متحده عرب اماراتو د جنورۍ له لسمې بهر ته د هغو کسانو پر سفر بندیز ولګاوه چې د کرونا ضد بشپړ واکسین یې نه وي لګولی.
د دغه هېواد دولتي اژانس وام «WAM» پرون د بهرنیو چارو وزارت او نورو چارواکو په حواله دغه خبر ورکړ.
په راپور کې ویل شوي، هغو کسانو چې یو واکسین یې لګولی، د دې لپاره چې د سفر پر شرایطو برابر شي، باید تقویتي ستن یا ډوز هم ولګوي.
دا تحول داسې مهال راځي چې د نړۍ بېلابېلو برخو ته د کرونا ویروس د نوې بڼې اومېکرون خپرېدو د نړۍ د ګڼو هېوادونو او سازمانونو اندېښنې پارولي دي.