د شمالي کوریا او روسیې مشرانو نن د هر اړخیز ستراتیژیک مشارکت تړون لاسلیک کړ.
د روسیې ولسمشر ولادمیر پوتین ۲۴ کاله وروسته نن سهار د لومړي ځل لپاره د شمالي کوریا پلازمېنې پیونګ یانګ ته ورسېد.
د پوتین هرکلي ته د پیونګ یانګ په هوایي ډګر کې سور فرش غوړېدلی و او د شمالي کوریا رهبر کېم جونګ اون یې مخته ورغلی و.
پوتین او کېم چې دواړه د لوېدیځ مخالفان دي، پیونګ یانګ کې یوه جوړه شوې غونډه کې ګډون وکړ او د هر اړخیز ستراتیژیک مشارکت تړون یې هم لاسلیک کړ.
د شمالي کوریا مشر پوتین ته د اوکراین په جګړه کې د ملاتړ ډاډ ورکړ.
هغه وویل: "د کوریا د ډیموکراتیک ولسي جمهوریت حکومت د روسیې له حکومت، پوځ او خلکو سره په اوکراین کې د ځانګړو عملیاتو د ترسره کولو لپاره خپل بشپړ ملاتړ او پیوستون څرګندوي تر څو خپل حاکمیت، امنیتي ګټې او ارضي تمامیت خوندي کړي."
کېم له کوم شرط پرته د روسیې د ټولو تګلارو ملاتړ اعلان کړ.
د روسیې ولسمشر ولادمیر پوتین د شمالي کوریا له ملاتړه مننه وکړه او له دغه هېواد سره یې د اړیکو لا پياوړتیا ته ټټر وواهه.
هغه وویل: "مونږ د اوکراین د مسیر په ګډون د روسیې له تګلارو ستاسو د باثباته او کلک ملاتړ د لوړې کچې هرکلی کوو."
روسیه په اوکراین کې د جګړې او شمالي کوریا د خپلو اټومي پروګرامونو له کبله د لوېدیځ تر کلکو بندیزونو لاندې دي.
یو شمېر لویدیځو چارواکو له وړاندې شمالي کوریا ته د ولادمیر پوتین پر سفر غبرګونونه ښودلي دي.
د ناټو سرمنشي ینس سټولټنبرګ پرون په واشنګټن کې د امریکا د بهرنیو چارو له وزیر انټوني بلېنکن سره په یوه ګډه خبري ناسته کې وویل، په اوکراین کې د روسیې جګړه د شمالي کوریا، چین او ایران پر مرستو متکي ده.
سټولټنبرګ دغه راز وویل، د ناټو غړي هېوادونه اندېښنه لري چې روسیه د شمالي کوریا له اټومي پروګرامونو سره مرسته کوي.
د سپینۍ ماڼۍ د ملي امنیت شورا ویاند جان کربي هم ویلي چې دوی دغه تحولات له نژدې څاري.
د روسیې د بهرنیو چارو او دفاع وزیران او یو شمېر نور لوړپوړي چارواکي شمالي کوریا ته د ولادمیر پوتین د دوه ورځني سفر ملګري دي.
