د لاسرسۍ وړ لېنکونه

تازه خبر
پنجشنبه ۹ کب ۱۴۰۳ کابل ۰۳:۱۸

نړۍ

د پاکستان پوځ: خيبر پښتونخوا کې د نښتې پر مهال درې سرتېري وژل شوي

انځور - ارشیف
انځور - ارشیف

د پاکستان پوځ ويلي چې، د خيبر پښتونخوا په لکي مروت سيمه کې يې له وسله‌والو سره په نښته کې درې سرتېري وژل شوي دي.

د پوځ يوه چارواکي، چې له رسنيو سره يې د خبرو اجازه نه درلوده، د نوم د ښوولو په شرط پرون ازادي راډيو ته ادعا وکړه چې تېره شپه يې د نښتې پر مهال ۷ تنه وسله‌وال هم وژلي دي.

د راپورونو له مخې، تېره شپه وسله‌والو د لکي مروت پر پوسټ ګرېجوېټ کالج، چې د سرحدي ځواک او پوځ کمپ په‌کې جوړ دي، بريد وکړ.

د ځايي خلکو په وینا، پر دې مهال د درنو او سپکو وسلو د ډزو غږونه تر ډېره اورېدل کېدل.

تر دې وړاندې پوځ او پولیسو په لکي مروت کې ګډ عملیات کړي وو او دعوه یې کړې وه چې له هغه ځایه یې وسله‌وال په شا تمبولي دي.

د "تحریک جهاد" په نوم یوې لږې پېژندل شوې وسله‌والې ډلې پر ټولنيزو رسنيو په لکي مروت کې د برید مسوولیت منلی دی.

د ورځې تازه خبرونه دلته ولولئ

د اتومي انرژۍ اداره وايي، ایران د اتومي وسلې جوړولو ته نژدې شوی

د اتومي انرژۍ د نړیوالې ادارې تازه راپور ښیي چې د ایران د هغو غني شویو یورانیمو زېرمه، چې خالص والی یې د اتومي وسلې جوړولو ته نژدې دی، په چټکۍ سره زیاته شوې او لا هم د اختلافاتو په حل کې پرمختګ نه دی شوی.

دا اداره وایي، له کله چې ډونالډ ټرمپ د امریکا په انتخاباتو کې بریالی شوی، ایران د یورانیمو د غني کولو بهیر ګړندی کړی، او هغه حد ته یې نژدې کړی چې د اتومي وسلو د جوړولو لپاره کارول کېدای شي.

د دې محرم راپور له مخې، چې کاپي یې اسوشیېټډ پریس خبري اژانس د چهارشنبې (د کب/حوت ۸مه) په ورځ ترلاسه کړې، د ایران د ۶۰ سلنه غني شویو یورانیمو زېرمه د فبرورۍ تر ۸مې پورې نژدې ۲۷۵ کیلو ګرامه ته رسېدلې، چې دا د ۲۰۲۴ کال د نوومبر له میاشتې څخه ۹۲.۵ کیلو ګرامه زیاته ده.

د اتومي انرژۍ د نړیوالې ادارې د راپور له مخې، نژدې ۴۲ کیلو ګرامه ۶۰ سلنه غني شوی یورانیم که ۹۰ سلنې ته لوړ شي، د یوه اتومي بم د جوړولو لپاره کافي مواد برابرولی شي. په دې توګه، که دا پروسه دوام ومومي، ایران به د راتلونکي کال د دلوې/ سلواغې تر ۲۰مې پورې د شپږو اتومي بمونو د جوړولو لپاره کافي مواد ولري.

ایران پر دوی د امریکا نوي بندیزونه وغندل

د امریکا او ایران بیرغ
د امریکا او ایران بیرغ

د ایران د بهرنیو چارو وزارت ویاند اسماعیل بقایي پر دغه هېواد د امریکا نوي بندیزونه غندلي دي.

د چهارشنبې په ورځ، د فیبرورۍ ۲۶مه، د ایران د بهرنیو چارو وزارت په ایکس/ پخواني ټویټر کې، د بقایي په حواله ولیکل چې د هېوادونو ترمنځ د اقتصادي او سوداګریزو تعاملاتو په اړه پرېکړې کول د ملتونو د قانوني حق یوه برخه ده، چې هېڅ اړخ حق نه لري چې په سیاسي پلمو یې ګډوډ کړي.

د متحده ایالاتو د بهرنیو چارو وزارت او د خزانې وزارت د دوشنبې په ورځ، د فیبرورۍ ۲۴مه، د ایران د نفتي محصولاتو د لېږد او پلور سره تړلي یو شمېر اشخاص، شرکتونه او د تېلو لېږدونکي د نویو بندیزونو په لیست کې شامل کړل.

د امریکا د بهرنیو چارو وزارت ټینګار کړی چې ایران د خپل اټومي ګواښ، د بالستیک توغندیو پروګرام او د ترهګرو ډلو ملاتړ سره د نړیوال امنیت بې ثباته کولو ته دوام ورکوي.

د امریکا د نویو بندیزونو له مخې، د امریکایي اشخاصو یا شرکتونو لخوا د بندیزونو لاندې اشخاصو او ادارو سره هر ډول سوداګریزې معاملې منع دي، او په متحده ایالاتو کې د دوی هر ډول شتمنۍ کنګل کېږي.

سوډان کې پوځي الوتکه لویدلې، ۴۶ تنه په کې مړه شوي دي

د سوډان جنوب کې د الوتکې د لوېدو یوه پخوانۍ پیښه، آرشیف
د سوډان جنوب کې د الوتکې د لوېدو یوه پخوانۍ پیښه، آرشیف

چارواکي وایي چې په سوډان کې د یوې پوځي الوتکې د لوېدو په پیښه کې د مړو شمېر لږ ترلږه ۴۶ ته لوړ شوی دی.

پیښه پرون سه شنبه په اومدورمان ښار کې چې د پلازمېنې خرطوم اړوند دی، شوې ده.

د خرطوم مطبوعاتي دفتر ویلي چې پيښه کې لس تنه نور ټپيان شوي هم دي.

تر دې وړاندې رویټرز د سوډان د پوځ په حواله ویلي و چې دغه انتونوف پوځي الوتکه له وادي سیدنا هوایي اډې څخه تر الوتنې وروسته د امدورمان په شمال کې ولوېده.

خبر کې راغلي چې مرګ ژوبله پوځي او ملکي کسانو ته اوښتې ده.

تراوسه د پیښې لامل روښانه شوی نه دی.

په سوډان کې د ۲۰۲۳ کال له اپریل راهیسې د پوځ او د ( چټک ملاتړ ځواکونو) په نوم ملیشو ترمنځ جګړه پيل شوې ده.

د دغې جګړې له کبله لسګونه زره کسان وژل شوي او د ملګرو ملتونو د شمېرو له مخې څه باندې ۱۲ میلیونه له خپلو سیمو بې ځایه شوي دي.

جګړې په سوډان کې بشري ناورین رامنځته کړی دی.

حماس او اسراییلو د یرغملو او بندیانو د خوشې کولو پر دوام موافقه وکړه

رام الله، د فبروري لومړۍ نېټه- د اسراییلو له زندانه خوشې شوی فلسطینی
رام الله، د فبروري لومړۍ نېټه- د اسراییلو له زندانه خوشې شوی فلسطینی

د اسراییلو او حماس چارواکي وايي، د فلسطیني بندیانو د خوشې کېدو په بدل کې د اسراییلي یرغملو د مړو د سپارلو په برخه کې موافقه شوې ده.

اسراییلو له شنبې ورځې راهیسې د ۶۰۰ فلسطیني بندیانو د خوشې کولو بهیر، د یرغملو د خوشې کولو پرمهال د حماس د وسله والو د ناوړه چلند په غبرګون کې وځنډاوه. حماس چې امریکا او اروپايي ټولنه یې تروریستي ډله بولي، ویلي و، چې د اسراییل له زندانونو د دې بندیانو په خوشې کولو کې ځنډ له اوربند څخه جدي سرغړونه ده او د خبرو دوهم پړاو به د دې بندیانو تر خوشې کېدو پورې پیل نه شي.

دې لانجې دا ویره رامنځ ته کړې وه چې د غزې اوربند مات نه شي. د دې اوربند د لومړي پړاو شپږ میاشتې د بلې اونۍ له پیل سره سم پای ته رسېږي. خو حماس بېګا اعلان وکړ چې د دې ډلې د مخکښ چارواکي خلیل الحیا په مشرۍ پلاوی په قاهره کې د خبرو پرمهال له اسراییلو سره په دې اړه موافقې ته رسېدلی دی.

حماس په یو بیان کې ویلي چې دا موافقه به د څلورو نورو مْړو اسراییلي یرغملو د جسدونو سپارلو او د سلګونه فلسطیني بندیانو خوشې کېدو ته لاره اواره کړي. یوه اسراییلي چارواکي چې نه یې غوښتل نوم یې خپور شي ځکه د خبرو اجازه نه لري، هغه موافقه تایید کړه چې له مخې یې د اسراییلي یرغملو مړي دې هېواد ته سپارل کېږي خو اسراییلي رسنیو ویلي چې دا تبادله نن کېدونکې ده.

چارواکي وايي، کییف او واشنګټن د اوکراین طبیعي زېرمو ته د امریکا د لاسرسي پر سند موافقه کړې

ښکاري چې ټرمپ او زیلینسکي د اوکراین طبیعي زېرمو ته د امریکا د لاسرسي پر سند موافقه کړې ده.
ښکاري چې ټرمپ او زیلینسکي د اوکراین طبیعي زېرمو ته د امریکا د لاسرسي پر سند موافقه کړې ده.

رویټرز خبري آژانس د باخبره سرچینو په حواله راپور ورکوي چې متحدوایالتونو او اوکراین د هغه سند د مسودې په اړه موافقه کړې چې له کییف څخه د ملاتړ په بدل کې د اوکراین طبیعي زېرمو ته د امریکا لاسرسي ته لاره اواروي.

دا په داسې حال کې ده چې د امریکا ولسمشر ډونالډټرمپ هڅه کوي د روسیې او اوکراین ترمنځ جګړه ژرترژره پای ته ورسوي. د دې سند له مسودې څخه یوې باخبره سرچینې ویلي دي چې په دې موافقه کې د امریکا له خوا اوکراین ته د هېڅ راز امنیتي تضمین یا د وسلو د دوامداره مرستې یادونه نه ده شوې. یوې بلې سرچینې ویلي دي چې په راتلونکي کې اوکراین ته د وسلو د مرستو د مسئلې په اړه لاهم د واشنګټن او کییف ترمنځ بحثونه روان دي.

واشنګټن په دې اړه توافق تراوسه رسما نه دی تایید کړی خو ټرمپ خبریالانو ته وویل چې د اوکراین ولسمشر ولودیمیر زیلینسکي د جمعې په ورځ واشنګټن ته رسېږي او یوه ډېره لویه معامله به لاسلیک کړي.

له دې مخکې بلومبرګ راپور ورکړ چې تمه ده د اوکراین کابینه به نن چارشنبې (د فبروري ۲۶مه) د دې موافقې د لاسلیک سپارښتنه وکړي. فرانسپرس خبري آژانس د اوکراین د یوه جګپوړي چارواکي له قوله خبر ورکړی چې د دې هېواد حکومت د دې موافقې پر جزییاتو کار کوي.

د روسیې د بهرنیوچارو وزیر تهران ته ورسېد

د روسیې د بهرنیوچارو وزیر سیرګي لاوروف
د روسیې د بهرنیوچارو وزیر سیرګي لاوروف

د ایراني رسنیو د راپورونو له مخې د روسیې د بهرنیوچارو وزیر سیرګي لاوروف له ایراني چارواکو سره د خبرو لپاره نن (د کب ۷مه) تهران ته ورسېد.

د ایران د دولتي ټلویزیون د راپور له مخې لاوروف له خپل ایراني سیال عباس عراقچي سره ګوري. د ایران د بهرنیوچارو وزارت ویلي دي چې د لاوروف سفر یوورځنی دی.

د روسیې د بهرنیو چارو وزارت په یوه بیان کې ویلي دي چې لاوروف د عراقچي په بلنه تهران ته تللی دی. دې وزارت همداراز څرګنده کړې ده چې د روسیې جګپوړی ډیپلومات به د تهران او مسکو د اړیکو او د ځینو نړیوالو مسایلو په اړه خبرې وکړي.

د اسټرالیا او جنوبي افریقا د کرکټ لوبه ونه شوه

د فبروري ۲۵مه، د راولپنډۍ لوبغالی
د فبروري ۲۵مه، د راولپنډۍ لوبغالی

د اتلانو د جام یا چمپینز ټرافي د سیالیو په لړۍ کې د جنوبي افریقا او اسټرالیا د کرکټ د لوبډلو ترمنځ لوبه د باران له کبله ونه شوه.

دا لوبه نن د ماسپښین په یوه نیمه بجه پلان شوې وه خو د راولپنډۍ د کرکټ د لوبغالي پېچ د پرله پسې باران د ورېدو له کبله پوښلی و، نو د لوبې امپایرانو په سیمه ایز وخت د مازیګر په پنځو بجو اعلان وکړ چې لوبه نه کېږي.

اسټرالیا او جنوبي افریقا چې له افغانستان او انګلینډ سره په بي ګروپ کې دي دواړو خپلې دوه مخکینۍ لوبې ګټلې دي. ټاکل شوې چې د اسټرالیا بله لوبه به د جمعې په ورځ په لاهور کې له افغانستان سره وي او جنوبي افریقا به د شنبې په ورځ د کراچۍ په لوبغالي کې له انګلینډ سره مخامخ شي.

امریکا د م. م په عمومي اسمبله کې د اروپايي متحدانو د پرېکړه لیک له اصطلاحاتو سره مخالفت وکړ

د ملګروملتونو عمومي اسمبله، د فبروري ۲۴مه
د ملګروملتونو عمومي اسمبله، د فبروري ۲۴مه

متحدوایالتونو پرون په ملګروملتونو کې د خپلو اروپايي متحدانو له خوا په وړاندې شوي پرېکړه لیک کې د هغو کلمو مخالفت وکړ چې روسیه پر اوکراین د برید په خاطر پړه ګڼي.

متحدوایالات د اوکراین د جګړې په اړه د ناڅاپي لوی بدلون په ترڅ کې د ملګروملتونو په عمومي اسمبله کې د روسیې او بیلاروس ترڅنګ ودرېد او د اروپا له خوا په وړاندې شوي پرېکړه لیک کې یې له هغه څه سره مخالفت وکړ چې د اوکراین جګړه د روسیې یرغل بلل شوی دی. دا پرېکړه لیک په ۹۳ مثبتو، ۱۸ مخالفو او ۶۵ ممتنع رایو تصویب شو.

په عین حال کې متحدوایالاتو د واشنګټن له خوا یوه بل چمتو شوي پرېکړه لیک ته وروسته له هغه له رایې ورکولو ډډه وکړه چې دا جمله ورزیاته شوه چې روسیې د ملګروملتو د منشور پرخلاف پر خپل کوچني ګاونډي هېواد برید وکړ.

دې پرېکړه لیک ته د ملګروملتونو ۱۹۳ غړو ۹۳ مثبتې، ۸ مخالفې او ۷۳ نورو ممتنع رایې ورکړې. اوکراین دې پرېکړه لیک ته مثبته او روسیې مخالفه رایه ورکړه.

د عمومي اسمبلې له خوا تصویب شوي پرېکړه لیکونه حتما اجرایي صلاحیت نه لري خو د نړیوالو د نظر سنجۍ په توګه په پام کې نیول کېږي.

په ۳ کلونو کې ۹۵ زره روسي او ۷۰ زره اوکرایني پوځیان ټپیان شوي

د ازادې اروپا/ ازادی راډیو په یوه څېړنیز راپور کې څرګنده شوې چې د روسیې د پراخ پوځي یرغل په درې کلنه موده کې، روسي ځواکونو د اوکراین شاوخوا ۱۱ سلنه خاوره لاندې کړې ده. دا اندازه تقریباً د روسیې د تاتارستان د کورواک جمهوریت له مساحت سره مساوي ده. په دې موده کې سلګونه زره کسان وژل شوي او ټپیان شوي دي.

نه د روسیې او نه هم د اوکراین حکومت په دې اړه رسمي ارقام خپاره کړي دي. سربېره پر دې، په روسیه کې له درېیو کلونو راهیسې ډېری هغه ویب‌پاڼې بندې شوي چې رسمي معلومات خپروي.

خو تحقیقي خبریالانو د عامه سرچینو او ټولنیزو رسنیو پر بنسټ د هغو کسانو نومونه خپاره کړي چې په دې جګړه کې ټپیان شوي دي. د هغوی په منځ کې د روسیې پوځ تر ۹۵ زرو څخه سرتېري او د اوکراین د پوځ شاوخوا ۷۰ زره سرتېري شامل دي.

همداراز، د ازادې اروپا / ازادي راډیو روسي څانګې د روسیې د دفاع وزارت د عمومي طبي ادارې معلوماتو ته لاس رسېدلی، چې ښيي د اوکراین پر ضد د روسیې یرغل له دوهمې نړیوالې جګړې راهیسې په اروپا کې تر ټولو خونړۍ جګړه ده.

اروپایي اتحادیې پر روسیه نوي بندیزونه ولګول

اروپايي ټولنې پر اوکراین د روسیې د بشپړ یرغل د دریمې کلیزې پر مهال پر روسیه نوي بندیزونه ولګول.


د رویټرز خبري اژانس د راپور له مخې، د اروپايي اتحادیې د بهرنیو چارو وزیرانو د دوشنبې په ورځ، د فبروري په ۲۴مه، د روسیې پر وړاندې ۱۶م پړاو اقتصادي بندیزونه تصویب کړل.
ډیپلوماتانو تیره اونۍ ویلي وه چې بندیزونه به د روسیې د المونیم واردات او نور سکتورونه په نښه کړي چې په دې کې د روسیې ۷۳ غیر قانوني بیړۍ هم شاملې دي.
ویل کیږي چې د دې بندیزونو هدف د روسیې د عایدد سرچینو محدودول او د دې هیواد د جنګي وړتیاو ضعیفه کول دي.
پر اوکراین د روسیې یرغل له نن څخه درې کاله وړاندې، د ۲۰۲۲ کال د فبرورۍ په ۲۴مه پیل شو.

نور راوښيه

XS
SM
MD
LG