د ازادې اروپا/ازادي راډیو خبریال بیکا براډز د ګرجستان په پلازمېنه تبلیسي کې پارلمان ته څېرمه د تګ پر مهال د امنیتي ځواکونو له‌خوا وهل شوی او نیول شوی دی.

د هغه وکیل، جانو چیکادیوا ازادي راډیو ته وویل چې هغه د یکشنبې په ورځ سهار وختي د حکومت ضد یوې غونډې ته څېرمه د امنیتي ځواکونو له‌خوا ونیول شو.

د براډز وکیل ادعا کړې چې موکل یې وهل شوی دی.

دا ادعا تراوسه نه ده تایید شوې.

د چیکادیوا په وینا، تر معاینې وروسته، براډز توقیف خانې ته لېږدول شوی دی.

ګرجستان د اکټوبر په میاشت کې له پارلماني ټاکنو وروسته له ناامنیو سره مخ دی او تر څنګ یې تازه په اروپايي ټولنه کې د غړیتوب د خبرو د ځنډېدو په سبب پراخې مظاهرې شوي دي.

د دغه هېواد حکومت اعلان کړی چې د اروپايي اتحادیې د غړیتوب خبرې به د راتلونکو څلورو کلونو لپاره د هغه څه لپاره چې ګرجستان یې د اروپايي اتحادیې له‌خوا "باج اخیستل" یادوي وځڼدوي.

د ایران د حجاب او عفاف د نوي قانون تصویب ګڼ غبرګونونه پارولي دي.

دا قانون چې تمه کېږي د ایران جمهور رییس مسعود پزشکیان یې توشیح کړي د حجاب د نه رعایت لپاره پر ښځو له ۱۵ میلیونو تر ۱۶۵ میلیونو جریمې وضع کوي.

د راپورونو له مخې، هغه ښځې چې جریمه کېږي د جرمانې د نه ادا کولو په صورت کې له مالي، اداري او ټولنیزو خدمتونو بې برخې کېږي.

د دغه قانون هغې مادې هم ګڼ غبرګونونه پارولي چې بهرني اتباع هم کولای شي د حجاب په برخه کې ښځو ته سپارښتنې وکړي.

که څه هم په ایران کې امر باالمعروف منسوبین باید ایراني تابعیت ولري، خو د همدې قانون په تفسیر کې اشاره شوې چې د قانوني استوګنې بهرني اتباع له دې بنده مستثنی دي.

د ایران څه باندې نوي فیصده بهرني کډوال افغانان دي.

هلته د ملګرو ملتونو د کډوالو د کمېشنرۍ د راپور له مخې، څه باندې څلور میلیونه افغانان اوسېږي چې لږ تر لږه درې نیم لکه یې د ایران قانوني اقامې لري.

د هندوستان د کرکټ ادارې پخوانی سکرتر جي شاه د کرکټ نړیوالې شورا "آی‌سي‌‌سي" د نوي مشر په توګه ټاکل شوی دی.

د کرکټ نړیوالې شورا پر فېس‌بوک پاڼه په خپره شوې خبرپاڼه کې ویل شوي دي چې، ښاغلي جي شاه نن يک‌شنبه د (ډسمبر په لومړۍ) نېټه خپله دنده پيل کړه.

خبرپاڼه زیاتوي، جي شاه د پخواني عمومي ريیس ګرېګ بارکلې څلور کلنې هڅې وستایلې او زیاته یې کړه چې، د کرکټ نړیوالې شورا له غړیو هېوادونو سره به په ګډه د کرکټ د لا پراختیا لپاره هلې ځلې وکړي.

د ښاغلي شاه له قوله لیکل شوي دي چې، د نارینو د کرکټ پراختیا ترڅنګ د ښځو کرکټ ودې ته به لا ډېر کارونه ترسره کړي.

خبرپاڼه لیکي، جي شاه تر دې وړاندې د کرکټ اسیايي شورا مشري هم کړې ده او د هند کرکټ د مشرۍ پرمهال یې د ۲۰۲۳ ز کال نړیوال پنځوس اوریز جام بریالی کوربه‌توب، په لومړي ځل د ښځو لپاره د سوداګریز لیګ جوړول او د المپیک په سیالیو کې د کرکټ شاملولو هلې ځلې یې مهمې لاسته‌راوړنې دي.

دا په‌‌‌داسې حال کې ده چې لا هم د هند او پاکستان کرکټ بورډونو ترمنځ د چمپینز ټراپۍ لپاره پاکستان ته د هندۍ لوبډلې د نه ورتګ په تړاو لانجې لا روانې دي.

په وروستیو رپورټونو کې ویل شوي دي چې، یو وار بیا به د هند کرکټ ملي لوبډلې سیالۍ د پاکستان پر ځای په بل هېواد کې ترسره کېږي، خو د کرکټ نړیوالې شورا لا په‌‌‌دې تړاو کوم رسمي خبر نه‌‌دی خپور کړی.

د امریکا د متحدایالتونو منتخب ولسمشر ډونالډ ټرمپ اعلان کړی چې، د ملي امنیت پخوانی چارواکی کاش پټیل، د فدرالي تحقیقاتي ادارې (FBI) مشرۍ ته نوموي.

پټیل، چې پخوا یې د فدرال د عمومي مدافع وکیل او څارنوال په توګه دنده ترسره کړې، غوښتنه کړې چې، له FBI څخه دې د استخباراتي معلوماتو د راټولولو رول واخیستل شي او دا اداره دې له هغو کارمندانو پاکه کړای شي چې، د ټرمپ د پلانونو ملاتړ نه‌‌کوي.

کاش پټیل، چې هندي‌الاصله دی، د ټرمپ د ولسمشرۍ په لومړۍ دوره کې د ملي امنیت سلاکار او د دفاع وزیر د دفتر د رباست په شمول په څو مهمو چوکیو کار کړی دی.

د سپینې ماڼۍ د ملي امنیت شورا ویاند شان ساوت، تېره شپه (د ليندۍ ۱۰مه) په یوه بیان کې وویل چې، واشنګټن د سوریې حالات په دقیق ډول څاري او په تېرو ۴۸ ساعتونو کې یې د سیمې له پلازمېنو سره تماسونه نیولي دي.

په بیان کې وړاندې راغلي، پر روسیې او ایران د اسد رژیم پر له‌‌پسې تکیه او د ملګروملتونو د امنیت شورا د ۲۲۵۴پرېکړه‌لیک پر اساس سیاسي بهیر ته نه تسلیمېدو، داسې شرایط رامنځته کړل چې د اوسني وضعیت سبب شول، په ځانګړي ډول د د سوریې په شمال لوېدیځ کې د اسد د رژیم د جبهو سقوط.

د سپینې ماڼۍ د ملي امنیت شورا ویاند همداراز ټینګار کړی چې، متحدایالتونه د هیئت تحریرالشام ترهګرې ډلې له‌‌خوا له ترسره شویو بریدونو سره هیڅ‌راز اړیکه نه‌‌لري.

روسیې پرون شنبه اعلان وکړ، چې جنګي جټ الوتکو یې په سوریه کې ګڼ ماموریتونه بشپړ کړي، چې د یاغیانو د قوماندې، د توغندیو د ویشتلو مرکزونه او کمپونه یې په نښه کړې دي.

روسیې په دغو عملیاتو کې د سوریې د حکومت ضد ۳۰۰ جګړه مارو د وژل کېدو خبر ورکړی دی.

د روسیې تاس خبري اژانس په سوریه کې د روسیې د ماموریت د مشر، تورن اولیګ ایګناسیوک خبرې رااخیستي چې ویلي یې دي، د افراطي مهاجمانو پر خلاف به د دوی پوځي عملیات دوام کوي.

دغه اطلاعات په خپلواکه توګه تایید شوي نه‌دي.

پخپله ایګناسیوک هم د دغو جنګي الوتکو د موقعیتونو په باب معلومات نه‌‌دي ورکړي.

دا څرګندونې داسې وخت کېږي چې د سوریې د رژیم د مخالفانو ډلو چې مشري یې افراطي ډله، هیئت تحریر شام کوي، د سوریې په شمال لوېدیځ کې د حلب ښار د زیاتو برخو په ګډون ځینې ساحې نیولې دي.

روسیه د سوریې د حکومت له عمده متحدانو ګڼل کېږي او له ۲۰۱۵م کال راهیسې د سوریې د ولسمشر بشارالاسد ملاتړ کوي او په سوریه کې یې خپل ځواکونه ځای پر ځای کړي دي.

یو نړیوال خیریه بنسټ وايي، په غزې تړانګه کې پر یوه موټر د اسرايیل په پرونۍ هوايي حمله کې د دوی د یوه کارکوونکي په ګډون ۵ کسان وژل شوي دي.

د ولد سنټرل کیچن یا (WCK) په نوم بنسټ ویلي، په‌‌دې اړه یې د نورو توضیحاتو غوښتنه کړې ده، هغه هم وروسته له هغې چې د اسرايیل پوځ وویل، چې د WCK هغه کارکوونکی یې په نښه کړی، چې پر اسرايیل یې د حماس ډلې په حمله کې ونډه درلوده.

پر اسرايیل د ۲۰۲۳م کال د اکتوبر میاشتې د اوومې هغه حمله په غزه کې د جګړې سبب شوه.

د WCK په نوم خیریه بنسټ وايي، په‌‌‌دې اړه خوابدي دي او دا اطلاعات نه‌‌‌لري، چې په موټر کې کوم موجود کس دې د تېر کال په حمله کې دخیل وي.

دغه بنسټ په غزه کې د خپلو فعالیتونو د ځنډولو خبر ورکړی دی.

دغه بنسټ د روان کال په لومړیو کې هم وروسته له هغې خپل فعالیت ځنډولی و، چې د اسرايیل په یوه حمله کې یې ۷ کارکوونکي ووژل شول.

په جلا خبر کې ویل شوي چې د ماشومانو د ساتنې مؤسسې یا سیف د چلډرن هم د غزې په خان‌‌‌یونس کې د پرونۍ حملې پر مهال د خپل یوه کارکوونکي د وژل کېدو خبر ورکړی دی.

دا له تېر کال راهیسې د دې ادارې دویم کارکوونکی دی چې په غزه کې وژل کېږي.

د امریکا منتخب ولسمشر ډونالډټرمپ ګواښ کړی چې، که د بریکس ټولنې غړي هېوادونه په امریکايي ډالر راکړه ورکړه کمه کړي، نو د دې هېوادونو پر وارداتو به سل‌‌سلنه تعرفه وضع کړي.

بریکس د اقتصادي همکاریو ټولنه ده چې د برازیل، روسیې، هند، چین او جنوبي افریقا په ګډون یوشمېر هېوادونه غړیتوب په‌کې لري.

هغه د شنبې په ورځ (د لیندۍ ۱۰مه) په خپله خواله رسنۍ "تروت" کې د بریکس ډلې په اړه لیکلي: "دې هېوادونو ته پکار ده چې ژمنه وکړي نه به د بریکس لپاره نوې پیسه راباسي او نه به د امریکا د ځواکمن ډالر د ځای نیولو لپاره د بلې پیسې ملاتړ کوي. که داسې ونه‌کړي، نو له ۱۰۰ سلنه تعرفې سره به مخامخ شي او د امریکا له فوق‌العاده بازار سره به خدای پاماني وکړي."

برازیل، روسیه، هند، چین، جنوبي افریقا او څو نور هېوادونه د بریکس غړیتوب لري.

د بریکس هېوادونو په هغه غونډه کې چې تېره میاشت یې د روسیې په کازان کې وکړه، مسکو د بریکس دننه د بانکي همکارۍ د شبکې د پیاوړتیا او د محلي تادیاتو د اسانتیا لپاره د بریکس د پولي تادیاتو د نوښت ملاتړ وکړ.

خو د دې غونډې په پای کې د روسیې ولسمشر ولادیمیر پوتین خبریالانو ته وویل چې، د سویفټ سیسټم د بدیل مالي پیغام رسونې سیسټم په جوړولو کې د پام وړ پرمختګ نه‌‌‌دی شوی.

هغه زیاته کړه، په اوس وخت کې د بریکس لپاره د یوې واحدې پیسې د جوړولو موضوع د دوی په اجنډا کې شامله نه‌ده.

په پاکستان کې د یوه خبریال مدافع وکیله وايي، دغه خبریال چې څو ورځې مخکې د تروریزم ضد قانون له مخې نیول شوی و، بېرته په ضمانت خوشې شوی دی.

دغه خبریال د پخواني صدراعظم عمران خان په پلوي د رابلل شویو اعتراضونو پر مهال د وژنو د ادعاوو په باب څېړنه کوله.

روانه اوونۍ په اسلام‌اباد کې څه باندې ۱۰زره کسانو لاریون وکړ او پر عمومي غونډو یې له لګول شویو محدودیتونو سرغړونه وکړه چې وروسته د امنیتي ځواکونو له فشارونو سره مخامخ شول.

د تلوېزیون ویاند او د یوټیوب خبریال مطیع‌الله جان تېره چهارشنبه هغه وخت ونیول شو چې د اسلام‌اباد په پیمز (PIMS) روغتون کې یې د وژل شویو لاریونوالو په باب څېړنیز راپور جوړاوه.

د مطیع‌الله جان مدافع وکیله ایمان مزاري وايي، دی تر نیول کېدو یوه ورځ وروسته د اسلام‌اباد د تروریزم ضد محکمې ته حاضر کړای شو او د مخدره موادو په لېږد او د یوه پولیس د وژنې په هڅه تورن کړای شو.

مزاري د فرانسې خبري اژانس ته ویلي، موکل یې نن پر ځايي وخت ماښام شپږ بجې په ضمانت خوشې کړای شو.

هغې ویلي، د دغه خبریال د نیول کېدو له کبله په خلکو کې نارضایتي زیاته وه.

د پاکستان حکومت وايي، د تېرې اوونۍ د ناکراریو پر مهال ۵ پوځیان هم وژل شوي دي.

د عمران خان تر مشرۍ لاندې د پاکستان تحریک انصاف ادعا کوي چې د دوی ۱۰ غړي هم د امنیتي ځواکونو د ډزو له کبله وژل شوي دي.

د اسراییل پوځ وايي، نن یې د لبنان د حزب‌الله ډلې خلاف هوايي حملې کړي دي.

د پوځ په وینا، دغه حملې یې د لبنان په جنوب کې د حزب‌الله د فعالیتونو تر کشف وروسته کړي او دغو فعالیتونو هغه اوربند ته خطر پېښ کړی و چې څو ورځې مخکې نافذ شوی دی.

د اسراییل د پوځ په اعلامیه کې د څلورو بېلابېلو حملو خبر ورکړی چې په یوه حمله کې د اسراییل هوايي ځواکونو د لبنان په جنوب کې د حزب‌الله تاسیسات په نښه کړل.

د پوځ په وینا، په بله حمله کې هوايي ځواکونو د لبنان بله وداني په توغندیو وویشتله.

د لبنان روغتیا وزارت په یوه اعلامیه کې ویلي، په یوه حمله کې چې پر یوه موټر شوې د یوه ۷ کلن ماشوم په ګډون ۳ کسان ټپیان شوي دي.

د وزارت په وینا، بل کس په البازوریه ساحه کې ټپي شوی دی.

د اسراییل او حزب‌الله ډلې ترمنځ له تېرې چهارشنبې اوربند نافذ شوی، خو له دغه اوربنده د سرغړونو راپورونه هم ورکړل شوي او هر لوري ملامتي پر بل لوري اچولې ده.