- ګارډین
له بریتانیا خپرېدونکې ګارډین ورځپاڼې افغانستان ته د لوېدیځو هېوادونو په نه پاملرنې یوه لیکنه خپره کړې ده.
د بریتانیا تکړه خبریال جان سیمپسون چې کلونه کېږي له افغانستانه راپورونه ورکوي په دې مقاله کې لیکي، له افغانستانه د لوېدیځو هېوادونو له وتلو وروسته دغه هېواد کې اقتصادي کړکېچ زیات شوی.
لیکنه کې د بیلګې په ډول د کابل، هرات او بامیان ښارونو یادونه شوې چې بې وزله کسان په کې د ډوډۍ سوال ته په لویو کتارونو کې ناست وي.
لیکوال ویلي، کله چی څوک دې ښارونو کې ګرځې د شرم احساس کوې، ځکه خلک یې بې وزله دي او کله نا کله د خپلو هغو لاسته راوړنو د دفاع په خاطر ان وژل کېږي چې تېرو دوو لسیزو کې یې ترلاسه کړي دي.
له افغانستانه د امریکایي او نورو بهرنیو ځواکونو له وتلو دا دی ۶ میاشتې ووتې، خو لیکوال انتقاد کړی چې همدې لږه موده کې امریکایي او بریتانیایي رسنیو د افغانستان وضعیت هېر کړی دی.
جان سیمپسون لږ وړاندې تللی او د افغانستان په اړه یې د امریکا د مخکېني ولسمشر ډونالډ ټرمپ پر پالیسۍ هم نیوکه کړې.
ده ویلي، ټرمپ په لوی لاس افغانستان طالبانو ته وسپاره.
ګارډین لیکلي، د امریکا اوسنی ولسمشر جو بایډن که څه هم مجبور نه و چې د افغانستان په اړه د ټرمپ تګلاره تعقیب کړي، خو وایي بایډن هم د امریکا ګټو ته لومړیتوب ورکړ او سرتېري یې له افغانستانه وایستل.
د لیکوال په باور، د افغانستان د غمیزې لامل د امریکا او نورو لوېدیځو قدرتونو داسې کمزوري په ګوته کوي چې ان د ویتنام له ماتې وروسته هم نه تر سترګو کېده.
- ګلف ټوډې
ګلف ټوډې ورځپاڼې په یوه راپور کې د نړیوال بانک د مشرتابه هغې پرېکړې ته اشاره کړې چې ویلې يې دي، د افغانستان د کنګل شویو شتمنیو له جملې یو میلیارد ډالر کرنې، روغتیا او کورنیو پروګرامونو ته ځانګړي کوي.
په مطلب کې راغلي، دا پرېکړه هغه هڅې ګړندۍ کوي چې په افغانستان کې د خرابېدونکي بشري او اقتصادي ناورین د مخنیوي په هدف ترسره کېږي.
وړاندې لولو، دا پيسې روان ۲۰۲۲ کال کې د افغانستان د بیا رغونې له صندوقه اخیستل کېږي او د لګښت لپاره یې د ملګرو ملتونو اړوندو بشري ادارو ته سپارل کېږي.
- اکسپرېس تریبیون
اکسپرېس تریبیون ورځپاڼې بیا په خپله تازه ګڼه کې روسیې ته د پاکستان د صدر اعظم عمران خان د همدې اوونۍ پر پلان شوي سفر تبصره کړې ده.
لیکنه کې راغلي، اوس مهال توده موضوع د روسیې او اوکراین نانندرۍ دي، خو لیکوال ویلي، خان به د روسیې له چارواکو سره پر نورو مسایلو سربېره د افغانستان پر وضعیت هم خبرې وکړي.
ورځپاڼې لیکلي، پاکستان د امریکا متحد دی او دې برخه کې باید شاتګ ونه کړي، خو لیکوال ټینګار کړی چې پاکستان له روسیې سره هم خپلې اړیکې پياوړې کوي.