د ملګرو ملتونو د ماشومانو وجهي صندوق یا یونېسف یوځل بیا د طالبانو د واکمنۍ پر مهال په افغانستان کې د نجونو او ښځو پر زده کړو ټینګار کړی دی.

د سه شنبې په ورځ د جنورۍ ۱۶مه دغې ادارې په ایکس پاڼه کې لیکلي چې ډېری افغان مېرمنې غواړي پر خپلو لوڼو زده کړې وکړي.

يونېسف د نورستان ولايت د يوې اوسېدونکې سيدې بي بي په اړه ليکلي، چې له دې ادارې څخه د نغدي مرستو له ترلاسه کولو وروسته يې ویلي چې غواړي دا پیسې د خپلو نجونو پر زده کړو ولګوي.

سيده بي بي هيله څرګندوي، چې لوڼې به يې یوه ورځ ښې دندې ولري څو مجبوره نه وي د دې په څېر په کروندو کې کار وکړي.

د ۲۰۲۱ کال په اګست کې واک ته د طالبانو له راتګ وروسته افغان نجونو ته له شپږم ټولګي پورته ښوونځیو ته د تګ اجازه ورنه کړل شوه او د ۲۰۲۲ کال په ډسمبر کې هم د پوهنتونونو دروازې د افغان نجونو او ښځو پر مخ وتړل شوې.

د افغانستان لپاره د پاکستان ځانګړي استازي محمد صادق وویل چې په افغانستان کې د طالبانو له حکومت سره د لوړې کچې دوه اړخیزې اړیکې له اوږدې وقفې وروسته بیا پیل شوې دي.

هغه د پنجشنبې په ورځ ناوخته په یوه بیان کې وویل چې پاکستان به د طالبانو له چارواکو سره کار وکړي ترڅو د افغانستان په ګډون درې اړخیز او څو اړخیز ډیپلوماتیک میکانیزمونه بیا فعال کړي.

په دې میکانیزمونو کې د روسیې په ګډون یوشمیر ګاونډیان، د پاکستان افغانستان او چین درې اړخیز لورې، ازبکستان او ایران سره مذاکرات شامل دي.

په ورته وخت کې، محمد صادق د پنجشنبې په ورځ د افغانستان لپاره د چین له ځانګړي استازي یو شیاویونګ سره د افغانستان په شمول د درې اړخیزې پروسې د بیا پیلولو او د پخوانیو تړونونو د تعقیب لپاره انلاین خبرې وکړې.

نوموړي وویل، دا وړاندیز به ډېر ژر له افغان حکومت سره شریک شي.

د افغانستان لپاره د پاکستان ځانګړی استازی د چهارشنبې په ورځ کابل ته تللی و او د طالبانو د بهرنیو چارو د وزیر امیر خان متقي په ګډون یې له یوشمیر چارواکو سره لیدلي و.

هغه د کابل له سفر وروسته خپله غونډه رغنده وبلله، او زیاته یې کړه چې د دوی خبرې له حساسو او ستراتیژیکو موضوعاتو راڅرخیدې، خو هغه نور وضاحت ورنه کړ.

له هغه وخته چې طالبانو بیاځلي کابل نیولی دی، د پاکستاني سرحدي ځواکونو او طالبانو ترمنځ څو ځله نښتې شوي دي، او د دواړو خواوو ترمنځ اړیکې په بې ساري ډول سړې شوې دي.

پاکستان پر افغان طالبانو تور لګولی چې د تحریک طالبان پاکستان (ټي ټي پي) غړیو ته پناه ورکوي؛ دا هغه تور دی چې د افغانستان اوسني واکمنانو تل رد کړی دی.

د افغانستان لپاره د یونیسف رییس تاج الدین اویوال، د پنجشنبې په ورځ، په خپله ایکس پاڼه لیکلي چې له ۱.۵ ملیون څخه ډیر ماشومان د خوارځواکۍ له جدي خطر سره مخ دي.

یونیسف زیاته کړه چې د نړیوالو مالي مرستو د کمېدو په سبب د ژوند ژغورونکو معالجوي خوړو (RUTF) له سخت کمښت سره مخ دی؛ هغه مهم مواد چې د شدیدې خوارځواکۍ لرونکو ماشومانو د درملنې لپاره اړین دي.

د ملګرو ملتونو دې ادارې په دې برخه کې د بیړنۍ مرستې غوښتنه کړې ده.

مخکې له دې، د خوړو نړیوال پروګرام هم ویلي وو چې د تمویل د نشتوالي له امله، په افغانستان کې د ماشومانو د خوارځواکۍ د مخنیوي او مبارزې پروګرامونه به د مې تر میاشتې پورې وځنډول شي.

دې ادارې وویل چې په راتلونکو شپږو میاشتو کې په هیواد کې د خوراکي توکو د حیاتي مرستو د ساتلو لپاره په بیړني ډول ۵۵۵ ملیون ډالرو ته اړتیا لري.

یو افغان ځوان چې د امریکا په اوکلاهوما ښار کې د ټاکنو په ورځ د برید د پلان په تور نیول شوی وو په خپل جرم اعتراف کړی.

د څارنوالانو په خبره اتلس کلن عبدالله حاجي زاده چې د اوکلاهوما په مور Moore کې اوسېده، د ترهګرۍ برید لپاره د وسلو او مهماتو د ترلاسه کولو او دسیسې جرم منلی.

عبدالله، چې د نیول کېدو پر مهال ۱۷ کلن و، د سزا په تمه دی او تر ۱۵ کلونو پورې په بند او دوه نیم لکو ډالرو جریمې سره مخ دی.

د محکمې اسناد ښيي حاجي زاده د زندان د دورې له تېرولو وروسته له امریکا څخه د ایستل کېدو له پرېکړې سره موافقه ښوولې.

د پنجشنبې په ورځ د عبدالله حاجي زاده وکیل، جیف بایرز سره پاتې شوي ټیلیفوني او بریښنالیک پیغامونه سمدلاسه هغه ته بېرته نه دي سپارل شوي.

د حاجي زاده ملګری – تورن، ۲۷ کلن، ناصر احمد توحیدي، چې پخوا یې په افغانستان کې د امریکا د پوځي تاسیساتو لپاره د امنیتي ساتونکي په توګه کار کاوه، اوس مهال د اسلامي دولت ډلې ته د مادي ملاتړ چمتو کولو او د توطیې جوړولو په تور د محاکمې په تمه دی.

څارنوالان ادعا کوي چې حاجي زاده او توحیدي د AK-47 ټوپکونو او مهماتو ترلاسه کولو لپاره اقدام کړی وو او پلان یې درلود چې تېر کال د ټاکنو په ورځ د خلکو ګڼه ګوڼه هدف وګرځوي او برید ترسره کړي.

د ملګرو ملتونو کارپوهانو په طالبانو غږ کړی چې سمدستي اعدام او نورې ټولې بدني سزاوې بندې کړي.

دغو کارپوهانو په یوه اعلامیه کې چې پرون د ملګرو ملتونو د بشري حقونو شورا خپره کړې د طالبانو له خوا د اعدام وروستۍ پېښې په کلکه غندلي دي.

د ملګرو ملتونو دغو کارپوهانو اعدام او نورې سزاوې غیر انساني او د نړیوالو قوانینو په خلاف بللي.

د طالبانو حکومت تېره اوونۍ څلور کسان په بادغیس، فراه او نیمروز کې د خلکو مخته اعدام کړل.

د ملګرو ملتونو د کارپوهانو ډلې د اعدام دغو پېښو ته په شارې ویلي چې په عام محضر کې د اعدام تطبیق هېڅکله ان له دیني پلوه د دوی په خبره د توجیه وړ نه دی.

ملګرو ملتونو ویلي چې اعدامونه وحشت زیاتوي او ټولنه د تاوتریخوالي په وړاندې بې حسه کوي.

د ملګرو ملتونو په دغه اعلامیه کې یاده شوې چې طالبانو له بیا واکمنېدو راهیسې لس کسان اعدام کړي دي.

که څه هم د ملګرو ملتونو په شمول ګڼو نړیوالو بنسټونو او بشرپالانو له طالبانو مخکې هم غوښتي چې اعدام او نورې سزاوې بندې کړي خو د طالبانو حکومت وايي شریعت تطبیقوي.

د روسیې سترې محکمې نن پنجشنبه طالبان د ترهګریزو ډلو له نوملړه لرې کړل.

اسوشیتید پریس خبري اژانس دا کار د طالبانو لپاره " دیپلوماتیکه بریا" بللې.

روسیې په ۲۰۰۳ کال کې طالبان د ترهګرو ډلو په نوملړ کې شامل کړي وو.

تر دې وړاندې د روسي د کابینې یوشمېر غړو له ولسمشر پوتین نه غوښتي وو چې طالبان له دې نوملړه وباسي.

هغه مهال روسي چارواکو ویلي و چې دوی د طالبانو د حکومت رسمیت پيژندنې ته ګامونه جدي کړي دي.

د طالبانو د صنعت او سوداګرۍ سرپرست وزیر نورالدین عزیزي په اسلام اباد کې له خپل پاکستاني سیال جام کمال خان سره د دواړو هیوادونو ترمنځ د شته ترانزیتي ستونزو په اړه خبرې وکړې.

د طالبانو د صنعت او سوداګرۍ وزارت نن ( پنجشنبه د حمل ۲۸مه) په یوه بیان کې څرګنده کړه چې په دې غونډه کې د څلرویشت ساعتونو په مخ د تورخم بندر د فعالیت، د غلام خان بندر له لارې دوه اړخیزه سوداګري، د دواړو هیوادونو له لارې د بار وړونکو موټرو تګ راتګ، بانکي تضمین او د بندرونو د تنظیم لپاره د جامع میکانیزم د رامنځته کیدو په اړه بحثونه او خبرې شوې دي.

په اسلام اباد کې د طالبانو سفارت ویلي دي چې دواړو لوریو ترمنځ به بیلابیلې تخینکې غونډې ترسره شي چې پکې داسې پریکړې وشي چې دوه اړخیزه سوداګري وده وکړي.

د طالبانو د صنعت او سوداګرۍ د سرپرست وزیر په مشرۍ پلاوی پرون په درې ورځني سفر اسلام اباد ته ورسید.

د طالبانو د صنعت او سوداګرۍ سرپرست وزیر نورالدین عزیزي په اسلام اباد کې له خپل پاکستاني سیال جام کمال خان سره د دواړو هیوادونو ترمنځ د شته ترانزیتي ستونزو په اړه خبرې وکړې.

د طالبانو د صنعت او سوداګرۍ وزارت نن په یوه بیان کې څرګنده کړه چې په دې غونډه کې د څلرویشت ساعتونو په مخ د تورخم بندر د فعالیت، د غلام خان بندر له لارې دوه اړخیزه سوداګري، د دواړو هیوادونو له لارې د بار وړونکو موټرو تګ راتګ، بانکي تضمین او د بندرونو د تنظیم لپاره د جامع میکانیزم د رامنځته کیدو په اړه بحثونه او خبرې شوې دي.

په اسلام اباد کې د طالبانو سفارت ویلي دي چې دواړو لوریو ترمنځ به بیلابیلې تخینکې غونډې ترسره شي چې پکې داسې پریکړې وشي چې دوه اړخیزه سوداګري وده وکړي.

د طالبانو د صنعت او سوداګرۍ د سرپرست وزیر په مشرۍ پلاوی پرون په درې ورځني سفر اسلام اباد ته ورسید.

د اوکراین پر جنوب ختیځ ښار دنیپرو د روسیې د بې پیلوټه الوتکې په برید کې دوه میرمنې او یو ماشوم وژل شوی او د درې ماشومانو په ګډون ۳۱ تنه ټپیان شوي دي.

د سیمې والي سیرهي لیساک تېره شپه پر خپل ټېلګرام چېنل لیکلي چې د پروني برید د ټپيانو له ډلې ۵ یې تر درملنې وروسته له روغتونه رخصت شوي دي.

د دنیپرو ښاروال ویلي چې برید د ښاروالۍ ودانۍ ته په سل متري واټن کې شوی چې له کبله یې شاوخوا ۱۵ هستوګنیز کورونه تخریب شوي دي.

د برید له ځایه په خپرو شویو ویډیوګانو کې د اور لمبې او د اور وژونکو د ژغورنې هڅې ښکاري.

پر اوکراین په دې وروستیو کې دغه خونړي بریدونه داسې مهال کیږي چې دغې جګړې ته اوس په نړیواله کچه د پای ته رسولو هڅې هم ډېرې شوي دي.

د امریکا دوه لوړپوړي چارواکي نن پنجشنبه ( د حمل ۲۸مه) په پاریس کې د اوکراین د جګړې په پای ته رسولو او له ایران سره د امریکا د احتمالي شخړې پر مخنیوي خبرې کوي.

د متحدو ایالتونو د بهرنیو چارو وزیر مارکو روبیو او د منځني ختیځ لپاره یې ځانګړی استازی سټیف ویټکوف د فرانسې له ولسمشر ایمانویل مکرون سره د خبرو په هدف پاریس ته رسیدلي دي.

رویټرز لیکلي چې امریکایي چارواکي به د روسیې په اړه د اروپایي ټولنې اندیښنې اوري او د اوکراین د سولې د پلان پر څرنګوالي به خبرې کوي.

اروپایي مشران د ټرمپ پر هغې ډيپلوماسۍ خفه دي چې د اوکراین په جګړه کې یې خپله اوکراین پړ بللی دی.

د منځني ختیځ لپاره به د امریکا استازی له پاریس وروسته روم ته ولاړ شي او هلته به د ایران د بهرنیو چارو له وزیر عباس عراقچي سره د ایران د اټومي پروګرام پر سر خبرې وکړي.

ټرمپ تر دې وړاندې خبرداری ورکړی که ایران له اټومي پروګرامونو لاس وانخلي، د اسراییل په وسیله به برید پرې وکړي.

یوه الوتکه چې ۱۳۸ افغان کډوال پکې سپاره وو، له اسلام اباد څخه د جرمني لایپزیګ ښار ته ورسیده.

د جرمني د بهرنیو چارو وزارت ویاند وویل چې ټولو افغانانو د "مشروط قانوني استوګنې جوازونه" ترلاسه کړي دي.

د جرمني د کورنیو چارو وزارت ویلي چې په پناه غوښتونکو کې ۴۵ ماشومان، ۷۶ ښځې او ۶۲ نارینه شامل دي.

دوی به لومړی د مرکزي جرمني د کډوالو کمپ ته ولیږدول شي او په راتلونکو دوو اونیو کې به نورو ښارونو ته وویشل شي.

سږ کال درې نورو الوتکو ۴۶۱ افغان کډوال جرمني ته لیږدولي.

د جرمني د بهرنیو چارو وزارت وايي چې نږدې ۲۶۰۰ "زیان منونکي" افغانان لا هم جرمني ته د لېږد په تمه دي.

دا هغه افغانان دي چې وايي د طالبانو د واکمنۍ لاندې په افغانستان کې د دوی ژوند په خطر کې دی.

د جرمني د بهرنیو چارو وزارت ویاند د دې پوښتنې په ځواب کې چې زیانګالي افغانان به د پاکستان د حکومت لخوا د جبري ایستلو له خطر سره مخ نشي، وویل: "موږ د پاکستاني چارواکو سره نږدې همغږي لرو او ژمن یو چې د هغو کسانو سره مرسته وکړو چې د لیږد ژمنه یې شوې ده."