په کندهار کې د زړه ناروغۍ په زیاتیدو دي

د ناروغانو کیسې: د زړه حملې علتونه او اغېزې

محمد، چې وايي د کورنۍ غمونو د زړه ناروغ کړی
۷۰ کلن محمد، چې دا یې دوهم ځل دی چې د زړه حمله پرې راځي، وايي د کورنۍ غمونو او رواني فشارونو د ده روغتیا اغېزمنه کړې. دی زیاتوي، چې درې لمسیانې یې د کور د چت نړیدو له امله مړه شوي، چې دا غم یې د زړه ناروغۍ سبب شوی.

محمد وايي: "پر لمسیانو مې د خونې چت راچپه شو، درې واړه شهیدانې شوې. درېیمه ورځ وه چې د زړه حمله راباندې راغله، په ځان نه پوهېدم، په ځولۍ کې یې راوړی وم. اوس یواځې نفس تنګي لرم، نور ښه یم."

عبدالشکور، چې د اقتصادي ستونزو له امله د زړه حمله پرې راغلې
۵۸ کلن عبدالشکور یو بل ناروغ دی، چې د زړه د حملې وروسته روغتون ته راوړل شوی. دی وايي، د اقتصادي ستونزو او رواني فشارونو له امله یې تل چورتونه وهل، چې بالاخره د زړه حمله پرې راغله.

عبدالشکور وايي: "چورت او فکر ډېر وهم، غریبي ده څه وکړم. فکر کوم له همدې امله دا ناروغي راباندې راغله. په ځان نه پوهېدم، یوازې دومره وپوهیدم چې دلته یې راوستلم."

د زړه ناروغۍ د زیاتوالي لاملونه

د میرویس حوزوي روغتون د داخله ناروغیو د څانګې مشر ډاکټر عزت الله نېکزاد وايي، د تېرو کلونو په پرتله د زړه ناروغان ډېر شوي، چې ځینې یې د همدې ناروغۍ له امله خپل ژوند له لاسه ورکړی.

ډاکټر نېکزاد زیاتوي: "د بده مرغه باید ووایم چې د زړه ناروغۍ ورځ تر بلې ډېریږي. یوازې تېره میاشت مو ۴۶ ناروغان بستر کړي، خو زموږ OPD ته په زرګونو نورو د زړه ناروغانو مراجعه کړې ده."

روغتیاپالان د زړه ناروغیو د اصلي لاملونو په اړه وايي:

• رواني فشارونه او خپګان
• د نشه يي توکو استعمال
• د وینې لوړ فشار (بلډ پریشر)
• د شکري ناروغي
• د غوښو او مالګې زیات استعمال
• چاغښت او غیر فعاله ژوند
• د ورزش نه کول او تل ناست ژوند

د زړه ناروغیو مخنیوي لپاره سپارښتنې

روغتیاپالان وايي، د زړه او رګونو د ناروغیو د مخنیوي لپاره د روغتیايي سپارښتنو مراعات کول تر ټولو مهم دي.

دوی سپارښتنه کوي:

• منظم فزیکي فعالیتونه ترسره کړئ
• صحي خوراک ته پام وکړئ
• د غوښې او مالګې استعمال کم کړئ
• د نشه يي توکو څخه ډډه وکړئ
• رواني فشارونه کنټرول کړئ

پایله:
په کندهار کې د زړه ناروغۍ د زیاتوالي عمده لاملونه اقتصادي ستونزې، رواني فشارونه، ناسمه تغذیه او غیر فعال ژوند بلل کېږي. روغتیاپالان ټینګار کوي، چې د دې ناروغۍ د مخنیوي لپاره باید خلک خپل ژوند ته ځانګړی پام وکړي، متوازن خوراک وکړي، او د ذهني فشارونو د کمولو لپاره مناسبې لارې ولټوي.