ملګروملتو او شریکانو یې پرون (پنجشنبه) په ۲۰۲۳ کال کې په نړۍ کې د اړمنو هېوادونو لپاره د ۵۱ ملیارده او ۵ سوه میلیون ډالرو مرستې غوښتنه وکړه.
تر دې وړاندې دومره مرسته نه وه غوښتل شوې.
ګومان کېږي چې په نړۍ کې به د هغو کسانو پر شمېر، چې مرستو ته اړتیا لري، لسګونه میلیون تنه زیات شي.
د ملګروملتو له لوري غوښتل شوې مرسته د روان ۲۰۲۲ کال په پرتله ۲۵ سلنه ډېره ده.
تر دې وړاندې دومره مرسته نه وه غوښتل شوې.
د ملګروملتو د بشري چارو د اټکل لهمخې، راتلونکی کال به ۶۵ میلیون تنه نور بشري مرستو ته اړتیا لري او په ۶۸ هېوادونو کې د دغو کسانو ټول شمېر ۳۳۹ میلیون تنو ته رسیږي.
د ملګروملتو د بېړنیو مرستو همغږي کونکي مارتین ګریفیتس د اوکراین جګړې او په افریقا کې وچکالۍ ته په اشارې وویل، بشري مرستو ته اړتیا په بوږنوونکي ډول لوړه شوې ده.
د ده په وینا د سږ کال سختې پېښې د راتلونکي کال پر وضعیت اغېز شیندي.
په نړۍ کې څه باندې ۱۰۰ میلیون تنه کډوال دي.
جګړو او اقلیمي بدلونونو د کډوالۍ او بې ځایه کېدو ستونزه زیاته کړې ده.
د ملګروملتو په راپور کې راغلي چې د روسیې او اوکراین ترمنځ ۹ میاشتنۍ جګړې د خوراکي موادو د صادراتو بهیر ټکنی کړی او کابو ۴۵ میلیون تنه په ۳۷ هېوادونو کې له لوږې سره مخامخ دي.
په نړۍ کې څه باندې ۱۰۰ میلیون تنه کډوال دي.
ګریفیتس پرون د مرستې د غوښتنې په مهال وویل، د کرونا وبا د ماشومانو د واکسینونو په ځنډېدو کې ډېر رول لوبولی، د شدیدې بېوزلۍ د مخنیوي هڅې یې کمزورې کړي او د کولرا په شان ناروغۍ یې زیاتې کړي دي.
د بېوزلو هیوادونو لپاره د ملګروملتو د لسګونو میلیارد ډالرو مرستې تر غوښتلو یوه ورځ وړاندې د ملګروملتو د بشري مرستو د همغږۍ ادارې (اوچا) په یوه راپور کې وویل چې د افغانستان د نفوس په درو کې دوې برخې به راتلونکی کال بشري مرستو ته اړ وي.
