Исана 8 сентябралда Дагъистаналъул лъай кьеялъул министерлъиялъ хIукму гьабуна микьгоялдаса дагь цIалдохъан вугел классал къазе. Гьелъул мурад рагIула пачалихъалъул гIарац тIокI гьаби. КъачIого хутIарал классал цолъизаризеги бегьулин абулеб буго министерлъиялъул вакилзабаз. Амма гьеб хIукмуялдаса рази гьечIо мугIалимзаби.
Исана сон байбихьаралдаса 600 гIарза бачIун буго Россиялда инсанасул ихтиярал цIунулей вакил Элла Панфиловалъухъе Шималияб Кавказалдаса.
700 млн гъурущги харж гьабун Россиялъул "Ленфильм" компаниялъ Дагъистаналда бахъизе буго имам Шамилил хIакъалъулъ фильм.
13 сентябралда МахIачхъалаялда ккурав Дагъистаналъул премьер-министрасул гIакълучи Джафар Абуев виччан вугин лъазабуна низам цIуниялъул идарабаз 14 сентябралда. Интернеталде рехун буго Абуевги гьесул хъаравулзабиги кколеб мехалда бахъараб видео. Гьесул мадугьалзабиги ралагьун тун низам цIунулез гьев цеве къотIулев вуго тIад ретIараб гордеги мугъзадаса ботIроде цIан.
10 сентябралда Кабардагун Балкариялъул бетIерасул пресс-секретарас лъазабуна кIиазаргогIан кавказияв вугин Сириялдаса лъутун вачIун, жидер доба рукIел балагьулев.
Россиялъул лъай кьеялъул министр Дмитрий Ливановас лъазабуна исанаялдаса байбихьун улкаялъул школазда къватIиса пачалихъазул кIи-кIи мацI малъизе бугилан. Гьелдалъун лъималазул лъай кутакалда цебетIелин, гьезда ракIалда жо чIезабиги лъикIлъилин абураб пикру буго гьесул.
Исана 12 августалда Южно-Сахалинскалъул диванчи Перченкоца гьабураб хIукмуялда бан Кавказалдасан жаваб кьуна Чачан Республикаялъул бетIер Рамзан Къадировас. Хас гьабун жиндие кьезе кколин гьев диванчияс жавабин чIун вуго чачаназул бетIер.
МахIачхъала. Берцинлъиялъул салоналда аскIоб.
Дагъистаналда бищун гIемер лъималги гьарулел, бищун гIемер халичабиги рессулеб, бищун гIемер экстремисталги гIемерлъулел ругеб мухълъун рикIкIуна Табасаран. 11 лъимер бугеб гьениса хъизаналъул хIакъалъулъ бицана гьал къоязда «Голос Америки» радиоялдасан журналист Фатима Тлисовалъ. Советияб заманалда мукъсанабго харжихъ пачалихъалъе халичаби рессулел рукIарал табасараназул руччаби гьанже гьел фабрикабиги къан рес къотIун руго.
Анкьидасан МахIачхъалаялда тIоритIизесел рищиязда гIахьаллъизе ккола «Патриоты России» партиялъул кандидатал. Гьелъ батIи-батIиял харбал рижулел руго Дагъистаналда вугев гьеб партиялъул нухмалъулев Эдуард Хидиров республикаялда гьечIолъиялда бан.
Исламалъул къанунал ричIчIизаризе Дагъистаналде вачIун вуго гIараб улкабаздаса чанго гIалимчи.
30 августалда МахIачхъалаялда гIумруялдаса ватIалъана шагIир ГIадалло ГIалиев. БитIун советияб улка гучалда бугеб ригьалда официалияб куцалда Дагъистаналъул хъвадарухъабазул гIуцIиялдаса нахъе вилълъиндал гьесда сверухъ бахъараб ахIи-хIур такрарлъана 1990 абилел соназдаги.
Исана 25 августалда 156 сон тIубана Шамилил ахирисеб хъала - Гъуни магIарда рагъ лъугьаралдаса.
МахIачхъала шагьаралъул мэрасул ишал тIуразарулев Муса Мусаевас лъазабуна жинца нахъчIвалел ругин жинде щвезегIан шагьаралда ракьал рича-хисиялда бан гьарурал хIукмаби. Кинабниги 29 хIукму кколеб буго гьеб. Ракьалги МахIачхъала шагьаралда жанир руго рикьа-къотIун.
27 августалда МахIачхъалаялъул экс-мэр СагIид Амиров гIумруялъго туснахъ гьавураб хIукму къотIана Ростовалда рагъулаб диваналъ. Гьеб ккола кIиабизеги гьесие бихьизабураб туснахъалъул болжал. Гьелде щвезегIан гьебго шагьаралда 10 сон кьун букIана Амировасе.
Лъабго анкьидаса дагьаб заман хутIун буго МахIачхъала шагьаралъул депутатал рищизе. Амма жеги къватIибе загьирлъараб ахIи-хIур гьечIо гьелда тIасан. Гьезул сияхIалги дагьалъ церегIан загьирлъана.
24 августалда МахIачхъалаялда тIобитIана Дагъистаналъул мугIалимзабазул кIудияб данделъи. Республикаялъул бетIерасдасаги Москваялдаса хъулухъчагIаздасаги байбихьун гьелда гIахьаллъана лъай кьеялдехун хурхен бугел гIезегIан гIадамал.
Дагъистаналда нахъе витIун вуго пачалихъалъул мал-мулкалъул министр Имран ХIусенов. Гьес живго нахъе унев вугин гIарза хъваниги ришватчилъиялда данде къеркьолеб идараялъул щаклъи буго экс-министрас пачалихъалъул мал-мулк бичун букIиналда. Республикаялда букIине кколеб куцалда хIисаб-суалги гьабун пачалихъалъул буголъиялда хадуб хал кколеб гьечIин абураб пикру буго гIадамазулги.
МахIачхъалаялда букIараб Дагъистаналъул сейсмикияб ай ракьбагъариялъул цIех-рех гьабулеб станция биххизабун буго гьал къоязда. Гьеб станция бан букIараб ракь гьанже жиндир бугин абулев чияс цо сардилъ тракторгун вачIун биххизабунги рагIула гьеб.
Дербент шагьаралъул депутатазул гIуцIиялъул нухмалъулевлъун вищана цевеги гьенивго вукIарав Мовсун РахIимов. ЛъагIалил байбихьуда гьесги шагьаралъул нухмалъулев Имам Яралиевасги хисун рукIана цоцазул хъулухъал. Гьелдалъун Яралиевасда ракIалда букIана шагьаралда жиндирго божарав чиги тун, хадусеб болжалалдаги Дербенталъул мэрлъун вачIине. Амма гьел хьулал хIорлъана II августалда живго Яралиев хъулухъалдаса нахъеги ун. Гьелдаса хадувги Яралиевасул чи хъулухъалда хутIиялда бан батIи-батIиял пикраби руго бакIалъул гIадамазул.
Загрузить еще
