د شل اووریز کرکټ په یوه جالبه لوبه کې انګلستان د خپل تاریخ تر ټولو زیاتې ۳۰۴ منډې جوړې کړې.

د انګلستان ټیم دا منډې د جنوبي افریقا په وړاندې وکړې. په وړاندې یې د جنوبي افریقا ټول ټیم په ۱۵۸ منډو اوټ شو.

د انګلستان پياوړي پيلیز لوبغاړي فیل سلټ په ۶۰ توپونو ۱۴۱ منډې جوړې کړې چې پکې ۸ شپږیزې او ۱۵ څلوریزې شاملې دي.

ورسره د جاس بټلر ۸۳ چټکې منډې هم د یادولو دي چې یواځې ۳۰ باله یې وکارول او ۷ شپږیزې او ۸ څلوریزې یې هم ووهلې.

په اسیا جام کې بیا پاکستان خپل سیال عمان د ۹۳ منډو په توپیر مات کړ.

پاکستان ۱۶۰ منډې کړې وې او په وړاندې یې د عمان ټول ټیم په ۶۷ منډو اوټ شو.

د اسراییل پوځ له غزې ښارڅخه د پاتې اوسیدونکو د وتلو لپاره یوه بله لاره پرانیزي.

پوځ وویل چې دغه نوې لاره به د چهارشنبې له غرمې څخه د سپتمبر تر ۱۹مې، د جمعې تر غرمې پورې پرانیستې وي.

دغه اقدام په غزې ښار کې د اسراییلو د پوځ د عملیاتو په دویمه ورځ هغه مهال وشو چې په زرګونو کسانو چې د کورونو وسایل یې راټول کړي و، هڅه کوله چې د الرشید له ساحلي لارې له غزې ښارڅخه ووځي.

د اسراییلي رسنیو د راپورونو له مخې، د اسراییلو پوځ اټکل کوي چې د غزې ښارد شاوخوا یوملیون نفوس ۳۷۰،۰۰۰ تنو یې د سې شنبې تر ورځې پورې خپل کورونه پریښي او د جنوبي المواسي سیمې پر لور کډه شوي دي.

اسراییلو د غزې اوسیدونکو ته خبرداری ورکړی چې له سیمې ووځي.

اسراییل ادعا کوي چې په غزې ښارکې د حماس نژدې درې زره وسله وال پټ شوي او هغوی له ولسي خلکوڅخه د ډال په توګه کاراخلي. حماس د اروپایي ټولنې او د امریکا د متحدو ایالتونو له لوري د یوه تروریستي سازمان په توګه پیژندل شوی.

د اسراییل د غه خبرداري غبرګونونه هم راپارولي دي.

د اروپایي ټولنې د بهرنۍ پالیسۍ مشرې کایا کالاس ویلي چې دغه عملیات به په سیمه کې وضعیت له دې هم خراب کړي.

د ملګروملتونو سرمنشي انتونیو ګوتیریش پرون سې شنبې د غزې وضعیت وحشتناک وباله او ویې ویل چې لیواله دی چې راتلونکې اونۍ د اسراییل له صدراعظم بنیامین نتنیاهو سره وګوري او په دې اړه به ورسره خبرې وکړي.

د ایران حکومت یو تن د "اسرائیل لپاره د جاسوسۍ" په تور اعدام کړ.

د ایران دولتي رسنیو نن راپور ورکړ چې بابک شهبازي، له یوه بل کس، اسماعیل فکري سره یوځای، چې په جون کې اعدام شو، د ۲۰۲۲ کال له پیل راهیسې د موساد (د اسرائیل استخباراتي ادارې) لپاره جاسوسي کوله.

سږ کال د اسراییلو لپاره د جاسوسۍ په تور د خلکو اعدامونه د پام وړ زیات شوي دي.

یوازې په تیرو څو میاشتو کې، ایران لږترلږه نهه کسان د اسراییلو لپاره د جاسوسۍ په تور اعدام کړي دي.

شهبازي یو قراردادي و چې په ځینو دولتي ودانیو کې یې د یخولو سیسټمونه نصبول.

هغه له امنیتي او نظامي مرکزونو څخه د حساسو معلوماتو د راټولولو لپاره د خپل موقف په کارولو تورن شوی و.

د شهبازي وکیل له سترې محکمې څخه غوښتنه کړې وه چې د پخوانۍ محکمې پرپریکړې بیاکتنه وکړي، خو سترې محکمې د هغه د استیناف غوښتنه رد کړه.

تمه ده چې بریتانیا ته د امریکا د ولسمشر ډونالډ ټرمپ د سفر پرمهال د دواړو هیوادو ترمنځ د ټکنالوژي او اټومي انرژي په برخو کې د میلیارډونو ډالرو په ارزښت موافقې لاسلیک شي.

ټاکل شوې ده چې نن د بریتانیا پاچا چارلس دریم او ملکه کمیلا د امریکا د متحد ایالتونو د ولسمشر او د هغه د میرمنې میلانیا ټرمپ تشریفاتي هرکلی وکړي او ولسمشر ټرمپ به سبا د بریتانیا له صدراعظم کایر سټارمر سره خبرې وکړي.

دا بریتانیا ته د ولسمشر ټرمپ د ولسمشرۍ د دوهمې دورې دوهم رسمي سفر دی.

د ملګرو ملتونو سرمنشي منشي انتونیو ګوتیریش د راتلونکي کال لپاره د ملګرو ملتونو په عادي بودیجه کې د پنځلس په سلو کې د کمیدو وړاندیز کړی دی، چې تر مخکنۍ بودیجې پنځه سوه میلیونه ډالر کمه ده.

فرانس پریس اژانس څرګندوي چې دا خبر د سې شنبې په ورځ په هغو لیکونو کې په ډاګه شو چې د سرمنشي له لورې غړیو هیوادونو او د ملګرو ملتو مامورینو ته استول شوې دي.

د ملګرو ملتونو یوه لوړ پوړي چارواکي وویل چې دا نوې بودیجه درې اعشاریه دوه سوه اته دیرش میلیارډه ډالر ده چې له امله به یې د ملګرو ملتو نژدې دوه زره اووه سوه دندې له منځه ولاړې شي. د ملګرو ملتو دې چارواکي دا هم ویلي دي چې د بودیجې له کمیدو سره به د یوشمیر نورو برخو ترڅنګ د ملګرو ملتو د بشري حقونو هڅې اغیزمنې شي.

مخکې د ملګرو ملتو سرمنشي ویلي و چې د دوه زره شپږ ویشتم کال بودیجه به د روان میلادي کال د بودیجې په څیر وساتي، خو اوس د فرانس پریس اژانس د یوه راپور له مخې چې د بودیجې د کمیدو یو علت هم د امریکا د ولسمشر ډونالډ ټرمپ تګلارې دي چې په ځینو مواردو کې یې د ملګرو ملتونو بودیجه کمه کړې ده.

د سوله ساتو له بودیجې پرته واشنګتن په تیرو کلونو کې د ملګرو ملتو دوه ویشت په سلو کې بودیجه تامینوله.

تمه ده چې د اروپايي اتحادیې کمیشنران سبا په غزه کې د جګړې له امله په اسراییل نوي بندیزونه ولګوي.

د اروپايي کمیسیون ویاندې پاولا پنهو نن خبریالانو ته وویل چې کمیشنران به سبا د اسراییل پر وړاندې د اقداماتو یوه بسته تصویب کړي.

هغې زیاته کړه چې د اقداماتو یوه برخه به د اسراییل او اروپايي اتحادیې ترمنځ د سوداګرۍ په تړونونو کې شامل مالي امتیازات تنظیم کړي.

اسراییل تیره شپه له درنو هوایی بریدونو وروسته د غزې ښار په ډیرو برخو کې ځمکني عملیات پیل کړل.

د اسراییل د پوځ یوه ویاند د سې شنبې په ورځ وویل چې ځواکونو یې په غزه ښار کې د حماس په اصلي اډه کې خپل پلي عملیات پراخ کړې دي.

متحده ایالات او اروپايي اتحادیه حماس یوه ترهګره ډله ګڼي.

په غزه کې د اسراییلو د عملیاتو پراختیا له نړیوالو غبرګونونو سره مخ شوې ده.

د ملګرو ملتونو د بشري حقونو کمیشنر ولکر ترک د اسراییلو دا اقدام "د نه منلو وړ" وباله.

هغه AFP او رویټرز ته وویل چې "وینه تویونه باید ودرول شي."

د امریکا ولسمشر ډونالډ ټرمپ د دوشنبې د فلوریډا په فدرالي محکمه کې عریضه کړې چې نیویارک ټایمز او د هغې څلور خبریالان باید ده ته پنځلس میلیارډه ډالر ورکړي.

په دې عریضه کې د دوه زره څلرویشتم کال تر انتخاباتو مخکې خپرو شویو مقالو او یوه کتاب ته اشاره شوې ده چې د ټرمپ د بدنامۍ او سپکاوي لپاره مطالب پکې خپاره شوې دي.

ولسمشر ټرمپ په خپله خواله رسنۍ « تروت سوشل» کې نیویارک ټایمز په درواغو تورنه کړې ده.

اسوشیتد پریس اژانس راپور وکړی دی چې نیویارک ټایمز تر اوسه په دې اړه څه نه دې ویلي.

ټرمپ تر دې مخکې هم د یوشمیر نورو رسنیو لکه وال ستریت ژورنال پرضد دعوه کړې وه.

فرانس پریس اژانس د اسراییل د یوه پوځي چارواکي په وینا خبر ورکړ چې اسراییلي پلیو ځواکونو تیره شپه پر غزه ښار عملیات پيل کړې دي.

د دغه اسراییلي چارواکي په وینا چې نوم یې نه دی اخیستل شوی، فرانس پریس اژانس راپور ورکړ چې د اسراییل پوځ د غزې تړانګې د دغه تر ټولو ستر ښار د مرکز په لور د پرمختګ په حال کې دی.

اسراییل وایي چې د غزې ښار ترمځکې لاندې د حماس اصلي مرکز دی.

حماس امریکا او اروپایي ټولنه د یوې ترهګرې ډلې په توګه پيژني.

د امریکا د بهرنیو چارو وزیر نن دوحې ته ولاړ. مارکو روبیو قطر ته تر تګ مخکې له دغه هیواده وغوښتل چې د غزې په مساله کې د منځګړیتوب هڅو ته دوام ورکړي.

روبیو د تل ابیب د بن ګوریون له هوايي ډګر څخه دوحې ته د الوتنې پر مهال خبریالانو ته وویل، موږ به له قطر څخه وغواړو چې خپلو هڅو ته دوام ورکړي او پریکړه د دوی په لاس کې ده چې د تیرې اونۍ تر برید وروسته غواړي چې داسې څه وکړي که نه.

د امریکا د بهرنیو چارو وزیر زیاته کړه، قطر د نړۍ هغه هیواد دی چې همدا صلاحیت لري چې روغې جوړې ته لاره هواره کړي.

روبیو یوه ورځ وروسته تر دې قطر ته ورسید چې په پلازمینه دوحه کې د عربي-اسلامي هیوادونو په سرمشریزه کې پر دوحه د اسراییل برید وغندل شو.

په قطر کې د اسراییل د تیرې اونۍ د برید په ترڅ کې د حماس ډلې پنځه غړي ووژل شول.

د امریکا د بهرنیو چارو وزیر مارکو روبیو وایي، واشنګټن به پر ایران " حد اکثر فشار" ته دوام ورکړي.

روبیو پرون دوشنبه په بیت المقدس کې د اسراییل له صدر اعظم بنیامین نتنیاهو سره په ګډه خبري غونډه کې وویل، د دی فشار هدف دادی چې ایران اټومي وسلو ته لاسرسی پیدا نه کړي.

روبیو د سخت دریځي روحاني مشر تر واک لاندې اټومي ایران اسراییل، امریکا او ټولې نړۍ ته یو ګواښ بللی دی.

امریکا په تیره جون میاشت کې د ایران پر اټومي تاسیساتو بریدونه وکړل چې د چاروکو په خبره دروند زیان یې ورته واړوه.

د امریکا د بهرنیو چارو وزیر مارکو روبیو د اسراییل له سفر وروسته قطر ته سفر کوي.

د امریکا بهرنیو چارو وزارت پرون دوشنبه دغه اعلان وروسته تر هغه وکړ چې روبیو بیت المقدس کې د اسراییل له صدر اعظم بنیامین نتنیاهو سره وکتل.

روبیو داسې مهال د منځني ختیځ په سفر وتلی چې پر دوحې د اسراییل د تیرې اونۍ له برید وروسته سیمه کې نانندرۍ زیاتې شوې دي.

لویدیځو اژانسونو لیکلي، امریکا هڅه کوي چې د خپل دوو متحدانو، اسراییل او قطر ترمنځ ټوکیدلې نانندرۍ حل کړي.
د قطر صدر اعظم شیخ محمد بن عبدالرحمن آل ثاني وړمه ورځ غوښتنه وکړه چې اسراییل ته باید پر دوحې د برید له کبله سزا ورکړل شي.

د قطر صدر اعظم دغه برید چې د سپتمبر په ۹مه د حماس سخت دریځې ډلې ۵ غړي په کې ووژل شول، پر منځګړي حمله بللې ده.

د امریکا متحده ایالتونه او اروپایي ټولنه حماس ترهګره ډله بولي.