خو ولادمیر پوتین دا ونه ویل، چې د روسیې د هوايي مدافع دستګاه دې د اذربایجان د هوايي شرکت د الوتکې د سقوط مسوول وي.

د کرملین په وینا، پوتین علییف ته ویلي، چې په همدې شېبه کې پر موزدوک او ولادي وستوک ښارونو د اوکراین حملې روانې وې او د روسیې د هوايي مدافع دستګاه د دغو حملو په دفاع بوخته وه.

تر دې مخکې ګنګوسې وې، چې تېره چهارشنبه د اذربایجان هوايي شرکت د یوې الوتکې په سقوط کې د روسیې د هوايي مدافع دستګاه ښکېله وه.

په هغه الوتکه کې ۶۷ کسان موجود وو، چې د قزاقستان اقتاو ته نږدې نسکوره کړای شوه.

په دې پېښه کې د الوتکې ۳۸ سورلۍ ووژل شوه او ۲۹ نور کسان ټپیان شول.

د روغتیا نړیوال سازمان وايي د اسرائیل دغه چاپه د دې روغتون د خدماتو د ځنډېدو سبب شوی دی. د حماس تر ولکې لاندې د غزې روغتیا په یوه اعلامیه کې ویلي، چې د کمال عدوان روغتون د مشر په ګډون د روغتون لسګونه کارکوونکي د پوښتنو- ګروېږنو لپاره د توقیف یوه مرکز ته لېږدول شوي دي. د امریکا متحد ایالتونه او اروپايي ټولنه حماس ډله یو تروریستي سازمان ګڼي. د غزې د ملکي دفاع بنسټ هم د کمال عدوان روغتون د مشر حسام ابو صفیه د نیولو خبر ورکړی دی. د اسرائیل پوځ پرون جمعه د کمال عدوان روغتون په مربوطاتو کې د عملیاتو خبر ورکړ او ادعا یې وکړه، چې له دغه ځای څخه تروریستي سازمانونو د کلیدي مرکز په توګه کار اخیست.

د ترکیې د کورنیو چارو وزیر وايي چې د دې هېواد امنیتي ځواکونو ۶۵۶ داسې کډوال نیولي دي چې د اقامت قانوني اسناد نه یې نه لرل.

علي یرلي‌کایا پرون (جمعه) پر خپله ایکسپاڼه یا پخواني ټویټر کې لیکلي چې دغه کسان د (کالکان ۳۶) په نوم د عملیاتو په ترڅ کې پېژندل شوي او نیول شوي دي.

د هغه په وینا، خپلو هېوادونو ته د دغو کډوالو د بېرته ستنېدو چارې پیل شوې دي.

ده نه دي ویلي چې نیول شوي بې اسناده کډوال په کومو هیوادونو پورې تړاو لري خو په تیرو دوو کلونو کې د ترکیې امنیتي ځواکونو د نورو ملیتونو ترڅنګ ګڼ شمېر افغان کډوال هم نیولي او اکثره یې افغانستان ته لېږلي دي.

د ترکیې د کورنیو چارو وزیر همداراز ویلي چې په دې عملیاتو کې ۵۲ کسان د انسانانو د قاچاق په تور نیول شوي دي. ده د انساني قاچاقبرو هویت په اړه څه نه دي ویلي.

علي یرلي‌کایا زیاته کړې چې د ناقانونه کډوالو د پېژندلو او نیولو چارې د لویې څارنوالۍ، د مهاجرت ادارې، د عمومي امنیت ریاست، د ژاندارمې عمومي قوماندانۍ او د ساحل ساتونکو د قوماندانۍ په همغږۍ ترسره کېږي او دوام به ولري.

ترکیې د بېرته ستنېدو ۳۲ مرکزونه جوړ کړي چې شاوخوا ۲۰ زره کسانو ته ځای ورکولی شي.

د جرمني ولسمشر فرانک والټر شټاینمایر نن (د ډسمبر ۲۷مه) د دې هیواد پارلمان منحل کړ او د فبرورۍ په میاشت کې یې تروخت مخکې انتخابات تایید کړل.

دا پریکړه وروسته له هغه وشوه چې د صدراعظم اولاف شولز په مشرۍ حکومت تیره میاشت ړنګ شو.

د جرمني حکومت د اروپا د دې ستر اقتصاد د رغولو د څرنګوالي په اړه له داخلي اختلافاتو سره مخامخ و، خو تېره اونۍ د کرسمس پر یوه مارکېټ له برید وروسته د امنیت او کډوالۍ پر سر اختلافات هم پرې ورزیات شول.

د طالب عبدالمحسن په نوم د سعودي یوه وګړي چې ۱۸ کاله وړاندې جرمني ته کډوال شوی و، تېره اونۍ د مګدیبورګ ښار د یوه بازار په ګڼه ګوڼه کې خلک ترخپل ګړندي موټر لاندې کړل. په دغه برید کې پنځه تنه وژل شوي او تر ۲۰۰ زیات ټپیان شوي دي.

طالب المحسن، چې یو پنځوس کلن ارواپوه دی، د ښي اړخو پلوي بلل شوی او ویل کېږي هغه، چې ویل یې پخوا مسلمان و، له هغه څه سره مخالف و، چې د اروپا د اسلامي کیدلو هڅې بلل کېږي.

د هند پخوانی صدراعظم من موهن سنګ چې په هند کې د مهمو اقتصادي اصلاحاتو معمار ګڼل کېده د ۹۲ کلونو په عمر مړ شو.

د اسوشېټېډ پريس اژانس د خبر له مخې، په نوي ډیلي کې د هند د طبي علومو انسټیټیوټ په یوه بیان کې ویلي چې سنګ ناڅاپه د پنجشنبې پر ماښام بېهوښه شو او روغتون ته یووړل شو او د شپې پر نهو بجو او ۵۱ دقیقو مړ اعلان شو.

من موهن سنګ د ۲۰۰۴ او ۲۰۱۴ کلونو ترمنځ د دوو پرله پسې دورو لپاره د هند صدراعظم و.

د هند اوسني صدراعظم نریندرا مودي من موهن سنګ د هېواد یو له "تر ټولو غوره مشرانو" بللی دی.

مودي په خپله ایکسپاڼه کې لیکلي: "زموږ د لومړي وزیر په توګه، من موهن سنګ د خلکو د ژوند ښه کولو لپاره ډیرې هڅې وکړې."

د افغانستان پخواني ولسمشر حامد کرزي په دې اړه د ایکسپاڼې په یوه پیغام کې لیکلي چې هند خپل یو تر ټولو نامتو زوی له لاسه ورکړ.

ښاغلي کرزي زیاته کړې چې ډاکټر من موهن سنګ د افغانانو تلپاتی متحد او دوست و.

پخواني افغان ولسمشر د سنګ له کورنۍ، د هند له حکومت او خلکو سره خپله ژوره خواخوږي څرګنده کړې ده.

من موهن سنګ په ۲۰۱۱ کال کې کابل ته سفر کړی و.

نوموړي د افغانستان پخوانۍ ملي شورا ته په وینا کې ويلي وو چې د ده د سفر موخه د افغانستان او هند ترمنځ د اړیکو لا پیاوړې کول دي.

اسراییل وايي چې د هوایي مدافعې سیسټمونو یې له یمن څخه یوتوغول شوی توغندی مخکې له دې چې د اسراییل خاورې ته ورسیږي، شنډ کړ.

د اسراییل پوځ نن- د مرغومي ۷مه، سهاروختي مهال وویل چې د دې شنډ کړای شوي توغندي د ټوټو د راپریوتو له امله د احتمالي زیانونو په خاطر د اسراییل په څو مرکزي سیمو کې د خبرداري زنګونه وهل شوي و.

له دې مخکې اسراییلي جنګي جټ الوتکو پرون پنجشنبې د ایران ملاتړو حوثي یاغیانو د بریدونو په ځواب کې په یمن کې څو ځایونه په نښه کړل. د رسمي شمېرو له مخې، د دغو بریدونو په نتیجه کې لږترلږه شپږ کسان ووژل شول او له ۴۰ زیات نور ټپیان شول.

د غزې د جګړې له پیل راهیسې، د یمن حوثيانو پراسراییلو د توغندیو او بې پیلوټه الوتکو یا ډرونونو بریدونو ته دوام ورکړی. اسراییل د ځوابي حملو په ترڅ کې په وروستي هوایي برید کې د صنعا د نړیوال هوایي ډګر په ګډون د حوثیانو بنسټیز تاسیسات په نښه کړل.

د اسراییل صدراعظم بنیامین نتنیاهو د پنجشنبې په ماښام د هغه څه چې ده د " ایران د شرارت محور" وباله، د له منځه وړلو لپاره د اسراییل پرهوډ یوځل بیا ټینګاروکړ.

د روسیې ولسمشر ولادیمیر پوتین وایي، د سلواکیا صدراعظم رابرت فیڅو څرګنده کړې ده چې هیواد یې د ماسکو او کییف ترمنځ د اوکراین د جګړې په اړه د سولې احتمالي خبرو ته زمینه برابروي.

ولادیمیر پوتین پرون رسنیو ته وویل چې فیڅو له ده سره په خپلو وروستیو خبرو کې ورته ویلي دي، که چیرته خبرې وشي نو خوښ به وي چې سلواکیا یې کوربنه وي.

د پوتین ډیر وړاندیزونه تر اوسه د اوکراین ولسمشر ولودومیر زیلینسکي ته د منلو نه ښکاري.

له دوه زره دوه ویشتم کال راپه دې خوا چې روسیې پر اوکراین غیرموجه برید پيل کړی، فیڅو د اروپا له ګوتو په شمیرو مشرانو څخه دی چې له پوتین سره یې خپله دوستي ساتلې ده.

دا دوستي د دې سبب شوې ده چې زیلینسکي او د لویدیځ ګڼ مشران د سلواکیا پر صدراعظم انتقاد وکړي.

ټاکل شوې ده چې د ایران ولسمشر مسعود پزشکیان راتلونکې میاشت روسیې ته سفر وکړي.

د ایران او روسیې رسنیو پرون د دې سفر خبر ورکړ.

د ایران تسنیم اژانس په ماسکو کې د ایران د سفیر کاظم جلالي په وینا لیکلي دي چې پزشکیان به د جنوري به اوولسمه روسیې ته ولاړ شي او د دې سفر په ترڅ کې به د دواړو هیوادونو ترمنځ د همکارۍ یو توافقلیک لاسلیک کړي.

پر ایران او روسیې لویدیځ سخت اقتصادي بندیزونه لګولې دي او په وروستیو کلونو کې دغو دواړو هیوادونو په خپلو کې همکارۍ زیاتې کړ دي.

د پاکستان پوځ، د دغه هېواد په شمال لوېدیځ کې ډیورنډ کرښې ته څېرمه د ۱۳ وسلوالو د وژل کېدو خبر ورکړ.

د اسوشېټېډ پریس خبري اژانس د راپور له مخې، د پاکستان پوځ ویلي، چې امنیتي ځواکونو د پنج شنبې په ورځ په شمالي او جنوبي وزیرستانونو کې د دوو حملو په نتیجه کې ۱۱ افراطي وسلوال ووژل.

د راپور له مخې ۲ نور افراطي وسلوال په بنو سیمه کې وژل شوي دي.

د پاکستان پوځ دغه راز ویلي، چې د پوځ یو جګړن په شمالي وزیرستان کې له افراطي وسلوالو سره د ډزو په تبادله کې وژل شوی دی.

دغه سیمه پخوا د تحریک طالبان پاکستان یا (TTP) د تحرکاتو عمده مرکز و.

ټي، ټي، پي په وروستیو کې د پاکستان پر امنیتي ځواکونو خپلې حملې زیاتې کړې دي.

د شمالي اتلانتیک پوځي تړون یا ناټو پرون د اذربایجان د هوايي شرکت د یوې الوتکې د سقوط په اړه د بشپړو څېړنو غوښتنه وکړړه.

دغه الوتکه چې ۶۷ کسان په کې سپاره وو، د چهارشنبې په ورځ د قزاقستان د اقتاو ښار ته څېرمه نسکوره شوه، چې له امله یې ۳۸ کسان مړه شول.

د ناټو ویاندې فرح دخل اله پرون پر خپله ایکسپاڼه (پخواني ټویټر) لیکلي، چې د الوتکې د سقوط د پېښې قربانیان او کورنۍ یې د دوی په سوچ او دعاګانو کې دي.

هغې ټپیانو ته د عاجلې شفا او د الوتکې د سقوط د پېښې په اړه د بشپړو څېړنو غوښتنه کړې ده.

ځینو سرچینو رویټرز خبري اژانس ته ویلي، چې دغه الوتکه د روسیې د هوايي مدافع د دستګاه له خوا ویشتل شوې ده.