د رسمي ارقامو له مخې اروپا ته د روسیې د تېلو په صادراتو او د دې هېواد د تېلو د قراردادونو په بیو کې په تېرو پنځو میاشتو کې کموالی راغلی.

د روسیې د ګازپروم لوی شرکت پرون اعلان وکړ چې د نومبر له لومړۍ نېټې، د اپرېل تر پنځلسمې نېټې پورې اروپا او ترکیې ته د روسیې د تېلو په صادراتو کې د تېرکال د همدې مودې پرتله په سلو کې ۲۶،۴ کموالی راغلی.

پر اوکراین د روسیې له یرغل وروسته اروپايي ټولنې ویلي دي چې اروپا غواړي د روسیې پر ګاز له دریو دوه برخې اتکا راکمه کړي، خو جرمني بیا د روسیې د ګاز د صادراتو له بشپړ تحریم سره مخالفت کړی دی.

د سوریې نوي مشر احمد الشرع د ده د ځواکونو له خوا د ملکي علویانو د ډله ییزې وژنې له راپورونو وروسته، د ځواب ویلو او څیړنو ژمنه وکړه.

دغه ډل وژنه د بشار الاسد د حکومت له ړنګېدو او سوریه کې د نوي حکومت له راتګ وروسته د ملکیانو په وړاندې د تاوتریخوالي تر ټولو خونړۍ پیښه بلل شوې ده.

د سوریې د بشري حقونو یوې ډلې نن دوشنبه ( د کب شلمه) ویلي چې د مارچ له شپږمې راهیسې د سوریې د امنیتي ځواکونو یا دولت پلوه ملیشو له خوا ۹۳۷ ملکیان وژل شوي دي.

دغه ډل وژنه د اقلیت علویانو په سیمه کې د چاڼیزو عملیاتو پر مهال شوې.

دا هغه سیمه ده چې د سوریې پرزیدلی ولسمشر بشار الاسد پورې اړوند ده او هلته د هغه پلویان هم اوسیږي.
تازه تاوتریخوالی وروسته له هغه زیات شو چې تېره سه شنبه د بشار اسد وفاداره ځواکونو د سوریې د نوي دفاع وزارت دوه پوځیان د لاذقیه ښار په الدعتور سیمه کې ووژل.

تر دې پېښې وروسته د سوریې د نوي حکومت ځواکونو او ملاتړو وسله والو په یادو سیمو کې د د اسد د حکومت د پاتې شونو د تصفیې په نوم پراخ عملیات پيل کړل.

د امریکا د بهرنیو چارو وزیر مارکو روبیو د اوکراین د سولې په خبرو کې د ګډون په هدف تېره شپه سعودي عربستان ته روان شو.

د امریکا د بهرنیو چارو وزارت ویاندې ټامي بروس ( Tammy Bruce ) ویلي، روبیو به جده کې د دریو ورځو په مخه د ولسمشر ډونالډ ټرمپ پر هغو اهدافو تمرکز وکړي چې له مخې یې غواړي اوکراین کې د روسیې جګړه ختمه شي.

دا په جده کې د اوکراین د جګړې په اړه دویم پړاو خبرې دي.

لومړي پړاو خبرو کې که څه هم اوکرایني چارواکي حاضر نه و، خو فرانس پریس ویلي چې د اوکراین ولسمشر ولودمیر زلنسکي دا ځل ویلي چې د جدې خبرو کې به ګډون وکړي.

د اوکراین د سولې په اړه غونډه داسې مهال جوړیږي چې تېره اونۍ د امریکا حکومت له اوکراین سره پوځي مرستې او دغه راز استخباراتي معلوماتو شریکول وځنډول.

د هندوستان د کرکټ ملي ټیم نن د اتلانو جام یا چمپینز ټرافي په پایلوبه کې له نیوزیلند سره مخ شوی وو.
په پایلوبه کې نیوزیلند ۲۵۲ منډې هدف ورکړی وو.

هند وتوانېد په وروستي اوور کې د ۶ لوبغاړو په سوځېدو یاد هدف ته ورسیږي.

په دې ترتیب هندوستان د چمپینز ټرافۍ اتلولي وګټله.

په دا وار چمپینز ټرافي کې چې د پاکستان په کوربه توب وشوه او د هند لوبې په دوبۍ کې پلان شوې وې افغانستان هم برخه اخیستې وه.

افغانستان که څه هم نسبتاً ښې لوبې وکړې خو د باران په سبب یې له اسټرالیا سره مهمه لوبه مساوي شوه چې په سبب یې افغان ټیم له مخکې تګه پاتې راغی.

په داسې حال کې چې کییف له واشنګټن سره د خبرو لپاره سعودي عربستان ته د خپل پلاوي د لېږلو لپاره تیاري نیسي، روسیې په اوکراین کې پر ملکي اهدافو او د جګړې په ډګر کې د پرمختګ لپاره حملو ته زور ورکړی دی.

اوکرایني سیمه ایز چارواکي وايي چې روسیې پرون (د مارچ ۸مه) د اوکراین په ختیځه دونیڅک سیمه کې د هوايي حملو پرمهال لږترلږه پنځوس کسان او په دوبروپیلا ښار کې یوولس کسان ووژل.

د اوکراین ولسمشر ولودیمیر زیلینسکي تېره شپه ناوخته پر ټولنیزو شبکو په یوه بیان کې ولیکل دا حملې ښيي چې د روسیې اهداف نه بدلېدونکي دي نو ځکه د ده په وینا د خلکو د ساتنې، د اوکراین د هوايي مدافعې د ځواکونو د پیاوړي کولو او پر روسیې د نورو بندیزونو د لګولو لپاره باید لازم اقدامات وشي.

ټاکل شوې چې د امریکا د بهرنیوچارو وزیر مارکو روبیو له خپل اوکرایني سیال اندرې سیبیها سره د اوکراین او روسیې ترمنځ د جګړې د بندولو په اړه د خبرو لپاره سبا د مارچ له ۱۰مې تر ۱۳مې پورې سعودي عربستان ته سفر وکړي.

د اتلانو د جام- چمپینز ټرافي د سیالیو په فاینل لوبه کې نیوزیلنډ هند ته د ۲۵۲ منډو هدف وټاکه.

نیوزیلنډ د لوبې د پچې تر ګټلو وروسته د توپ وهنې پرېکړه وکړه او په پنځوسو اوورونو کې یې د اوو لوبغاړو په زیان سره ۲۵۱ منډې جوړې کړې. په څو شېبو کې به د هند لوبډله بیټینګ پیل کړي.

نیوزیلنډ تېره چارشنبې په نیم پایلوبه کې جنوبي افریقا ته او هند بیا د سه شنبې په ورځ اسټرالیا ته له ماتې ورکولو وروسته پایلوبې ته ووتل. په دې جام کې د افغانستان د کرکټ ملي لوبډلې هم نسبتا ښې لوبې لرلې خو وروسته له دې چې له اسټرالیا سره یې د باران له کبله لوبه مساوي شوه له وړاندې تلو پاتې شو.

د اتلانو د جام یا چمپینز ټرافي د لړۍ فاینل لوبه به نن د هند او نیوزیلنډ ترمنځ ترسره شي. دا لوبه د کابل په وخت د ماسپښین په یوه نیمه بجه په ډوبی کې په پام کې ده.

نیوزیلنډ تېره چارشنبې په نیم پایلوبه کې جنوبي افریقا ته او هند بیا د سه شنبې په ورځ اسټرالیا ته له ماتې ورکولو وروسته پایلوبې ته ووتل.

په دې جام کې افغانستان هم نسبتا ښې لوبې لرلې خو وروسته له دې چې له اسټرالیا سره یې د باران له کبله لوبه مساوي شوه له وړاندې تلو پاتې شو.

په سوریه کې د تېرو دوو ورځو په نښتو کې د وژل شویو کسانو شمېر له زرو اوښتی دی.

د سوریې د بشري حقونو د څار ډلې نن وویل، پر هغو ۷۴۵ ملکيانو سربېره چې له نژدې فاصلې لګېدلي دي د دولتي امنیتي ځواکونو ۱۲۵سرتېري او د مخالفو ډلو ۱۴۸ وسله وال هم په هغو جګړو کې چې د پنجشنبې په ورځ پیل شوې، وژل شوي.

دا ډله چې مرکز یې په برتانیا کې دی وايي چې په لاذقیه او د شاوخوا په پراخو سیمو کې یې د بریښنا او د څښاک د اوبو د رسولو خدمات هم په ټپه درېدلي دي.

دا وژنې د سوریې په کورنۍ جګړه کې چې ۱۴ کاله مخکې پیل شوه د تشدد له ډېرو خونړیو مواردو ګڼل کېږي او د نوي حکومت لپاره به چې درې میاشتې مخکې یې د بشارالاسد رژیم وپرځاوه او واک ته ورسېد یوه لویه ننګونه وي.

د احمدالشرع په مشرۍ سني حکومت وايي چې دا عملیات یې د اسد رژیم ته د وفادارو علوي وسله والو د حملو په ځواب کې پیل کړي دي.

د اوکراین ولسمشر ولودومیر زیلینسکي وايي چې هغه راتلونکې اونۍ په سعودي عربستان کې د امریکا له استازو سره رغنده خبرو اترو ته "بشپړ ژمن" دی.

د رویټرز په وینا، زیلینسکي د شنبې په ورځ پر خپله ایکس پاڼه لیکلي چې اوکراین د دې جګړې له لومړۍ شېبې راهیسې د سولې په لټه کې دی. هغه وویل ریښتیني وړاندیزونه په میز کې دي او هغه هیله لري چې په اړینو پریکړو او اقداماتو به موافقه وشي.

زیلینسکي وویل چې هغه به راتلونکې اونۍ سعودي عربستان ته سفر وکړي او د دوشنبې په ورځ به له ولیعهد سره وویني.

د اوکراین ډیپلوماتیک او پوځي استازي به د سې شنبې په ورځ د امریکا له ټیم سره وګوري.

د سوریې د بشري حقونو د څار ډلې یوه غړي، رامي عبدالرحمان، نن رویټرز اژانس ته ویلي چې په تېرو دوو ورځو کې د سوریې امنیتي ځواکونو او د هغوی ملاتړ کوونکو تر ۳۴۰ ډېر ملکیان وژلي دي.

رامي عبدالرحمان زیاتوي چې د دې ملکیانو اکثریت علویان دي.

د سوریې د کورنیو چارو وزارت د پنجشنبې په ورځ ویلي و، چې د اسد د رژیم د وسله‌والو پر ضد د حکومتي ځواکونو د عملیاتو پر مهال، په انفرادي توګه سرغړونې شوي دي، او په دې برخه کې به تحقیقات وشي.

رویټرز اژانس څرګندوي چې په خپلواکه توګه د دې راپورونو پخلی نه‌شي کولی.

د امريکا ولسمشر ډونالډ ټرمپ وايي، غواړي د ايران د اټومي پروګرامونو په اړه له دغه هېواد سره خبرې اترې وکړي او تېره پنجشنبه يې د ايران مشرانو ته يو ليک استولی دی. ولسمشر ټرمپ وويل چې هيله‌مند دی د ايران اسلامي جمهوريت، چې د امريکا د نږدې متحد اسرائيل سرسخته دښمن دی، له خبرو اترو سره موافقه وکړي.

ښاغلي ټرمپ د فاکس بيزنس شبکې سره په يوه مرکه کې، چې د جمعې په ورځ خپره شوه، وويل، هيله‌ لري ايران د خبرو اترو مېز ته حاضر شي، ځکه چې دا به د ايران لپاره ډېر ښه وي.

هغه زياته کړه چې باور لري ايران به د دې ليک پيغام درک کړي، که نه نو امريکا به بل څه وکړي، ځکه چې د ولسمشر ټرمپ په وینا، نه شي کولی چې نړۍ کې یوه بله اتومي وسله وزغمي.

د ايران د بهرنيو چارو وزارت تر اوسه د ښاغلي ټرمپ دې څرګندونو ته کوم ځواب نه دی ويلی.

دا ليک د ايران مشر آيت الله علي خامنه‌اي ته لېږل شوی دی. ټرمپ ټينګار وکړ چې له ايران سره د چلند لپاره دوه لارې شته: پوځي لاره يا یو جوړ جاړي ته رسیدل. هغه وويل چې جوړ جاړی يې غوره بولي، ځکه چې نه غواړي ايران ته او د هغه په وينا د دې هېواد سترو خلکو ته زيان ورسېږي.