د لاسرسۍ وړ لېنکونه

تازه خبر
جمعه ۲۸ مرغومی ۱۴۰۳ کابل ۰۴:۴۶

نړۍ

د امريکا دفاع وزير: د اوکراين د جګړې پايله اروپا او د ټولې نړۍ امنيت ته مهمه ده

د امریکا د دفاع وزیر لویډ اسټن
د امریکا د دفاع وزیر لویډ اسټن

د امریکا د دفاع وزیر لویډ اسټن وایي، د اوکراین د غمجنې جګړې پایله د اوکراین، اروپا او ټولې نړۍ امنیت ته مهمه ده.

اسټن پرون چهارشنبه په بروکسل کې د ناټو د دفاع وزیرانو له غونډې وروسته خبریالانو ته وویل، د دوی هدف دا دی چې اوکراین ته نوره مرسته ورکړي چې د روسیې په وړاندې جګړه کې بریالی شي.

اسټن که څه هم د نورو اضافي پوځي مرستو څرنګوالی مشخص نه‌کړ، خو زیاته یې کړه هر پوځي سیستم چې اوکرایني ځواکونو ته سپاري، روزنه به یې هم ورکوي.

پر اوکراین د روسیې ناموجه یرغل نژدې یو کلن کېږي او دې موده کې له اوکراینه د لوېدیځ ملاتړ د روسیې د ولسمشر ولادمیر پوتین غبرګونونه پارولي دي.

د ورځې تازه خبرونه دلته ولولئ

د بالیووډ پر ستوري سیف علي خان د چاکو ګوزارونه شوي

د بالیووډ په ستوری سیف علي خان باندې په ممبۍ کې په خپل کور ګې دننه د چاکو ګوزارونه شوي.

د هندی رسنیو په وینا ۵۴ کلن سیف علی خان د پنجشنبې په ورځ د سهار په ۳:۳۰ بجو په ممبۍ کې په خپل کور کې د نا معلومو افرادو له خو د چاکو په ګوزارونو ټپي شوی دي.

د بالیووډ یاد ستوری اوس مهال په ممبۍ کې نږدې د لیلاوتي روغتون ته یوړل شوی او ویل کیږي چې جراحي عملیات یې تر سره کیږي.

راپورونه کې راغلي چې سیف علي خان پر بدن د چاکو شپږ ټپونه لری، چې دوه یې ژور دي چې یو ټپ د ملا تېر ته نژدې دی.

پولیسو د پېښې په هکله تحقیقات پیل کړي دي.

د بریتانیا صدراعظم اوکراین ته لاړ

له کیڼې خوا: د اوکراین ولسمشر او د بریتانیا صدراعظم
له کیڼې خوا: د اوکراین ولسمشر او د بریتانیا صدراعظم

د بریتانیا صدر اعظم کییر سټارمر نن پنجشنبه اوکراین ته ورسېد.

د بریتانیا حکومت ویلي چې سټارمر به په کیف کې د اوکراین له ولسمشر ولودمیر زیلنسکي سره د " سل کلنې ملګرتیا" تړون لاسلیک کړي.

په دغه تړون کې له اوکراین سره په دفاعي، علمي، د انرژۍ او سوداګریزې بپه برخو کې ژمنې شاملې دي.

د اسوشیتید پریس خبري اژانس د راپور له مخې، دا واک ته له رسېدو وروسته اوکراین ته د بریتانیا د صدر اعظم لومړنی سفر دی.

هغه په ۲۰۲۳ هم اوکراین ته تللی و، خو هغه مهال د بریتانیا د اپوزیسیون مشر و.

بریتانیا له روسیې سره په جګړه کې د اوکراین نژدې ملاتړې ده او تراوسه یې د اوکراین شاوخوا پنځوس زره سرتیري روزلي دي.

بایډن د خپل ځایناستي په اړه اندېښنه ښکاره کړه

حو بایډن
حو بایډن

د امریکا ولسمشر جوبایډن ولس ته د خدای پامانۍ په وینا کې د متحدو ایالتونو د راتلونکې په اړه اندیښنه څرګنده کړه.

هغه تېره شپه په یوه پنځلس دقیقه یې وینا کې چې ممکن له ولس سره یې وروستۍ خبرې وي، په امریکا کې د " الیګارشي " خبرداری ورکړ.

الیګارشي د حکومت داسې یوه بڼه ده چې په هغه کې واک د یوې وړې ډلې په لاس کې وي.

د بایډن په خبره دغه وضعیت د امریکا ډیموکراسۍ ته یو ګواښ دی.
ټاکل شوې بایډن د راتلونکې دوشنبې په ورځ په رسمي بڼه واک خپل ځای ناستي، منتخب ولسمشر ډونالډ ټرمپ ته پریږدي.
د اسوشیتید پریس خبري اژانس د راپور له مخې، بایډن بې له دې چې د ټرمپ نوم یاد کړي، د خپل ځای ناستي په اړه اندیښنه ښودلې ده.

د ایران روزنیزې الوتکې له تخنیکي ستونزو لویدلې؛ درې سرتیري وژل شوي

د لویدلې روزنیزې الوتکې پاتې شوني
د لویدلې روزنیزې الوتکې پاتې شوني

په ایران کې د یوې روزنېزې الوتکې د لویدو پېښه کې د دې هېواد درې امنیتي سرتیري وژل شوي دي.

د ایران د پولیسو د معلوماتو مرکز نن چهارشنبه د مورخې په (۲۶) مه، رسنیو ته وویل چې هغه روزنیزه الوتکه چې د مهرآباد له هوايي ډګر څخه الوتنه کړې وه، تهران ته د راستنیدو په لاره کې نسکورې شوې ده.
دغه مرکز ویلي دي چې دغه روزنیزه الوتکه د تخنیکي ستونزو له امله لویدلې ده.
د فرانس پرېس خبري اژانس د راپور له مخې، ایران چې په وروستیو کلونو کې له سختو اقتصادي بندیزونو سره مخ دی، د څو هوايي پیښو شاهد دی او د دې هیواد چارواکي د الوتکو د پرزو په جوړولو کې له ستونزو شکایت کوي.
د ایران پخوانی ولسمشر ابراهیم رییسي هم د ۲۰۲۴ کال په می میاشت کې د چورلکې د غورځېدو په پېښه کې د دې هېواد د څو نورو چارواکو سره یوځای ووژل شو.

د امریکا دفاع وزارت ته نوماند: له افغانستان څخه وتل یو لویه ناکامي وه

د امریکا منتخب ولسمشر ډونالډ ټرمپ د نوې ادارې د دفاع وزیر لپاره نوماند پیټ هیګسټ وايي چې له افغانستان څخه د امریکایي ځواکونو وتل د هغه د هېواد لپاره یوه مطلقه او شرمونکې ناکامي وه.

هغه د سې‌شنبې په ورځ، د مرغومې (۲۵) مه، د امریکا د کانګرس د یوې غونډې په ترڅ کې چې موخه یې د نوموړي د نومول کېدو تایید و، وویل، له افغانستان څخه د امریکایي ځواکونو وتل د امریکا د پوځ اعتبار ته زیان رسولی او د امریکایي سرتېرو د وژلو او د هغو کسانو د پرېښودو لامل شول چې له امریکا سره یې همکاري کړې وه.
خو د جنورۍ په ۲۴مه، د امریکا ولسمشر جو بایډن د بهرنیو چارو په وزارت کې په خپله وینا کې یو ځل بیا له افغانستان څخه د امریکایي ځواکونو د وتلو دفاع وکړه او ویې ویل چې د جګړې پای ته رسول سمه پرېکړه وه.
په افغانستان کې د طالبانو له واک ته رسېدو دوه اونۍ وروسته، د امریکایي سرتېرو وروستۍ ډله د ۲۰۲۱ کال د اګست په ۳۱مه له هېواده ووتله.
له افغانستان څخه د دوی وتل د دوحې د تړون پر بنسټ بشپړ شول.
دا تړون د ډونالډ ټرمپ د ولسمشرۍ په لومړۍ دوره کې، د ۲۰۲۰ کال د فبرورۍ په ۲۹مه، د متحده ایالاتو او طالبانو ترمنځ لاسلیک شوی و.

روسیه: چمتو یو، د اوکرایین د جګړې د پای رسولو په اړه د امریکايي استازو نظر واورو

د روسیې د بهرنیوچارو وزیر وايي مسکو چمتو دی چې د اوکراین د جګړې د پای ته رسولو لپاره د مسکو د طرحې په اړه د امریکا د منتخب ولسمشر ډونالډټرمپ او د هغه د سلاکارانو نظر واوري.

سیرګي لاوروف نن (د جنوري ۱۴مه) په خپل کلني خبري کنفرانس کې وویل، د واشنګتن نوې ادارې د اوکراین د جګړې د حقایقو درک پیل کړی دی. له دې مخکې نورو روسي چارواکو هم د اوکراین په جګړه کې، چې په څو اونیو کې یې دریمه کلیزه پیلېږي، د احتمالي اوربند د طرحې په اړه ورته څرګندونې کړې دي.

ښاغلي ټرمپ ویلي چې غواړي د روسیې له ولسمشر ولادیمیرپوتین سره مخامخ وګوري او د اوکراین د جګړې د پای ته رسولو په اړه خبرې ورسره وکړي.

دا په داسې حال کې ده چې روسیې د اوکراین د قلمرو څه باندې شل سلنه سیمې اشغال کړي او په توجیه کې یې په ناټو کې د اوکراین د غړیتوب د مخنیوي په ګډون یولړ دلایل وړاندې کړي دي.

په کییف کې هم چارواکو د ټرمپ د سولې د طرحې اورېدو ته چمتووالی ښودلی. ټرمپ د پرون په یوه مرکه کې وویل پوتین چمتو دی چې د ده د لوړې له مراسمو وروسته له ده سره وګوري.

په لاس انجلس کې د بادونو اټکل د اورلمن د لمنې د پراخیدو ویره رامنځته کړې ده

د امریکا د کلیفورنیا ایالت په لاس انجلس ښار کې نن او سبا هم د چټکو بادونو اټکل شوی چې ښايي په ځنګلونو کې د لګېدلي اور لمن نوره هم پراخه کړي.

د امریکا د هواپېژندنې د ادارې کارپوه ډیویډ راټ ویلي چې د دې بادونو سرعت نن په ساعت کې تر ۱۲۰ کیلومترو پورې دی خو د هغه په وینا سبا- چارشنبې (د ډسمبر ۱۵مه) به یې سرعت د ۸۰ او ۱۱۲ کیلومترو ترمنځ وي. په ځنګلونو کې د تېرې اونۍ دوه لوی لګېدلي اورونه د چټکو بادونو له کبله پراخ شول.

د رویټرز خبري آژانس د راپور له مخې په لاس انجلس کې د اوروژنې کارکوونکي د نورو احتمالي اورونو د مخنیوي لپاره چمتووالی نیسي.

تېره شپه د اطفاییې څه باندې ۸۵۰۰ کارکوونکو په ځمکه او هوا کې د لګېدلو اورونو د مخنیوي په عملیاتو کې برخه واخیسته.

د راپورونو له مخې په دې اورپېښو کې تردې دمه لږترلږه ۲۴ کسان مړه شوي او له ۱۲ زرو ډېر کورونه او ودانۍ ویجاړې یا زیانمنې شوې دي.

د ناټو د بالتیک حوزې درې غړي هېوادونه د روسیې د ګواښونو په اړه غونډه لري

د ناټو سازمان ځانګړي ځواکونه په بالتیک سمندرګي کې د عملیاتو پر مهال
د ناټو سازمان ځانګړي ځواکونه په بالتیک سمندرګي کې د عملیاتو پر مهال

د شمالي اتلانتیک تړون سازمان یا ناټو د بالتیک حوزې درې غړي هېوادونه نن د روسیې د ځینې سمندري ګواښونو د دفاع په اړه غونډه کوي.

ایستونیا، لاتویا او لیتوانیا د دې غونډې جوړوونکي دي او تمه ده چې د ناټو د سرمنشي مارک روته په شمول ځینې نور مشران هم ورشي.

د غونډې اصلي هدف هم د هغو ګواښونو په وړاندې چې احتمالاً د روسي بیړیو له خوا پېښیږي د ځینو مهمو تاسیساتو ساتنه او دفاع ده.

روسیه پر اوکرایین د یرغل په خاطر له لګېدلو بندیزونو د ځان د خلاصون لپاره په بالتیک سمندرګي کې کښتۍ د تیلو د انتقال لپاره کاروي خو دا کښتۍ په ځینو مخربو فعالیتونو کې ښکېلې بلل شوي.

په وروستیو کې د دغو کښتیو د تحرکاتو په سبب دوه ځایه د فایبر اپتیک کیبلونه چې فنلند او جرمني سره وصلوي شلیدلي او په یوه بله پېښه کې هم د فنلند او ایستونیا د برېښنا کیبلونه پرې شوي.

شمالي کوریا لنډ واټن ویشتونکی میزایل توغولي دي

شمالي کوریا د سه شنبې په ورځ ګڼ لنډ واټن ویشتونکي میزایل توغولي دي. دا خبره د جنوبي کوریا پوځ په یوه بیان کې کړې ده.

د بیان په اساس شمالي کوریا د سه شنبې سهار نهه نیمي بجې د ګانګیي له سیمې دا میزایل توغولي چې تر ۲۵۰ کیلومتره یې مزل کړی او بیا سمندر کې لوېدلي.

شمالي کوریا داسې وخت دا توغندي ویشتلي چې د جاپان صدراعظم تاکیشي ایوایا جنوبي کوریا ته تللی دی.

ځینې کارپوهان بیا د شمالي کوریا له خوا د توغندیو دا ازموینه د امریکا د منتخب جمهور رییس ډونالډ ټرمپ راتلونکې ادارې ته یو پیغام بللی دی.

په لبنان کې نواف سلام ته د کابینې د جوړولو دنده وسپارل شوه

نواف سلام
نواف سلام

د لبنان د ولسمشرۍ دفتر ویلي چې د دې هېواد ولسمشر جوزف عون، د پارلمان له فراکسیونونو سره له مشورې وروسته، نواف سلام ته، چې د هاګ د نړیوالې محکمې رئیس دی، رسماً د کابینې د جوړولو دنده وسپارله.

د راپورونو له مخې، تر پرون (دوشنبې) ناوخته پورې د لبنان د پارلمان تر نیمايي زیاتو غړیو د نواف سلام ملاتړ کړی دی.

دا پرمختګ د دې ښودنه کوي چې په لبنان کې د حزب‌الله موقف کمزوری شوی دی. حزب‌الله، چې د ایران له ملاتړه برخمن دی، غوښتل چې نجیب میقاتی په دې څوکۍ کې پاتې شي.

د دوشنبې تر مازیګر پورې، نواف سلام د پارلمان د ۸۴ غړو ملاتړ ترلاسه کړی و. ښاغلی سلام به، چې اوس مهال په هاګ کې اوسي، د خپلې دندې د پیل لپاره لبنان ته ستون شي.

نور راوښيه

XS
SM
MD
LG