ټاکل شوې د هند او جنوبي افریقا ملي ټیمونه نن په ویسټ اینډیز کې د شلو اوورونو د نړیوال جام پایلونه وکړي.

دواړه لوبډلې به نن د کابل پر وخت ماښام اووه بجې د ویسټ اینډیز د باربادوس په بریجټاون کې سره مخامخې شي.

جنوبي افریقا په نیمه پایلوبه کې افغانستان او هند انګلنډ یا انګلستان ته په ماتې ورکولو سره پایلوبې ته ووتل.

په داسې حال کې چې روسیې پر نازي جرمني د بریا د کلیزې په مناسبت اوربند اعلان کړی، د اوکراین په ډېری ښارونو کې نن کراري وه.

د تېرې شپې له درنو بمباریو وروسته نن سهار ډېری سیمې چې پخوا به د ورځنیو جګړو راپورونه ترې خپرېدل آرام وو.

خو په عین حال کې د اوکراین هوايي ځواک ویلي چې د روسیې جنګي الوتکو نن سهار د اوربند د نافذیدو په لومړیو ساعتونو کې د اوکراین په شمال ختیځه سومي سیمه کې دوه ځلې هدایت کېدونکي بمونه وغورځول.

همداراز په ختیځه دونېڅک سیمه کې پوځي سرچینو ویلي چې روسي ځواکونو سهار مهال د بې پیلوټه الوتکو او بمونو حملې وکړې.

د روسیې ولسمشر ولادیمیر پوتین تېره ورځ له اوکراین سره په جګړه کې د ۷۲ ساعتونو په مخه اوربند اعلان کړ. دا اوربند په دوهمه نړیواله جګړه کې د نازي جرمني پروړاندې د بریا له اتیایمې کلیزې سره چې په روسیه کې د درې ورځني جشن په ترڅ کې لمانځل کېږي سره برابر دی.

ښاغلي پوتین نن د چین له ولسمشر شي جین پېنګ سره چې په دې مراسمو کې د ګډون لپاره د څو نورو هېوادونو له مشرانو سره مسکو ته رسېدلی دی، په کریملین کې وکتل.

د فرانسې ولسمشر ایمانویل مکرون د سوریې د انتقالي دولت له مشر احمد شرع څخه د خپل هېواد ملاتړ ته چمتووالی ښودلی دی.

ښاغلي مکرون فرانسې ته د شرع د سفر پرمهال په خپلو څرګندونو کې همداراز ټینګار وکړ چې د پاریس ملاتړ په سوریه کې د یوه سوله ایز او ټولګډونه سیاسي بهیر په پیل پورې تړلی دی.

مکرون وویل، د سوریې موقت دولت باید قومیت، مذهب او د سیاسي نظریو توپیر ته له پام پرته د سوریې د ټولو خلکو ملاتړ تضمین کړي. هغه زیاته کړه چې که شرع د اصلاحاتو پر لور ګامونو ته دوام ورکړي اروپايي ټولنه کولای شي پر سوریې د لګېدلو تحریمونو د راکمولو بهیر پیل کړي.

په سوریه کې په تېرو څو اونیو کې د تاوتریخوالي پېښې وشوې او د دروز اقلیت وسله وال له سني ملېشو سره ونښتل.

د سوریې انتقالي دولت په مارچ میاشت کې د پرځېدلي ولسمشر بشاراسد رژیم ته د وفادارو وسله والو د حملو په ځواب کې پوځي عملیات وکړل چې په ترڅ کې یې له دواړو خواوو ګڼ کسان ووژل شول.

احمدشرع دا نښتې خواشینوونکې وبللې خو ویې ویل، د ده دولت له هغو کسانو سره حساب کتاب ته ژمن دی چې د سوریې له خلکو سره یې بېعدالتي کړې ده.

شرع چې د هیات تحریر شام د اسلامپالې ډلې مشر دی، په تېره لیندۍ میاشت کې د اسد د رژیم له نسکورېدو وروسته واک ته ورسېد. نوموړی اروپا ته د خپل سفر په لومړي ګام کې پرون فرانسې ته ورسېد. شرع له دې مخکې سعودي عربستان او ترکیې ته هم سفرونه کړي وو.

په داسې حال کې چې د هند او پاکستان ترمنځ کړکېچ پرځای پاتې دی، دواړو هېوادونو نن- د مې ۸مه یوبل د بې پیلوټه الوتکو په حملو تورن کړل او دواړو د دې حملو د شنډولو ادعاوې وکړې.

د پاکستان د پوځ ویاند ډګرجنرال احمد شریف وویل چې د هند په حملو کې په سند کې یو ملکي وګړی وژل شوی او په لاهور کې څلور پوځیان ټپیان شوي دي.

د پاکستان د پوځ د رسنیو څانګې همداراز وویل چې د هند ۲۵ بې پیلوټه د هوايي مدافعې د ځواکونو له خوا ویشتل شوي دي.

په عین حال کې د هند د دفاع وزارت ویلي دي چې د پاکستان د بې پیلوټه الوتکو او توغندیو له حملو وروسته یې تېره شپه په څو سیمو کې د پاکستان د هوايي مدافعې ځواکونه په نښه کړي دي خو د هند پوځ نه دي ویلي چې آیا دا حملې یې د بې پیلوټه الوتکو په وسیله کړي.

د هند او پاکستان ترمنځ دا تاوتریخوالی وروسته له هغه پیل شو چې وسله والو د کشمیر په پهلګام سیمه کې پر سیلانیانو برید وکړ او ۲۶ کسان یې ووژل. په ځواب کې یې د هند پوځ د چارشنبې ورځې په سهار د پاکستان تر ولکې لاندې کشمیر او پنجاب کې نهه سیمې په نښه کړې.

د ایران د بهرنیوچارو وزیر عباس عراقچي هغه تورونه رد کړي دي چې ګنې هېواد یې په لندن کې د اسراییلو پر سفارت د برید په پلان کې لاس لري.

له دې مخکې د برتانیا پولیسو ویلي و، چې اوه ایراني وګړي یې د تروریستي حملو د ترسره کولو په تور شک نیولي دي.

ښاغلي عراقچي نن پر خپله ایکس پاڼه ولیکل چې له ډیپلوماتیکو سرچینو څخه یې هېڅ ډول رسمي اطلاعات نه دي ترلاسه کړي.

د برتانیا د کورنیو چارو وزیرې ایویټ کوپر ویلي دي چې تورن کسان د ایران د فعالیتونو په اړه له اندېښنو وروسته ونیول شول.

ټایمز ورځپاڼې راپور ورکړی چې دا نیونې په لندن کې د ایران پر سفارت د برید د طرحې له افشا کېدو وروسته شوې دي، خو چارواکو په رسمي ډول تراوسه په دې اړه څه نه دي ویلي.

د پاکستان پر قلمرو د هند له حملې یوه ورځ وروسته نوې ډېلي ګواښ کړی چې د پاکستان هرراز انتقامي اقدام ته به په خورا ډېر قاطعیت ځواب وايي.

د هند د بهرنیوچارو وزیر اس جېشنکر نن په نوې ډېلي کې له خپل ایراني سیال سره د لیدنې پرمهال وویل چې پر پاکستان د دې هېواد حمله دقیقه او سنجول شوې وه خو ده زیاته کړه چې که پاکستان ځوابي برید وکړي نو په دې کې به هېڅ شک نه وي چې په ډېر- ډېر قاطعیت سره به ځواب ورکړل شي.

په داسې حال کې چې په کشمیر کې په ګډ سرحد کې له څو ورځو راهیسې پیل شوې نښتې اوس په توپچي ډزو بدلې شوي، د پاکستان صدراعظم شهبازشریف ژمنه کړې ده چې د هند برید ته به په انتقامي اقدام سره ځواب ووايي.

د هند له حملې وروسته له پرونۍ ورځې راهیسې تراوسه پورې له دواړو خواوو د ماشومانو په ګډون د لږترلږه ۴۵ کسانو د وژل کېدو خبرونه رارسېدلې دي.

هند وروسته له هغه د پاکستان پر خاوره برید وکړ چې د اپریل په ۲۲مه نېټه د کشمیر په پهلګام سیمه کې یوې وسله والې ډلې پر سیلانیانو ډزې وکړې. د هند په حملو کې چې په نهو موقعیتونو کې وشوې، ۲۶ کسان ووژل شول. هند پر پاکستان تور ولګاوه چې د دې ډلې ملاتړ کوي خو پاکستان دا تور رد کړی دی.

له بلې خوا د پاکستان پوځ وايي چې هند د پاکستان خاورې ته یرغلیزې بې پیلوټه الوتکې لېږلې دي. د پاکستان پوځ پر هند د پاکستان له حملې یوه ورځ وروسته په یوه بیان کې وویل چې د یوه هندي ډرون په برید کې څلور پاکستاني سرتېري ټپیان شوي دي.

د پاکستان ملکي هوایي چلند ادارې وویل چې د اسلام اباد او لاهور هوایي ډګرونه یې نن بیرته پرانیستل.

پاکستان تر دې مخکې ویلي وو چې د هند د ډرون الوتکو پرضد د عملیاتو لپاره یې د اسلام اباد، لاهور او کراچۍ هوایي ډګرونه بند کړې دي، خو د کراچی هوایي ډګر چې د پاکستان تر ټولو ستر هوایي ډګر دی لاهم بند دی.

هندوستان د سه شنبې او چارشنبې ترمنځ د شپې پر مهال په پاکستان او د پاکستان تر واک لاندې کشمېر کې پر څو سیمو بریدونه وکړل.

هند وايي د بریدونو هدف یې هغه ترهګر وو چې د هند تر واک لاندې د کشمېر په پهلګام سیمه کې یې پر سیلانیانو برید پلان کړی و. د اپریل په دوه ویشتمه په دې برید کې 26 تنه سیلانیان وژل شوي و.

پاکستان په دې ترهګریز برید کې هر ډول دخالت رد کړی و.

نن د پاکستان په لاهور ښار کې د یوې چاودنې د غږ اورېدل کېدو خبر ورکړل شوی دی.

پاکستاني جیو تلویزیون او رویټرز خبري اژانس د یوه عیني شاهد له قوله دا خبر ورکړی دی. د چاودنې د لامل په اړه سمدستي څه نه دي ویل شوي.

دا خبر یوه ورځ وروسته له هغه دی چې هند د پاکستان تر ولکه لاندي کشمیر کې پر څو هدفونو برید وکړ.

هند وویل چې د چهارشنبې په سهار یې په پاکستان کې "ترهګریز بنسټونه" په نښه کړل. دا دوې اونۍ وروسته له هغه چې دوی پاکستان په هندي کشمیر کې په وسله وال برید کې په لاس درلودو تورن کړ. په هغه برید کې ۲۶ کسان چې ډیری یې هندو سیلانیان وه، ووژل شول.

اسلام آباد دا تور رد کړ او خبرداری یې ورکړ چې د توغندیو د بریدونو غچ به واخلي، او دا یې هم وویل چې پنځه هندي الوتکې یې ویشتلې دي. خو په پیکنګ کې د هند سفارت د جنګي الوتکو د ویشتل کیدو راپورونه "غلط معلومات" وبلل.

د طالبانو حکومت د بهرنیو چارو وزیر امیر خان متقي د چهارشنبې په ورځ (د مې په ۷مه) د ترکمنستان د وزیرانو د کابینې مرستیال او د بهرنیو چارو وزیر رشید میریدوف سره د ټاپي پایپ لاین پروژې د پرمختګ په اړه خبرې کړي دي.

د طالبانو د بهرنیو چارو وزارت د عامه اړیکو مشر ضیا احمد تکل په یوه بیان کې ویلي چې دا غونډه د ویډیو کنفرانس له لارې وشوه. د بیان له مخې میردوف په نژدې راتلونکي کې د ریل پټلۍ، سوداګرۍ او ټرانزیټ په برخو کې د عملي همکارۍ د پراخولو پلانونه اعلان کړل. خو په بیان کې د دغو پلانونو په اړه نور معلومات نه دي ورکړل شوي.

ټاپي د ګازو د نللیکې سیمه‌ییزه پروژه ده چې د ترکمنستان ګاز د افغانستان له لارې پاکستان او هند ته لېږدوي.

د دې پروژې د کار د پیل تړون په ۲۰۱۶ م کال کې د ترکمنستان، د افغانستان د تېر جمهوري نظام، پاکستان او هند هېوادونو ترمنځ د ترکمنستان په عشق اباد کې لاسلیک شو.

د والټ ډیزني شرکت ویلي چې غواړي د متحده عربي اماراتو په پلازمینه ابوظبي کې د سیمه ایزې پراختیا میرال ګروپ سره په ګډه د ډیزني پارک جوړ کړي.

دا موافقه د ډیزني د تیم پارک جوړولو لومړۍ لویه پروژه ده چې په نژدې یوه لسیزه او په منځني ختیځ کې لومړۍ ده.

دا تفریحي کمپلیکس به، چې په ساحل کې موقعیت لري، په یاس ټاپو کې جوړ شي. د سیلانیانو لپاره یو مشهور ځای چې د ډیری کورنیو تفریح ځایونو کوربه دی، یاس واټر پارک نومیږي.

د ابوظبي ښار شاوخوا ۲.۵ میلیونه نفوس لري، خو د میرال په وینا، یاس ټاپو په ۲۰۲۳ کال کې له ۳۴ میلیونه څخه ډیر لیدونکي ثبت کړي، چې د تیر کال په پرتله ۳۸٪ زیاتوالی ښيي.

د پاکستان سترې محکمې د چهارشنبې په ورځ په یوه نوي حکم کې پریکړه وکړه چې په پوځي محکمو کې د ملکي وګړو محاکمه کول قانوني ده، او خپله هغه پرېکړه یې لغوه کړه چې دا کار يې د اساسي قانون پر خلاف بللی و.

دا پریکړه د پخوانۍ پریکړې پر وړاندې د پاکستان د دفاع وزارت تر اعتراض وروسته صادره شوه.

په ۲۰۲۳ کال کې د پخواني صدراعظم عمران خان تر نیول کېدو وروسته د هغه په ملاتړ د رامنځته شوې ناکرارۍ په جریان کې، تر ۱۰۰ زیات ملکي وګړي په پوځي محکمو کې محاکمه شول. له دغو کسانو ځینې یې تر لسو کلونو پورې په بند محکوم شوي دي.

د حکومت په وینا، د هغو لاریونونو په جریان کې د پاکستان په څلورو ولایتونو کې پر ۳۹ پوځي تاسیساتو بریدونه شوي دي.

د عمران خان په مشرۍ د پاکستان تحریک انصاف ګوند ویاند په ځواب کې وویل: "مارشل لا د وسله والو ځواکونو ترمنځ د نظم ساتلو لپاره طراحي شوې وه او هیڅکله پر ملکي وګړو د عملي کولو لپاره نه وه."

عمران خان لا هم د فساد په تور په زندان کې دی.