د جرمني په پلازمېنه برلین کې پرون بیا یوتن د چړې په ګوزارونو سخت ټپي شو. پولیس وايي چې پېښه تېر ماښام په برلین کې د هالوکاست یا د یهودانو د ډلوژنې د څلې مخې ته وشوه.

د پولیسو چارواکو ویلي دي چې بریدګر نارینه دی خو هویت یې تراوسه نه دی معلوم. دوی دا هم وايي چې د برید علت روښانه نه دی خو په مشکوک بریدګر پسې لټون روان دی.

د پیښې له ځایه چې د امریکا د سفارت مخې ته دی، په اخیستل شویو ویډیوګانو کې د بېړنیو حالاتو موټر او د پولیسو زغرګاډي په کتارونو کې ښکاري.

د برلین د پولیسو ویاندې فلوریان نات ویلي چې په چړو وهل شوی کس هومره سخت ټپي شوی و، چې د اوروژنې په یوه موټر کې روغتون ته ورسول شو.

دا پېښه په داسې حال کې کېږي چې سبا یکشنبې د فبروري په ۲۳مه په جرمني کې عمومي پارلماني انتخابات کېږي.

په جرمني کې د حملو لړۍ د انتخاباتو پر بهیر سیوری غوړولی دی. د دې حملو په ترڅ کې د روانې فبروري میاشتې په ۱۳مه په مونشن ښار کې یوه افغان کډوال د موټر په وسیله د کارګرانو پر یوه لاریون برید وکړ. د دې برید په نتیجه کې له دېرشو ډېر کسان ټپیان شول چې دوو تنو وروسته په روغتون کې سا ورکړه.

یوه ډله مهاجر، چې تېره اوونۍ له متحدو ایالتونو څخه پاناما ته شړل شوي وو، د سې شنبې په شپه د پاناما سیټي له یوه هوټله د دې هېواد جنوبي ځنګلي سیمې، دارین ته انتقال شول.

د پاناما د امنیت وزیر اعلان وکړ، چې له نیمايي ډېرو هغو مهاجرو، چې امریکا پاناما ته شړلي وو، په خپله خوښه خپلو هېوادونو ته د ستنېدو پرېکړه کړې. دا مهاجر عمدتاً د آسیا او منځني ختیځ د هېوادونو اتباع دي.

د پاناما د ولسمشر خوزې رایول مولینو په وینا، تازه شړل شوي مهاجر د افغانستان، چین، هند، ایران، نیپال، پاکستان، سریلانکا، ترکیې، ازبکستان او ویتنام وګړي دي.

د ډونالډ ټرمپ حکومت، دا مهاجر په درې پروازونو کې پاناما ته لېږلي دي.

پاناما له متحدوایالتونو سره د یوه توافق له مخې منلې، چې له خپلو اتباعو پرته، نور غیرقانوني مهاجر هم تر هغه وخته ومني، چې د هغوی برخلیک معلوم شي.

یو شمېر شړل شوي مهاجر، چې په ایران او افغانستان پورې اړه لري، د خپلې راتلونکې او امنیت په اړه اندېښنه لري او خپلو هېوادونو ته ستنېدل ناشونی بولي.

لرغون پوهان وايي، د توت عنخ امون د قبر له موندلو وروسته، په سلو کالونو کې دا لومړی ځل دی چې د یو بل فرعون مقبره موندل کیږي.

لرغون پوهانونو ویلي، د شاه توتموس دویم مقبره د مصر د اتلسمي لړۍ یوازینۍ سلطنتي مقبره ده چې تراوسه نه وه موندل شوې.

دا مقبره د سلطنتي کورنۍ د ښځینه غړو د دفن له ځای سره تړاو لري او د مقبرې داخلي برخه د فرعونیانو په ځانګړو نقشوتو او ښکلاو ښایسته شوې وه.

په دې مقبره کې موندل شوی مومیايي د مصر د تمدن په ملي موزیم کې نندارې ته اېښودل شوی دی.

د اټکل له مخې شاه توتموس دویم د توت عنخ امون له نیکونو څخه و چې له ۱۴۹۳ څخه تر ۱۴۷۹له میلاده مخکې کالونو کې يې پر مصر واکمني کوله.

له دې مخکې د توت عنخ امون مقبره یو بریتانوي لرغونپوه کشف کړې وه.

د چک جمهوریت چارواکي وايي، د پنجشنبې په ورځ په یوه سوداګریز مرکز کې د چاقو په وسیله برید کې دوه ښځې وژل شوې دي.

اسوشیټید پریس د پولیسو له قوله وايي، چې دوی د پراګ په ختیځ کې د هرادیک کرالو په ښار کې په یوه پلورنځي کې د چاقو برید په تړاو یو شکمن ځوان نیولی دی.

د وژل شوو ښځو هویت لا تر اوسه نه دی څرګند شوی، خو د برید له ځایه شاوخوا یو کیلومتر لرې یو ۱۶ کلن چکي وګړی د پولیسو لخوا نیول شوی دی.

د چک جمهوریت لومړي وزیر پیټر فیالا د وژل شویو کسانو له خپلوانو سره خپله خواخوږي څرګنده کړې او یاده پېښه یې "په بشپړ ډول د نه پوهیدو وړ او وحشتناک عمل" بللې ده.

د برید انګېزه لا تر اوسه نه ده معلومه شوې.

د پاکستان په بلوچستان ایالت کې د اوو مسافرو د وژنې مسوولیت بلوڅ بېلتونپالو ډلي، د بلوچستان د ازادۍ پوځ په غاړه واخیست او ویې ویل چې قربانیانو د پوځ او استخباراتي سره تړاو درلود.

دا برید د سې شنبې په شپه ناوخته په رخني نومې سیمه کې هغه مهال وشو چې وسله والو یو بس چې له پنجاب څخه کوټې ته روان و، په لویه لاره کې ودراوه، اووه تنه یې راکښته کړل او په ډزو یې ووژل.

د اسوشیتد پریس خبری آژانس د خبر له مخې بلوڅ بیلتونپالو ډلي په یوه بیان کې ويلي چې د دوی جنګیالیو په بسونو برید وکړ او د پوځ اووه تنه یې ووژل.

خو ځايي چارواکو دا ادعا رد کړه او ویې ویل چې وژل شوي کسان ملکي وګړي وو چې له امنیتي ځواکونو سره یې هیڅ اړیکه نه درلوده.

د پاکستان په بلوچستان ایالت کې وخت ناوخته پر پوځ او امنیتي ځواکونو حملې کېږي چې مسوولیت یې یا د پاکستاني طالبانو تحرک، ټي ټي پی او یا د بلوچستان د ازادۍ پوځ په نوم بلوڅ بیلتون پاله ډله په غاړه اخلي.

د بشري حقونو دوو سازمانونو په خپل کلني راپور کې ویلي چې د ایران حکومت د تېر میلادي کال (۲۰۲۳) په ترڅ کې ۹۷۵ کسان اعدام کړي دي.

ایران، له چین وروسته، تر ټولو ډېر کسان اعداموي.

د ایران د بشري حقونو سازمان، چې په ناروې کې مېشت دی، او فرانسوي سازمان، چې «په ګډه د اعدام د مجازاتو پر وړاندې» نومېږي، دا راپور د پنجشنبې په ورځ (د فبرورۍ ۲۰مه) خپور کړ.

په دې راپور کې ویل شوي چې له ۲۰۰۸ کال راهیسې، چې د ایران د بشري حقونو سازمان د ایران د اعدامونو د ثبت کار پیل کړی، دا تر ټولو لوړه شمېره ده.

دواړه سازمانونه ادعا کوي چې د ایران اسلامي جمهوري حکومت د خپل حاکمیت په اوږدو کې اعدام د «سیاسي ځپنې د اصلي وسیلې» په توګه کارولی دی.

د ۲۰۲۳ پرتله په ۲۰۲۴ کال کې د اعدامونو شمېر ۱۷ سلنه زیات شوی دی. په ۲۰۲۳ کال کې ۸۳۴ کسان اعدام شوي وو خو په ۲۰۲۴ کې ۹۷۵ اعدام شوي دي.

د راپور پر اساس، په اعدام شویو کې ۳۱ ښځې هم شاملې دي.

د چمپینز ټرافي لوبلړۍ نن- د فبروري ۱۹مه د پاکستان په کراچۍ ښار کې پیلېږي. په لومړۍ لوبه کې به چې د کابل په وخت د ماسپښین په یوه نیمه بجه پیلېږي، د کوربه پاکستان لوبډله د نیوزیلنډ له سیالې لوبډلې سره مخامخ شي.

افغانستان په دې لړۍ کې د لومړي ځل لپاره برخه اخلي او د جنوبي افریقا، انګلستان او آسټرالیا له ځواکمنو لوبدلو سره په B ګروپ کې لوبېږي.

د افغان لوبډلې لومړۍ لوبه د جمعې په ورځ د فبروري په ۲۱مه له جنوبي افریقا سره پلان شوې، دوهمه لوبه به یې د فبروري په ۲۶مه له انګلستان او دریمه به یې د فبروري په ۲۸مه له اسټرالیا سره وي.

د چمپینز ټرافي لوبې دا ځل په دوو هېوادونو، پاکستان او متحده عربي اماراتو کې ترسره کېږي ځکه د هند لوبغاړو نه غوښتل پاکستان ته ولاړ شي.

فلسطینۍ حماس ډله وايي، د راروانې شنبې په ورځ به شپږ تنه ژوندي اسراییلي یرغمل خوشې کړي او سبا پنجشنبې به د څلورو نورو مړي اسراییل ته وسپاري.

حماس دا اعلان ظاهرا د اسراییل د هغه اقدام په غبرګون کې کوي چې ویجاړې شوې غزې ته یې د خوځنده استوګنځایونو او ساختماني تجهیزاتو د استولو اجازه ورکړې ده.

دا کسان وروستي اسراییلي یرغمل دي چې د غزې د اوربند په لومړي پړاو کې د اسراییلو په زندانونو کې د سلګونه فلسطیني بندیانو په بدل کې له بنده خوشې کېږي.

حماس چې امریکا او اروپايي ټولنه یې تروریستي ډله بولي باید له اسراییل سره د اوربند په دوهم پړاو کې چې ښايي ډېر لانجمن وي، په غزه کې د دایمي اوربند او له دې تړانګې د اسراییلي سرتېرو د پوره وتلو په بدل کې لسګونه نور یرغمل هم خوشې کړي.

پاکستاني چارواکي وايي چې وسله والو تېره شپه ناوخته په بلوچستان ایالت کې د یوه بس اوه تنه سپرلۍ په ډزو ووژل.

یوه سیمه ایزو چارواکي وقار علم وايي دا پېښه په رخني نومې سیمه کې هغه مهال وشوه چې وسله والو یو بس چې له پنجاب څخه کوټې ته پرلاره و، په لویه لاره کې ودراوه، اوه تنه یې راکښته کړل او په ډزو یې ووژل. د ښاغلي علم په وینا بریدګرو یوازې دا ۷ کسان چې د پنجاب وو وویشتل.

د دې وژنې پړه تراوسه هېڅ یوې ډلې نه ده منلې خو په دې سیمه کې له دې مخکې بلوڅ بېلتونپالو هدفي وژنې او حملې کړې دي.

فرانسه به نن چهارشنبه د اوکراین د جګړې او د اروپا د امنیت په اړه د دویمې غونډې کوربه وي.

په دې غونډه کې له کاناډا او هغو اروپایي هېوادونو د ګډون غوښتنه شوې چې د پاریس د همدې اونۍ په بیړنۍ غونډه کې حاضر نه وو.

د ديپلوماتیکو سرچینو د معلوماتو له مخې نننۍ غونډه کې به د کاناډا، ناروی، استونیا، لاتویا، لیتوانیا، چک جمهوریت، یونان، فنلند، رومانیا، سویډن او بلجیم چارواکي حضور ولري.

د پاریس په لومړۍ غونډه کې چې د فبرورۍ په ۱۷مه جوړه شوې وه، اروپایي مشرانو اوکراین ته د امنیتي ضمانتونو ورکړې ته لیوالتیا درلوده، خو وې ویل دغه ډول ضمانتونه د واشنګټن په مشارکت پورې اړه لري.

د فرانسې ولسمشر امانویل مکرون ویلي، دوی اوکراین کې د تلپاتې سولې په لټه کې دي.