په کابل ښار کې ۹ تنه د نشه‌يي موادو د قاچاق پر مهال ونيول شول.

له دې نهو تنو څخه اوو تنو يې نيت درلود چې نهه نيم کيلوګرامه هيروئين په سفري بکس او خېټو کې د حامد کرزي نړيوال هوايي ډګر له لارې هند ته قاچاق کړي.

دا قاچاق کوونکي له نشه‌يي موادو سره د مبارزې د حساسو تحقيقاتو کارکوونکو نيولي دي.

د کابل امنیه قوماندانۍ وياند فردوس فرامرز ازادي راډيو ته وويل: "په يوه بل اقدام کې د کابل ښار په نهمه ناحیه کې له نشه‌يي موادو سره د مبارزې ځانګړو پولیسو څلور نيم کيلوګرامه هيروئين ونيول او دغه ډول‌يې د نشه‌يي موادو دوه پلورونکي هم نيولي دي."

د سرپُل ولايت پولیسو په يوه کور کې تر ۲۰۰ کيلوګرامه ډېر نشه‌يي مواد ونيول.

د سرپل ولایت له نشه‌يي موادو سره د مبارزې ځانګړو پولیسو د استوګنې پر يوه کور عمليات وکړل چې په نتیجه کې يې ۱۵۳ کیلوګرامه هيروئين او ۶۹ کيلوګرامه ښیښه ونیول شول.

د کورنيو چارو وزارت وياند طارق ارين ازادي راډيو ته وويل، د دې موادو د قاچاق او ساتنې په تور پنځه نفره نيول شوي او عدلي او قضايي ادارو ته سپارل شوي دي.

په نيمروز ولایت کې تر ۲۸۰ کيلوګرامه ډېر ترياک ونيول شول.

د نيمروز ولایت له نشه‌يي موادو سره ځانګړو پوليسو د ثور مياشتې پر ۱۴مه نېټه په زرنج ښار کې عمليات وکړل چې په نتيجه کې يې ۲۸۶ کيلوګرامه ترياک د پولیسو لاس ته ورغلل.

له نشه‌يي موادو سره د مبارزې پولیسو مدير پروېز سيستاني ازادي راډيو ته وويل: "په پام کې وه چې دا ترياک يوه ګاونډي هېواد ته قاچاق کړل شي."

د يادونې وړ ده چې د دې موادو د قاچاق او ساتنې په تور څوک نه‌دي نيول شوي.

په ارزګان ولایت کې د کوکنارو اړولو عمليات پيل شول.

له نشه‌يي موادو سره د مبارزې معينیت د رسنیو دفتر ازادي راډيو ته وويل، له نشه‌يي موادو سره د مبارزې پولیسو د ثور میاشتې پر ۱۵مه نېټه په دې ولایت کې د کوکنارو اړولو عمليات پيل کړل چې د دې کمپاين په لومړۍ ورځ‌يې د ارزګان ولايت په مرکز ترينکوټ (ده يک) سيمه کې ۵۰ جريبه ځمکه د کوکنارو له بوټو څخه پاکه کړه.

د يادونې وړ ده چې د دې ولايت په ډېری سيمو کې کوکنار نېښ وهلو ته برابر او په ځينو ولسوالیو کې خو بېخي نېښ وهل پيل شوي دي.

د ملګرو ملتونو سازمان وايي، تېر کال په افغانستان کې د کوکنارو کرکېله ۳۷ فیصده زیاته شوې ده.

دا خبره د یاد سازمان له مخدره موادو او جرمونو سره د مبارزې ادارې'یو.اېن.او.ډي.سي' په یوه تازه راپور کې کړې چې پرون د مې درېیمه خپور شوی.

په راپور کې راغلي په دې سربېره چې ۲۰۲۰ میلادي کال د وړم کال په نسبت د کوکنارو کرکېله ۳۷ فیصده زیاته شوې شااوخوا ۶۳۰۰ ټنه تاریاک هم تولید شوي.

په افغانستان کې چې ۲۰۲۰ کال لر او بر جګړې روانې وې او هم کرونا ویروس خلک زیانمن کړي و له ۳۴ ولایتونو په ۲۲ هغو کې د کوکنارو د کرکېلو راپور ورکړل شوی دی.

د ملګرو ملتونو په دې راپور کې راغلي، د افغانستان له اویا فیصدو ډېر تاریاک په هلمند کې چې ګڼې سیمې د وسله والو طالبانو تر کنټرول لاندې دي تولید شوي.

په خوست ولایت کې څلور نيم جريبه ځمکه د کوکنارو له بوټو څخه پاکه شوه.

د خوست ولايت پولیسو د دې ولايت په تڼيو ولسوالۍ کې درې عملیاتونه وکړل چې په نتيجه کې يې څلور نیم جريبه ځمکه د کوکنارو له کښته پاکه شوه.

د خوست د امنيه قوماندانۍ په خبرپاڼه کې راغلي چې تر دې عملياتو مخکې له محلي خلکو سره خبرې شوي دي او دوی په پام کې لري چې د خوست ولايت په نورو ولسوالیو کې هم د کوکنارو کښتونه واړوي.

په بلخ او کندز ولايتونو کې تر ۶۰۰ بوتلو ډېر شراب د قاچاقو پرمهال ونيول شول.

په لومړي ګام کې ۱۵۰ بوتله شراب چې له حيرتان بندره په يوه موټر کې بار شوي او په پام کې وه چې سمنګان ولايت ته قاچاق کړل شي، د حيرتان بندر په دوراهي سيمه کې ونيول شول.

د کورنيو چارو وزارت له نشه يي موادو سره د مبارزې معينيت د رسنيو دفتر ازادي راډيو ته وويل چې په دوهم اقدام کې له نشه يي موادو سره د مبارزې ځانګړو پولیسو د ملي امنيت ریاست د کار کوونکو په همکارۍ په کندز ښار کې يو تن له۵۱۰ بوتله شرابو سره ونيو.

د دې دوو قضيو په تړاو دوه تنه هم نيول شوي دي.

پولیسو په ننګرهار ولايت کې تر سلو کيلو ګرامو ډېر نشه يي مواد ونيول.

په ننګرهار ولايت له نشه يي موادو سره د مبارزې ځانګړو پوليسو د موټرو د تلاشۍ پرمهال په خوګياڼو، شېرزادو او مومنددرې ولسواليو کې ۸۲ کيلوګرامه چرس او ۴۰ کيلو ګرامه ترياک ونيول.

د کورنيو چارو وزارت ویاند طارق ارين ازادي راډيو ته وويل، دوهم عمليات چې په جلال اباد ښار کې وشول، په نتيجه کې يې ۱۶نيم کيلو ګرامه چرس، څه اندازه ښیښه او کېمياوي مواد هم ونيول شول.

د نشه يي موادو د دې څلورو قضیو په تړاو اته تنه هم نيول شوي دي.

د عدلي او قضايي مرکز محکمو د نشه يي موادو ۳۰ قاچاق کوونکي په مجازاتو محکوم کړل.

له نشه يي موادو سره د مبارزې عدلي او قضايي مرکز ابتدائيه او استېناف محکمو ۳۰ قاچاق کوونکي چې د امنيتي ادارو له خوا د نشه يي موادو د قاچاقو د ۲۶ قضيو په تړاو نيول شوي وو، له درېيو څخه نيولی بیا تر اوو کالو پورې په بند باندې محکوم کړل.

د دې مرکز وياند خالد مؤحد ازادي راډيو ته وويل، له محکوم شوېو قاچاق کوونکو سره ۱۷۳کيلوګرامه هيروئين، ۱۵۳ کيلوګرامه تارياک، ۷۵ کيلوګرامه ښیښه، تر اوو کيلو ګرامو ډېر چرس او تر پنځو زرو ليټرو ډېر شراب نيول شوي دي.

د افغانستان په هوايي ډګرونو کې د نشه‌يي موادو اووه قاچاق کوونکي ونيول شول.

له نشه‌يي موادو سره د مبارزې معينيت کارکوونکو د بلخ ولايت په جلال‌الدین محمد بلخي هوايي ډګر کې پنځه تنه په داسې حال کې ونيول چې تر دوو کيلوګرامو ډېر هيروئين‌يې په خپلو خېټو کې پټ کړي او غوښتل‌يې چې هند ته‌يې قاچاق کړي.

د کورنيو چارو وزارت وياند طارق ارين ازادي راډيو ته وويل: "په دوهم اقدام کې تر دوو کيلوګرامو ډېر هيروئين د حامد کرزي په نړيوال هوايي ډګر کې په داسې حال کې ونيول شول چې هند ته قاچاق کېدل."