ګلوب اینډ مېل:
ګلوب اینډ مېل کاناډايي ورځپاڼې د هندي ژورنالیست روچي کومار یوه لیکنه خپره کړې چې سرلیک یې دی: "د اقلیم د بدلون سره مبارزې لپاره د طالبانو سره کار کولو ته اړتیا ده."
د کومار لیکنه پر افغانستان د اقلیمي بدلون د اغېزو او د ګاونډیو هېوادونو ایران او ازبکستان سره د اوبو د شخړو له امله په رامنځ ته شویو پېچلو ننګونو بحث کوي هغه څه چې د لیکوال په باور د سیاسي بې ثباتۍ او د طالبانو د واکمنۍ له امله زیات شوي.
لیکوال زیاتوي، سره له دې چې افغانستان په نړۍ کې د ککړو ګازونو چې اقلیم ته زیان رسوي تولید کې ډېره کمه ونډه لري، خو د اقلیم بدلون پرې سختې اغېزې کړي او له سختو وچکالیو او سېلابونو سره مخ دی.
په لیکنه کې پر دې هم ټینګار شوی چې د طالبانو د حکومت نړیواله انزوا د دې سبب شوې چې د اقلیم بدلون سره د جوړ راتلو د ځینو مهمو پروژو تمویل بند شي.
په لیکنه کې هغه اړتیا په ګوته شوې چې وايي، افغانستان کې د اقلیمي بدلون له اغېزو سره باید غیرسیاسي چلند خپل شي او د طالبانو، مدني ټولنې او نړیوالو ادارو په شمول له بېلابېلو ښکېلو لورو سره د کار کولو سپارښتنه کوي.
لیکوال ټینګار کوي چې اوسني وضعیت د اقلیمي بدلون نړیوال ماهیت او د جامع او له پولو هاخوا د هواري اړتیا په ګوته کوي.
عرب نیوز ویبپاڼه:
له سعودي عربستان خپرېدونکې عرب نیوز ویبپاڼې د پاکستان په لاهور کې د منجمینټ ساینس پوهنتون د سیاسي علومو د پوهنځي د یو استاد رسول بخش رییس یوه مقاله خپره کړې ده.
د دې مقالې سرلیک دی: "هغه څه چې پاکستان د افغانستان په اړه ناسم درک کړي."
لیکوال وايي، هغه څه چې پاکستان یې په پوهېدو کې پاتې راغلی دا دي چې د ټولو نظریو او لورو افغانان، هغوی کې د هر ډول خپلمنځي ویش په هر اړخ کې وي، هیڅکله دا نه مني چې پاکستان ورته ووايي کوم څه د دوی لپاره ښه دي او له ځینو هېوادونو سره دې څه ډول اړیکې وپالي؟
اینډیپنډینټ:
له بریتانیا خپرېدونکې اینډیپنډینټ ورځپاڼې بیا د شاوخوا اویا افغان ښځو پر هغه پرانیستي لیک راپور خپور کړی چې ملګرو ملتونو ته یې د طالبانو په مدرسو کې د نجونو د زده کړو په اړه استولی دی.
د ملګرو ملتونو د عمومي منشي په نوم په دې لیک کې افغان ښځینه فعالانو ویلي، طالبان د خلکو له دیني باورونو څخه د نظامي اهدافو لپاره کار اخلي.
اینډیپنډینټ د دې راپور په پای کې وايي، افغانستان د نړۍ یوازېنی هېواد دی چېرې چې نجونې له شپږم ټولګي پورته له عصري زده کړو منعه شوي دي.
