النصر فوټبال لوبډلې د کریستیانو رونالډو د هرکلي لپاره نن ماښام ځانګړي مراسم نیولي.
تمه ده کریستیانو رونالډو د هرکلي په دې مراسمو کې د النصر کمیس په تن کړي او رسماً له خپل نوي ټیم سره یو ځای شي.
رونالډو بېګا شپه ریاض ته په لار له الوتکې په لنډ پیغام کې وویل چې: "د ژر لیدو په تمه مو یم."
د پرتګال د ملي لوبډلې کپټان کریستیانو رونالډو د دوو کلونو په مخه د کال ۲۰۰ میلیونو ډالرو په ارزښت د سعودي عربستان له النصر لوبډلې سره تړون لاسلیک کړی دی.
د سعودي عربستان النصر لوبډلې ویلي چې، په بې صبرۍ د رونالډو د ورتلو شېبې شماري او له ټولو مینهوالو یې غوښتي چې د رونالډو د هرکلي په مراسمو کې ګډون وکړي.
له النصر سره د رونالډو د تړون د ډېرو پیسو تر څنګ چې د خلکو پام یې ور اړولی د دغه ټیم د انسټاګرام پاڼه هم په خورا چټکۍ مخته روانه ده.
د رونالډو تر تړون مخکې د النصر د انستاګرام پاڼه اتو لکو کسانو خوښه کړې وه خو د هغه په راتګ سره په دوو ورځو کې د دغه ټیم د مینهوالو شمېر په انسټاګرام باندې له اوه میلیونو واوښت.
رونالډو بیا خپله پر انسټاګرام ۵۲۷ میلیونه مینه وال په لرلو سره د نړۍ په کچه تر ټولو زیات مینهوال لري.