له کابل ښار څخه شپېته معتادین راټول او د درملنې لپاره روغتيايي مرکز ته يووړل شول.

د ابن سينا زر بستريز روغتيايي مرکز رئیس محمد ظاهر سلطاني ازادي راډيو ته وويل، زموږ مرکز د پولیسو په مرسته د بې سرپناه معتادينو راټولولو په لړ کې د کابل ښار له پل سوخته او شپږمې ناحيې له بېلابېلو سيمو څخه ۶۰ معتادين راټول او د درملنې لپاره د ابن سينا زر بستريز روغتيايي مرکز ته يووړل.

په ۲۱ ولايتونو کې د نشه يي موادو ۵۵ خرڅوونکي ونيول شول.

د کورنيو چارو وزارت وياند طارق ارين ازادي راډيو ته وويل، پولیسو د افغانستان په ۲۱ ولايتونو کې عمليات کړي چې په نتيجه کې يې د نشه يي موادو ۵۵ خرڅوونکي له ۳۰ کيلوګرامو نشه يي موادو سره نيولي دي.

دا نشه يي مواد هيروئين، ښیښه، ټابلیټ کا ګولۍ، تارياک او چرس دي.

د نيول شوېو تورنو کسانو دوسيې له نشه يي موادو سره د مبارزې عدلي او قضايي مرکز څارنوالۍ ته استول شوي دي.

د افغانستان په ۱۶ ولايتونو کې د نشه‌يي موادو ۲۷ قاچاق کوونکي او خرڅوونکي نيول شوي دي.

د کورنيو چارو وزارت وياند طارق ارين ازادي راډيو ته وويل: "له نشه‌يي موادو سره د مبارزې پولیسو د افغانستان په ۱۶ ولایتونو کې د نشه‌يي موادو د ساتلو او خرڅلاو پر سيمو عمليات وکړل چې په نتيجه کې يې ۲۷ قاچاق کوونکي او خرڅوونکي ونيول شول."

له دې نيول شويو خلکو سره تر ۳۰ کيلوګرامو ډېر نشه‌يي مواد، لکه هيروئين، ښیښه، ټابلېټ کا ګولۍ او شراب نيول شوي دي.

په غزني ولایت کې نږدې څلور زره کيلوګرامه بنګ ونيول شول.

د غزني ولایت د امنيه قوماندانۍ د رسنيو دفتر وايي چې له نشه‌يي موادو سره د مبارزې ځانګړو پولیسو د نشه‌يي موادو پر يوه زېرمه عمليات کړي چې په نتيجه کې يې ۳،۹۰۰ کيلوګرامه بنګ نيول شوي او د دې موادو د ساتلو په تور درې تنه هم نيول شوي دي.

د نشه‌يي موادو دې قاچاق کوونکو غوښتل چې دا بنګ پر بزګرو باندې وپلوري.

له نشه‌يي موادو سره د مبارزې عدلي او قضايي مرکز نږدې ۵۰ قاچاق کوونکي په بند باندې محکوم کړل.

د عدلي او قضايي مرکز ابتدائيه او استېناف محکمو د خپلو علني غونډو به ترڅ کې د نشه‌يي موادو د قاچاقو د ۳۴ قضيو په نتيجه کې ۴۹ قاچاق کوونکي له دوو څخه نيولې بیا تر ۱۶ کالو پورې په بند باندې محکوم کړل.

د عدلي او قضايي مرکز وياند خالد موحد ازادي راډيو ته وويل، محکوم شوي قاچاق کوونکي امنيتي ځواکونو له ۲۱۸ کیلوګرامو هیروئینو، ۲۲ کیلوګرامو ښیښې، ۴۶۲ کیلوګرامو چرسو او ۱۷۸ کیلوګرامو خاشخاشو سره نيولي وو.

په ننګرهار ولایت کې څه د پاسه پنځوس کیلوګرامه نشه يي مواد ونیول شول.

د ننګرهار ولایت د امنیه قوماندانۍ رسنیو ته ویلي چې پولیسو په جلال اباد ښار کې د استوګنې پر یوه کور عملیات وکړل چې په نتیجه کې یې ۲۹ کیلوګرامه چرس، ۱۶ کیلوګرامه تاریاک او شبږ کیلوګرامه هیروئین ونیول.

د دې موادو د ساتنې په تور پنځه تنه هم نیول شوي او له نشه يي موادو سره د مبارزې د عدلي او قضايي مرکز څارنوالۍ ته معرفي شوي دي.

د هرات ولایت پولیسو د شرابو یوه کارخانه ویجاړه کړه.

د هرات ولایت د امنیه قوماندانۍ ویاند عبدالاحد ولي زاده ازادي راډیو ته وویل، له نشه يي موادو سره د مبارزې پولیسو په ګذره ولسوالۍ کې پر یوې کارخونې د برید په نتیجه کې یو زرو ۹۰۰ کیلوګرامه تخمیر شوي کشمش او ۲۹ لېټره شراب ونیول.

پولیسو د شرابو د کارخانې وسایل له منځه یووړل،خو د ساتنې او جوړولو په تور یې څوک نه دي نیولي.

په غزني او پنجشیر ولایتونو کې به دوو جلا جلا پېښو کې څه د پاسه څلوېښت کیلوګرامه نشه يي مواد ونیول شول.

په لومړۍ پېښه کې پولیسو د غزني ولایت په مرکز کې د نشه يي موادو پر یوې ذخیرې د برید په نتیجه کې ۲۳ کیلوګرامه چرس ونیول.

له نشه يي موادو سره د مبارزې معینیت د رسنیو دفتر وايي چې پولیسو په دوهمه پېښه کې د پنجشیر ولایت په بازارک سیمه کې د موټرو د تلاشۍ پر مهال ۱۹کیلوګرامه چرس ونیول.

د دې موادو د ساتنې او انتقال په تور دوه تنه هم نیول شوي دي.

په بدخشان ولایت کې د څه د پاسه سل کیلوګراموه نشه يي موادو د قاچاقو مخه ونیول شوه.

د بدخشان ولایت امنیه قوماندان محمد صادق مرادي ازادي راډیو ته وویل، پولیسو ۱۴۰ کیلوګرامه چرس ونیول چې له بهارک ولسوالیه یې په یوه بار وړونکي موټر کې د وردوج ولسوالۍ له لارې له هېواده بهر قاچاق کول.

د موټروان په ګډون دوه کسان هم د دې موادو د قاچاقو په تور نیول شوي دي.

د افغانستان په شپږو ولایتونو کې تر ۱۰ ډېر کسان د نشه‌يي موادو د قاچاق په تور ونیول شول.

له نشه‌يي موادو سره د مبارزې پولیسو د هېواد په شپږو ولایتونو کې ۱۴ قاچاق کوونکي او د نشه‌يي موادو خرڅوونکي له ۲۷ کیلو ګرامه تاریاکو، ۲۰ کیلو ګرامه ښیښې، یو کیلو هیروئینو، دوو تومانچو او ۶۳ زره افغانیو سره یوځای نیولي دي.

نیول شوي کسان له نشه‌يي موادو سره د مبارزې عدلي او قضايي مرکز ته معرفي شوي دي.