIияб комиссиялъул вакилзабаз.
Гъоркьисала Табасаран мухъалда хасал тадбиразул заманалда чIварав Мирзаханов Рамисица полициялъулал чIвазе хIал бихьанин аби мекъаб бугилан чIезабун буго гьал къоязда Дагъистаналъул прокуратураялъ. ЧIварасул гIагарлъиялъ лъазабулеб буго бащадаб лъагIел сверанини жеги Рамис чIваялда хурхун такъсиргьабиялъул иш рагьун гьечIилан. Къуваталъул идарабазул хIалтIухъабиги жидеца гьев мекъи ккун чIваялъе мукIурлъулел рукIинчIилан. Цебехун рехсараб прокуратураялъул хIукмуялдаса хадуб жидеца тIалаб гьабизе бугила Рамис чIварал гIадамазе букIине кколеб диван гьабейилан абулеб буго гьез.
Гьаб соналъул май моцIалда официалиял гурел баяназда рекъон низамцIунулез 27 чи викъун вугин Дагъистаналдайилан ахIи балеб буго республикаялъул жамагIатчагIаз.
Гьал къоязда тIоцебе МахIачхъалаялда рагьана социалияб тукен. Гьеб тукадаса бокьарав бесдалас жиндиего данде кколеб къайи босизе бегьула. Гьениб бугеб къайи бичун щвараб гIарацги бесдалазе хIажаталъубе хвезабизе бугин лъазабуна гьеб тукен рагьараб «Дагестан без сирот» абураб жамгIияб гIуцIиялъул нухмалъулей ГIусманова Раисатица.
Дагъистаналъул халкъияб мажлисалъ ахирисеб данделъиялда хIукму гьабуна МахIачхъала лъабго муниципалитеталде бикьизе. Цере рукIарал мухъазул бакIалда гьаризе руго гьел. Тахшагьаралъул мухъазул бутIрул рукIине руго гьезул нухмалъудаги. Гьел разиял руго гьеб къанун бахъиялда, гьезие гьанже цIикIкIун ихтиярал щолел руго. Гьеб къануналде данде чIун руго цо-цо сиясатиял партиязул вакилзаби.
Адвокат ва Инсанасул ихтиярал цIунулей Елена Денисенкоца низам цIунулел идарабазул адаб гьабулеб гьечIин, гьелъ жал интернеталда хъварал баяназдалъун хIакъир гьарулел ругин, абураб гIарз гьабулеб буго Гъизляралъул прокурорас ва диванчияс. Денисенкоца абулеб буго ахирисезул гIарз хурхараб бугин жидецаго къанунал хвезарулел рукIиналде жинца кIвар буссинабулеб букIиналдайин.
Диваналъ гIумруялъ туснахъ гьаризе хIукму къотIана ЧIикIаса СагIид – Апанди чIваялъул гIайиб гIунтIизабулеб букIаразул лъабгов, цоясе 12 сон кьуна диваналъ.
Ставрополь регионалда гIумру гьабун ругел дагъистанияз тIалаб гьабулеб буго къуваталъул идарабаз ункъго моцIица цеве ккурав Сулейбанов МухIамад эркен гьавеян. Хасал идарабазул щаклъи буго 2013 соналъ, цеве Нефтекумск мухъалъул колхозалъул бетIерлъун вукIарав Шандиев Гадильбек чIваялда. Сулейбановасда щибго гIайиб гьечIин, низам цIунулезе лъиде букIаниги гIайиб реххизе къваригIиналъ жанив тIамун вугин гьевилан лъазабулеб буго гьесул рахъккураз.
Дагъистаналъул вукIарав вице-премьер МухIамадхIусен Насрутдиновас гIарац бикъиялда хурхун гьабулеб диваналъул иргадулаб данделъиялда нугIзазул цIех-рех гьабизе байбихьана.
Гьал къоязда Дербенталъул полициялъул бутIаялъул нухмалъулес хъулухъалдаса букIине кколелдаса цIикIкIун пайда босиялда хурхун такъсиргьабиялъул иш рагьун буго.
Гьал къоязда жанисел ишазул идарабазул хIалтIухъабазда батун буго кIиго соналъ цебе Дербенталъул музеялдаса бикъараб IXX гIасруялъул ярагъ.
12 арелалда Дагъистаналъул христианазги кIодо гьабуна Пасха. Аслиял байрамалъулал тадбирал тIоритIана МахIачхъалаялъул гьатIаналдаги, Гъизляралъул гьатIаналдаги. МахIачхъалаялъул ва Грозныялъул кIудияв кашиш Варлаамица цевехъанлъиги гьабуна гьениб. Байрамкъоялъ МахIачхъалаялъул килисаялде вакIарун вукIана 400 гIан чи.
10 апрелалда бухIун буго Гъизляралъул аслияб мажгит. ГIорхъолъа арал ишазул министерлъиялъул баяназда рекъон цIа рекIиналъул хIасилалда лъилниги сахлъиялъе зарал ккун гьечIо.
Гьал къоязда Америкаялъул Масачусес штаталъул гьа баразул диваналъ Джохар Царнаев гIайибияв вугин 2013 соналъ Бостоналда кьвагьи бахъинабиялъейилан абураб хIукму къотIана.
СагIид Афанди чIваялъул гIайиб гIунтIизабулел ругел лъабгоял гIумруялъго туснахъ гьарейин, цоясе 15 сон кьейин абун тIалаб гьабуна прокурорас иргадулаб диваналъул данделъиялда.
Гьал къоязда МахIачхъалаялда бугеб цIех-рех гьабизе жанир тIамулеб 1 изоляторалъул азбаралъув полициялъул хIалтIухъабаз вухун вуго Хасавюрталдаса ГIалиев Рашидхан.
Щуабилеб апрелалда Дербенталда щалали лъаларел чагIаз вухун, азарханаялде ккун вуго журналист Вячеслав Стародубец. Гьеб лъугьа-бахъин гьес жиндирго хIалтIуда бухьинабулеб буго.
Гьал къоязда Дагъистаналъул тIадегIанаб диванханаялда гьабараз гIайибияв гьечIин абурб хIукму къотIана изну гьечIого яргъидгIуцIаразул кьерулъ вукIиналда щаклъи букIарав Ибрагьим АсхIабалиев.
Загрузить еще
