د طالبانو تر ولکې لاندې د برښنا ریاست د کندوز حوزوي څانګه وايي، د امام صاحب، علي اباد او چهاردرې ولسوالیو بېلابېلو برخو ته د برښنا رسونې د بهیر د چټکتیا لپاره یې ټول پخواني تجهیزات بدل کړل.

د دې ادارې د اعلامیې له‌مخې د علي اباد ولسوالۍ په میرشیخ سیمه کې ۱۲ پایې چې ۱۲متره دي هم درول شوي دي.

برښنا ریاست ویلي، د ټرانسفرمرونو تجهیزات هم په دقیق ډول ارزول شوي دي.

دا ادعا داسې وخت کېږي، چې د پلازمېنې کابل په ګډون د افغانستان په زیاتو ښارونو کې منظمه برېښنا نه‌شته او پرچاوي هم زیاته شوې ده.

د پاکستان د کورنیو چارو وزیر محسن نقوي وویل، د دغه هېواد حکومت پرېکړه کړې چې د افغان کډوالو د لنډمهالې استوګنې کارتونه (PoR) نور تمدید نه کړي. نوموړي خبرداری ورکړی؛ هغه افغانان به، چې له پاکستان څخه ایستل کېږي، په تور لېست کې شامل شي او بیا به پاکستان ته د ننوتو اجازه ونه لري.

محسن نقوي د جمعې په ورځ په اسلام‌‎آباد کې خبریالانو ته وویل، دا پرېکړه د پاکستان د نوې ملي تګلارې یوه برخه ده. هغه ټینګار وکړ چې له غیرقانوني مهاجرت، په ځانګړي ډول له افغان اتباعو سره به هېڅ ډول نرمي و نه شي.

نوموړي زیاته کړه: «هغو افغان اتباعو ته چې په غیرقانوني ډول په پاکستان کې اوسي، د استوګنې د تمدید اجازه نه ورکول کېږي.»

د پاکستان د کورنیو چارو وزیر دا هم څرګنده کړه چې ایران د ۲۰۲۵ کال د جولای په لومړیو لسو ورځو کې تر ۳۰۰ زره ډېر افغان اتباع ایستلي دي.

راپورونه ښيي چې پاکستان هم د روان کال له پیل راهیسې تر ۳۰۰ زره زیات افغان مهاجر ایستلي دي.

په ترکیه کې د امریکا سفیر او د سوریې د چارو لپاره د امریکا ځانګړي استازي، ټام باراک اعلان وکړ چې اسرائیل او سوریه پر اوربند موافقه کړې ده.

ښاغلي باراک نن سهار (۲۸ چنګاښ) وختي په ایکسپاڼه (پخوانی ټویټر) کې ولیکل چې د اسرائیل صدراعظم او د سوریې ولسمشر، د امریکا د بهرنیو چارو وزیر په ملاتړ، پر یوه اوربند سلا شوي، چې د ترکیې، اردن او نورو ګاونډیانو له خوا یې هرکلی شوی دی.

نوموړي زیاته کړه، له دروزیانو، بدویانو او سنیانو غواړي چې خپلې وسلې کېږدي، له نورو اقلیتونو سره یو ځای د یوې متحدې سوریې د جوړولو لپاره کار وکړي، او له خپلو ګاونډیانو سره په سوله او هوساینه کې ژوند وکړي.

تر اوسه په دې اړه نور جزییات نه دي خپاره شوي او نه هم د اسرائیل او سوریې چارواکو رسماً څه ویلي دي.

له بلې خوا رویټرز خبري آژانس د خپلو سرچینو پر اساس راپور ورکړی چې د سوریې حکومت داسې انګېرلې وه چې د سوېدا سیمې ته د ځواکونو د لېږلو لپاره یې د امریکا او اسرائیل شنه اشاره ترلاسه کړې ده.

د برینانیا ایسپکس پوهنتون افغان نابینا ځغاستونکي او لامبو زن ولي محمد نوري ته افتخاري ډکټورا ورکړه.

دا خبر دغه پوهنتون په خپله فیس بوک پاڼه خپور کړی دی.

ولي محمد نوري ازادي راډیو سره په خبرو کې له دې امله خوښي وښوده ویې ویل، دا ډکټورا د ده د ټولو لاسته راوړونو تایدي ده.

ده وړاندې ازادي راډیو ته وویل، سره له دې چې دی د برېټانیا د معلولینو د ځغاستې او لامبو په ملي ټیم کې دی، هڅونکې ویناوې کوي او د بشري مرستو په برخه کې هم فعال دی.

ده د خپلو دې کارونو او فعالیتونو له امله مخکې ګڼې جایزې او مډالونه هم ګتلې دي.

ولي محمد نوري دوه لسیزې مخکې کابل کې په یوې بمي چاودنه کې ټپي او نابینا شو.

د ترکیې لپاره د امریکا سفیر، تام باراک، ویلي ،اسرائیل او سوریې د امریکا د بهرنیو چارو د وزیر په ملاتړ له یو اوربند سره موافقه کړې.

تام باراک، چې د سوریې په چارو کې د امریکا ځانګړی استازی هم دی، د شنبې په سهار (د چنګاښ ۲۸مه) پر خپله ایکس پاڼه ولیکل: "د اسرائیلو لومړي وزیر او د سوریې ولسمشر د امریکا د بهرنیو چارو وزیر په ملاتړ، له هغه اوربند سره موافقه کړې چې د ترکیې، اردن، او نورو ګاونډیو له خوا یې هرکلی شوی دی."

باراک زیاته کړه: "موږ له درزي، بدویانو او سني وګړو غواړو چې خپلې وسلې کېږدي، د نورو اقلیتونو سره یوځای د نوې، واحدې سوري هویت د جوړېدو لپاره کار وکړي، او له خپلو ګاونډیانو سره سوله او هوساینه کې ژوند وکړي."

اسرائیل په وروستیو ورځو کې پر جنوبي سوریې بریدونه زیات کړي دي. د چهارشنبې په ورځ یې د دمشق ښار شاوخوا، د ولسمشرۍ ماڼۍ او د دفاع وزارت پر سیمو هم بریدونه وکړل.

اسرائیل څو ځله له نړیوالې ټولنې غوښتي چې د سوریې درزي اقلیت خوندي وساتل شي، او دا چې د سوریې جنوب باید له پوځ او وسلو څخه خالي پاتې شي.

په تېره یوه اونۍ کې د سوریې په جنوب کې د درزي اقلیت او بدوي قبایلو ترمنځ نښتو، چې وروسته د دولتي ځواکونو مداخله هم پکې وشوه، نږدې ۶۰۰ کسان وژلي دي.

تر اوسه د اسرائیلو او سوریې چارواکو په رسمي ډول د دې موافقې په اړه څه نه دي ویلي، خو د امریکا د بهرنیو چارو وزیر، مارکو روبیو، د تام باراک دا پیغام بیا شریک کړی دی.

د جرمني صدراعظم، فریدریش مرڅ وايي، افغانستان ته د یو شمېر افغانانو د بېرته ستنولو عملیات "د قطر دولت په نږدې همکارۍ "ترسره شوي دي چې په وینا یې په دې چاره کې یې "د منځګړي رول لوبولی دی. "

نوموړې د جمعې په ورځ پر خپله ایکس پاڼه قطر په سېمه کې ، یو باوري او ستراتیژیک شریک بللی او د قطر له امیر څخه یې مننه کړې ده.

جرمني د جمعې په ورځ اعلان وکړ چې یو اتیا تنه افغانان چې په جرمونو کې ککړ و، د طالبانو تر واک لاندې افغانستان ته یې استولي دي. جرمني تر دې مخکې هم څو ډلې په جرمونو کې ښکیل افغانان د طالبانو تر واک لاندې افغانستان ته استولي دي چې د بشري حقونو د څار ‌ډلو یې دا چاره غندلې.

د جرمني صدراعظم تر دې مخکې د جمعې په ورځ په برلین کې خبریالانو ته وویل چې افغانستان ته په جرمونو کې د ککړو افغانانو بیرته ستنول د طالبانو د حکومت په وړاندې د جرمني په دریځ کې د بدلون یا د طالبانو د حکومت د په رسمیت پیژندو په معنی نه ده .

د ملګرو ملتونو ځانګړي راپور ورکوونکي رېچارډ بېنېټ، د جمعې په ورځ د هغو راپورونو په اړه ژوره اندېښنه څرګنده کړه چې وايي یو شمېر افغان وګړي ښايي ډېر ژر له متحده عربي اماراتو څخه وایستل شي.

بېنېټ چې په افغانستان کې د بشري حقونو د وضعیت څارنه کوي پر خپله ایکس پاڼه لیکلي: "زه د هغو راپورونو له امله سخت اندېښمن یم چې وایي له اماراتو څخه د یو شمېر له خطر سره مخ افغانانو د شړلو چمتووالی روان دی."

نوموړې د متحده عربي اماراتو غوښتي چې دا پلانونه دې سملاسي ودروي. ځکه چې د ریچارډ بینیټ په وینا "افغانستان خوندي نه دی، او هغه کسان چې په زور ورستنیدو ته اړ کیږي، له جدي ځورونې او تاوتریخوالي سره مخ دي."

دا خبرداری له هغې ګډې اعلامیې وروسته راغلی چې پکې بېنېټ او د ملګرو ملتونو نورو ځانګړو راپور ورکوونکو د ایران او پاکستان له‌خوا د افغان وګړو د پرلپسې جبري شړلو غندنه کړې وه.

په اعلامیه کې راغلي: "د ملګرو ملتونو کارپوهان له ایران او پاکستان څخه د افغان وګړو د جبري ستنولو لړۍ غندي." هغوی ټینګار کړی چې جبري ستنول باید سمدلاسه ودرول شي.

د ملګرو ملتونو کارپوهانو پر ټولو حکومتونو غږ کړی چې خپل نړیوال مکلفیتونه دې رعایت کړي، او تر هغو چې په افغانستان کې د داوطلبانه، خوندي او باعزته ستنېدنې شرایط برابر شوي نه وي، افغان کډوالو او پناه‌غوښتونکو ته دې بشپړ تحفظ ورکړي.

سره له دې چې د سوریې په دې جنوب لوېدیځه سیمه کې تر څلور ورځنیو نښتو وروسته، چې نژدې ۶۰۰ تنه پکې وژل شوي، اوربند اعلان شوی و، له سیمې ورکړل شوي راپورونه د دروزي جنګیالیو او بدویانو ترمنځ د نښتو د بیا پیلېدو پخلی کوي.

انادولو خبري آژانس، الجزیرې، او واشنګټن پوسټ ورځپاڼې د چنګاښ په ۲۷مه، جمعه راپور ورکړ چې د سوېدا په سیمه کې ټینګ شوی اوربند د پنجشنبې په ماښام مات شو او یو ځل بیا نښتې پیل شوې.

د انادولو خبري آژانس د راپور له مخې، چې خبریالان یې په سوریه کې حضور لري، د سني بدویانو د بېلابېلو قبیلو سلګونه جنګیالي، سوېدا ته رسېدلي دي، د سوېدا په شاوخوا کې یې د یو شمېر کلیو کنټرول ترلاسه کړی، او د سوېدا ښار لوېدیځې دروازې ته روان دي.

وسلوال بدویان وایي چې دوی د جمعې په ورځ پر دروزي جنګیالیو بریدونه پیل کړل. د دوی یوه قوماندان ویلي، اوربند یوازې د دولتي ځواکونو او دروزي جنګیالیو ترمنځ شوی، نه له بدویانو سره.

دغه قوماندان رویټرز خبري آژانس ته ویلي چې د دوی ځواکونه د خپلو هغو ملګرو د خوشې کېدو غوښتنه لري، چې په تېرو ورځو کې د دروزي وسله‌والو له خوا نیول شوي دي.

جرمني نن، د جمعې په ورځ (۲۷ سرطان)، ۸۱ افغان نارینه چې په دې هېواد کې په جرمونو محکوم شوي وو، افغانستان ته ولېږل.

د فرانس پرېس خبري آژانس د راپور له مخې، د جرمني د کورنیو چارو وزیر الکساندر دوبریند ویلي، د دې کسانو د شړلو حکم د محکمې له پرېکړې وروسته صادر شوی دی.

له کله چې په افغانستان کې طالبان بیا واک ته رسیدلي، دا دوهم ځل دی چې جرمني افغان پناه غوښتونکي له خپلې خاورې باسي.

د طالبانو د بهرنیو چارو وزارت ویاند، عبدالقهار بلخي هم نن په خپله ایکسپاڼه (پخوانی ټویټر) کې لیکلي چې د کډوالو د ایستلو له قضیې د طالبانو حکومت خبر و.

د کډوالو د ایستلو موضوع یو ځل بیا په جرمني کې پر یوه مهم سیاسي بحث بدله شوې، په ځانګړي توګه په داسې شرایطو کې چې د ښي‌ اړخي افراطي ګوند «بدیل جرمني» (AfD) محبوبیت زیات شوی دی.

د جرمني د کورنیو چارو وزارت ویلي چې د افغانانو د ایستلو په وروستيو عملیاتو کې قطر هم مرسته کړې او ټینګار یې کړی چې دا بهیر باید په راتلونکي کې هم دوام وکړي.

پاکستاني رسنیو نن د خپل هیواد د امنیتي سرچینو پر اساس ادعا وکړه چې سرحدي ځواکونو یې تېر ماښام (د جولای په ۱۷مه) پنځه مشکوک ځانمرګي بریدګر په داسي حال کې ونیول چې غوښتل ‌یې له افغانستان څخه پاکستان ته دننه شي.

سرچینو نیول شوي کسان د ټي ټي پي یا پاکستاني طالبانو غړي بللي دي او ویلي، دا کسان هغه مهال ونیول شول چې د بیسي خېل کلي په یوه جومات کې یې پناه واخیسته.

پاکستان وخت په وخت له افغانستانه د ټي ټي پي د وسله والو کسانو د وراښتو ادعاوې کوي. خو په افغانستان کې د طالبانو حکومت د پاکستان ادعاوې ردوي او وايي چې هیڅ ډلې ته اجازه نه ورکوي چې د افغانستان خاوره د بل هیواد پر ضد وکاروي.

شاوخوا یوه میاشت وروسته له هغه امریکا خپل ډیپلوماتان له عراقه وایستل، چې د ایران پر اتومي تاسیساتو بریدونه وشول.

د امریکا د بهرنیو چارو وزارت ویاندې، تمی بروس، د پنجشنبې په ورځ (۲۶ سرطان) په یوه خبري ناسته کې وویل:

«هغه کارکوونکي به، چې په موقتي توګه له عراقه بهر ځای پر ځای شوي وو، اوس په تدریج په بغداد کې د امریکا سفارت او په اربیل کې کونسلګرۍ ته بېرته ستنېږي.»

هغې زیاته کړه چې د بهرنیو چارو وزارت لا هم امریکايي وګړو ته سپارښتنه کوي چې عراق ته سفر ونه کړي.

امریکا د دې پرېکړې دقیق دلیل نه ‌دی څرګند کړی، خو فرانس پریس آژانس راپور ورکړی چې دا ډول بدلونونه عموماً د شخړو د خطر د کمېدو نښه ګڼل کېږي.

د روان چنګاښ په لومړۍ نېټه، کله چې دونالد ټرمپ د ایران پر اتومي تاسیساتو د برید امر ورکړ، د امریکا حکومت خپل ډیپلوماتان له عراقه وایستل.