خبرونه
ایراني پولیسو د سیستان او بلوچستان په زابل کې کابو ۳۰۰ افغان کډوال نیولي

د ایران د سیستان او بلوچستان ولایت د زابل ولسوالي د پولیسو قوماندان وايي چې په وروستیو څو ورځو کې یې په دې ولسوالي کې نژدې ۳۰۰ بې اسناده کډوال نیولي دي.
حمید نوري پرون (د دوشنبې په ورځ، د دلوې میاشتې لومړۍ نېټه) د ایران دولتي خبري اژانس، ایرنا ته وویل چې دا کسان د ټولنیز امنیت د پیاوړتیا د طرحې د تطبیق په لړ کې نیول شوي دي.
دغه ایراني چارواکي د نیول شویو کسانو هویت نه دی په ډاګه کړی، خو په دې هېواد کې د افغان پناه غوښتونکو د پېژندلو، نیولو او شړلو لړۍ په شدت سره روانه ده.
تر دې وړاندې د سیستان او بلوچستان ولایت چارواکو په زاهدان او شاوخوا سیمو کې د شاوخوا ۴۰۰ غیرقانوني کډوالو د نیولو خبر ورکړی و.
ایراني چارواکو ویلي چې په روان لمریز کال کې ټولټال دوه نیم میلیونه افغان کډوال له خپلې خاورې باسي.
د ورځې تازه خبرونه دلته ولولئ
متقي؛ له افغان کډوالو سره د پاکستاني پولیسو ناسم چلند د دواړو هېوادونو اړیکې زیانمنوي

د طالبانو د حکومت د بهرنیو چارو سرپرست وزیر امیرخان متقي په کابل د پاکستان د سفارت له سرپرست سفیر عبیدالرحمن نظاماني سره کتلي او د افغان کډوالو پر ستونزو يې خبرې کړي دي.
د بهرنیو چارو وزارت د عامه اړیکو رییس ضیا احمد تکل نن دوشنبې د (اپریل۱۴مه) پر ایکس پاڼې لیکلي، " متقي په دې کتنه کې له پاکستانه د افغان کډوالو د جبري ایستلو او له کډوالو سره د پاکستاني پولیسو پر نامناسب چلند خپله خواشیني له نظاماني سره شریکه کړې ده".
وړاندې د متقي په حواله راغلي، له افغان کډوالو سره د پاکستاني چارواکو دا ډول چلند د دواړو هېوادونو اړیکې زیانمنوالی شي.
د طالبانو د حکومت د بهرنیو چارو وزارت د نظاماني له قوله ویلي، "د پاکستان حکومت د افغان کډوالو په اړه د طالبانو انديښنې مني او له اړونده چارواکو سره يې دا موضوع شریکه کړې ده".
پاکستان د اپریل میاشتې له پیله په زرهاوو افغان کډوال په جبري ډول افغانستان ته ستانه کړي دي.
دا کډوال وايي، پاکستاني پولیس ورسره ناسم چلند کوي او د جبري اخراج سربیره اړ شوي خپل ټول مال او پانګې په پاکستان کې پریږدي او خالي لاس افغانستان ته ستانه شي.
د مزارشریف په دویمه حوزه کې چادونه شوې ده

د مرکز مزارشریف په دویمه حوزه کې چادونه شوې ده.
د افغانستان د کورنیو رسنیو د راپورونو له مخې دا چادونه نن سهار د مزارشریف "سه دکان" جومات نژدې رامنځته شوي ده.
دغو رسنیو د عیني شاهدانو په حواله ویلي، " چادونه د ځای پرځای شویو انفجاري مواد" له کبله شوې چې یوه ښځه په کې وژل شوې او درې کسان په کې ټپیان شوي دي.
تراوسه د طالبانو حکومت د دې چادونه په اړه څه ویلي نه دي.
د افغان ښځینه کریکټرانو د ملاتړ لپاره ځانګړی کاري ځواک او د ملاتړ صندق رامنځته کیږي

د کریکټ نړیواله شورا ( آی.سي.سي) وایي، د افغانستان د ښځینه کریکټ لوبډلې د ملاتړ په هدف، چې د طالبانو له راتګه وروسته جلاوطنه شوې، یو " ځانګړی کاري ځواک" رامنځته کوي.
کریک انفو ویبپاڼې د کریکټ نړیوالې شورا د خبرپاڼې له مخې چې پرون یکشنبه خپره شوې لیکلي چې دغه نوښت په هند کې د کریکټ د کنټرول د پلاوي، د اروپا مرکزي بانک او د استرالیا د کریکټ ادارې په همکارۍ ترسره کیږي.
له دې سره د ښځینه کریکټ لوبغاړو د مالي ملاتړ لپاره یو ځانګړی صندق رامنځته کیږي چې ډاډ ترلاسه شي افغان کریکټرانې د لوبو د دوام لپاره د اړتیا وړ پیسې لري.
وړاندې راغلي چې افغان ښځینه کریکټ لوبډلې ته به تکړه او تجربه کاره روزونکي ګمارل کیږي چې دغه لوبډله وتوانیږي د لا غوړېدا فرصتونه پیدا کړي.
په ۱۴۰۰ هجري لمریز کال کې د طالبانو له بیا واکمنۍ وروسته په نورو برخو کې پر محدودیت لګولو ښځې له ورزشي سیالیو منع شوې او ورزشي کلپونه یې په مخ وتړل شول.
له دې سره د افغانستان د کریکټ اکثره لوبغاړې له هېواده جلاوطنه او ګڼ شمېر یې استرالیا ته ولاړې.
د افغانستان لپاره د اروپايي ټولنې د ځانګړي استازي توماس نیکلاسن ماموریت پای ته رسیدلی

د افغانستان لپاره د اروپایي ټولنې ځانګړي استازي توماس نیکلاسن د خپل ماموریت د پای ته رسېدو اعلان کړی دی.
نیکلاسن پرون یکشنبه ( د حمل ۲۴مه) پر خپله ایکس پاڼه/ پخواني ټویټر ولیکل چې په افغانستان کې یې خپل مسولیتونه د تېرې مارچ میاشتې له لومړۍ نیټې پای ته رسیدلي دي.
هغه لیکلي، د ماموریت پای یې، د افغانستان په وړاندې د اروپایي ټولنې د سیاست د بدلون په معنا نه دی.
نیکلاسن زیاته کړې " اروپایي ټولنه به په افغانستان کې خلکو ته د ژمنو او د دغې ټولنې د ګټو او ارزښتونو د ساتنې په هدف خپل حضور ته دوام ورکړي."
د هغه په خبره، دا مهال د افغانستان لپاره د اروپایي ټولنې د ځانګړې استازولۍ مسولیت د افغانستان او پاکستان لپاره د دغې ټولنې یوه ډيپلوماته درین دریا مخته وړي.
نیکلاسن ۲۰۲۱ کال کې د افغانستان لپاره خپل ماموریت پیل کړ چې د ماموریت له پیل دوه میاشتې وروسته یې طالبان پر افغانستان واکمن شول.
پاکستان ایران کې د خپلو ۸ اتباعو د وژنې عاملانو ته د سزا غوښتنه وکړه

د پاکستان د صدر اعظم شهباز شریف دفتر په ایران کې د اتو پاکستاني کارګرو وژنه غندلې او له تهرانه یې غوښتي چې د پيښې عاملین پیدا او سزا ورکړي.
د شریف دفتر پرون یکشنبه ( د حمل ۲۴مه) په دې اړه اعلامیه خپره کړې ده.
د ازادۍ راډیو ایراني څانګې، راډیو فردا لیکلي چې یوشمېر وسله وال د شنبې په ورځ د سیستان بلوچستان ولایت د مهرستان ښار یوې فابریکې ته ننوتلي او پر پاکستاني کارګرو یې، چې په خوب کې وو، ډزې کړي دي.
د ایران د بهرنیو چارو وزارت هم د یکشنبې په ورځ دغه پیښه " ترهګریزه" وبلله او وې ویل د عاملانو د نیولو لپاره به یې لازم اقدامات وکړي.
رادیو فردا لیکلي چې د پیښې مسولیت " د بلوڅانو د ازادي غوښتونکي پوځ" په نوم بیلتون پالې پاکستاني ډلې او دغه راز جیش العدل ډلې منلی دی.
د "بلوڅانو د ازادي غوښتونکي پوځ" د متحده ایالتونو، اروپایي ټولنې، بریتانیا او د پاکستان د مرکزي حکومت له خوا د ترهګریزې ډلې په توګه پيژندل کیږي.
ایران دوه افغانان اعدام کړي، جرم یې د نشه یي توکو قاچاق ښودل شوی

د "هنګاو" په نوم د ایران د بشري حقونو یوه ډله وایي چې دغه هېواد کې پر دوو افغانانو د اعدام حکم عملي شوی دی.
دغه سازمان پرون یکشنبه ( د حمل ۲۴مه) پر خپله ویبپاڼه یوه راپور کې لیکلي چې د ربیع شامراد او وسیم احمد په نوم دغه کسان د شنبې په ورځ د قزوین په مرکزي زندان کې اعدام شول.
راپور کې راغلي چې ۲۷ کلن ربیع شامراد او ۴۰ کلن وسیم احمد د کندز ولایت اوسیدونکي دي او درې کاله وړاندې د نشه یي توکو د قاچاق په تور ونیول شول.
د هنګاو په راپور کې راغلي چې دغه دوه کسان خوریی او ماما دي.
د ایران د بشري حقونو سازمان تېره میاشت یوه راپور کې وویل چې تېر ۲۰۲۴ کال کې لږ تر لږه ۸۰ افغانان په ایران کې اعدام شوي دي.
د بشري حقونو سازمانونو او ملاتړي د دغو اعدامونو له کبله پر ایران نیوکه کوي او وایي چې د تورنو کسانو دوسیو ته په عادلانه ډول رسیدګي نه کیږي او اکثره تورن مدافع وکیل ته لاسرسی نه لري.
د څلورو کسانو د اعدام په تړاو د بشري حقونو د مدافع سازمانونو کلکو نیوکو د طالبانو غبرګون پارولی

د طالبانو مشر ملا هبت الله اخندزاده د اعدام پر عملي کېدو ټینګار کړی.
د طالبانو سترې محکمې هم د اعدام په اړه نیوکې عجیبې او غیر منصفانه بللې.
د طالبانو حکومت د اپریل په باغیس، نیمروز او فراه کې ۴ کسان په عام محضر کې اعدام کړل.
د ملګرو ملتونو بشري حقونو شورا اعدام له انساني کرامت سره ټکر بللی.
ریچارډ بنېټ هم دا اعدامونه غندلي او له طالبانو یې غوښتي چې اعدامونه او نورې بدني سزاوې سمدستي بندې کړي.
د امریکا ولسمشر ډونالډ ټرمپ د ازادو مبارزو د لوبو ځانګړی مېلمه وو

د یو اف سي په نوم د ازادو مبارزو تر ټولو معتبره سازمان بېګا د امریکا په میامي ښار کې د اتلولۍ په څو کمربندونو لوبې برابرې کړې وې.
ډونالډ ټرمپ چې د یو اف سي له مشر ډانا وایټ سره کلک ملګری دی دغو لوبو ته ورغلی وو او ګڼو خلکو یې هرکلی وکړ.
په بیګانیو لوبو کې اسټرالیايي لوبغاړي الکساندر ولکنوفسکي خپل سیال ډیګو لوپیز مات کړ او اتلولۍ ته ورسېد.
انګریز پدي پمبلټ هم بل مشهوره لوبغاړی مایکل چندلر ناک اوټ کړ او اتل شو.
په بله مهمه لوبه کې هم د نیمه درانه وزن مشهوره لوبغاړي دومینیک ریس نیکیتا کریلوو ناک اوټ کړ.
اسراییلي ځواکونو نن تر لمر خاته مخکې په غزه ښار کې پر الاهلي روغتون برید کړی

د غزې روغتیا وزارت ویلي ګڼ ناروغان وایستل شول خو یو د ودانۍ د تخلیې پر مهال مړ شو.
د اسراییلو دفاع وزیر په غزه تړانګه کې د عملیاتو د پراخولو خبرداری ورکړی.
اسراییلي پوځ ادعا کړې چې د عملیاتو د پراخولو هدف د حماس ختمول او د ټولو یرغملو خلاصون دی.
حماس چې د امریکا او اروپا له خوا ترهګر ګڼل کېږي په عین حال کې د اوربند هوکړه د پرمختګ په حال کې بللې.
اسراییل غزه کې د عملیاتو د پراخوالي خبرداری ورکړی، له خلکو یې د تخلیې غوښتنه کړې

د اسراییل د دفاع وزیر اسراییل کتز په غزه کې د خپلو پوځي عملیاتو د پراختیا خبرداری ورکړی دی.
کتز په یوه خبرپاڼه کې دغه خبرداری پرون شنبه وروسته له هغه ورکړ چې غزه کې يې پر یوه امنیتي دهلیز ولکه ټینګه کړه.
د فرانس پریس په وینا په دغې خبرپاڼه کې د غزې د خان یونس او شاوخوا سیمو له لسګونه زره اوسیدونکو غوښتل شوي چې خپلې مېنې تخلیه کړي.
د اسراییل د دفاع وزیر یوځل بیا د فلسطیني ډلې حماس د له منځه وړلو او د هغوی له منګولو د ټولو اسراییلي برمته شویو د خلاصون غوښتنه کړې ده.
اسراییل دغه خبرداری داسې وخت ورکوي چې حماس وسله والې ډلې، چې امریکا او اوروپایي ټولنه یې ترهګر بولي، ویلي چې دوی د اوربند په هوکړه کې پرمختګ کړی دی.