چارواکي وایي، د پاکستان په شمالي وزیرستان کې نن پر یوې امنیتي پوستې په یوه ځان وژونکي برید کې لږ تر لږه دوه سرتېري او یوولس کلن ماشوم وژل شوي او ۱۴ ولسي وګړي ټپیان شوي دي.

دا پېښه د خیبر پښتونخوا ایالت چې مخکې د پاکستاني طالبانو یا تحریک طالبان پاکستان یو پیاوړی مرکز و، په میرانشاه ښار کې رامنځته شوې ده.

د پولیسو یوه چارواکي راشد خان ویلي چې په دې پېښه کې یو شمېر سرتېري هم ټپیان شوي، خو شمېر یې نه دی ښودلی.

تر اوسه د دې پېښې مسوولیت کومې ډلې نه دی منلی، خو شک کېږي دا به د تحریک طالبان پاکستان د ډلې کار وي چې په دې وروستیو کې په هغه هېواد کې حملې زیاتې کړي دي.

د روغتیا نړیوال سازمان د غزې په شمال کې د اسراییلي پوځ د عملیاتو د بندېدو غوښتنه کړې او ویلي یې دي چې په دې سیمه کې د اسراییلو د ځمکنیو عملیاتو له کبله ډېری روغتونونه د له منځه تلو په حال کې دي.

د WHO مشر تیدروس ادهانوم ګیبریسیوس پر خپله ایکس پاڼه په یو بیان کې لیکلي چې د غزې شمال ته د اسراییلو د پوځ د ننوتو او د خلکو د راوتو له کبله د کورنیو کډوالو یوه نوې څپه رامنځ ته شوې ده او په نتیجه کې یې جګړه ځپلې کورنۍ په ډېره کوچنۍ ساحه کې چې د نوموړي په وینا له انساني کرامت سره نه ښايي راټولې شوې دي.

ګیبریسیوس خبرداری ورکړ چې د غزې روغتیايي مرکزونه د سقوط په حال کې دي او د روغتیا نړیوال سازمان د ناامنۍ د پراخېدو له کبله نه شي کولای خلکو ته د ژوند ژغورونکې مرستې ورسوي.

د غزې په ښاري ناحیو کې د اسراییلو پوځي عملیات نن د دریمې ورځې لپاره هم روان دي.

سعودي عربستان او پاکستان په خپلو کې دوه اړخیز دفاعي تړون لاسلیک کړ.

د پاکستان د صدراعظم دفتر پرون په یوه بیان کې وویل، له سعودي عربستان سره د دفاعي موافقې له مخې پر هر لوري چې حمله وشي، دوهم هېواد به یې پر ځان حمله وګڼي.

دا دفاعي تړون داسې مهال لاسلیکېږي چې پاکستان یوازې څو میاشتې مخکې له خپل اټومي سیال هند سره لنډه جګړه وکړه.

د هند د بهرنیوچارو وزارت ویاند رندیر جیسوال نن پر خپله ایکس پاڼه په یوه بیان کې ولیکل چې هند له دې پرمختګ څخه خبر دی او خپل امنیت او د سیمې ثبات ته د دې پرمختګ عواقب څېړي.

په داسې حال کې چې په سیمه کې ناامني پراخه شوې ده دا اقدام به د ریاض او اسلام آباد ترمنځ د څو لسیزو همکاري نوره هم پیاوړې کړي.

د امریکا یوپوځي چارواکی وایي چې د اسراییل جنګي جټ الوتکو تیره اونۍ په قطرکې د حماس پرمشرانو په برید کې له سره سمندرګي څخه بالسټیک میزایل توغولي و. د سپټمبرپه نهمه په دغه برید کې چې د قطرپه پلازمینه دوحه کې وشو، شپږ تنه ووژل شول چې پنځه یې د سخت دریځې حماس ډلې غړي و. دغه برید هغه مهال وشوچې د حماس مشران په دوحه کې په غزه کې د جګړې د بندیدو په هدف د خبرو لپاره راټول شوي و. د اسوشیتید پرس خبري آژانس د راپور له مخې متحدو ایالتونو خپل نژدې متحد قطرته د دغه برید په اړه خبر ورکړی وخو په دوحه کې چارواکو وویل چې دغه خبرداری له برید وروسته ورکړل شوی و. د اسراییل یوه چارواکي چې نه یې غوښتل نوم یې واخیستل شي وویل چې شاوخوا لس جنګي جټ الوتکو په دغه برید کې برخه اخیستې او شاوخوا لس میزایل یې توغولي دي. اسراییل د دغه برید د جزیاتو چې هغه په څه ډول شوی او پکې له کومو وسلو کاراخیستل شوی و، رسمي څرګندوني ندي کړي.

د امریکا د بهرنیو چارو وزارت د چهارشنبې په ورځ په عراق کې له ایران سره تړلې د ملیشو څلور ډلې د ترویستي ډلو په توګه وپیژندلې. دې وزارت په یوه بیان کې وویل چې د (حرکت النُجَباء)، (کتائب سیدالشهداء)، (حرکت انصارالله) او (کتائب امام علی) ډلې د متحدو ایالتونوله لوري د تروریستي سازمانونو په فهرست کې شامل شوي دي.

په بیان کې د متحدو ایالتونو د بهرنیو چاو وزیر مارکو روبیو له قوله ویل شوي چې وایي، له ایران سره تړلو دغو ډلو په بغداد کې د امریکا پرسفارت او د امریکایي او ایتلافي ځواکونو پراډو په بریدونو کې لاس درلود خو د دې لپاره چې په دې بریدونو کې خپله ښکیلتیا پټه کړي، له نورو نیابتي ډلو یا نورو نومونو یې کاراخیستی.

د اسراییل پوځ له غزې ښارڅخه د پاتې اوسیدونکو د وتلو لپاره یوه بله لاره پرانیزي.

پوځ وویل چې دغه نوې لاره به د چهارشنبې له غرمې څخه د سپتمبر تر ۱۹مې، د جمعې تر غرمې پورې پرانیستې وي.

دغه اقدام په غزې ښار کې د اسراییلو د پوځ د عملیاتو په دویمه ورځ هغه مهال وشو چې په زرګونو کسانو چې د کورونو وسایل یې راټول کړي و، هڅه کوله چې د الرشید له ساحلي لارې له غزې ښارڅخه ووځي.

د اسراییلي رسنیو د راپورونو له مخې، د اسراییلو پوځ اټکل کوي چې د غزې ښارد شاوخوا یوملیون نفوس ۳۷۰،۰۰۰ تنو یې د سې شنبې تر ورځې پورې خپل کورونه پریښي او د جنوبي المواسي سیمې پر لور کډه شوي دي.

اسراییلو د غزې اوسیدونکو ته خبرداری ورکړی چې له سیمې ووځي.

اسراییل ادعا کوي چې په غزې ښارکې د حماس نژدې درې زره وسله وال پټ شوي او هغوی له ولسي خلکوڅخه د ډال په توګه کاراخلي. حماس د اروپایي ټولنې او د امریکا د متحدو ایالتونو له لوري د یوه تروریستي سازمان په توګه پیژندل شوی.

د اسراییل د غه خبرداري غبرګونونه هم راپارولي دي.

د اروپایي ټولنې د بهرنۍ پالیسۍ مشرې کایا کالاس ویلي چې دغه عملیات به په سیمه کې وضعیت له دې هم خراب کړي.

د ملګروملتونو سرمنشي انتونیو ګوتیریش پرون سې شنبې د غزې وضعیت وحشتناک وباله او ویې ویل چې لیواله دی چې راتلونکې اونۍ د اسراییل له صدراعظم بنیامین نتنیاهو سره وګوري او په دې اړه به ورسره خبرې وکړي.

د ایران حکومت یو تن د "اسرائیل لپاره د جاسوسۍ" په تور اعدام کړ.

د ایران دولتي رسنیو نن راپور ورکړ چې بابک شهبازي، له یوه بل کس، اسماعیل فکري سره یوځای، چې په جون کې اعدام شو، د ۲۰۲۲ کال له پیل راهیسې د موساد (د اسرائیل استخباراتي ادارې) لپاره جاسوسي کوله.

سږ کال د اسراییلو لپاره د جاسوسۍ په تور د خلکو اعدامونه د پام وړ زیات شوي دي.

یوازې په تیرو څو میاشتو کې، ایران لږترلږه نهه کسان د اسراییلو لپاره د جاسوسۍ په تور اعدام کړي دي.

شهبازي یو قراردادي و چې په ځینو دولتي ودانیو کې یې د یخولو سیسټمونه نصبول.

هغه له امنیتي او نظامي مرکزونو څخه د حساسو معلوماتو د راټولولو لپاره د خپل موقف په کارولو تورن شوی و.

د شهبازي وکیل له سترې محکمې څخه غوښتنه کړې وه چې د پخوانۍ محکمې پرپریکړې بیاکتنه وکړي، خو سترې محکمې د هغه د استیناف غوښتنه رد کړه.

تمه ده چې بریتانیا ته د امریکا د ولسمشر ډونالډ ټرمپ د سفر پرمهال د دواړو هیوادو ترمنځ د ټکنالوژي او اټومي انرژي په برخو کې د میلیارډونو ډالرو په ارزښت موافقې لاسلیک شي.

ټاکل شوې ده چې نن د بریتانیا پاچا چارلس دریم او ملکه کمیلا د امریکا د متحد ایالتونو د ولسمشر او د هغه د میرمنې میلانیا ټرمپ تشریفاتي هرکلی وکړي او ولسمشر ټرمپ به سبا د بریتانیا له صدراعظم کایر سټارمر سره خبرې وکړي.

دا بریتانیا ته د ولسمشر ټرمپ د ولسمشرۍ د دوهمې دورې دوهم رسمي سفر دی.

د ملګرو ملتونو سرمنشي منشي انتونیو ګوتیریش د راتلونکي کال لپاره د ملګرو ملتونو په عادي بودیجه کې د پنځلس په سلو کې د کمیدو وړاندیز کړی دی، چې تر مخکنۍ بودیجې پنځه سوه میلیونه ډالر کمه ده.

فرانس پریس اژانس څرګندوي چې دا خبر د سې شنبې په ورځ په هغو لیکونو کې په ډاګه شو چې د سرمنشي له لورې غړیو هیوادونو او د ملګرو ملتو مامورینو ته استول شوې دي.

د ملګرو ملتونو یوه لوړ پوړي چارواکي وویل چې دا نوې بودیجه درې اعشاریه دوه سوه اته دیرش میلیارډه ډالر ده چې له امله به یې د ملګرو ملتو نژدې دوه زره اووه سوه دندې له منځه ولاړې شي. د ملګرو ملتو دې چارواکي دا هم ویلي دي چې د بودیجې له کمیدو سره به د یوشمیر نورو برخو ترڅنګ د ملګرو ملتو د بشري حقونو هڅې اغیزمنې شي.

مخکې د ملګرو ملتو سرمنشي ویلي و چې د دوه زره شپږ ویشتم کال بودیجه به د روان میلادي کال د بودیجې په څیر وساتي، خو اوس د فرانس پریس اژانس د یوه راپور له مخې چې د بودیجې د کمیدو یو علت هم د امریکا د ولسمشر ډونالډ ټرمپ تګلارې دي چې په ځینو مواردو کې یې د ملګرو ملتونو بودیجه کمه کړې ده.

د سوله ساتو له بودیجې پرته واشنګتن په تیرو کلونو کې د ملګرو ملتو دوه ویشت په سلو کې بودیجه تامینوله.

تمه ده چې د اروپايي اتحادیې کمیشنران سبا په غزه کې د جګړې له امله په اسراییل نوي بندیزونه ولګوي.

د اروپايي کمیسیون ویاندې پاولا پنهو نن خبریالانو ته وویل چې کمیشنران به سبا د اسراییل پر وړاندې د اقداماتو یوه بسته تصویب کړي.

هغې زیاته کړه چې د اقداماتو یوه برخه به د اسراییل او اروپايي اتحادیې ترمنځ د سوداګرۍ په تړونونو کې شامل مالي امتیازات تنظیم کړي.

اسراییل تیره شپه له درنو هوایی بریدونو وروسته د غزې ښار په ډیرو برخو کې ځمکني عملیات پیل کړل.

د اسراییل د پوځ یوه ویاند د سې شنبې په ورځ وویل چې ځواکونو یې په غزه ښار کې د حماس په اصلي اډه کې خپل پلي عملیات پراخ کړې دي.

متحده ایالات او اروپايي اتحادیه حماس یوه ترهګره ډله ګڼي.

په غزه کې د اسراییلو د عملیاتو پراختیا له نړیوالو غبرګونونو سره مخ شوې ده.

د ملګرو ملتونو د بشري حقونو کمیشنر ولکر ترک د اسراییلو دا اقدام "د نه منلو وړ" وباله.

هغه AFP او رویټرز ته وویل چې "وینه تویونه باید ودرول شي."

د امریکا ولسمشر ډونالډ ټرمپ د دوشنبې د فلوریډا په فدرالي محکمه کې عریضه کړې چې نیویارک ټایمز او د هغې څلور خبریالان باید ده ته پنځلس میلیارډه ډالر ورکړي.

په دې عریضه کې د دوه زره څلرویشتم کال تر انتخاباتو مخکې خپرو شویو مقالو او یوه کتاب ته اشاره شوې ده چې د ټرمپ د بدنامۍ او سپکاوي لپاره مطالب پکې خپاره شوې دي.

ولسمشر ټرمپ په خپله خواله رسنۍ « تروت سوشل» کې نیویارک ټایمز په درواغو تورنه کړې ده.

اسوشیتد پریس اژانس راپور وکړی دی چې نیویارک ټایمز تر اوسه په دې اړه څه نه دې ویلي.

ټرمپ تر دې مخکې هم د یوشمیر نورو رسنیو لکه وال ستریت ژورنال پرضد دعوه کړې وه.