د جنوبي افریقا د کرکټ ملي لوبډلې د پاکستان په ماتولو سره د ټیسټ اتلولیو پایلوبې ته ورسېده.
د سویلي افریقا او پاکستان ترمنځ د دوو ټیسټ سیالیو په پیل شوې لوبلړۍ کې نن یکشنبه د ډسمبر په ۲۹مه نېټه کوربه سویلي افریقا په لومړۍ ټيسټ لوبه کې د ۲ وېکټو په توپیر پاکستان ته ماتې ورکړه.
دغه سیالي چې د ډسمبر په ۲۴مه نېټه د سویلي افریقا په سینچرین ښار کې پیل شوې وه، نن پای ته ورسېده.
په دې ټيسټ سیالۍ کې پاکستان لومړۍ توپوهنه کړې وه چې په لومړۍ پاڼۍ کې یې ۲۱۱ منډې کړې وې، سویلي افریقا یې بیا په ځواب کې ۳۰۱ منډې وکړې.
د پاکستان توپوهونکو په دویمې پاڼۍ کې۲۳۷ منډې وکړې او د ۱۴۸ منډو هدف یې وټاکه. د لوبې په څلورمه ورځ د سویلي افریقا توپوهونکو که څه هم ښه پیل نه درلود او په ۹۶ منډو یې ۸ لوبغاړي له لاسه ورکړي وو، خو رباډا او یانسین وکړای شول چې ورکړل شوی هدف پوره کړي او د ټیسټ اتلولیو پایلوبې ته خپله لوبډله ورسوي.
د ټیسټ اتلولیو د پایلوبې بله لوبډله لا نه ده معلومه شوې، خو اسټرالیا د پایلوبې مخکښ کاندید دی.
د ویلو ده چې د ټيسټ چمپین شیپ پایلوبه به د ۲۰۲۵ ز کال د جون په ۱۱مه نېټه د انګلستان په لارډز لوبغالي کې ترسره شي.