د امریکا پوځ ویلي دي چې د دوی هوایي بریدونو په یمن کې د تیلو یو مهم بندر چې د حوثي یاغیانو په واک کې و، ویجاړ کړی دی.

د ازادې اروپا / ازادي راډیو د خبر د مرکزي څانګې د راپور له مخې، حوثیانو ویلي چې د امریکا په هوايي بریدونو کې ۲۰ کسان وژل شوي او ۵۰ نور ټپیان شوي دي.

د امریکا د پوځ مرکزي قوماندانۍ، سینټکام، ویلي دي چې امریکایي ځواکونو د راس عیسی بندر په نښه کړ ترڅو د ایران ملاتړیو حوثي یاغیانو لپاره د تیلو اکمالات بند کړي او دوی له عاید څخه محروم کړي.

سینټکام په یوه بیان کې وویل، د دې بریدونو هدف د حوثیانو د ځواک اقتصادي سرچینې کمزورې کول وو.

په خبرپاڼه کې زیاته شوې ده چې د دې برید هدف د یمن خلکو ته زیان رسول نه وو، هغو غواړي چې د حوثیانو له واکمنۍ خلاص شي او په سوله کې ژوند وکړي.

د امریکا د متحد ایالتونو ولسمشر ډونالډ ټرمپ د مارچ په ۱۵مه د حوثیانو پر ضد کمپاین پیل کړ.

د دې کمپاین په تعقیب، د حوثیانو پر وړاندې د امریکا هوايي بریدونه زیات شوي دي ترڅو په سره سمندر او د عدن په خلیج کې پر ملکي او پوځي کښتیو د حوثیانو بریدونه پای ته ورسوي.

د افغانستان د خبریالانو مرکز په تخار ولایت کې د دریو سیمه ایزو خبریالانو د نیول کېدو خبر ورکوي.

د خبریالانو دې مدافع ټولنې په یوه بیان کې چې نن خپور شو ویلي دي چې د آریانا نیوز خبریال نصرت الله ابراهیمي او آزاد خبریالان منیر هدف او اسدالله تیمور په تالقان ښار کې د طالبانو د سیمه ایزو چارواکو له خوا نیول شوي دي.

د بیان له مخې تیمور او منیر د دوشنبې په شپه او ابراهیمي د سه شنبې په ورځ نیول شوي دي. طالبانو تراوسه په دې اړه څه نه دي ویلي.

د افغانستان د خبریالانو مرکز د دې خبریالانو پر نیول کېدو اندېښنه ښودلې او پر واکمنو طالبانو یې غږ کړی چې دا خبریالان سمدستي او له قید او شرط پرته خوشې کړي.

د افغانستان لپاره د ملګروملتونو د سرمنشي ځانګړې استازې روزا اوتونبایووا د مې په دریمه، د رسنیو د آزادۍ د نړیوالې ورځې په مناسبت په یوه بیان کې د طالبانو له خوا د بیان پر آزادۍ محدودیتونه د اندېښنې وړ وبلل.

مېرمن اوتونبایووا وویل، د طالبانو محدودیتونه د دې سبب شوي چې د رسنیو مسلکي کسان له ګواښونونو، بندي کېدو او ناوړه چلند سره مخامخ شي.

په داسې حال کې چې روسیې پر نازي جرمني د بریا د کلیزې په مناسبت اوربند اعلان کړی، د اوکراین په ډېری ښارونو کې نن کراري وه.

د تېرې شپې له درنو بمباریو وروسته نن سهار ډېری سیمې چې پخوا به د ورځنیو جګړو راپورونه ترې خپرېدل آرام وو.

خو په عین حال کې د اوکراین هوايي ځواک ویلي چې د روسیې جنګي الوتکو نن سهار د اوربند د نافذیدو په لومړیو ساعتونو کې د اوکراین په شمال ختیځه سومي سیمه کې دوه ځلې هدایت کېدونکي بمونه وغورځول.

همداراز په ختیځه دونېڅک سیمه کې پوځي سرچینو ویلي چې روسي ځواکونو سهار مهال د بې پیلوټه الوتکو او بمونو حملې وکړې.

د روسیې ولسمشر ولادیمیر پوتین تېره ورځ له اوکراین سره په جګړه کې د ۷۲ ساعتونو په مخه اوربند اعلان کړ. دا اوربند په دوهمه نړیواله جګړه کې د نازي جرمني پروړاندې د بریا له اتیایمې کلیزې سره چې په روسیه کې د درې ورځني جشن په ترڅ کې لمانځل کېږي سره برابر دی.

ښاغلي پوتین نن د چین له ولسمشر شي جین پېنګ سره چې په دې مراسمو کې د ګډون لپاره د څو نورو هېوادونو له مشرانو سره مسکو ته رسېدلی دی، په کریملین کې وکتل.

د فرانسې ولسمشر ایمانویل مکرون د سوریې د انتقالي دولت له مشر احمد شرع څخه د خپل هېواد ملاتړ ته چمتووالی ښودلی دی.

ښاغلي مکرون فرانسې ته د شرع د سفر پرمهال په خپلو څرګندونو کې همداراز ټینګار وکړ چې د پاریس ملاتړ په سوریه کې د یوه سوله ایز او ټولګډونه سیاسي بهیر په پیل پورې تړلی دی.

مکرون وویل، د سوریې موقت دولت باید قومیت، مذهب او د سیاسي نظریو توپیر ته له پام پرته د سوریې د ټولو خلکو ملاتړ تضمین کړي. هغه زیاته کړه چې که شرع د اصلاحاتو پر لور ګامونو ته دوام ورکړي اروپايي ټولنه کولای شي پر سوریې د لګېدلو تحریمونو د راکمولو بهیر پیل کړي.

په سوریه کې په تېرو څو اونیو کې د تاوتریخوالي پېښې وشوې او د دروز اقلیت وسله وال له سني ملېشو سره ونښتل.

د سوریې انتقالي دولت په مارچ میاشت کې د پرځېدلي ولسمشر بشاراسد رژیم ته د وفادارو وسله والو د حملو په ځواب کې پوځي عملیات وکړل چې په ترڅ کې یې له دواړو خواوو ګڼ کسان ووژل شول.

احمدشرع دا نښتې خواشینوونکې وبللې خو ویې ویل، د ده دولت له هغو کسانو سره حساب کتاب ته ژمن دی چې د سوریې له خلکو سره یې بېعدالتي کړې ده.

شرع چې د هیات تحریر شام د اسلامپالې ډلې مشر دی، په تېره لیندۍ میاشت کې د اسد د رژیم له نسکورېدو وروسته واک ته ورسېد. نوموړی اروپا ته د خپل سفر په لومړي ګام کې پرون فرانسې ته ورسېد. شرع له دې مخکې سعودي عربستان او ترکیې ته هم سفرونه کړي وو.

په داسې حال کې چې د هند او پاکستان ترمنځ کړکېچ پرځای پاتې دی، دواړو هېوادونو نن- د مې ۸مه یوبل د بې پیلوټه الوتکو په حملو تورن کړل او دواړو د دې حملو د شنډولو ادعاوې وکړې.

د پاکستان د پوځ ویاند ډګرجنرال احمد شریف وویل چې د هند په حملو کې په سند کې یو ملکي وګړی وژل شوی او په لاهور کې څلور پوځیان ټپیان شوي دي.

د پاکستان د پوځ د رسنیو څانګې همداراز وویل چې د هند ۲۵ بې پیلوټه د هوايي مدافعې د ځواکونو له خوا ویشتل شوي دي.

په عین حال کې د هند د دفاع وزارت ویلي دي چې د پاکستان د بې پیلوټه الوتکو او توغندیو له حملو وروسته یې تېره شپه په څو سیمو کې د پاکستان د هوايي مدافعې ځواکونه په نښه کړي دي خو د هند پوځ نه دي ویلي چې آیا دا حملې یې د بې پیلوټه الوتکو په وسیله کړي.

د هند او پاکستان ترمنځ دا تاوتریخوالی وروسته له هغه پیل شو چې وسله والو د کشمیر په پهلګام سیمه کې پر سیلانیانو برید وکړ او ۲۶ کسان یې ووژل. په ځواب کې یې د هند پوځ د چارشنبې ورځې په سهار د پاکستان تر ولکې لاندې کشمیر او پنجاب کې نهه سیمې په نښه کړې.

د ایران د بهرنیوچارو وزیر عباس عراقچي هغه تورونه رد کړي دي چې ګنې هېواد یې په لندن کې د اسراییلو پر سفارت د برید په پلان کې لاس لري.

له دې مخکې د برتانیا پولیسو ویلي و، چې اوه ایراني وګړي یې د تروریستي حملو د ترسره کولو په تور شک نیولي دي.

ښاغلي عراقچي نن پر خپله ایکس پاڼه ولیکل چې له ډیپلوماتیکو سرچینو څخه یې هېڅ ډول رسمي اطلاعات نه دي ترلاسه کړي.

د برتانیا د کورنیو چارو وزیرې ایویټ کوپر ویلي دي چې تورن کسان د ایران د فعالیتونو په اړه له اندېښنو وروسته ونیول شول.

ټایمز ورځپاڼې راپور ورکړی چې دا نیونې په لندن کې د ایران پر سفارت د برید د طرحې له افشا کېدو وروسته شوې دي، خو چارواکو په رسمي ډول تراوسه په دې اړه څه نه دي ویلي.

د پاکستان پر قلمرو د هند له حملې یوه ورځ وروسته نوې ډېلي ګواښ کړی چې د پاکستان هرراز انتقامي اقدام ته به په خورا ډېر قاطعیت ځواب وايي.

د هند د بهرنیوچارو وزیر اس جېشنکر نن په نوې ډېلي کې له خپل ایراني سیال سره د لیدنې پرمهال وویل چې پر پاکستان د دې هېواد حمله دقیقه او سنجول شوې وه خو ده زیاته کړه چې که پاکستان ځوابي برید وکړي نو په دې کې به هېڅ شک نه وي چې په ډېر- ډېر قاطعیت سره به ځواب ورکړل شي.

په داسې حال کې چې په کشمیر کې په ګډ سرحد کې له څو ورځو راهیسې پیل شوې نښتې اوس په توپچي ډزو بدلې شوي، د پاکستان صدراعظم شهبازشریف ژمنه کړې ده چې د هند برید ته به په انتقامي اقدام سره ځواب ووايي.

د هند له حملې وروسته له پرونۍ ورځې راهیسې تراوسه پورې له دواړو خواوو د ماشومانو په ګډون د لږترلږه ۴۵ کسانو د وژل کېدو خبرونه رارسېدلې دي.

هند وروسته له هغه د پاکستان پر خاوره برید وکړ چې د اپریل په ۲۲مه نېټه د کشمیر په پهلګام سیمه کې یوې وسله والې ډلې پر سیلانیانو ډزې وکړې. د هند په حملو کې چې په نهو موقعیتونو کې وشوې، ۲۶ کسان ووژل شول. هند پر پاکستان تور ولګاوه چې د دې ډلې ملاتړ کوي خو پاکستان دا تور رد کړی دی.

له بلې خوا د پاکستان پوځ وايي چې هند د پاکستان خاورې ته یرغلیزې بې پیلوټه الوتکې لېږلې دي. د پاکستان پوځ پر هند د پاکستان له حملې یوه ورځ وروسته په یوه بیان کې وویل چې د یوه هندي ډرون په برید کې څلور پاکستاني سرتېري ټپیان شوي دي.

د جرمني نوی حکومت وايي چې ډېری غیرقانوني پناه غوښتونکو ته به اجازه ورنه کړي چې له سرحدونو څخه دې هېواد ته ننوځي. دا په داسې حال کې ده چې نوی صدراعظم فریدریښ میرڅ هڅه کوي دې هېواد ته د پناه غوښتونکو د بې نظمه ننوتلو او ورسره د افراطي ښي اړخو د نفوذ د زیاتېدو مخه ونیسي.

د کډوالو پرمخ د سرحدونو بندول د ښاغلي میرڅ د پالیسۍ مهمه برخه ده ځکه دی غواړي چې د جرمني لپاره د بدیل AfD په نوم د کډوالو مخالف سیال ګوند، پراخ نفوذ ترلاسه نه کړي. دې ګوند د فبروري په انتخاباتو کې دوهم ځای وګاټه او محبوبیت یې په نظرپوښتنو کې په زیاتېدو دی.

جرمني په ۲۰۱۵ کال کې د کډوالو د بحران په اوج کې شاوخوا یو میلیون کډوال ومنل چې ډېری د سوریې او افغانستان وګړي وو.

د روغتیا نړیوال سازمان WHO وايي چې په افغانستان کې د شري یا سرخکان د ناروغۍ پېښې په زیاتېدو دي.

دې سازمان پر خپله ایکس پاڼه په یوه بیان کې واکسین د شري د مخنیوي لپاره یوازینۍ لاره بللې ده او له خلکو یې غوښتي دي چې د دې ناروغۍ پر وړاندې خپل ماشومان واکسین کړي.

په تېره اپریل میاشت کې WHO په یوه راپور کې وویل چې په افغانستان کې د شري ناروغۍ پېښې څه باندې ۴۲ سلنه ډېرې شوي دي. د دې راپور له مخې تر اپریل میاشتې پورې د دې ناروغۍ له کبله د مړینو شمېر ۱۹۳ ته رسېدلی دی.

په غزني ولایت کې د طالبانو سیمه ایز چارواکي وايي چې د یوې کورنۍ درې غړي په اوبو کې د ډوبېدو په پېښه کې مړه شوي دي.

د کورنیو رسنیو د راپورونو له مخې د غزني امنیه قوماندانۍ ویلي دي چې لومړی یو ماشوم د لوبو پرمهال اوبو ته وغورځېد او وروسته یې مور او پلار د هغه د ژغورنې لپاره ځان اوبو ته واچاوه خو درې واړه مړه شول.

دا پېښه نن (د غويي ۱۸مه) د غزني په اجرستان ولسوالۍ کې شوې ده.

تېرکال راپور ورکړل شوی و، چې له پنځوسو ډېر کسان چې ډېری ځوانان وو، د هېواد په بېلابېلو ولایتونو کې په اوبو کې د ډوبېدو په پېښو کې مړه شوي دي.

بې احتیاطي، له لامبو سره نابلدي او د ډوبو شویو کسانو د ژغورنې د امکاناتو نشتوالی د دې خونړیو پېښو مهم عوامل بلل کېږي.

د پاکستان ملکي هوایي چلند ادارې وویل چې د اسلام اباد او لاهور هوایي ډګرونه یې نن بیرته پرانیستل.

پاکستان تر دې مخکې ویلي وو چې د هند د ډرون الوتکو پرضد د عملیاتو لپاره یې د اسلام اباد، لاهور او کراچۍ هوایي ډګرونه بند کړې دي، خو د کراچی هوایي ډګر چې د پاکستان تر ټولو ستر هوایي ډګر دی لاهم بند دی.

هندوستان د سه شنبې او چارشنبې ترمنځ د شپې پر مهال په پاکستان او د پاکستان تر واک لاندې کشمېر کې پر څو سیمو بریدونه وکړل.

هند وايي د بریدونو هدف یې هغه ترهګر وو چې د هند تر واک لاندې د کشمېر په پهلګام سیمه کې یې پر سیلانیانو برید پلان کړی و. د اپریل په دوه ویشتمه په دې برید کې 26 تنه سیلانیان وژل شوي و.

پاکستان په دې ترهګریز برید کې هر ډول دخالت رد کړی و.