د اروپايي ټولنې د درملو د قوانینو د ادارې اېما (EMA) مسؤل مشر وايي، د دې ټولنې لهخوا د کرونا ضد تأیید شوي واکسینونه د دې ویروس د اوښتو یا نویو بڼو پر وړاندې هم اغېزمن دي.
د دې ادارې د روغتیايي ګواښونو پر ضد د پالېسۍ د څانګې مشر مارکو کاوالیري پرون پنجشنبه د هالنډ په پلازمېنه امستردام ښار کې په یوه خبري غونډه کې په دې اړه څرګندونې وکړې.
ده زیاته کړه: "موږ د کرونا ویروس د دلتا او نورو بڼو د چټک سرایت له کبله له اندېښنو خبر یو، خو ښکاري هغه څلور ډوله واکسینونه چې اروپايي ټولنې تأیید کړي دي د کرونا ویروس د اوښتو بڼو چې په اروپا کې په دوران کې دي او له هغې ډلې د دلتا بڼې پر وړاندې د وجود ساتنه کوي."
دا څرګندونې داسې مهال کېږي چې د اروپايي ټولنې په ځینو غړو هېوادونو کې د کرونا ویروس د نویو بڼو د چټک سرایت له کبله اندېښنې په زیاتېدو دي.