په نړۍ کې د اومېکرون په نوم د کرونا وبا د نوې بڼې د مثبتو پېښو له زیاتېدو سره اروپا بندیزونو ته مخه کړې ده او متحد ایالاتونو خبرداری ورکړی دی.
امریکایي چارواکي وایي، د هغو کسانو شمېر د پام وړ زیات شوی چې په اومېکرون اخته دي او بستر شوي دي.
د جرمني او فرانسې چارواکو پرون وویل، داسې ښکاري چې اومېکرون به د کرونا وبا د پنځمې پیاوړې څپې سبب شي.
د فرانسې حکومت له خلکو غوښتي دي چې واکسین وکړي او د کرسمس د میلو په وخت کورنۍ غونډې محدودې کړي.
ډنمارک ویلي دي چې ټیاټرونه، د کنسرټ سالونونه، تفریحي پارکونه او موزیمونه به بند کړي.
د ایرلنډ حکومت بیا خبر ورکړی دی چې پر دې غور کوي چې د بارونو او رسټورانټونو وخت راکم کړي چې تر ډېره پرانیستي نه وي.
په دې ترڅ کې روغتیایي چارواکو د هالنډ حکومت ته وړاندیز کړی دی چې بندیزونه ولګوي.
دا په داسې حال کې ده چې په نړۍ کې خلک د کرسمس جشن او نوي میلادي کال لپاره رخصتۍ پیلوي.