له افغانستان سره د بشري مرستو په چارو کې د ملګرو ملتونو همغږۍ اداره یا اوچا وایي، ښځې باید د بشري مرستو د چارو په ګډون د ژوند په ټولو برخو کې حیاتي ونډه ولري.

اوچا نن په یوه ټویټ کې ویلي چې د دغې ونډې باید درناوی وشي او هم وساتل شي.

په عین حال کې د ناروۍ د کډوالود شورا مشر یان ایګلنډ وایي، په افغانستان کې په نادولتي موسسو کې د ښځو پر کاربندیز به ناوړه پایلې ولري.

ایګلنډ په یوه ټویټ کې ویلي، ۶ میلیون وګړي به له قحطۍ سره مخ شي، ۶ لکه ماشومان به له زده کړې محروم شي، ۱۳،۵ ملیون وګړي به له پاکو اوبو برخې او ۱۴،۱ میلیون وګړي به هم د خوندیتوب له خدمتونو بې برخې شي.

ایګلنډ نن مخکې په یوه بل ټویټ کې ویلي و، شورا یې چمتو ده چې سر له سبا په دې هېواد کې خپل فعالیتونه بېرته پیل کړي، خو په دې شرط چې اړو کسانو ته د مرستو رسولو په چارو کې د دې شورا د ټولو ښځینه او نارینه کارکونکو پرمخ خنډونه لیرې شي.

دغې شورا د تېرې ډسمبر میاشتې په ۲۴مه وروسته له هغې په افغانستان کې د مرستو رسولو ټولې چارې ودرولې چې د طالبانو د اقتصاد وزارت په ټولو نادولتي موسسو کې د ښځو پر کار کولو بندیز ولګاوه.

ایګلنډ ویلي، ۴۶۹ ښځینه کارکوونکي یې په افغانستان کې اوه لکه افغانانو ته د بشري مرستو په رسولو کې حیاتي ونډه لري.

ملګروملتونو د افغانستان اوپاکستان ترمنځ د لانجي د هواري لپاره د ترسره شویو خبرو پرناکامه کیدو اندیښنه ښودلې او هیله یې څرګنده کړې چې دواړه لوري بیا جګړې ته مخه نکړي. پاکستاني جګپوړو چارواکو پرون چهارشنبې وویل چې د استانبول خبرې ناکامه شوې او پړه د افغانستان پرلوري واچوله.

د ملګروملتونو د سرمنشي ویاند سټیفن دوجاریک پرون چهارشنبې په نیویارک په یوه خبري غونډه کې د دې پوښتنې په ځواب کې چې ملګري ملتونه د افغانستان او پاکستان ترمنځ د خبرو ناکامه کیدو ته اندیښنه لري، وویل، چې البته دا سازمان اندیښمن دی او زیاته یې کړه چې سره له دې چې دا خبرې له خنډ سره مخ شوي خو دوی بیاهم ډیرهیله من دي چې نښتې به له سره پیل نشي. د دغو خبرو له ناکامه کیدو وروسته پاکستاني چارواکو ګواښ وکړچې د دواړو لورو ترمنځ د لانجې د هواري لپاره خبرو نتیجه ورنکړه او نافذ شوی اوربند له خطرسره مخ دی. د طالبانود حکومت چارواکو تراوسه د استانبول د خبرو او د پاکستاني چارواکو د وروستیو څرګندونو په اړه رسمي څه ندي ویلي.

د افغانستان د ۱۷ کلنو فوټسال لوبډله به نن پنجشنبې په بحرین کې د ۲۰۲۵ کال د آسیا د ځوانانو د سیالیو په پای لوبه کې له ایران سره مخامخ شي.

افغانستان د سې شنبې په ورځ تایلینډ ته ۹ د ۱ په مقابل کې په ماتې ورکولو سره د دې لوبو وروستي پړاو ته ووت.

افغانستان په دې سیالیو کې مخکې ازبکستان، بحرین او چین ته ماتې ورکړې ده.

د افغانستان کرکټ ملي لوبډلې پرون چهارشنبې په لومړۍ یو ورځنۍ مسابقه کې د زیمبابوې لوبډلې ته د ۵۳ منډو په توپیرماتې ورکړه.

دغه لوبه چې د زیمبابوې په کوربه ‌توب، په هرارې کې ترسره شوه، افغان لوبډلې ۱۸۰ منډې کړې وې چې د زیمبابوې لوبډلې یوازې ۱۲۷ منډې وکړې. دواړه لوبډلې به دوه نورې لوبې هم وکړي. یوه یې سبا جمعه او بله هم د یکشنبې په ورځ پلان شوي دي. دواړه لوبډلې په هند او سریلانکا کې د راتلونکې فبرورۍ او مارچ میاشتوکې د شل اوره نړیوال جام لوبو ته تیاری نیسي.

د لندن پولیسو پرون چهارشنبې یو ۲۲ کلن افغان پرقتل تورن کړ. د فرانسپرس خبري آژانس د راپورله مخې پولیسو صفي داوود په لندن کې د دوشنبې په ورځ د چړې په وسیله له برید وروسته د قتل او د وژنې د هڅې پردوو مواردو تورن کړ.

د راپورله مخې نوموړی د لندن په شمال لویدیځ د اکسبریج هستوګنې سیمې په یوه ارامه کوڅه کې د یوه ۱۴ کلن هلک په ګډون د درې کسانو په چاقو وهلو تورن دی.

د کورنیو چارو وزارت په وینا، هغه ته چې په ۲۰۲۰ کال کې یې ځان په یوه لارۍ کې پټ کړی اوبریتانیا ته راغلی، پناه ورکړل شوې او دوه کاله وروسته د دایمي پاتې کیدو اجازه ورکړل شوې.

د ملګروملتونو د ښځو څانګه وایي، په وروستیو کې په افغانستان کې د انټرنیټ او ټیلفوني اړیکو پریکیدو وښودله چې د افغان ښځو لپاره اړیکه څومره مهمه ده ـ او کله چې دا اړیکه له لاسه ورکړل شي، نوهیله له منځه ځي او ځای یې انزوا نیسي.

د ملګروملتونو د ښځوڅانګې دغه څرګندونې پرون چهارشنبې پرخپله ایکسپاڼه د اکتوبر د ۲۹، د انټرنیټ نړیوالې ورځې ته په اشاره کړې دي. دې ادارې په یوه راپورکې چې د اوکتوبرپه ۱۶ یې په خپله ویبپاڼه کې خپورکړی ویلي: کله چې طالبانو انټرنیټ بندکړ، ښځو د خپل ژوند د بقا لپاره د زده کړې او له یوبل سره د مرستو فرصت له لاسه ورکړ. د راپورله مخې د انټرنیټ او ټیلفوني اړیکو له بندیدو سره په افغانستان کې په ملیونونو ښځې او نجونې غلې شوې. دغه راز ویل شوي چې د هغو کسانو لپاره چې انټرنیټ ته یې لاسرسی درلود، بندیدو یې له بهرنۍ نړۍ سره وروستۍ اړیکه پرې کړه - هغه نازکه اړیکه چې د دوی د زده کړې، کار او هیلې یې ژوندۍ ساتلې وې. د روانې میاشتې په پیل کې د طالبانو له خوا په ټول افغانستان کې د ۴۸ ساعتونو په مخه د انټرنیټي او موبایل ټیلفوني خدماتو له بندیدو سره د نورو برخو ترڅنګ ښځو او نجونو هغه فرصت هم له لاسه ورکړچې انلاین یې زده کړې کولې.

تمه کیږي چې د افغانستان د ۱۷ کلنو فوټسال لوبډله به د پنجشنبې په ورځ په بحرین کې د ۲۰۲۵ کال د آسیا د ځوانانو د سیالیو په پای لوبه کې له ایران سره مخامخ شي.

افغانستان د سې شنبې په ورځ تایلینډ ته ۹ د ۱ په مقابل کې په ماتې ورکولو سره د دې لوبو وروستي پړاو ته ووت.

افغانستان په دې سیالیو کې مخکې ازبکستان، بحرین او چین ته ماتې ورکړې ده.

د " افغانستان دوستانو" په نوم غونډه کې د افغانستان د خلکو، په ځانګړې توګه د ښځو او نجونو د ملاتړ پر اړتیا ټینګار وشو.

په ملګروملتونوکې د کاناډا ماموریت د سې شنبې په ورځ ناوخته پرخپله ایکسپاڼه لیکلي: «موږ له افغانستان سره د دوامداره ملاتړ غوښتونکي یو او د دې هیواد له خلکو، په ځانګړې توګه د ښځو او نجونو پر خپل قوي ملاتړبیا ټینګارکوو. »

په دې اړه چې دا غونډه کله جوړه شوې وه، څه ندي ویل شوي خو ویل شوې چې د افغانستان د بشري حقونو لپاره د ملګرو ملتونو ځانګړي راپور ورکوونکي، ریچارډ بینټ او په ملګروملتونو کې د افغانستان د دایمي استازولۍ سرپرست، د ړنګ شوي جمهوي نظام چارواکي نصیراحمد فایق هم ګډون کړی و.

پر افغانستان د طالبانو له بیاځلي واکمنیدو وروسته له دې هیواد سره د نړیوالې ټولنې ډیری مرستې بندې شوي او د نجونو او ښځو لپاره د زده کړې، کار او د تګ راتګ په آزادۍ سخت محدودیتونه لګول شوي دي.

د طالبانو له واک ته رسیدو څه باندې څلور کاله وروسته، له روسیې پرته د نړۍ بل هیڅ هیواد هم د طالبانو حکومت په رسمیت ندی پیژندلی.

بشري حقونو، په ځانګړې توګه د ښځو او نجونو حقونوته درناوی او د یو ټول شموله حکومت جوړیدل د نړیوالې ټولنې له خوا د طالبانو د حکومت د په رسمیت پیژندلو لپاره اساسي شرطونه ګڼل کیږي.

د پاکستاني چارواکو د وروستیو څرګندونو په اړه چې وایي په استانبول کې خبرې ناکامه شوي، د طالبانو د حکومت چارواکو تراوسه څه ندي ویلي خو د دوی ترکنټرل لاندې ملي ټلویزیون وایي، د پاکستاني لوري د "غیرمنطقي غوښتنو " له امله پرمختګ ندی شوی.

د پاکستان د اطلاعاتو مرکزي وزیر عطاالله تارړ پرون سې شنبې پرخپله ایکسپاڼه په یوه پیغام کې وویل چې د استانبول په خبرو کې هیڅ پرمختګ ونه شو او هیڅ حللار ونه موندل شوه. د پاکستان دفاع وزیر خواجه اصف بیا ادعا وکړه چې په استانبول کې د طالبانو استازو واک نه درلود.

که څه هم د طالبانو چارواکو تراوسه د دې غونډې او پاکستاني چارواکو د څرګندونو په اړه څه ندي ویلي خو د طالبانو ترکنټرول لاندې ملي ټلویزیون چې د طالبانو سیاست منعکسوي، په خپله ویبپاڼه کې په یوه بیان کې لیکلي چې په استانبول کې د افغانستان او پاکستان تر منځ خبرې د پاکستاني لوري د "غیر منطقي غوښتنو " له امله پرمختګ نه کوي.

ویل شوي چې په دې خبرو کې پاکستاني لوري له افغانستان څخه غوښتي، چې په پاکستان کې د کېدونکو بریدونو د نه کېدو تضمین ورکړي. د افغانستان پلاوي بیا ویلي، چې تحریک طالبان پاکستان یا ټي ټي پي د پاکستان کورنۍ او پخوانۍ ستونزه ده، خو د افغانستان حکومت ژمن دی، چې د افغانستان خاوره به د پاکستان، یا د کوم بل هېواد پر وړاندې نه کارول کېږي.

د ترکیې په ګډون چې د دې خبرو کوربنه وه، تراوسه پوري هیڅ لوري ندي ویلي چې ایا دواړه پلاوي بیرته خپلو هیوادونو ته ستانه شوي او که د خبرو د دوام په نیت بیاهم په استانبول کې دي.

د کابل او اسلام آباد ترمنځ په وروستیو کلونو کې پریوبل د تورونو لګولو له امله د دواړو لورو ترمنځ اړیکي ترینګلې شوي دي. پاکستان تورلګوي چې افغانستان هغو وسله والو ډلو ته پناه ورکړې چې پر پاکستان بریدونه کوي، هغه تورچې کابل تل ردکړی دی.

پاکستاني چارواکو پرون ناوخته اعلان وکړ چې په استانبول کې د دوی او طالب استازو خبرې ناکامه شوي دي.

د پاکستان د اطلاعاتو مرکزي وزیر عطاالله تارړ په یوه پیغام کې وویل چې د استانبول په خبرو کې هیڅ پرمختګ ونه شو.

ده پر خپله ایکسپاڼه لیکلي چې د استانبول په خبرو کې هیڅ حللار ونه موندل شوه.

له بلې خوا د پاکستان دفاع وزیر خواجه اصف ادعا وکړه چې په استانبول کې د طالبانو استازو واک نه درلود.

خواحه اصف تېره شپه د پاکستان یوه خصوصي تلویزیون ته په مرکه کې وویل چې هند د افغانستان له لارې د پاکستان خلاف نبابتي جنګ پیل کړی دی.

طالبانو تراوسه پورې د استانبول د خبرو د ماتې او د پاکستاني چارواکو د دغو نویو ادعاوو په اړه څه نه دي ویلي خو د طالبانو د کورنیو چارو وزارت ویاند عبدالمتین قانع د سې شنبې په ورځ آریانا نیوز، د افغانستان خصوصي رسنۍ ته د پاکستان د دفاع د وزیر خواجه آصف وروستي خبرداري ته په اشاره چې ویلي و، که دواړه لوري یوې هوکړې ته ونه رسیږي نو دا "خلاصې جګړې" ته لار هوارولی شي وویل: هر برید به داسې ځواب شي چې د ده په ټکو هغه به "پاکستان ته د عبرت درس او نورو ته پیغام" ورکړي.

ښاغلي قانع زیاته کړه: "دا سمه ده چې موږ اټومي وسلې نه لرو، خو نه ناټو او نه هم متحده ایالات توانیدلي چې په افغانستان کې د شل کلنې جګړې سره سره دا هیواد تر خپل کنټرول لاندې راولي."

د کابل او اسلام آباد ترمنځ په وروستیو کلونو کې پریوبل د تورونو لګولو له امله د دواړو لورو ترمنځ اړیکي ترینګلې شوي دي. پاکستان تورلګوي چې افغانستان هغو وسله والو ډلو ته پناه ورکړې چې پر پاکستان بریدونه کوي، هغه تورچې کابل تل ردکړی دی.

د ایران ولسمشر د کابل او اسلام‌اباد ترمنځ د تاوتریخوالي د حل لپاره د مرستې وړاندیز وکړ.

مسعود پزشکيان د سې‌شنبې په ورځ د اقتصادي همکاریو سازمان (ECO) د سرمشریزې په څنډه کې د پاکستان له کورنیو چارو وزیر محسن نقوي سره وکتل او د کابل او اسلام‌اباد ترمنځ د ترینګلتیاوو له هواري یې یې مرستې ته چمتووالی څرګند کړ.

پزشکيان وویل، اسلامي هېوادونه باید د شخړو د کمولو لپاره یو موټی کار وکړي او د ګډو ګواښونو پر وړاندې “یووالی وساتي”، هغه ټینګار وکړ چې باید په سیمه کې د کړکېچونو د مخنیوي لپاره هڅې وشي.

پزشکیان دا وړاندیز په داسي حال کې وکړ چې په استانبول کې د طالبانو او پاکستان د حکومتونو خبرې پرون په درېیمه ورځ له ولاړ حالت سره مخامخ شوې.

د پاکستان د کورنیو چارو وزیر محسن نقوي د ایران له ولسمشر سره په خبرو کې د پاکستان او افغانستان ترمنځ په استانبول کې وروستۍ خبرې “رغنده” وبللې، خو ټینګار یې وکړ چې اختلافات باید د سوله‌ ییزو خبرو له لارې حل شي.

نقوي ټینګار وکړ چې سیمه‌ییزې ترینګلتیاوې باید نورې زیاتې نه شي، ځکه دواړه هېوادونه لا هم د خبرو د ناکامۍ پر سر یو بل ملامتوي.

د پاکستان د کورنیو چارو وزیر د ایران ولسمشر ته دا هم وویل چې «ترهګري» او «کډوالي» د ایران او پاکستان ګډې اندېښنې دي او زیاته یې کړه چې د دواړو ګاونډیو ترمنځ اوسنۍ همکاري به اغېزمنې پایلې ولري.