د افغانستان د عامې روغتیا وزارت وايي چې په هېواد کې د کرونا ضد واکسین د ترلاسه کولو لپاره د خلکو تقاضا ورځ په ورځ زیاتېږي.
اوس مهال په افغانستان کې د کرونا پرضد اسټرازینیکا، سینوفارم او جانسن اینډ جانسن واکسینونه تطبیقېږي.
د عامې روغتیا وزارت ویاند دستګیر نظري تېر ماښام ازادي راډیو ته وویل چې د دې واکسینونو کمپاین به په ټول هېواد کې دوام وکړي.
ښاغلي نظري زیاته کړه: "له نېکه مرغه اوس مهال په ټول هېواد کې د واکسین لپاره د خلکو ډېره پراخه تقاضا لیدل کېږي. موږ به د واکسین د تطبیق بهیر ته په عادي ډول د هېواد په ۳۴ ولایتونو کې دوام ورکړو."
د عامې روغتیا وزارت ویاند زیاته کړه چې تر دې دمه په افغانستان کې شااوخوا ۱،۱ میلیونه کسان واکسین شوي، خو ویل کېږي له دې سره-سره افغانستان د نړۍ له هغو هېوادونو څخه دی چې ډېر لږ وګړي یې د کرونا پرضد واکسین شوي دي.
اوس مهال په افغانستان کې د کووېډ-۱۹ ناروغۍ له کبله د مړینو ټول شمېر له ۶۰۰۰ کسانو اوښتی او نژدې ۱۳۸ زره کسان په دې ناروغۍ اخته شوي دي.