نړۍ
ویسټ نن د پاکستان سفر پيلوي
![د افغانستان لپاره د امریکا ځانګړی استازی ټوماس ویسټ](https://gdb.rferl.org/08530000-0a00-0242-3e0e-08db029e6403_w250_r1_s.jpg)
ټاکل شوې ده چې د افغانستان لپاره د امریکا ځانګړی استازی ټوماس ویسټ نن پاکستان ته ولاړ شي.
د پاکستان د بهرنیو چارو د وزارت ویانده ممتاز زهره بلوچ وایي چې ښاغلی ویسټ به نن اسلام اباته ورسیږي او د شنبې تر ورځې به په اسلام اباد کې پاتې شي.
ښاغلي ویسټ په خپلې اېکس پاڼه یا پخواني ټویټر کې لیکلي دي چې سیمې ته یې له دوشنبې سفر پيل کړی دی او د لس ورځو په ترڅ کې به پاکستان، متحده عربي اماراتو، قطر او سعودي عربستان ته ولاړ شي.
ویسټ دا هم څرګنده کړې ده چې له دغو مهمو شریکانو سره به پر ګډو امنیتي ګټو، د کډوالو د خوندیتوب او بیا مېشتېدنې پر موضوع، بشري اړتیاوو، بشري حقونو او اقتصادي مسایلو خبرې وکړي.
د ورځې تازه خبرونه دلته ولولئ
ټرمپ: د اوکراین د جګړې د پای ته رسولو لپاره مې له پوتین سره خبرې کړې
![د امریکا ولسمشر ډونالډ ټرمپ او د روسیې د ولسمشر پوتین د یوې پخوانۍ لیدنې پر مهال- عکس له ارشیف اخیستل شوی.](https://gdb.rferl.org/551bea2d-edec-441b-8485-ff262d1ad7a9_w250_r1_s.jpg)
امریکا ولسمشر ډونالډ ټرمپ د چهارشنبې په ورځ د دلوې ۲۴مه اعلان وکړ چې د اوکراین د جګړې د پای ته رسولو لپاره یې له د روسیې ولسمشر ولادیمیر پوتین سره خبرې کړې دي.
د رویټرز خبري اژانس د راپور له مخې، ټرمپ په خپله ټولنیزه رسنۍ کې په یو پوست کې لیکلي: "موږ موافقه وکړه چې زموږ ټیمونه به سمدستي خبرې اترې پیل کړي، او زه به د اوکراین له ولسمشر زیلیسکي سره اړیکه ونیسم څو هغه د دې خبرو له جریان څخه خبر کړم. دا هغه کار دی چې زه یې همدا اوس ترسره کوم."
کرملین ویلي چې پوتین او ټرمپ نږدې یو نیم ساعت د تلیفون له لارې خبرې کړې دي.
د کرملین د معلوماتو له مخې، دواړو مشرانو موافقه کړې چې سره وویني.
د کرملین د اعلامیې له مخې، د روسیې ولسمشر ولادیمیر پوتین د چهارشنبې د ورځې په تلیفوني خبرو کې ټرمپ ته ویلي چې د "سولهییزو مذاکراتو" له لارې د اوکراین جګړه پای ته رسېدای شي.
د کرملین په وینا، دواړو لوریو موافقه وکړه چې د اوږدمهاله هوکړې لپاره سولهییز مذاکرات ترسره شي.
د عرب لیگ مشر: د فلسطینیانو بېځایه کول د منلو نه دي
![](https://gdb.rferl.org/EB68578F-5B2A-4C6E-88C2-96C760109D95_w250_r1_s.jpg)
د عرب لیگ مشر، احمد ابوالغیط، وايي چې د فلسطینیانو بېځایه کول، که له غزې تړانګې وي او که له لویدیځه غاړې، د منلو وړ نه دي.
د فرانس پرېس خبري آژانس د راپور له مخې، ابوالغیط دغه څرګندونې نن، د چهارشنبې په ورځ، د سلواغې ۲۴مه، د عرب لیګ په غونډه کې وکړې، چې د متحده عربي اماراتو په دوبۍ ښار کې جوړه شوې وه.
هغه د امریکا د ولسمشر ډونالډ ټرمپ د وړاندیز په اړه، چې فلسطینیان له غزې څخه انتقال او دغه سیمه د بیا رغونې لپاره تر کنټرول لاندې روالي، وویل چې دا وړاندیز د عربي نړۍ لپاره، چې له سلو کلونو راهیسې له دې نظر سره مبارزه کوي، د منلو وړ نه دی.
ټرمپ د سلواغې پر ۱۷مه، د اسرائیل له صدراعظم بنیامین نتنیاهو سره په ګډه خبري ناسته کې وړاندیز وکړ چې امریکا دې د غزې تړانګه تر کنټرول لاندې راولي او هلته دې بیا رغونه وکړي.
اسرائیل د دې وړاندیز هرکلی وکړ، خو ګڼو هېوادونو دا وړاندیز رد کړ او ویې ویل چې دا اقدام به د منځني ختیځ د شخړې لمنه پراخه کړي.
د امریکا نوی دفاع وزیر: د نړیوال نظامي وضیعت بیا کتنه د شاتګ په معنا نه ده
![](https://gdb.rferl.org/159dee3c-0d22-4e35-8ce1-9fc4f53a2ee7_w250_r1_s.jpg)
د امریکا د دفاع وزیر، پیت هګست، وايي که که د نړۍ مشران دا انګیري چې د ولسمشر ډونالډ ټرمپ له لوري د امریکا د نړیوال نظامي وضعیت د بیا کتنې هڅه د واشنګټن د شاتګ په معنا ده، نو هغوی تېروتنه کوي.
ښاغلي هګست دا څرګندونې د سه شنبې په ورځ، د سلواغې ۲۳مه، د امریکا د دفاع وزیر په توګه د لوړې مراسمو وروسته د خپلې لومړۍ بهرنۍ سفر پر مهال، د جرمني په اشتوتګارت ښار کې خبریالانو ته وکړې.
دا څرګندونې د ناټو د دفاع وزیرانو او د اوکراین د دفاعي تماس ډلې له دوه ورځني غونډې وړاندې شوې دي.
د امریکا دفاعي چارواکي وايي، تمه کېږي چې هګست به د ناتو پر متحدینو فشار راولي ترڅو په اروپا کې له موجودو ننګونو سره د مقابله کولو لپاره د رهبرۍ رول زیات کړي او همداراز خپل دفاعي لګښتونه لوړ کړي.
تمه کېږي چې هګست به نن، چهارشنبه، او سبا، پنجشنبه، د بلجیم په پلازمېنه بروکسل کې د ناتو په مرکزي دفتر کې په یوه غونډه کې ګډون وکړي.
ډونالډ ټرمپ د روسیې له زندانه د امریکايي ښوونکي مارک فوګل د خوشې کېدو هرکلی وکړ
![امریکايي مارک فوګل د روسیې له بند څخه تر خوشې کیدو وروسته د امریکا له ولسمشر ډنالډ ټرمپ سره](https://gdb.rferl.org/4e3e98b5-eb8a-4ddb-b061-08dd4a80fec4_w250_r1_s.jpg)
د امریکا ولسمشر ډونالډ ټرمپ د روسیې له زندانه د یوه امریکايي ښوونکي مارک فوګل د خوشې کېدو هرکلی وکړ.
ښاغلي ټرمپ د سې شنبې په ورځ، د سلواغې ۲۳ مه، په سپینه ماڼۍ کې له فوګل سره په لیدنه کې وویل، چې د روسیې په زندان کې له درې نیم کلونو وروسته د هغه خوشې کېدل، د اوکراین د جګړې په پای ته رسولو کې د روسیې د ښه نیت نښه وه.
ښاغلی فوګل، د سپینې ماڼۍ د ملي امنیت سلاکار مایک والټز او د یرغمل نیونکو د چارو لپاره د ټرمپ ادارې د ځانګړي استازي ادم بولر سره یوځای، د سې شنبې په ورځ ناوخته د میریلینډ په انډریوز هوايي اډه کې له الوتکې څخه د امریکا خاورې ته ننوته.
د سپینې ماڼۍ د ملي امنیت سلاکار مایک والټز لخوا په خپره شوې اعلامیه کې ویل شوي، چې فوګل د ولسمشر ټرمپ، د منځني ختیځ لپاره د ټرمپ د ځانګړي استازي استیو ویتکاف او د روسیې سره د هغه د سلاکارانو ترمنځ د خبرو اترو په پایله کې خوشې شو.
فوګل د ۲۰۲۱ کال په دوبي کې په روسیه کې د ماریجوانا د درملو د قاچاق په تور ونیول شو او په ۱۴ کاله بند محکوم شو.
ملګري ملتونه وايي یو کارکوونکی یې، چې په یمن کې په توقیف کې و، مړ شوی دی
![یمن- د ملګروملتونو د موټرو کاروان (آرشیف)](https://gdb.rferl.org/3F884D4C-2CF3-48C8-862B-3DCD5353C94D_w250_r1_s.jpg)
ملګري ملتونه وايي یو کارکوونکی یې چې د یمن په شمال کې په توقیف کې و، مړ شوی دی.
د ملګروملتونو د خوړو نړیوال پروګرام WFP ویلي دي چې یو کارکوونکی یې له شپږو نورو سره د جنوري په ۲۳مه نېټه ونیول شو خو دې ادارې دا نه دي ویلي چې څه وخت او څنګه مړ شوی دی.
د م. م سرمنشي انتونیو ګوتیریش د دې کارکوونکي مړینه غندلې ده او په دې اړه یې د سمدستي څېړنو او عدالت ته د مسوولو کسانو د سپارلو غوښتنه کړې ده. ښاغلي ګوتیریش په یوه بیان کې ویلي دي چې د دې تراژیدۍ علت تراوسه نه دی معلوم.
بیان زیاتوي چې ملګري ملتونه له حوثي واکمنو څخه سمدستي په دې اړه وضاحت غواړي. ملګروملتونو څوځلې مخکې له حوثي وسله والې ډلې غوښتي و، چې د م. م نیول شوي کارکوونکي خوشې کړي.
د سرمنشي ویاند فرحان حق پرون وویل چې د حوثي ډلې له خوا د ملګروملتونو د نورو کارکوونکو له نیول کېدو وروسته دا سازمان په سعده ښار کې خپل فعالیت ځنډوي.
اوکرایني چارواکي وايي، روسیې پر پلازمېنه کییف د بالستیک توغندي په وسیله برید کړی دی
![د روسیې له برید وروسته د کییف په یوه ودانۍ کې د لګېدلي اور د وژنې هڅه (آرشیف)](https://gdb.rferl.org/1c9aba64-2a60-46b6-b359-f1572a9ea030_w250_r1_s.jpg)
د اوکراین پوځ وايي د هوايي مدافعې ځواکونو یې نن سهار وختي پر پلازمېنه کییف د روسیې هوايي حمله شنډه کړې ده.
د کییف ښاروال ویټالي کلیچکو پر خپله انسټاګرام پاڼه ولیکل چې په دې چاودنه کې یو تن وژل شوی او درې نور ټپیان دي. هغه زیاته کړه چې د چاودنې غږ لوړ و. کلیچکو خلکو ته ډاډ ورکړ چې د اوکراین د هوايي مدافعې ځواکونه فعال دي.
د اوکراین د هوايي ځواک چارواکو ویلي چې روسیې پر کییف د بالستیک توغندي په وسیله برید وکړ.
رویټرز خبري آژانس د عیني شاهدانو له قوله راپور ورکوي چې وايي د څو چاودنو غږونه یې اورېدلي دي. چارواکو د کییف په دوو ناحیو کې د اور لګېدو خبر ورکړی دی.
د امریکا د نړیوال پرمختګ د ادارې USAID سرمفتش له کاره لیرې شو
![](https://gdb.rferl.org/6041ee9e-e94b-4569-9a70-6d7b34563bea_w250_r1_s.jpg)
د امریکا د نړیوال پرمختګ ادارې USAID یوه چارواکي ویلي دي چې پاول مارتین پرون له دندې لیرې شو.
دې چارواکي چې د موضوع د حساسیت له کبله نه غواړي خپل نوم افشا کړي ویلي چې دا خبر د جمهوري ریاست د پرسونل د دفتر مرستیال ترینټ مورس په یوه ایمیل کې ښاغلي مارتین ته ورکړ او هغه ته یې ولیکل چې د USAID د سرمفتش مقام نور نه شته. د دې ایمیل یوه کاپي رسنیو ته هم ښودل شوې ده.
دا خبر یوه ورځ وروسته له هغه ورکړل شوی چې د مارتین دفتر د USAID د له منځه وړلو لپاره د ولسمشر ډونالډټرمپ د هڅو په اړه یو انتقادي راپور خپور کړ.
سپینې ماڼۍ تراوسه په دې اړه تبصره نه ده کړې او د دې پرېکړې د علت په اړه هم څه نه دي ویل شوي.
پاول مارتین د ۲۰۲۳ کال له ډسمبر میاشتې راهیسې د USAID د سرمفتش په توګه کار کاوه. د دې مقام ټاکنه د سنا تایید ته اړتیا لري.
نتنیاهو خبرداری ورکړی چې که اسراییلي یرغمل د اونۍ ترپایه خوشې نه شي پر غزې به بیا حمله وکړي
![د اسراییل صدراعظم بنیامین نتنیاهو او د امریکا ولسمشر ډونالډټرمپ](https://gdb.rferl.org/3e87ed11-1ece-48ec-85b9-e74994379a29_w250_r1_s.jpg)
د اسراییلو صدراعظم خبرداری ورکړی چې که اسراییلي یرغمل د اونۍ تر پایه خوشې نه شي نو اوربند به مات کړي او بیا به د غزې پر تړانګه درنې حملې پیل کړي.
بنیامین نتنیاهو دا څرګندونې پرون د امنیتي کابینې له غونډې وروسته وکړې. هغه وویل، د حماس دا اعلان چې د شنبې په ورځ به یرغمل شوي کسان په ټاکلي وخت خوشې نه کړي د اوربند سرغړونه ده. نتنیاهو پوځ ته امر وکړ چې خپل ځواکونه په غزه او شاوخوا سیمو کې یې ځای پرځای کړي.
له دې مخکې، د امریکا ولسمشر ډونالډ ټرمپ خبرداری ورکړی و، چې که ټول اسراییلي یرغمل د شنبې ورځې تر غرمې پورې خوشې نه شي نو د اوربند تړون به باطل اعلان کړي.
حماس چې امریکا او اروپايي ټولنه یې تروریستي ډله بولي ادعا کوي چې اسراییل په تیرو دریو اونیو کې د اوربند له مخې خپلې ژمنې نه دي پوره کړي، غزې ته یې د بشري مرستو د رسولو مخه نیولې او فلسطیني کډوال یې په نښه کړي دي.
اسراییل دا تورونه رد کړي دي.
د ترکیې پولیسو د استانبول د ښاروالۍ لس چارواکي له کرد وسله والو سره د اړیکو په تور ونیول
![](https://gdb.rferl.org/BC58162E-2BDB-44AA-9703-808DF649C66A_w250_r1_s.jpg)
د ترکیې پولیسو نن (د سلواغې ۲۳مه) د استانبول ښار د اړوندو ناحیو لس تنه جګپوړي چارواکي له کرد وسله والو سره د اړیکو په تور ونیول.
د ترکیې انادولو خبري آژانس راپور ورکوي چې په نیول شویو چارواکو کې د کارتال او اتاشهیر د ناحیو د ښاروالیو مرستیالان او د نورو ناحیو د ښاروالیو د شورګانو غړي دي.
واړه تورن کسان د ترکیې د اصلي اپوزیسیون د خلق جمهوریپال ګوند غړي دي. د راپورونو له مخې دا کسانو تورن دي چې هغه کسان یې په ښاروالیو کې په کار ګومارلي دي چې د شوې ادعا له مخې له کرد وسله والو سره یې اړیکي درلودل.
د حکومت منتقدان د دې کسانو نیول د استانبول د ښاروال اکرام امام اوغلو د بدنامۍ لپاره د دولتي کمپاین یوه برخه بولي. امام اوغلو د اپوزیسیون د ځینو نورو شخصیتونو ترڅنګ په راتلونکي کې د ولسمشر رجب طیب اردوغان لپاره د احتمالي سیالانو له ډلې ګڼل کېږي. د اردوغان حکومت پر محکمو د فشارونو د راوستلو تورونه رد کړي او ټینګار کوي چې د ترکیې قضا خپلواکه ده.
ملګروملتونو کې د یمن د حوثي ډلې تر ولکې لاندې صعده ښار کې بشري فعالیتونه وځنډول
![په یمن کې د ملګروملتونو د کارکوونکو موټر (آرشیف)](https://gdb.rferl.org/bca03528-a927-44c8-dcbb-08dd3bb47256_w250_r1_s.jpg)
ملګري ملتونه وايي، د یمن په صعده ښار کې چې، د حوثي وسله والو لوی مرکز بلل کېږي، د بشري مرستو فعالیتونه یې ځنډولي دي.
دا اقدام وروسته له هغه کېږي چې د حوثي ډلې وسله والو د ملګروملتونو ۸ نور کارکوونکي ونیول. ملګروملتونو پرون (د سلواغې ۲۲مه) په یو بیان کې وویل چې په صعده کې د خپلو ټولو فعالیتونو او پروګرامونو د ځنډولو پرېکړه یې د دې ولایت د ناسمو امنیتي شرایطو او د امنیتي تضمینونو د نشتوالي له کبله کړې.
د ایران پلوې حوثي ډلې ویندوی تراوسه په دې اړه د تبصرې غوښتنو ته ځواب نه دی ویلی.
حوثي ډلې له ۲۰۱۴ کال راهیسې د یمن د حکومت پرضد چې نړیواله ټولنه یې په رسمیت پېژني او سعودي عربستان یې ملاتړ کوي جګړه پیل کړې ده. دې جګړې تراوسه د وسله والو او ملکي وګړو په ګډون له ۱۵۰ زرو ډېر کسان وژلي دي.