د لاسرسۍ وړ لېنکونه

تازه خبر
شنبه ۶ غویی ۱۴۰۴ کابل ۰۸:۰۰

نړۍ

د نړیوال اقتصادي فوروم غونډه نن په ریاض کې پيلیږي

د غونډې یوه څنډه
د غونډې یوه څنډه

د نړیوال اقتصادي فوروم اصلي غونډه نن د سعودي عربستان په پلازمېنه ریاض کې پيلیږي.

دې غونډې ته د نړۍ د څه باندې شپېتو هېوادونو استازي وربلل شوي چې فلسطیني مشران هم پکې شامل دي.

د غونډې ګډونوال تر ډېره په غزه کې د اوسني کړکېچ د هواري او د حماس او اسراییلو تر منځ د اوربند هڅې کوي.

حماس د امریکا او اروپايي ټولنې له خوا ترهګر سازمان ګڼل کېږي.

د امریکا د بهرنیو چارو وزیر انتوني بلنکین د یوه داسې اوربند د ټینګېدو په هدف د نړیوال اقتصادي فوروم په غونډه کې ګډون کوي چې په نتیجه کې یې د حماس له خوا د یرغمل شویو کسانو خلاصون تضمین کړي.

د سعودي عربستان د مالیې وزیر محمد الجدعان پرون ویلي چې د غزې جګړه پر نړیوال اقتصادي وضعیت "خورا زیات فشار" اچوي.

هغه د اقتصادي فوروم د غونډې په درشل کې د سیمه ییز "ثبات" غوښتنه کړې او پر نړیوال اقتصاد یې د غزې تړانګې د جګړې د اثراتو په اړه خبرداری ورکړی دی.

د ورځې تازه خبرونه دلته ولولئ

عراق له سوریې سره د غنمو مرسته کوي

د سوریې له دیر الزور د زرګونو ماشومانو له ډلې یو بیځایه شوی- د ۲۰۲۱ کال د دسمبر ۱۸مه-ارشیف
د سوریې له دیر الزور د زرګونو ماشومانو له ډلې یو بیځایه شوی- د ۲۰۲۱ کال د دسمبر ۱۸مه-ارشیف

عراق غواړي چې له سوریې سره د دوه لکه شل زره ټنه غنمو مرسته وکړي.

د سوریې د غله دانې د عمومي ریاست په وینا، د دې غنمو لومړی بار اوس دیر الزور ولایت ته رسیدلی دی.

عراق په داسې وخت کې دا مرسته کوي چې سوریې د مارچ په پنځه ویشتمه نژدې یولک ټنه غنم واخیستل. ویل کیږي چې د پروسږ میلادي کال په وروستیو کې په سوریې کې د رژیم تر بدلیدو وروسته دا لومړۍ لویه سودا وه چې له بهیره یې کوله.

د سوریې د پخواني ولسشر بشار الاسد له رژیم سره روسیې او ایران د غنمو او سون موادو په برخو کې مرسته کوله او دا مرستې وروسته تر دې بندې شوې چې وسله والو په ډسمبر کې میاشت کې دمشق ونیو او بشارالاسد مسکو ته وتښتید.

ولسمشر ټرمپ د پاپ فرانسس د تدفین د مراسمو لپاره روم ته رسیدلی

ولسمشر ټرمپ ایتالیا ته تر سفر مخکې په متحد ایالتونو کې
ولسمشر ټرمپ ایتالیا ته تر سفر مخکې په متحد ایالتونو کې

ټاکل شوې ده چې د نړۍ د کاتولیکانو د مشر د تدفین مراسم نن د ایتالیا په پلازمینه روم کې ترسره شي.

پاپ فرانسس د اته اتیا کلونو په عمر د دوشنبې په ورځ ومړ. د پاپ فرانسس د تدفین په مراسمو کې د نړۍ په سلګونو مشران د امریکا د متحد ایالتونو د ولسمشر ډونالډ ټرمپ په ګډون برخه اخلي.

وروسته له دې چې ټرمپ د جنوري په شلمه د امریکا د ولسمشر په توګه لوړه وکړه، دا بهر ته د ده لومړی سفر دی.

د روسیې یو ډګر جنرال مسکو ته څيرمه ووژل شو

هغه موټر چې روسی جنرال موسکالیک پکې ووژل شو
هغه موټر چې روسی جنرال موسکالیک پکې ووژل شو

د روسیې تحقیقاتي کمیټې نن وویل چې د دغهَ هیواد یو جګپوړی پوځي افسر د ماسکو په لمن کې ووژل شو.

ډګر جنرال یاروسلاو موسکالیک د روسیې د وسله والو ځواکونو د عمومي درستیز د عملیاتي ریاست مرسیتال و.

دا جنرال نن په موټر کې د نیستروف پر سړک روان و چې د ریموټ کنټرول له لارې په ترسره شوې چاودنه کې ووژل شو.

د روسیې د تحقیقاتي کمیټې په وینا د ډګرجنرال یاروسلاو موسکالیک د وژلو د پيښې تحقیقات روان دی.

پروسږکال د ډسمبر په میاشت کې جنرال ایګور کیريلوف هم په ماسکو کې په یوې چاودنه کې وژل شوی و، د هغې چاودنې مسوولیت د اوکراین استخباراتو منلی و.

د موسکالیک د وژلو مسوولیت تر دې دمه چا نه دی منلی.

ولسمشر ټرمپ د ایټالیا په لور روان شو

د امریکا ولسمشر ډونالډ ټرمپ
د امریکا ولسمشر ډونالډ ټرمپ

د امریکا د متحد ایالتونو ولسمشر ډونالډ ټرمپ ایتالیا ته په سفر روان شوی دی.

وروسته تر دې چې د جنوري په شلمه ډونالډ ټرمپ د امریکا د متحد ایالتونو د ولسمشر په توګه لوړه وکړه دا د ښاغلي ټرمپ لومړی بهرنی سفر دی.

ټاکل شوې ده چې ولسشمر ټرمپ سبا، شنبه په واتیکان کې د نړۍ د کاتولیکانو د مشر پاپ فرانسیس د تدفین په مراسمو کې برخه واخلي.

د بلوچستان په مرکز کوټه کې پر پاکستاني سرتیرو چاودنه شوې

په کوټه کې چاودنه- د ارشیف عکس
په کوټه کې چاودنه- د ارشیف عکس

د بلوچستان په مرکز کوټه کې نن د سړک د غاړې په بمي چاودنه کې څلور سرتیرې وژل شوي.

اسوشیتد پریس اژانس په کوټه کې د پولیسو د مشر نوید احمد په وینا په دې چاودنه کې د درې نورو سرتیرو د ټپي کیدو خبر هم ورکړی دی.

تر اوسه کومې ډلې د دې برید مسوولیت نه دی منلی، خو د پاکستان په دغهَ ایالت کې اکثر وخت د بلوچانو بیلتون غوښتونکي ډلې پر پاکستاني امنیتي ځواکونو بریدونه کوي.

هندي افسران وایي چې له پاکستاني پوځیانو سره یې ډزې تبادله کړي

د هندي تر واک لاندې کشمیر په پهلګام سیمه کې هندي پوځیان په ترهګرو پسې ګرځي April 23, 2025.-ارشیف
د هندي تر واک لاندې کشمیر په پهلګام سیمه کې هندي پوځیان په ترهګرو پسې ګرځي April 23, 2025.-ارشیف

هندي چارواکو نن وویل چې د کشمیر په متنازعه سیمه کې د دوی د ځواکونو او پاکستاني پوځیانو ترمنځ لنډه نښته شوې ده.

دا خبر وروسته تر دې خپور شوی دی چې د سې شنبې په ورځ د هند تر ادارې لاندې د کشمیر په پهلګام سیمه کې وسله والو نژدې شپږ ویشت تنه ووژل. هند پاکستان تورن کړ چې په دې ترورستي برید کې لاس لري. پاکستان دا تور رد کړی دی.

اسوشیتد پریس اژانس د دریو هندي افسرانو په وینا ویلي دي چې پاکستاني پوځیانو په سپکو وسلو تیره شپه د هندي ځواکونو پر مورچو ډزې وکړې، دغو افسرانو چې په دې شرط یې خبرې کولې چې نومونه به یې نه اخیستل کیږي، څرګنده کړه چې هندي پوځیانو ځوابي برید وکړ او تر اوسه یې د مرګ ژوبلې خبر نه دی ترلاسه کړی.

د پاکستان د بهرنیو چارو وزارت نن د دې نښتې راپور نه تایید کړ او نه یې رد کړ. د دغه وزارت ویاند شفقت علي خان خبرې کنفرانس ته وویل چې دې ته انتظار کوي چې پوځ دا پښه رسما تایید کړي.

اوکراین نن ماتم اعلان کړی

 Kyiv, April 24, 2025- سوفیاتوشینڅکي، تر برید وروسته
Kyiv, April 24, 2025- سوفیاتوشینڅکي، تر برید وروسته

کییف نن د هغو دولسو کسانو لپاره د ماتم ورځ اعلان کړې چې د روسیې د توغندیو او ډرون الوتکو په بریدونو کې پرون په اوکراین کې ووژل شول.

د اوکراین د بهرنیو چارو وزارت اعلان وکړ چې په کییف او بهر کې به د اوکراین په دیپلوماتیکو ماموریتونو کې بیرغونه نیم ځوړند شي.

د اوکراین ولسمشر ولودومیر زیلینسکي وویل، په داسې حال کې چې د کییف اوسیدونکي د قربانیانو ویر کوي او انبارونه پاکوي، د اوکراین استخبارات د دې لټه کوي چې وګوري په دې بریدونو کې په شمالي کوریا کې جوړ شوي توغندي استعمال شوې دي که نه دي.

زیلینسکي زیاته کړه، که دا ثابته شي دا به د مسکو او پیونګ یانګ ترمنځ د ګډ جرم بل ثبوت وي.

د کیوبا د جاسوسۍ یو افسر چې امریکا ته په جاسوسۍ تورن وو تر ۲۷ کاله بند وروسته خوشې شو

یو زندان او امنیتي ساتونکی یې
یو زندان او امنیتي ساتونکی یې

ارنستو بورخس فرانسپرس ته وویل له خپلې ازادۍ خوشاله دی که څه هم د سترګو عملیات باید وکړي.

بورخس ویلي ژر غواړي له کیوبا ووځي او امریکامتحده ایالتونو ته لاړ شي.

دا کیوبايي افسر په ۱۹۹۹ کال کې امریکايي ډپلوماټانو ته د پټو معلوماتو د لېږد د هڅې پر مهال نیول شوی وو او د هاوانا د یوې پوځي محکمې له خوا په ۳۰ کلونو بند محکوم شو.

هغه په ځلونو د دې حکم په وړاندې اعتراض کړی وو او ویلي یې وو داسې حکم ورباندې شوی چې ګواکې ده واقعاً هغه کار کړی وو.

بورخس ۵۹ کلن دی او یوه ۲۱ کلنه لور یې په کاناډا کې اوسیږي.

هغه ویلي چې د زندان ۱۱ کاله یې په کوټه قلفۍ کې تېر کړي دي.

ملګري ملتونه وايي ټکنالوژۍ او مصنوعي زیرکتیا کې د نجونو ونډه کمه ده

افغان نجلۍ
افغان نجلۍ

د ټیکنالوژۍ په برخه کې د نجونو د نړیوالې ورځې په مناسبت، ملګري ملتونه وايي چې انټرنیټ او ټیکنالوژۍ ته د مساوي لاسرسي نشتوالی نجونې د ژوند له مهمو فرصتونو څخه محرومولی شي.

د پنجشنبې په ورځ، د اپرېل په ۲۴مه، د ملګرو ملتونو د سرمنشي مرستیالې امینې محمد د دې ورځې په مناسبت په خپل ایکس پاڼه کې ولیکل چې د ټیکنالوژۍ په برخه کې د نجونو حضور خورا اهمیت لري.

ملګرو ملتونو زیاته کړه چې د پرمختګ سره سره، نجونې او ښځې لاهم د ډیجیټل ټیکنالوژۍ ته د لاسرسي او رول لوبولو په برخه کې له خنډونو سره مخ دي، په ځانګړې توګه د مصنوعي زیرکتیا په برخه کې.

د ټیکنالوژۍ په برخه کې د نجونو نړیواله ورځ داسې حال کې راغله چې افغانستان کې نجونې له شپږ ټولګي پورته له هر ډول زده کړو منع دي او انټرنیټ او ډیجیټل ټیکنالوژیو ته یې لاسرسی ډېر محدود دی.

د هند صدراعظم ترهګرو ته خبرداری ورکړ

د هند صدراعظم مودي-ارشیف
د هند صدراعظم مودي-ارشیف

د هند صدراعظم خبرداری ورکړ چې د پهلګام په برید کې ښکېلو کسانو ته به له تصوره پورته سزا ورکړي.

نریندرا مودي نن په بیهار کې یوې غونډې ته وویل، هند به هر ترهګر او د هغوی ملاتړي وپيژني، وبه یې څاري او سزا به ورکړي. ښاغلي مودي زیاته کړه چې د دغو بریدونو تر شا لاس لرونکو ترهګرو ته به د هغوی له ملاتړیو سره یوځای سخته سزا ورکړي.

دا لومړی ځل دی چې ښاغلی مودي تر خپلې ادارې لاندې د کشمیر په پهلګام کې د شوي برید په اړه په یوه عمومي غونډه کې د وینا پر مهال د خپل حکومت دریځ روښانوي.

د سه شنبې په ورځ د هند تر واک لاندې کشمیر د پهلګام په تفریحي سیمه کې وسله والو پر سیلانیانو ډزې وکړې چې ۲۶ کسان پکې ووژل شول.

نور راوښيه

XS
SM
MD
LG