- ګارډین
ګارډین ورځپاڼې د طالبانو پر نوې اعلان شوې کابینې یوه لیکنه خپره کړې ده.
د ورځپاڼې په لیکنه د طالبانو په سرپرسته اداره کې چې د چهارشنبې په ورځ یې کار پيل کړ، ټول غړي د طالبانو سخت دریځه کسان دي او هېڅ مېرمنه په کې نشته.
د امریکا د بهرنیو چارو وزارت هم د طالبانو د کابینې پر جوړښت اندېښنه ښودلې او ویلي یې دي، نړۍ د افغانستان وضعیت له نژدې څاري.
اروپایي ټولنې هم پر دې کابینې چې طالبانو لنډ مهاله بللې ده، نیوکه کړې.
ګارډین ورځپاڼې د مطلب په یوه برخه کې دې ته هم کتنه کړې چې طالبانو د ښځینه ورزشکارانو د فعالیت مخه نیولې ده.
ورځپاڼې د طالبانو د فرهنګي کمېسیون د مرستیال احمدالله وثیق په حواله لیکلي چې د اسټرالیا اېس.بي.اېس ټلوېزیون ته ویلي، د ښځو لپاره ورزش نه مناسب دی او نه هم یوه اړتیا.
- انډپنډنټ
انډپنډنټ ورځپاڼې د طالبانو په وړاندې د ښځو پر لاریونونو تمرکز کړی دی او ویلې یې دي، د هغه طالب انځور ټولنیزو رسنیو کې ډېر ښکته پورته کېږي چې د یوې لاریون کوونکې مخته یې د ټوپک شپیلۍ نیولې ده.
په لیکنه کې راغلي، ټولنیزو رسنیو کې د دې مېرمنې مېړانه ډېره ستایل شوې ده.
د ښځو دا مظاهرې په کابل، مزار شریف، هرات، نیمروز او ځینو نورو ښارونو کې ترسره شوي، دوی له طالبانو د کار، تحصیل او سیاسي ګډون حق غواړي.
د ورځپاڼې په لیکنه، طالبانو د مظاهره کوونکو د تیت او پرک کولو لپاره هوایي ډزې کړي او هغوی یې ویرولي دي.
- واشنګټن ایګزاماینر
واشنګټن ایګزاماینر ورځپاڼې بیا یوې بیلې موضوع باندې لیکنه خپره کړې.
دې ورځپاڼې لیکلي، د امریکا اداره له هغو راپورونو سره په چار چلند کې له ستونزو سره مخامخ ده چې ویل کېږي د امریکایي اتباعو څو الوتکې د مزارشریف په هوایي ډګر کې بندې پاتې دي.
د ورځپاڼې په باور، دې راپورونو پر ولسمشر جو بایډن نیوکې زیاتې کړي او هغه دا چې ده ولې د ټولو امریکایي اتباعو له ایستلو مخکې له افغانستانه خپل پوځیان و ایستل.
د راپورونو له مخې د لسګونه امریکایي اتباعو الوتکې له تېرو څو ورځو راهیسې د مزار په هوایي ډګر کې بندې پاتې دي او دې ته په تمه ده چې طالبان دوحې ته د الوتنې اجازه ورکړي.
د امریکا د بهرنیو چارو وزارت وایي، هېڅ لاره نه لري چې څنګه د دغو بندو پاته شویو کسانو په اړه څېړنه وکړي.
