د جنوري په ۲۹مه د نړیوال خوراکي پروګرام WFP په مالي مرسته خوست کې ۵۰۰ نارینه او ښځینه وو ته د حرفوي او مسلکي زده کړو ۶ میاشتنۍ پروګرام پیل شو.

د دې پروګرام ۳۵۰ ځوانان د خوست د مرکز اوسیدونکي او ۱۵۰ تنه يې په ګلان کېمپ کې مېشت وزیرستاني کډوال دي چې د دې پروګرام د ټولو ګډوالو له ډلې ۲۴۰تنه ښځې دي.

د خوست اقتصاد رئیس شهزاده پېر یې په اړه وايي:"د WFP په مالي ملاتړ ۵۰۰ خوستي ځوانانو او خویندو ته د حرفوي زده کړو د مراسمو افتتاح ده، په دې پروګرام کې به په مختلفو برخو کې خویندو او وروڼو ته زده کړې ورکول شي، لکه موټر سایکل جوړونه، موبایل جوړونه، اچارجوړونه، خیاطي او نورو برخو کې دوی ته حرفوي زده کړې ورکړل شي، دا پروګرام به د ۶ میاشتو لپاره وي، خو دوامداره به وي. "

مسوولین وايي، د برنامې ټولو ۵۰۰ ګډونوالو ته د میاشتې ۷ زره افغانۍ معاش په پام کې نیول شوی او د روزنې لپاره يې ۵۰ تنه استادان هم ګمارل شوي دي.

د دې برنامې پلي کېدنه افغان پرمختیايي او مسلکي موسسې پرغاړه ده، مسوول يې رشاد طاهري د برنامې د پرانېستې ګډونوالو ته په خپلو خبرو کې وویل، دا برنامه په اصل کې د فقر د کچې د ټیټولو لپاره طرحه شوې ده.

د خوست اوسیدونکي او د کلیوالي شوراګانو غړي یاده برنامه د خلکو د اوږدمهاله ځان بسیاینې پر لور یو ښه ګام بولي او زیاتوي چې دې برنامې ته مستحق کسان جذب شوي دي.

د یوې کلیوالي شورا مشرظاهر شاه وايي، د برنامې د ګډونوالو په خاطر دقیقه سروې شوې او ټاکلی پلاوی کلي په کلي او کور په کور ګرځیدلي او تر وسه يې مستحق کسان جذب کړي دي.

په خوست کې د خوړو نړیوال پروګرام داسې مهال سلګونو کسانو ته د حرفوي زده کړو او د ۶ میاشتو لپاره د یوه اندازه معاش برنامه پیلوي چې د یاد پروګرام مشر د افغانستان روان اقتصادي وضعیت کړکېچن بللی دی.

نوموړي ویلي، لوږه او قحطي د شااوخوا ۲۳ میلیونه افغانانو تر کورونو رسیدلې چې د افغانستان د وګړو څه باندې نیمايي برخه جوړوي.

هغه د نړۍ له شتمنو هېوادونو غوښتي چې د یوه بشري بحران د مخنیوي په پار له افغانستان سره مرستې زیاتې کړي.

نن( د اګست ۳۰مه) د افغانستان په ختیځ کې په ولایتي کچه د پولیو یا د ماشومانو د ګوزڼ ناروغي د مخنیوي کمپاین پیلیږي.

له پولیو څخه پاک افغانستان بنسټ د جمعې په ورځ په خپله ویبپاڼه کې د دې کمپاین خبر ورکړ. د دې بنسټ په وینا، د ننګرهار او لغمان ولایتونو په دوو ولسوالیو کې به نن ماشومانو ته د پولیو واکسین ورکړل شي.

د روغتیا د نړیوال سازمان په وینا سږکال په افغانستان کې د پولیو دوې مثبتې پیښې ثبت شوي، یوه په بادغیس او بله په هلمند کې.

افغانستان او پاکستان د نړۍ یوازیني دوه هیوادونه دي چې لاهم پکې د پولیو مثبتې پیښې لیدل کیږي.

د امریکا ) این-پي-ار) راډیو خبر ورکړ چې طالبانو د دولسو چینایانو پاسپورټونه ګرځولي او دوی یې نیولې دي.

د دې خبر له مخې د طالبانو او ( ایف چین) کمپنۍ ترمنځ د جون په میاشت کې د امو د حوزې د تیلو د تړون تر لغوه کیدو وروسته دا کسان په کابل کې نیول شوې دي چې له دې ډلې یې اته تنه بیرته ازاد شوي او څلور تنه لاهم په بند کې دي.

په واشنګتن ډي سي کې د چین سفارت ویلي دي چې دوی په دې اړه معلومات نه لري. د طالبانو یوه چارواکي چې د خپل نوم له اخیستو ډډه کړې ده ویلي دي چې د دې چینایانو پاسپورټونه ګرځول شوي وو، خو هغوی نه دي نیول شوي.

د طالبانو د کانونو او پترولیم وزارت ویلي دي چې دې چینایي کمپنۍ په خپلو مالي ژمنو عمل نه دی کړی نو تړون ورسره لغوه شوی دی، خو د ( ایف چین) کمپنۍ غړیو ( این-پي ـ ار) راډیو ته ویلي دي چې

طالبان په دې نه پوهیږي چې په قراردادونو کې دواړه لورې ګټې کوي.

طالبانو له ( ایف چین) کمپنۍ سره د دوه زره درویشتم کال په جنوري کې د امو حوزې د تیلو د استخراج پنځه ویشت کلن تړون لاسلیک کړی و. د تړون له مخې چینایي کمپنۍ ژمنه کړې وه چې په لومړیو دریو کلونو کې به پنځه سوه څلویښت میلیونه ډالر پانګونه کوي.

ټاکل شوې ده چې یوه ډله افغانان د دوشنبې په ورځ له اسلام اباده جرمني ته انتقال شي.

جرمني رسنیو د خپل هیواد د چارواکو په وینا خبر ورکړی دی چې شاوخوا پنځوس افغانان به د جرمني هانورو ښار ته په الوتکه کې ولیږدي.

دا کسان د هغو شاوخوا دوه زره درې سوه افغانانو له ډلې دي چې په پاکستان کې اوسي او جرمني یې د منلو ژمنه کړې ده.

په وروستیو کې د نورو کډوالو ترڅنګ په پاکستان کې پر دغو افغانانو فشارونه زیات شوې دي او د جرمني د بهرنیو چارو د وزارت په وینا له دې ډلې تر څلور سوه پنځوس ډير افغانان پاکستاني پولیسو نیولي و چې نژدې نیمایي یې د برلین د هڅو له امله بیرته خوشي شوې دي.

له څه باندې څلور کلونو راهیسې چې طالبانو کابل نیولی، جرمني په لسګونو زره افغانان خپل هیواد ته انتقال کړې دي.

د افغانستان او پاکستان د کرکټ ملي لوبډلې نن د کابل په وخت د ماښام اووه نیمې بجې مسابقه لري.

دا لوبه د افغانستان، پاکستان او کوربه متحده عربي اماراتو ترمنځ د درې اړخیزې شل اووره لړۍ په ترڅ کې په شارجه کې ترسره کیږي.

د افغانستان د کرکټ بورډ چارواکي وایي چې د دې درې اړخیزو لوبو هدف اسیایي جام ته چمتوالی دی چې یولس ورځې وروسته په متحد عربي اماراتو کې پيلیږي.

په اسیایي جام کې د دغو دریو لوبډلو ترڅنګ، د هند، عمان، هانګ کانګ او بنګله دیش ملي لوبډلې برخه اخلي.

په افغانستان کې د طالبانو حکومت،اسلام اباد په خوست او ننګرهار کې په وروستیو بریدونو تورن کړ.

د طالبانو د حکومت د بهرنیو چارو وزارت کابل کې د پاکستان سفیر احضار کړ او دغه بریدونه یې یو "پارونکی عمل " وباله او وغندل.

د پاکستان حکومت او پوځ تراوسه په دې هکله څه نه دي ویلي.

په شینوارو او سپیرې ولسوالیو باندې د چهارشنبې د شپې د بی پیلوټه الوتکو دغو بریدونو کې د ماشومانو په شمول لږ ترلږه درې کسه وژل شوي او اوه تنه نور ټپیان شوي.

دغه راز یو شمیر کورونه هم ویجاو شوي دي.

کابل مخکې لدې هم اسلام اباد په افغانستان کې په ورته بریدونو تورن کړی .

اسلام اباد وایي پاکستاني طالبان په افغانستان کې پټنځایونه لري او له هغه ځایه پاکستان کې خپل بریدونو تنظیموي خو په افغانستان کې د طالبانو حکومت دغه ادعا تل رد کړې ده .

د افغانستان او پاکستان د کریکټ ملي لوبډلې سبا جمعه شل اوریزه لوبه لري.

دا لوبه د افغانستان، پاکستان او متحده عربي اماراتو د درې اړخیزې لوبلړۍ په ترڅ کې ترسره کیږي چې د افغانستان په وخت ماښام ۷ نیمې بجې پیلیږي.

دا لوبلړۍ د متحده عربي امارتو په کوربه توب اسیایي جام ته د چمتوالي په هدف ترسره کیږي او دغه جام راتلونکې میاشت ته پلان شوی دی.

لوبلړۍ لس ورځې دوام کوي او دوه غوره لوبډلې به د سپټمبر په ۷مه پایلوبه کوي.

د امریکا د نړیوالې مذهبي آزادۍ کمیسیون (USCIRF) د هغو افغانانو لپاره د نوي خوندیتوب او لارو چارو غوښتنه کړې چې د مذهبي ځورونې سره د مخامخ کیدو خطر یې زیات دی.

د دې ادارې د اعلامیې له مخې چې د چارشنبې په ماښام خپره شوه، راغلي چې تر اوسه، طالبانو د اسلام د یوه تعبیر په عملي کولو سره هغه کسان چې مختلف نظرونه یا مذهبي عقیدې لري، تابع او په نښه کړي دي.

د دې ادارې رییسې ویکي هارټزلر له قوله راغلي:

"په څلورو کلونو کې، طالبانو په افغانستان کې مذهبي ازادۍ په بشپړه توګه له منځه وړې دي. ټول افغانان، د مذهبي اقلیتونو په ګډون، د ځورول کېدو له سخت خطر سره مخامخ دي. د طالبانو تش په نامه 'اخلاقي قانون' د ظلم یو سخت سیسټم نور هم پیاوړی کوي، په عامه او مذهبي ژوند کې د افغان ښځو ګډون له منځه وړي او مذهبي اقلیتونه د زیان له جدي خطر سره مخامخ کوي."

د دې میاشتې په پیل کې، USCIRF د طالبانو امربالمعروف و نهی عن المنکر د قانون په اړه یو راپور خپور کړ. د ۲۰۲۵ کال په خپل کلني راپور کې دې ادارې د متحده ایالاتو د بهرنیو چارو وزارت ته سپارښتنه وکړه چې افغانستان د مذهبي ازادۍ د سیستماتیک، دوامداره او سختو سرغړونو له امله د ځانګړې اندیښنې وړ هیواد په توګه وپېژني.

طالبانو سمدستي په دې اړه څه نه دي ویلي خو مخکې یې ویلي چې دوی د ټولو مذهبي اقلیتونو حقونو ته ژمن دي.

د خبریالانو د خوندیتوب کمیټې (CPJ) په افغانستان کې له طالبانو غوښتي چې خبریال شکیب احمد نظري سمدلاسه خوشې کړي چې له جولای میاشتې راهیسې په توقیف کې دی.

د خبریالانو د ژغورنې کمیټې د اسیا-پاسیفیک رییس بې لي یي په یوه بیان کې غوښتنه کړې:

"دوی باید دا خبریال سمدلاسه ازاد کړي، او اعتراف ته د خبریالانو اړ ایستل ودروي. دا له رسنیو سره د دوی ظالمانه چلند په ګوته کوي."

CPJ یادونه کړې چې د نظري توقیف د طالبانو د هغو ځپنو د لړۍ وروستۍ بېلګه ده چې د نړیوالو رسنیو سره کارکونکي افغان خبریالان په نښه کوي.

د ۲۰۲۱ کال په اګست کې د طالبانو د واک ته رسیدو راهیسې، د بشري حقونو ډلو او د مطبوعاتو د ازادۍ مدافعینو پر خپل سري توقیفونه، بېرول او سانسور مستند کړي دي.

نظري، د جاپاني رسنۍ نیپون تلویزیون خبریال، د جولای په ۲۴مه د طالبانو استخباراتي اجنټانو توقیف کړ.

د خوست ولایت په سپیرې ولسوالۍ کې سیمه ییزې سرچینې ادعا کوي، چې بې پیلوټه الوتکو په دغه ولسوالۍ کې یو شمیر کورونه بمبارد کړي دي.

یادو سرچینو چې نه یې غوښتل د موضوع د حساسیت له امله یې نوم او غږ یې په خبر کې خپور شي ازادي راډیو سره خبرو کې دا ادعا هم وکړه، چې د چهارشنبې د ورځې د ماخوستن په دې بمبارۍ کې خلکو ته مرګ ژوبله هم اوښتې ده.

د طالبانو حکومت امنیتي ادارو په دې اړه څه نه دي ویلي.

دا معلومه نه ده چې دا بې پیلوټه الوتکې به د کوم هیواد وي.

ازادي راډیو نه شي کولای په خپلواک ډول دا معلومات تایید کړي.

د یادونې ده چې په تېره کې د افغانستان د خاورې په ځینو برخو د پاکستاني الوتکو له خوا د بمبارۍ راپورونه ورکړل شوي دي.

د امریکا د فدرال استیناف محکمې د ۲۰۰۱ کال د سپتمبر د ۱۱مې د بریدونو او د افریقا په سفارتونو کې د ۱۹۹۸ کال د القاعده د بمي چاودنو د قربانیانو د کورنیو هغه هڅې رد کړې چې غوښتل یې د افغانستان بانک له کنګل شوي شتمنۍ څخه ملیاردونو ډالره تاوان ورکړل شي.

په مانهاټن کې د استیناف دوهمې محکمې وویل چې د نیویارک په فدرال ریزرف بانک کې ساتل شوي د افغانستان ۳.۵ ملیارد ډالر د بهرني حاکمیت د معافیت تر قانون (FSIA) لاندې خوندي دي.

د دې قانون له مخې دولتي شتمنۍ د جریمې په توګه نشي تر لاسه کېدای.

محکمې ټینګار کړی چې د افغانستان بانک (DAB)، یوه دولتي اداره ده او له همدې امله له هغو عریضو معافیت لري چې د طالبانو د حکومت پر ضد کیږي.

د قربانیانو کورنیو استدلال کړی و چې د افغانستان زیرمې باید د خسارې په توګه وکارول شي ځکه چې په هغو کلونو کې د طالبانو حکومت د دغو بریدونو تر شا د لاس لرونکې ډلې (القاعده) غړو ته خوندي ځای ورکړی و.

القاعدې د سپتمبر د یوولسمې بریدونو مسولیت منلی و چې په نیویارک، واشنګټن او پنسلوانیا کې یې نژدې ۳۰۰۰ کسان ووژل، او همداراز القاعده شبکې په ۱۹۹۸ کال کې په کینیا او تنزانیا کې د امریکا په سفارتونو بمي بریدونه وکړل، چې ۲۲۴ کسان یې ووژل.