د اوکراین ولسمشر ولودیمیر زیلینسکي وايي، روسیې د ده د هېواد د انرژۍ څه باندې درېیمه برخه تاسیسات ویجاړ کړي دي.

زیلینسکي نن په برلین کې د اوکراین د رغونې په اړه غونډې ته د ویډیو کنفرانس له لارې په وینا کې وویل چې روسیې د اوکراین هر څه وران کړي او د دې هېواد لپاره به دا ګرانه وي چې راروان ژمی تېر کړي.

په برلین کې د اوکراین د رغونې په کنفرانس کې د جرمني د صدراعظم اولاف شولڅ او د اروپايي کمېسیون د مشرې اورزولا وان دېرلین په ګډون د اروپا جګپوړو چارواکو ګډون کړی و.

مېرمن وان دیرلین د اوکراین پر ملکي تاسیساتو برید تروریستي عمل وباله.

د نړیوال بانک د اټکل له مخې روسیې د اوکراین عامه تاسیساتو ته د ۳۴۵ میلیارد ډالرو انډول زیان اړولی.

د قطرپلازمینه دوحې باندې د اسرائیلو برید پراخ غبرگونونه وپارول.

د ملګرو ملتونو عمومي منشی انتونیو ګوتیرش دابرید د قطر په حاکمیت او ځمکني تمامیت څرکند تیری وباله او وغانده.

ایران د اسرائیل دغه برید خطرناک او نړیوالو قوانینو څخه څرګنده سرغړونه وبلله.

دایران دبهرنیو چارو وزارت ویاند اسماعیل بقايي دغه برید یو"فوق العاده خطرناک" اقدام وباله او وویل چې په دغه برید کې فلسطیني مرکچیان په نښه شوي دي.

د ترکیې بهرنیو چارو وزارت ویلي دي چې په دوحه کې د حماس په غړو د اسرائیل برید غندي اوزیاته یې کړه چې دغه برید ښيي چې اسرائیل په سیمه کې " توسعه غوښتونکی سیاست" او دولتي تروریزم ته مخه کړې ده.

امریکا او اروپايي اتحادیه حماس ډله یو تروریستي سازمان ګڼي.

دکاتولیکو مسیحیانو مذهبي مشر پاپ لیو په قطر باندې د اسرائیلو د برید د عواقبو په اړه اندیښنه څرګنده کړه.

پاپ وویل چې اوسنی وضعیت جدي دی.

بلخوا په دوحه کې دامریکا او چین سفارتونو په قطر کې له خپلو اتباعو وغوښتل چې په خپلو کورونو کې پاته شي او له تګ راتګ ډډه وکړي.

د اسرائیلو اردو نن سه شنبې اعلان وکړ چې د حماس د افراطي ډلې مشران یې په نښه کړي دي.

سره لدې چې اسرائیلو پیل کې ونه ویل چې برید یې چیرته کړی دی خو وروسته د صدراعظم بنیامین نتانیاهو دفتر وویل چې برید یواځې د اسرائیلو لخوا په مستقله توګه شوی دی.

نتانیاهو وویل چې خپلو ځواکونو ته یې امر کړی وو چې په بیت المقدس کې ددوشنبې د ورځې دبرید عاملانو ته جزا ورکړي.

په دغه برید کې ۶ اسرائیلیان مړه او ۱۶ کسه نور ټپیان شول.

اسرائیلي چارواکو وویل چې دغه برید د لویدیځې غاړې د دوو کسانو لخوا شوی دی.

دا په تیرو دوو کلونو کې په بیت المقدس کې لومړنی دا ډول برید وو.

د اسرائیلو دفاع وزیر ییسراییل کاتس وویل په دې یقین لري چې په دوحه برید "بشپړه توجیه " لري.

خو دقطر د بهرنیو چارو وزارت ویاند ماجد الانصاري دغه برید د ټولو نړیوالو قوانینو څرګنده سرغړونه وبلله او وغانده .

ایکسپاڼه کې د اسرائیلو د اردو اعلامیې وویل چې له برید مخکې د ملکي تلفاتو د مخنیوي لپاره اقدامات ترسره شول.

اعلامیې زیاته کړه چې په نښه شويو کسانو د کلونو لپاره د حماس مشري کوله او په اسراییلو یې د ۲۰۲۳ کال د اکتوبر د اومې په برید کې مستقیم لاس درلوده.

هغه مهال په دغه برید کې شاوخوا ۱۲۰۰ کسان ووژل شول او ۲۵۰ نور یرغمل شول.

دغه برید ددې لامل شو چې اسرائیل په غزه پراخ او شدید هوايي او ځمکني بریدونه وکړي.

د پاکستان د پنجاب د طبیعي پیښو د مدیریت ادارې عمومي رییس وایي، په تیرو ۲۴ ساعتونو کې، له یولک او دوه ویشت زره څخه ډیر کسان د پنجاب په ختیځ کې د جلال پور پیروالا ښار څخه د سیلونو له امله خوندي ځایونو ته انتقال شوې دي.

عرفان علي کاتیا زیاته کړه چې له څو اونیو راهیسې سختو بارانونو او د هند له لورې د بندونو د اوبو د خوشي کیدو له امله په پنجاب کې شاوخوا دوه میلیونه او دوه لکه کسان د خپلو کورونو پریښودو ته مجبوره شوې دي.

په پنجاب کې اوس د ملتان ښار د سیلونو له خطر سره مخامخ دی، د چارواکو په وینا هلته شیبه په شیبه په سیندونو کې د اوبو کچه لوړیږي.

د تیرو دریو اونیو په ترڅ کې سیلونو د پاکستان په پنجاب کې د لسګونو کسانو ژوند اخیستی او نژدې څلور زره کلي او واړه ښارونه اوبو لاندې کړې دي.

د اسراییل پوځ نن( د سپتمبر په ۹مه) اعلان وکړ چې په غزه کې نور ځواکمن عملیات ترسره کوي.

د پوځ چارواکو د سیمې له خلکو وغوښتل چې د دې لپاره دي سمدستي د الرشید له سمندرغاړې ووځي.

دا خبرداری یوه ورځ وروسته له هغه ورکړل شو چې په بیت المقدس کې شپږ اسراییلیان د ډزو پرمهال ووژل شول.

اسراییلي چارواکو ویلي دي چې د لویدیځې غاړې دوو فلسطینیانو دا حمله کړې ده.

په تیرو دوو کلونو کې داسې برید په بیت المقدس کې نه و شوی.

د اسراییل صدراعظم بنیامین نتنیاهو د پیښې په ځای کې وویل چې هیواد یې له ترهګرو سره په بشپړه جګړه کې دی او ژمنه یې وکړه چې پوځي عملیات به د لویدیځې غاړې لور ته وغځوي.

امریکایي او اروپایي چارواکو پرون دوشنبه پر روسیې د نویو بندیزونو په اړه غونډه کړې او ټاکل شوې بحثونه یې نن سه شنبه هم دوام ومومي.

اسوشیتید پریس د یوې باخبره سرچینې په حواله لیکلي چې غونډه د امریکا په خزانې وزارت کې جوړه شوې وه او په کې پر روسیې د اقتصادي فشارونو له هغې ډلې د دغه هېواد د تېلو پر سکتور د بندیزونو او د تعرفولوړولو یادونه وشوه.

دغې سرچینې ویلي، ټرمپ غواړي د همدې فشارونو له لارې روسیه د اوکراین د جګړې پای ته رسیدو ته مجبوره کړي، خو په خبره یې دې چاره کې د دوی د اروپایي متحدانو بشپړه همکاري اړینه ده.

د متحده ایالتونو د دغې غونډې ګډونوال هغه امریکایي او اروپایي چارواکي یاد شوي چې د انرژۍ، بندیزونو او دغه راز مالي او سوداګریزې چارې مخته وړي.

تیره پنجشنبه په پاریس کې د اوکراین د وضعیت په اړه یوې غونډې ته خپله ډونالډ ټرمپ هم په ډاګه وویل چې اروپایي ټولنه باید د روسیې د تیلو او ګازو په پیرلو بندیز ولګوي.

د نیپال په پلازمېنه کتمندو کې نن دوشنبه لږ تر لږه ۱۶ مظاهره چیان د پولیسو په ډزو کې وژل شوي دی.

لویدیځو اژانسونو لیکلي چې پولیسو د مظاهره چیانو د خورولو لپاره ډزې کړي او دغه راز یې پر هغوی ربړۍ ګولۍ او اوښکې بهونکی ګاز کارولی او اوبه یې پرې شیندلې دي.

مظاهره چیان له دولته غواړي چې پر ټولنیزو رسنیو محدودیت لرې کړي او له فساد سره مبارزه وکړي.

د کتمندو د پولیسو یوه مسول شیخار خانال ویلي، شاوخوا سل مظاهره چیان دا مهال په روغتون کې بستر دي.

دولت دغلته پریکړه کړې چې پر ټولنیزو رسنیو لکه یوټیوب، فیسبوک او اکس بندیز ولګوي ځکه د دوی په خبره کمپنۍ یې راجستر شوې نه دي او دولت پرې څارنه نه شي کولای.

د امریکا ولسمشر ډونالډ ټرمپ حماس ته "وروستی خبرداری" ورکړی دی، او له دې ډلې یې غوښتي چې د اسراییلي یرغمل شویو کسانو د خوشې کولو لپاره یوې موافقې ته ورسیږي.

حماس د امریکا او اروپايي ټولنې لخوا یو ترهګر سازمان ګڼل کیږی.

ټرمپ د سپتمبر په ۷مه، د یکشنبې په ورځ په خپلې سوشیا تروټ ټولنیزه شبکه کې ولیکل چې "اسرائیلیانو زما شرایط منلي دي. د حماس لپاره وخت دی چې دوی یې هم ومني. ما حماس ته د دې شرایطو د نه منلو د پایلو په اړه خبرداری ورکړی دی. دا زما وروستی خبرداری دی. نور به هیڅ خبرداری نه وي."

اسراییلي رسنیو د شنبې په ورځ راپور ورکړ چې د امریکا ولسمشر حماس ته د اوربند نوی وړاندیز کړی دی.

د پلان له مخې، حماس به د اوربند په لومړۍ ورځ ټول ۴۸ پاتې اسراییلي یرغمل شوي کسان خوشې کړي، په بدل کې به یې اسراییل هم زرګونه بندي فلسطینیان خوشې کړي.

د افغانستان لپاره د امریکا د متحده ایالاتو شارژدافیر ډان براون وايي چې د ولسمشر ډونالډ ټرمپ نوی اجرایوي فرمان د بهرنیو هیوادونو د بی دلیله توقیف څخه د امریکایي اتباعو د ساتنې لپاره یو بې ساري اقدام دی.

هغه د سپتمبر په ۷مه، د یکشنبې په ورځ په ایکسپاڼه کې په یوه پیغام کې خبرداری ورکړ چې دا ډول توقیفونه به سختې پایلې ولري.

ښاغلي بروان د طالبانو د نوم اخیستلو پرته، لیکلي چې دا فرمان یو واضح پیغام رسوي چې که تاسو هڅه وکړئ چې یو امریکایی تبعه د معاملې کولو لپاره د وسیلې په توګه وکاروئ، نو تاسو به له سختو پایلو سره مخ شئ.

د متحده ایالاتو ولسمشر ډونالډ ټرمپ د جمعې په ورځ یو نوی اجرایوي فرمان لاسلیک کړ چې د بهرنیو چارو وزارت ته اجازه ورکوي چې هغه هیوادونه تور لیست کی شامل کړي چې په ناحقه امریکایی اتباع توقیف کوي.

تر دې مخکې ، د ټرمپ ادارې د طالبانو لخوا د نیول شوي افغان-امریکایی تبعه محمود شاه حبیبي د خوشې کولو غوښتنه کړې.

خو د طالبانو حکومت د ښاغلي حبیبي نیول چې پخواني نظام کې د افغانستان د ملکي هوايي چلند ادارې مشر و، رد کړي او ویلي یې دي چې د هغه د ځای په اړه هیڅ معلومات نلري. د ټرمپ ادارې د حبیبي د موندلو لپاره پنځه میلیونه ډالر جایزه هم اعلان کړې.

په سره سمندر کې د څو سمندري کیبلونو د پرې کېدو له کبله د اسیا او منځني ختیځ په ځینو برخو کې انټرنیټي خدمتونه ورو او ګډوډ کړی دی.

د پیښې لامل لا تر اوسه روښانه نه دی.

مایکروسافټ خبرداری ورکړی چې په منځني ختیځ کې کاروونکي ممکن په خپلو انټرنیټ خدماتو کې نور ځنډونه تجربه کړي.

نیټ بلاکس وویل چې بندښت هند، پاکستان او څو نور هیوادونه اغیزمن کړي او لامل یې د سعودي عربستان جدې ښار ته نږدې د نړیوالو کیبلونو زیانمنېدل دي.

سعودي او اماراتي چارواکو د بندښت تایید نه دی کړی، خو په متحده عربي اماراتو کې کاروونکو د انټرنیټ د سرعت د کمیدو راپور ورکړی دی.

سمندري کیبلونه ډیری وختونه د سمندري پیښو یا بریدونو له امله زیانمن کیږي او ترمیم یې اونۍ وخت نیسي.

په وروستیو میاشتو کې داسې اټکلونه شوي چې دا لینونه د اسراییلو په وړاندې د یمن د حوثيانو په کمپاین کې په نښه کیدی شي، که څه هم دې ډلې دمخه دا ډول تورونه رد کړي دي.

د بریتانیا پولیس وایي، د " پالستاین اکشن" یا د فلسطین لپاره د اقدام ډلې د ملاتړ په خاطر د تیرې شپې له لاریون وروسته یې نژدې ۹ سوه کسان نیولي دي.

دا په یوې پیښه کې د نیولو شویو کسانو لوړ شمیر ښيي.

د فلسطین لپاره د اقدام ډله د ترهګرۍ ضد قانون له مخې په تیره جولای میاشته کې له فعالیته منع شوه.

دغه ډله تورنه ده چې د اسراییل اړوند پوځي اډو او د وسلو پر شرکتونو باندې یې بریدونه کړي دي.

د بشري حقونو سازمانونه پر دغې ډلې بندیز د بیان ازادۍ محدودول بولي خو د بریتانیا حکومت وایي، دا اقدام یې د بې نظمۍ د مخنیوي لپاره کړی دی او اړین دی.

د جاپان صدر اعظم شیګیرو ایشیبا له واکه د لرې کېدو اعلان کړی دی.

اسوشیتید پریس خبري اژانس د جاپان د دولتي ټلویزیون په حواله ویلي چې ایشیبا دغه اعلان نن یکشنبه وروسته تر هغه وکړ چې حاکم ګوند یې د تیرې جولای میاشتې په پارلماني ټاکنو کې ماته وخوړه.

رویټرز هم د یوې سرچینې په حواله د ایشیبا د احتمالي استعفا خبر ورکړی او ټاکل شوې چې نوموړی نن ناوخته خبري کانفرانس ته هم حاضر شي.

نوموړي دغه اعلان یوه ورځ وروسته تر هغه وکړ چې حاکم لیبرال دیموکرات ګوند یې تیره ورځ د رهبرۍ لپاره د له وخته مخکې ټاکنو غوښتنه وکړه.

که د ګوند دغه غوښتنه تایید شي، دا د صدر اعظم د عدم اعتماد رایې په معنا ده.

د هغه د استعفا په اړه په ګوند کې دننه اختلافاتو د نړۍ دغه څلورم اقتصاد لرونکی هېواد له سیاسي بې ثباتۍ سره مخامخ کړی دی.