د متحدوایالتونو د پوځ الوتکو له دې هېواده د نیول شویو غیرقانوني کډوالو د ایستلو بهیر پرون (د جنوري ۲۴مه) پیل کړ.

یوه امریکايي چارواکي رویټرز خبري آژانس ته ویلي دي چې د دې اقدام په پیل کې په دوو سي- ۱۷ (C-17) الوتکو کې اتیا اتیا کسان ګواتیمالا ته ولېږل شول.

د امریکا د بهرنیوچارو وزارت ویلي دي چې ګواتیمالا او متحدوایالتونو موافقه کړې چې د غیرقانوني کډوالو لړۍ به پای ته رسوي او د خپلو سرحدونو امنیت به پیاوړي کوي.

دا کار د ولسمشر ډونالډټرمپ د امر په اساس پیل شوی او د امریکا دفاع وزارت هممهاله جنوبي سرحدونو ته د نورو سرتېرو استولو ته تیاري نیسي.

د امریکا پوځ له دې مخکې هم له پوځي الوتکو څخه بهر ته د خلکو په لېږد کې کار اخیستی، لکه په ۲۰۲۱ کال کې د کابل د سقوط پرمهال؛ خو یوه امریکايي چارواکي ویلي دي چې د امریکا په معاصر تاریخ کې دا لومړی ځل دی چې له پوځي الوتکو څخه له دې هېواده بهر ته د کډوالو په ایستلو کې کار اخیستل کېږي.

په هغو برمته وو کې چې ټاکل شوې حماس ډله به یې نن څخه خوشې کړي څلور ښځینه اسراییلۍ پوځیانې شاملې دي.

د مدافع وکیلانو یوې ډلې چې د برمته وو د کورنیو استازیتوب کوي پرون جمعه دا خبر ورکړ. حماس چې متحدایالات او اروپايي ټولنه یې یوه تروریستي ډله بولي، د دې برمته وو نومونه پرون خپاره کړل.

د اسراییلو او حماس ترمنځ د اوربند د کاواکه موافقې له مخې د غزې جګړه به د شپږو اونیو لپاره بندیږي او په دې ترڅ کې به حماس لسګونه اسراییلي برمته او اسراییل به سلګونه فلسطیني اسیران خوشې کوي او په عین حال کې به غزې ته د بشري مرستو رسول دوام کوي.

د څلورو برمته وو په بدل کې به اسراییل ۲۰۰ فلسطیني بندیان خوشې کړي. په دې ډله کې هغه ۱۲۰ وسله وال هم شامل دي چې د وژونکو حملو په تور په دایمي حبس محکوم شوي دي.

د اسراییل او حماس ترمنځ د اسیرانو لومړۍ تبادله تېره یکشنبې وشوه چې په ترڅ کې یې ۳ اسراییلي برمته د ۹۰ فلسطیني بندیانو په بدل کې خوشې شول.

په همدې حال کې هغه فلسطینیان چې په پام کې ده د اوربند له موافقې وروسته خپلو مېنو ته ستانه شي په ډېر بدحالت کې بشري مرستو ته سترګې په لاره دي.

جرمني په پام کې لري چې په جنايي جرمونو د محکومو افغانانو یوه بله ډله هم افغانستان ته واستوي.

د جرمني سوید دویچه څایتونګ ورځپاڼې پرون (د سلواغې ۵مه) د کورنیوچارو وزارت د سرچینو په حواله راپور ورکړ چې چارواکو له یوه سیمه ایز شریک سره ګډ کار پیل کړی دی څو د افغانانو د جرمني له عمومي انتخاباتو مخکې ولېږي.

د رویټرز خبري آژانس د راپور له مخې د جرمني د کورنیوچارو وزارت یوه ویاند دا خبره تایید کړه چې د دې افغان کډوالو د ایستلو پر پلان کار روان دی خو زیاته یې کړه چې دا پرېکړه د جنوري د ۲۳مې له انتخاباتو سره هېڅ راز تړاو نه لري.

ویاند همدراراز یادونه وکړه چې دا ډله افغانان به هغه مهال افغانستان ته په یوه الوتنه کې واستول شي چې شرایط ورته برابر شي.

دا پریکړه وروسته له هغه اعلانېږي چې د چارشنبې په ورځ د جرمني فرانکفورت ښار ته نژدې په یوه عمومي پارک کې یوه افغان کډوال د چړې په ګوزارونو دوه کسان چې یو یې یو دوه کلن ماشوم و، ووژل.

دې پیښې نه یوازې د اپوزیسیون ګوندونو او عامو خلکو سخته غوسه وپاروله، بلکې له دې هېواده د غیرقانوني کډوالو د ایستلو غوښتنې یې زیاتې کړې.

د یمن حوثي یاغیانو د ګیلیکسي لیډر په نوم د یوې سوداګریزې کښتۍ عمله خوشې کړې ده.

اسوشیټیډ پریس راپور ورکړ چې یاغیانو دا کښتۍ د ۲۰۲۳ کال په نومبر کې په سره سمندر کې پر کښتیو د بریدونو په پیل کې ونیوله.

دا بریدونه د اسراییلو او حماس ترمنځ د جګړې په ځواب کې ترسره شول.

امریکا او اروپايي ټولنه حماس د یوې ترهګرې ډلې په توګه پیژني.

اسوشیټیډ پریس راپور ورکړی د دې کښتۍ د عملې ازادول د حوثي یاغیانو لخوا په غزه کې تر اوربند وروسته د بریدونو د کمولو لپاره وروستۍ هڅه ده.

د امریکا ولسمشر ډونالډ ټرمپ ویلي چې د یمن حوثي یاغیان به د ترهګرو سازمانونو په خپل لیست کې شامل کړي.

د ملګرو ملتونو د ماشومانو وجهي صندوق (یونیسف) ویلي دي تېر کال د سختې ګرمۍ د څپو، طوفانونو، سېلابونو او شدید موسم له وجې ((په ۸۵ هېوادونو کې د لږ تر لږه ۲۴۲ مېلیونه ماشومانو)) زده کړې له خنډونو سره مخامخ شوي دي.

یونیسف ویلي په افغانستان کې په مې میاشت کې د ګرمۍ تر څپو وروسته په سختو سېلابونو کې تر ۱۱۰ زیات ښوونځي ړنګ شول.

په افغانستان کې د طبیعي پېښو سربېره د واکمنو چارواکو د ستخدریځیو په سبب هم تر شپږم ټولګي پورته لکونه افغان نجونې له ښوونځیو محرومې دي.

د تعلیم نړیوالې ورځې په مناسبت یونیسف همداراز په خپل رپورټ کې زیاته کړې چې د افغانستات ګاونډ پاکستان کې هم تېر کال په اپرېل کې د سېلابونو له وجې تر ۴۰۰ زیات ښوونځي ړنګ شوي دي.

راپور زیاتوي چې ۱۷۱ مېلیونه ماشومان د ګرمې څپې له امله اغېزمن شول چې ورڅخه ۱۱۸ مېلیونه د بنګلادېش، هند، کمبوډیا، تایلینډ او فېلېپین اوسېدونکي ول.

د امریکا د متحد ایالتونو ولسمشر ډونالډ ټرمپ وایي، پر روسیې به د بندیزونو له لارې نور فشار راولي.

ډونالډ ټرمپ پرون انلاین د سویس په داووس کې نړیوالې اقتصادي غونډې ته وینا وکړه.

ده په اوکراین کې د جګړې ژر پای ته رسیدو په اړه په دې غونډه کې د یوه سوال په ځواب کې وویل چې دی غواړي په لنډې راتلونکې کې د روسیې له ولسشمر ولادیمیر پوتین سره وګوري او غواړي چې د تعرفې او نورو بندیزونو له لارې پر روسیې فشارونه زیات کړي.

ډونالډ ټرمپ د انتخاباتي مبارزو پرمهال ژمنه کړې وه چې د ولسشمرۍ د کار له پيلیدو سره به سم د اوکراین جګړه په څلوریشت ساعتونو کې پای ته رسوي، دی په وروستیو اونیو کې له دې ژمنې په شا شوی، خو لاهم ټینګار کوي چې دا جګړه به ژر ختموي.

د روسیې د پلازمینې ماسکو په جنوبي ختیځ کې د ریازان سیمې والي وایي، د روسیې هوایي ځواکونو یو شمیر بې پيلوټه الوتکې نسکورې کړې دي.

پاول مالکوف نن سهار د دې الوتکو د نسکوریدو خبر و رکړ او ویې ویل چې چاته زیان نه دی اوښتی.

د ماسکو ښاروال سرګي سوببیانین هم نن وویل چې د اوکراین د هغو ډرون الوتکو مخه یې نیولې ده چې د ماسکو په لور روانې وې.

د روسیې دفاع وزارت تر دې مخکې ویلي و چې د اوکراین نهه څلویښت بې پيلوټه الوتکې یې له منځه وړې دي چې اکثر یې د اوکراین پولي ته څيرمه د کورسک په سیمه کې نسکورې شوې دي.

د دې وزارت په بیان کې راغلې دي چې د بریانسک، بلګورود او کریمیا ټاپوزمه پر سر یې هم بې پيلوټه الوتکې ویشتلې دي.

د عراق د بهرنیو چارو وزیر وايي د سوریې په شمال کې پر کُرد ځواکونو د ترکیې هوايي حملې ښايي خطرناکې وي.

فواد حسین پرون په داویس کې د اقتصاد نړیوال فورم غونډې ته ویلي، چې دغه حملې به عراق ته د سوریې له شمال څخه د نورو کسانو د کډوالۍ سبب شي.

د ترکیې حکومت هغو کُرد وسلوالو ته چې د سوريې په شمال کې یې د اسلامي دولت ډلې یا داعش پر خلاف په پوځي عملیاتو کې له امریکا سره همکاري کړې، د تروریستانو په سترګه ګوري.

د سعودي عربستان د بهرنیو چارو وزیر پرون بیروت ته لاړ چې د لبنان له نوي مشرتابه سره پر ځینو مسایلو خبرې وکړې.

دا څه باندې لس کاله وروسته لومړی وار دی، چې لبنان ته د سعودي عربستان یو لوړ رتبه ډیپلومات سفر کوي.

د لبنان چارواکي هیله من دي، له څو کلن اقتصادي رکود، دغه راز د اسرائیل او حزب اله ترمنځ له جګړې وروسته د بیارغونې لپاره د خلیج د شتمنو هېوادونو مالي مرستې جلب کړي.

د لبنان ملي خبري اژانس راپور ورکړی، چې د سعودي عربستان د بهرنیو چارو وزیر شهزاده فیصل بن فرحان لبنان ته رسېدلی دی.

هغه به د لبنان له نوي غوره شوي ولسمشر جوزیف عون سره هم وګوري، چې ګومان کېږي ریاض یې د کاندیداتورۍ سخت ملاتړ کاوه.

د مصر ولسمشر عبدالفتاح السیسي وايي، په سومالیا کې د افریقايي اتحادیې په نوي ماموریت کې د مصر د پوځي ځواکونو ګډون، هېڅ هېواد ته کوم خطر نه دی پېښ کړی.

السیسي پرون پنج شنبه په قاهره کې د سومالیا له ولسمشر، حسن شېخ محمود سره تر کتنې وروسته دا خبره وکړه.

مصر د ۲۰۲۴م کال په وروستیو کې اعلان کړی و، چې د افریقايي تحادیې په دغه ماموریت کې به، چې په سومالیا کې به وي، مصري ځواکونه د سوله ساتنې په ماموریت کې برخه واخلي.

ویل شوي د مصر پوځیان د الشباب په څېر د افراطي ډلو په وړاندې په پوځي مبارزه کې هم برخه لري.