د امریکا د ولسمشر مرستیالې کامالا هریس په ولسمشریزو ټاکنو کې د ډونالډ ټرمپ په وړاندې خپله ماتې ومنله.

نوموړې خپل سیال منتخب ولسمشر ډونالډ ټرمپ ته پرون د ټیلفونې مکالمې له لارې او په واشنګټن کې د خپلو پلویانو یوې غونډې ته په وینا کې دا څرګندونې کړي.

هغې ویلي: "د ټاکنو پایله هغسې نه‌دي لکه مونږ چې غوښته، نه هغسې چې مونږ ورته مبارزه وکړه."

خو په وینا یې له امریکایانو سره د کړیو ژمنو څراغ به یې تل بل وي.

مېرمن هریس ټرمپ ته په ټیلفوني خبرو کې هغه ته مبارکي ورکړې او سپینې ماڼۍ ته د هغه او د هغه د ټیم په بېرته ورتګ کې یې د مرستې وړاندیز ورته کړی دی.

ټاکل شوې ډونالډ ټرمپ چې د نومبر د پنځمې نېټې په ټاکنو کې د منتخب ولسمشر په توګه وټاکل شو، د ۲۰۲۵ کال د جنورۍ په شلمه نېټه لوړه وکړي او د ۴۷م ولسمشر په توګه خپله دنده پيل کړي.

د ایران د بهرنیو چارو وزیر عباس عراقچي نن یکشنبه (د غویي ۱۹مه) د عمان پلازمینې مسقط ته سفر وکړ ترڅو د ایران او امریکا ترمنځ د اټومي خبرو اترو په څلورم پړاو کې ګډون وکړي.

د ایران د بهرنیو چارو وزارت ویاند اسماعیل بقايي وویل ، چې خبرې به د یکشنبې په ورځ په ځايي وخت د غرمې په ۱۲ بجو پیل شي.

د منځني ختیځ لپاره د امریکا استازی او د امریکا لوړ پوړی مذاکره کوونکی استیف ویټکاف په یوه مرکه کې وویل، چې د واشنګټن دریځ د ایران د « د یورانیموغني کولو » بشپړ درول دي. د هغه په وینا، ایران باید خپل اټومي پروګرام، چې پکې د نطنز، فردو او اصفهان کلیدي تاسیسات شامل دي، له منځه یوسي.

ښاغلي ویټکاف زیاته کړه، که د یکشنبې ورځې بحثونه مثبتې پایلې ونه لري، نو دوی باید بدیل لارې ولټوي.

هغه خبرداری ورکړ چې په عمان کې د پرمختګ نشتوالی کولی شي د خبرو اترو اوسنی بهیر پای ته ورسوي.

د ایران د بهرنیو چارو وزیر انسو د خپل هیواد د یورانیمو غني کولو څخه د لاس اخیستلو او د ایران د اټومي پروګرام د له منځه وړلو امکان رد کړ.

عباس عراقچي عمان ته له سفر وروسته وویل چې که د واشنګټن هدف دا وي چې ډاډ ترلاسه شي چې تهران اټومي وسلې ترلاسه کوي نه ، نو له متحده ایالاتو سره به یوه موافقه وشي.

د اوکراین ولسمشر ولودیمیر زلنسکي وايي، د روسیې له ولسمشر ولادیمیر پوتین سره د اوربند په خاطر د لیدو لپاره چمتو دی.

زلنسکي زیاته کړې چې د جګړې پای ته رسولو په خاطر د مستقیمو خبرو اترو لپاره د مسکو غوښتنه "مثبته" بولي.

زلنسکي د می په ۱۱مه وویل چې دا "یوه مثبته نښه ده چې روسانو بالاخره د جګړې د پای ته رسولو په اړه غور پیل کړی دی او په وینا یې دې لور ته لومړی ګام اوربند و.

پوتین څو ساعته مخکې په مسکو کې په یوه مطبوعاتي کنفرانس کې د اروپایي مشرانو او اوکراین دا غوښتنه له پامه وغورځوله چې د اوکراین په جګړه کې دې ۳۰ ورځنی چټک اوربند وکړي او پرځای یې وړاندیز وکړ چې له کیېف سره"پرته له قید او شرطه" د سولې مستقیمې خبرې اترې غواړي چې احتمالاً د می په ۱۵مه به په استانبول کې وي.

د اوربند غوښتنې ته په مستقیم ډول پرته له غبرګونه، پوتین د سولې خبرو اترو د "بیا پیلولو" وړاندیز وکړ چې د ۲۰۲۲ کال په اپریل کې د روسیې او اوکراین تر منځ ترسره شوې وې. دا یو څو اوونۍ وروسته له هغه و چې روسیې په فبرورۍ میاشت کې پر خپل ګاونډي - اوکران -بشپړه یرغل وکړ.

د طالبانو د بهرنیو چارو سرپرست وزیر امیر خان متقي او د افغانستان لپاره د چین ځانګړي استازي یو شیاوینګ په کابل کې د سیاسي اړیکو او اقتصادي همکاریو د پراختیا په اړه خبرې کړې دي.

دا خبره د طالبانو د بهرنیو چارو وزارت د عامه اړیکو مشر حافظ ضیا احمد تکل د یکشنبې په ورځ (د مې په ۱۱مه) پر ایکس شبکه لیکلې ده.

د معلوماتو له مخې، طالب چارواکي وايي، چین د طالبانو د بهرنیو چارو سرپرست وزیر امیر خان متقي ته دې هیواد ته د ورتګ بلنه ورکړې ده.

چین یو له هغو څو هېوادونو دی چې له طالبانو سره نژدې اړیکې او تعاملات لري.

د۱۴۰۲ کال په سلواغه میاشت کې چین، بلال کریمي په پيکنګ کې د طالبانو د سفیر په توګه ومانه؛ خو د طالبانو حکومت تر اوسه هیڅ هیواد په رسمیت نه دی پیژندلی.

د ښځو او نجونو د حقونو په ګډون بشري حقونو ته درناوی او په افغانستان کې د یو ټول شموله حکومت رامنځته کول، نړیوالې ټولنې ته د طالبانو د حکومت په رسمیت پېژندلو لپاره اصلي شرایط ګڼل کیږي.

ټاکل شوې چې د ایران د اټومي پروګرام په اړه د تهران او واشنګټن ترمنځ د خبرو څلورم پړاو نن په عمان کې پیل شي.

د عمان په پلازمېنه مسقط کې په دې غیرمستقیمو خبرو کې به د ایران د بهرنیو چارو وزیر عباس عراقچي او د منځني ختیځ په چارو کې د ولسمشر ډونالډټرمپ ځانګړی استازی ستیف ویټکاف برخه واخلي.

که څه هم دواړو لور ویلي چې غواړي اختلافونه د ډيپلوماسۍ له لارې حل کړي، خو د مهمو غوښتنو په اړه د دوی اختلاف پرځای پاتې دی او مرکچیان باید یوه نوي اټومي توافق ته ورسېږي څو د پوځي اقداماتو مخه ونیسي.

د ایران د بهرنیوچارو وزیر په دې مذاکراتو کې د پرمختګ خبره کړې او ویلي یې دي چې ښکېل لوري په تدریجې ډول جزییاتو ته ننوځي.

دا په داسې حال کې ده چې ولسمشر ټرمپ ویلي، که د تهران د اټومي پروګرام په اړه ډیپلوماسي ناکامه شي نو پوځي اقدام به وکړي.

ټاکل شوې وه چې د خبرو دا پړاو د مې په دریمه پیل شي خو د لوژستیکي ستونزو له کبله تر نننۍ ورځې پورې وځنډېدلې.

د هند او پاکستان په اړیکو کې د کړکېچ له زیاتېدو وروسته د هند او پاکستان د کرکټ لیګونه وځنډېدل او بهرني لوبغاړي یې خپلو هېوادونو ته ستانه شول.

هند د جمعې په ورځ د یوې اونۍ لپاره د پریمیر لیګ لوبو یا IPL د ځنډولو اعلان وکړ خو د پاکستان سوپر لیګ نژدې ۲۴ ساعته وروسته له هغه وځنډول شو چې د پاکستان کرکټ بورډ وویل هڅه کوي د دې لیګ پاتې اته لوبې په ډوبی کې ترسره کړي.

د دواړو لیګونو ګډونوالو بهرنيو لوبغاړو لا مخکې له دواړو هېوادونو څخه وتل پیل کړي دي. د هند د کرکټ د کنټرول بورډ تراوسه د IPL د لوبو د بیاپیل نېټه نه ده اعلان کړې. په IPL کې د راشدخان په ګډون د افغانستان او نورو هېوادو ۶۵ لوبغاړي ګډون لري.

هندي رسنیو راپور ورکړی چې د IPL تنظیموونکو د لیګ د پاتې ۱۶ لوبو لپاره د هند درې جنوبي ښارونه، بنګلور، چینای او حیدر آباد په پام کې نیولي دي او د لوبو د بیاپیلولو طرح یې د تایید لپاره حکومت ته چمتو کړې ده.

د روسیې ولسمشر ولادیمیر پوتین د اوکراین په جګړه کې د یو میاشتني اوربند طرحې ته له پام پرته له اوکراین سره د مخامخ خبرو وړاندیز کړی.

ښاغلي پوتین نن سهار وختي په یوه خبري غونډه کې د وینا پرمهال غوښتنه وکړه چې د ۲۰۲۲ کال په اپریل کې د دواړو هېوادونو ترمنځ د سولې خبرې بیا پیل شي.

دا خبرې پر اوکراین د روسیې له یرغل څخه څو اونۍ وروسته پیل شوې وې.

پوتین وویل، موږ جدي خبرو ته ژمن یو. د خبرو هدف دا دی چې د دې کړکېچ اصلي جرړې له منځه ولاړې شي او تاریخي حقایقو ته په پام سره تلپاتې سوله رامنځ ته شي.

پوتین یادونه وکړه چې ډېرژر به د ترکیې له ولسمشر رجب طیب اردوغان سره خبرې وکړي څو په استانبول کې د خبرو منځګړتوب وکړي.

د طالبانو د حکومت د دفاع وزارت د پاکستان د پوځ هغه ادعا رد کړه چې ګنې د هند پوځ پر افغانستان توغندویي برید کړی دی.

د طالبانو پلوي رسنۍ حریت راډیو د دفاع وزارت د ویاند عنایت الله خوارزمي له قوله خبر ورکوي چې نوموړی وايي، د افغانستان پر خاوره د هند توغندیر برید په اړه ادعاوې حقیقت نه لري.

د پاکستان د پوځ ویاند جنرال احمدشریف نن ادعا وکړه چې هند پر دې هېواد د راکټي حملو په دوام د افغانستان پر لور هم څو توغندي ویشتلي دي خو هند هم دا اعا رد کړه. د هندي رسنیو د راپورونو له مخې په بهرنیوچارو کې د هند د دولت وزیر ویکرم مسري دا یوه بې مفهومه ادعا بللې، ویلي یې دي د افغانستان خلک ډېر ښه پوهېږي چې په تېر یوه نیم کال کې یې کوم هېواد پر وګړو او تاسیساتو حملې کړې دي. د هند پوځ هم دا ادعا رد کړې ده.

د آزادۍ راډیو مشال څانګې د خیبرپښتونخوا مرکز پېښور ښار ته نژدې د یوې چاودنې خبر ورکړ. د مشال خبریال ویلي چې نن سهار وختي شاوخوا درې بجې د یوې چاودنې په غږ له خوبه راویښ شو او ورپسې د ډزو غږونه واورېدل شول چې نژدې یو ساعت یې دوام وکړ.

د مشال راډیو خبر زیاتوي چې خلک د چاودنې د غږ په اورېدو له خپلو کورونو راووتل. هند او پاکستان په تېرو دریو ورځو کې پر یوبل حملې کړې دي.

د هند او پاکستان ترمنځ کړکېچ وروسته له هغه پیل شو چې د هندي کشمیر په پهلګام سیمه کې د وسله والو په برید کې ۲۶ تنه سیلانیان چې ډېری هندوان وو، ووژل شول. نوې ډيلي پر پاکستان تور لګولی چې د دې وسله والو ملاتړ کوي خو اسلام آباد دا تور رد کړی دی.

د ایران د بهرنیو چارو وزیر، عباس عراقچي په وینا د تهران او واشنګټن ترمنځ د خبرو څلورم پړاو به سبا (یکشنبې د غوايي ۲۱مه - مې ۱۱مه) په عمان کې ترسره شي.

رویټرز خبري آژانس هم د خپلو سرچینو له قوله راپور ورکړی چې تمه ده د ولسمشر ټرمپ د حکومت لپاره د منځني ختیځ ځانګړی استازی، سټیو ویټکاف، سبا، یکشنبې عمان ته ولاړ شي چې له ایران سره په خبرو کې ګډون وکړي.

د خبرو دا پړاو باید د غوايي/ ثور په ۱۳مه ترسره شوی وای، خو ایراني او عماني چارواکو هغه مهال ویلي وو چې دا خبرې د "تخنیکي او لوژستیکي" دلایلو له امله ځنډېدلي دي.

د ایراني رسنیو د جمعې د ورځې (غوايي ۱۹مه) د راپورونو له مخې، ښاغلي عراقچي د ایران او امریکا ترمنځ د دې "نامخامخ" خبرو د څلورم پړاو په اړه ویلي: «د عماني دوستانو له لوري د یکشنبې د ناستې پوښتنه وشوه، او موږ یې منلو ته چمتووالی وښود.»

نوموړي زیاته کړه: «عماني چارواکو له امریکایي لوري سره هم خبرې کړي، او تر دې دمه پرېکړه شوې چې خبرې به د یکشنبې په ورځ وشي.»

د ایران د بهرنیو چارو وزیر د خبرو لوری "مثبت او پرمخ روان" وباله او ویې ویل: «موږ ورو ورو د جزییاتو پړاو ته داخلېږو. موږ پر یوه اساسي طرحه مخ ته ځو، خو له مقابل لوري متضاد او ګډوډ پیغامونه اورو، او دې کار ستونزمن کړی دی."

عراقچي د دغو ضد و نقیض پیغامونو په اړه وضاحت ورنه کړ، خو داسي ښکاري چې د ده اشاره د ایران د اتومي پروګرام د راتلونکې په اړه د امریکايي چارواکو بېلابېلو څرګندونو ته وه.

د مایکروسافټ بنسټګر بیل ګېټس، غواړي په راتلونکو شلو کلونو کې خپله ۹۹ سلنه شتمني وبخښي.

د بلومبرګ شبکې پر اساس، بیل ګیټس د نړۍ پنځم لوی شتمن دی. که نوموړی خپله ۹۹ سلنه شتمني وبخښي، بیا به هم میلیاردر پاته شي.

هغه اراده لري چې خپله شتمني د خپل خیریه بنسټ له لارې ووېشي، څو دا بنسټ په ۲۰۴۵ کال کې خپل فعالیت پای ته ورسوي.

ګېټس د پنجشنبې په ورځ په یوه ویبلاګ کې ولیکل: «له مرګه وروسته به خلک ډېر څه ووایي، خو زه غواړم داسې څه وکړم چې هیڅوک و نه وايي، هغه شتمن ومړ.»

ښاغلي ګېټس ویلي چې د هغه بنسټ یا فونډېشن تر دې دمه شاوخوا سل میلیارد ډالره پر روغتیا او پراختیایي پروژو لګولي، او ښايي د بازار بدلونونو او انفلاسیون ته په پام، په راتلونکو دوو لسیزو کې لا هم دوه سوه میلیارد ډالر ولګوي.

ګېټس او پل الن په ۱۹۷۵ م کال کې مایکروسافټ شرکت جوړ کړ.

راتلونکې اوونۍ به د یوروویژن یا د اروپا د سندرو سیالي په سویس کې وشي.

سږکال دا د نړۍ تر ټولو رنګینه او مسته سندریزه سیالي خپله ۶۹مه کلیزه لمانځي – دا ځل دا سیالي په هغه هېواد کې کېږي چې په ۱۹۵۶ کې یې د دې سیالیو د لومړنۍ دورې کوربه‌توب کړی و.

تېر کال د یورو وېژن سیالۍ له ګڼو لانجو ډکې وې – د اسراییل د ګډون پر ضد پراخ اعتراضونه وشول او د هالنډ استازی (یوست کلاین) په ناڅاپي ډول له سیالیو وایستل شو – سږ کال هم داسې ښکاري چې له جنجال، ګډوډۍ او ناندریو خالي نه وي.

سلووینیا، هسپانیا، آیسلنډ او تازه ایرلنډ د اروپا له خپرنیزې اتحادیې (EBU) سره د اسراییل د بیا ګډون په اړه اندېښنه څرګنده کړې، او د غزې په تړاو یې د دې هېواد روانو پوځي عملیاتو او بندیز ته اشاره کړې. همداراز، د یورو ویژن ۷۲ پخوانیو ګډونوالو یو پرانیستې لیک لاسلیک کړی چې پکې یې په سیالۍ کې د اسراییل د نه ګډون غوښتنه کړې ده.