ډيپلوماټ مجله:
ډيپلوماټ مجلې پر افغانستان د طالبانو د واکمنۍ د يوه کال پوره کېدو په اړه ليکلي چې د افغانستان د منتخب حکومت تر سقوط يو کال وروسته، د طالبانو حکومت له داخلي او بهرنيو ازموينو سره لاس او ګرېوان دی.
او دا داسې ازموینې دي چې کولای شي د دوی د حکومت ضعیفه بنسټ نور هم کمزوری کړي.
د ډیپلومات په وینا، د طالبانو حکومت چې تر اوسه بهرنیو هېوادونو په رسمیت نه دی پېژندلی، له داخلي بې اتفاقیو ډک دی او طالبان نه دي توانیدلي چې د دوحې په تړون کې د خپلو ژمنو پر بنسټ یو ټول شموله حکومت جوړ کړي.
ډیپلوماټ زیاتوي چې طالبانو ښځې تر ډېره له کاره بې برخې کړي او د نجونو زده کړې یې تر شپږم ټولګي پورته محدودې کړې دي.
د مقالې د لیکوال په باور د افغانستان له ۹۰ سلنې څخه زیات خلک کافي خوراکي توکو ته لاس رسی نهلري او تر دې بده د امریکا د بې پیلوټه الوتکې په حمله کې د کابل په زړه کې د القاعده شبکې د مشر ایمن الظواهري وژل کېدل دي.
د لیکوال په باور دا ښکاروي چې ښايي افغانستان یو ځل بیا د ترهګرو ډلو په خوندي ځای بدل شي.
ډیپلوماټ مجله پوښتنه کوي چې طالبان په افغانستان کې څنګه حکومت کوي او دا هېواد پر کوم لوري روان دی؟
د ډیپلوماټ د مقالې د لیکوال په وینا، د کابل له سقوط وروسته، طالبانو د دې ډلې پخواني مشر او بنسټګر ملا محمد عمر ته نږدې له سخت دریځو څخه جوړ حکومت اعلان کړ، داسې کابینه چې په بشپړه توګه د نارینهوو په واک کې ده.
په مقاله کې راغلي، چې طالبانو د ترهګرو په لېست کې د يو شمېر کسانو په ټاکلو کې هيڅ عذر نه درلود او له نیمايي کابینې څخه زیات، یاني له هرو ٣٠ کسانو څخه ١٧ يې د امريکا د متحدو ايالتونو د ترهګرو په لېست کې دي.
ډیپلوماټ لیکلي، د طالبانو د جنډر پالیسۍ د ښځو لپاره په ځانګړې توګه زیانمنوونکې دي.
ځکه چې د افغان ښځو اکثریت خپلې دندې له لاسه ورکړي او یوازې یو څو ته په هغو دندو کې د کار کولو اجازه ورکړل شوې چې نارینه یې نهشي کولای او دوی اړې شوې چې په لږ معاش هم دا کارونه وکړي.
انډيپنډنټ مجله:
برېتانوي مجلې انډیپنډنټ بیا د هالیووډ د مشهورې هنرمندې او بشردوستانه فعالې انجلینا جولي هغه مقالې ته اشاره کړې چې له افغان ښځو سره د طالبانو د چلند په اړه په ټایمز مجله کې خپره شوې ده.
انجلینا جولي د طالبانو د حکومت له خوا له ښځو سره د ناوړه چلند په اړه د انتقاد په ترڅ کې وايي، له افغانستانه د امریکايي ځواکونو له وتلو یو کال تېر شوی او په یوه شپه کې شاوخوا ۱۴ میلیونه افغان نجونو منځني ښوونځي او لېسو ته د تللو حق له لاسه ورکړ.
پوهنتونونو ته د تګ، د کار حق او د سفر ازادي یې له لاسه ورکړې.
د انجلینا جولي په وینا، انډیپنډنټ لیکلي چې: "پر ښځو په ظلم او جبر باندې جوړه شوې سوله په هیڅ ډول سوله نه ده، بلکې هغه ټولنه ده چې په دوامداره توګه له ځان سره په جګړه کې وي."
