د فرانسپرس خبري اژانس د راپور له مخې د کردانو نیمه خپلواکې ادارې شنبه په یوه اعلامیه کې ویلي چې ترکیې یو وار بیا په تشرین بندر کې د خلکو غونډه هدف ګرځولې او په دغه برید سره څلور ملکیان وژل شوي او ۱۵ نور ټپیان دي.

په لندن کې د سوریې د بشري حقونو څارونکې ډلې ویلي هم د ترکیې د بې پيلوټه الوتکې په یوه برید کې د لږ تر لږه دریو ملکیانو د وژل کېدو خبر ورکړی.

خو ترکیه بیا د کردستان د کارګرانو د ممنوعه ګوند پي. کا . کا اړوند د خلق مدافعینو ځواکونه تورنوي چې له څلورو لسیزو راهیسې د ترکیې د حکومت پر ضد وسله وال فعالیتونه کوي.

ترکیې له ۲۰۱۶ کال راهیسې د کردانو په مشرۍ د سوریې د ډموکراټیکو ځواکونو اس. ډي . اف پر ضد څو عملیاتونه ترسره کړي دي.

پر زاکاري یانګ تور وو چې امریکا ته یې د افغانانو د انتقال په قضیو کې لسګونه زره ډالره اخیستي او له «سرګردانه» افغانانو یې ډېرې پیسې په جیب وهلي.

د راپورونو له مخې یانګ چې د یوې امنیتي کمپنۍ مشر دی د طالبانو له بیا واکمنېدو وروسته یې له ګڼو افغانانو سره امریکا ته د تلو په برخه کې مرسته کړې.

هغه پر سي ان ان په دې خاطر د حیثیت د اعادې دعوا کړې وه او دا شبکه یې «سو» کړې وه چې د ده کار ته یې د تور بازار نوم یاد کړی وو.

په فلوریدا ایالت کې یوه منصفه پلاوي وړمه ورځ سي ان ان په دې قضیه کې پړ وباله.

سي ان ان که څه هم د زاکاري یانګ د نوم بدولو تور رد کړی خو د ۲۰۲۲ کال په مارچ کې یې د زاکاري یانګ کار ته د «تور بازار» د جملې د کارولو په اړه پښیماني وښوده.

اسلام ۲۶ لوبې ګټلي یوه یې بایللې. سیال یې ۲۵ ګټلي او ۵ یې بایللي.

د اسلام او ریناتو لوبه د یو اف سي د ۳۱۱ دورې لوبو مرکزي سیالي ده.

تمه ده په بله مهمه لوبه کې عمر نورمحمدوف د میراب دوالشویلي په وړاندې لوبه وکړي. دمګړۍ د اتلولۍ کمربند له میراب سره دی.

عمر اتلس لوبې ګټلي او هېڅ ماته یې نه ده خوړلې حال دا چې سیال یې ۱۸ ګټلي او ۴ یې بایللي.

تمه کېږي چې د رزمي لوبو پخوانی بې ماتې اتل حبیب نورمحمدوف د اسلام او عمر په سیالیو کې حضور ولري او د هغوی لارښوونه وکړي.

د یو اف سي دا دور سیالۍ د کالیفورنیا په انګل ووډ کې ترسره کېږي چې په صالون کې به شاوخوا اتلس زره نندارچیان ولري او په نړۍ کې به یې لکونه کسان په ټلویزیونو وګوري.

د اوکراین د پلازمېنې کییف د میټرو پر یوه تمځای نن سهار بالستیک توغندی ولګېد، لږ تر لږه ۴ کسان یې ووژل او ۳ نور یې ټپیان کړل. دا خبر د کییف د پوځي ادارې مشر تیمور تکاچینکو رسنیو ته ورکړی دی.

له بلې خوا د کییف ښاروال ویتالي کلیچکو پر خپله ټلګرام پاڼه لیکلي چې د کییف په یوه ناحیه کې یوې ودانۍ چې څوک نه پکې اوسېدل اور اخیستی دی.

په زاپوریژیا ښار کې هم پر یوه بنسټ د روسیې له خوا د توپ ډزې شوي او لږ تر لږه ۸ کسان یې ټپیان کړي دي. په پېښه کې دولتي ودانۍ او شخصي موټرونه زیانمن شوي دي.

روسیې له کله چې د ۲۰۲۲م کال په فبروري میاشت کې پر اوکراین بشپړ یرغل پیل کړ، په سیسټماتیک ډول د اوکراین ملکي او د انرژۍ تاسیسات په نښه کړې دي.

په تهران کې نن د سترې محکمې دوه قاضیان په ډزو وژل شوي او بل تن ژوبل شوی دی.

د ایران د قضا ویبسایټ میزان نن راپور ورکړچې برید کوونکي د سترې محکمې مخې ته، پر دې دوو قاضیانو له ډزو وروسته خپل ځان هم وژلی دی.

د ایران قضائیه قوې ویلي چې وژل شوي قاضیان محمد مقیسه او علي رازیني نومېدل. د ایران رسنیو راپور ورکړی، چې د یوه قاضي یو ساتونکی هم ټپي شوی دی.

د دې حملې انګېزه معلومه نه ده. د اپوزیسیون ویبسایټونو مخکې راپور ورکړی و، چې مقیسه د هغو کسانو په محاکمه کې دخیل و، چې سیاسي بندیان ګڼل شوي دي

د اسراییل د صدراعظم بنیامین نتنیاهو ایتلافي حکومت له فلسطینۍ حماس ډلې سره د اوربند او یرغملو د خلاصون موافقه چې امنیتي کابینې یې مخکې ملاتړکړی و، تایید کړه.

د نتنیاهو دفتر نن د جنوري اتلسمه سهاروختي اعلان وکړ چې له څوساعته بحثونو وروسته، د اسراییل حکومت له حماس سره د موافقې په تایید رایه ورکړه. د یوشمیرتندلارو ښي اړخو وزیرانو له مخالفتونو سره سره د دې پریکړې تمه کیده.

د اسراییل د بشپړې کابینې غونډې چې پرون جمعه ناوخته له ټاکلي وخت څخه په ځنډ سره پیل شوه، تر نن ورخې چې د یهودانو د عبادت ورځ ده ترسهاروختي پورې دوام وکړ. د حکومت د دې پریکړې مخالفان کولای شي د عدالت عالي محکمې ته شکایت وکړي خو لیرې بریښي چې محکمه دې په دې قضیه کې مداخله وکړي.

د اسراییل او حماس ترمنځ د شوې موافقې له مخې په غزه کې اوربند د یکشنبې په ورځ په سیمه ییز وخت د غرمې په ۱۲ بجو او پنځلس دقیقو نافذیږي.

وروسته له دې چې د امریکا سترې محکمې پرون د جنوري په ۱۷مه ماښام مهال د ویډیوګانو شریکولو د مشهور اپ ټیکټاک درخواست رد کړ، دغه اپلکېشن د امریکا په متحدو ایالتونو کې د یکشنبې له ورځې څخه بندېږي.

ټیکټاک غوښتل د هغې لایحې مخه ونیسي چې پر اساس یې دا چینايي شرکت باید په مریکا کې د خپل فعالیت برخه پر واشنګټن وپلوري کنه په امریکا کې به بندېږي. قاضیانو د ټیکټاک هغه استدلال، چې ګواکې دغه لایحه په اساسي قانون کې د بیان د ازادۍ له لیدلوري سرغړونه کوي، رد کړ.

ټیکټاک چې په متحدو ایالتونو کې یې د ګډونوالو شمېر ۱۷۰ میلیونو ته رسېږي، سر له سبا د جنوري ۱۹مه د اپلکېشنونو له اپ سټورونو څخه لیرې کېږي. دا په داسې حال کې ده چې ټاکل شوې د دوشنبې په ورځ د جنوري په ۲۰مه ډونالډټرمپ د امریکا د نوي ولسمشر په توګه لوړه وکړي.

دا لا معلومه نه ده، چې د ټرمپ د ولسمشرۍ پر مهال به د ټیکټاک په وړاندې څه ډول اقدامات کېږي. د کانګرس غړي اندېښنه لري، چې د چین حکومت ښايي له ټیکټاک څخه په استفادې سره د کاروونکو شخصي اطلاعات د سیاسي نفوذ لپاره وکاروي، خو ټیکټاک شرکت دا تور رد کړی دی.

د ملګرو ملتونو د بشري حقونو کمشنر ولکر تورک په سوډان کې روانه شخړه د ملکیانو لپاره ډېره خونړۍ او وژونکې وبلله.

ښاغلي تورک پرون په جنیوا کې وویل، چې لسګونه ملکیان په جنوب ختیځ ایالت الجزیره کې په قومي-هدفي حملو کې وژل شوي دي. هغه زیاته کړه چې د جنګي جنایتونو او نورو وحشیانه جرمونو شواهد شته او دا وضعیت لا خطرناکه کېږي.

د سوډان د پوځ چې مشري یې عبدالفتاح البرهان کوي او د چټک ملاتړ ځواکونو په نوم د ملېشه وو ترمنځ چې مشري یې محمد حمدان دقلو کوي، په وروستیو اوونیو کې جګړه د پام وړ سخته شوې ده.

پوځ په وروستیو کې په الجزیره ایالت کې د «ود مدني» ښار په بیا نیولو سره یو لړ بریاوې ترلاسه کړې. راپورونه وايي چې پر پلازمېنه خرطوم د ولکې ټینګولو لپاره د دواړو لوریو ترمنځ جګړه سخته شوې ده.

د ملګرو ملتونو د بشري حقونو کمشنر وویل چې په الجزیره ایالت کې یوازې د دوو حملو په نتیجه کې د لږ تر لږه ۲۱ کسانو وژنه مستنده شوې ده. د هغه په وینا پر ملکیانو ښايي د حملو او د وژل شویو ملکیانو واقعي شمېر زیات وي.

د جرمني دفاع وزیر بوریس پیسټوریس وایي، جرمني به د پوځ د عصري کولو لپاره د ځانګړی وجهي صندوق ترپای ته رسیدو وروسته د پام وړزیاتې دفاعي بودجې ته اړتیا ولري.

د جرمني خبري آژانس د راپورله مخې نوموړي پرون (د جنوري ۱۷مه) زود دویچه سایټونګ ورځپاڼې ته وویل چې له ۲۰۲۸ کال وروسته به، چې ځانګړی صندوق پای ته رسیږي، د دې هېواد د پوځي لګښتونو لپاره لږترلږه ۸۵ مییلیارډ یورو ته اړتیا وي. دا د اوسنیو لګښتونو پرتله ۳۰ مییلیارډه یورو زیاتوالی ښيي.

د جرمني د سل میلیارډ یورو ځانګړی فنډ په ۲۰۲۲ کال کې پر اوکراین د روسیې د یرغل په پایله کې د جرمني د پوځ د رغونې لپاره جوړشو. په ۲۰۲۴ کال کې د جرمني دفاعي لګښت ۵۲ میلیارډ یورو اټکل شوی و، چې له ځانګړې فنډ سره یوځای د دې هیواد د ناخالص کورني تولید شاوخوا دوه سلنه جوړوي.

ښاغلي پیسټوریس یادونه وکړه چې جرمني باید د دفاعي لګښتونو د درې سلنه هدف ترلاسه کړي. هغه زیاته کړه چې له دې سره به دفاعي بودیجه څه باندې ۱۲۰ میلیارډ یورو ته ورسیږي چې دا هیواد اوس ډیر ترې لیرې دی.