د کرملین ویاند وايي، په روسیه کې د وروستیو ورځو شمېرې ښيي چې د کرونا ضد واکسین لګولو ته د خلکو لېوالتیا زیاته شوې ده.

دمتري پیسکوف، پرون سې شنبه (د چنګاښ ۸مه) په یوه ټیلیفوني کنفرانس کې وویل:"دا ښکاره خبره ده چې د روان کال تر سېپټمبر میاشتې پورې د روسیې د ۶۰ سلنه وګړو واکسین کول به ممکن نه وي، خو موږ روانه اوونۍ ولیده، د هغو خلکو شمېر په زیاتېدو دی چې غواړي واکسین شي. که څه هم دولت د واکسین ټول امکانات برابر کړي دي، تر دې مخکې له بده مرغه دا شمېر خورا کم و. د خدای شکر دی اوس واکسین ته زیات خلک لېوالتیا ښيي، که څه هم د ۶۰ فیصده وګړو د واکسین کولو هدف به ترلاسه نه شي او دغه ټاکل شوی مهلت به تمدید شي."

په روسیه کې پرون سې شنبه(د چنګاښ ۸مه) په یوه ورځ د ۶۵۲ کسانو مړینه ثبت شوه چې دا له سېپټمبر میاشتې راهیسې تر ټولو لوړ شمېر دی.

د هند د اوديشا ایالت د یوه کلي اوسېدونکو مېرمنو د “خیالي نقشو“ په نوم داسې نقشې جوړې کړې دي چې د طبیعي سرچینو کموالی ښيي.

د دې سیمې اوسېدونکي د حاصلاتو د ټولولو په کلني جشن کې د شپې د ډوډۍ لپاره کبان او مارماهي چمتو کوي خو په دې سیمه کې اوس اوس کبان، ځنګلي مېوې او نورې طبیعي سرچینې د کمېدو په حال کې دي.

د لسو کلیو اوسېدونکو مېرمنو د هغو نقشو په مرسته چې د یوې غیرحکومتي ټولنې په مرسته یې برابرې کړې دي، له ایالتي حکومت څخه د خپلو سرچینو او ځمکو د احیا لپاره مرسته ترلاسه کوي. د دوی د اټکل له مخې د دې سرچینو د بیا ژوندي کولو لپاره شاوخوا دوه میلیون ډالره بسپنې ته اړتیا شته.

د اقلیم بدلون، نامنظمو بارانونو او د تودوخې لوړېدو د دې ایالت د خلکو پر ژوند ډېر ناوړه اغیز کړی دی.

دا مېرمنې که څه هم د لومړي ځل لپاره په رسمي ډول خپل غږ اوچتوي خو وايي چې دې اقدام د دوی د ډاډ او باور کچه لوړه کړې ده.

د دې کلي یوه اوسېدونکې وايي چې "ځنګل یې ژوند دی، دوی هلته زېږېدلې دي او هلته مري خو ځمکه د دوی هرڅه ده."

د کییف او مسکو ترمنځ د مستقیمو خبرو له پیل څو ساعته وروسته اوکرایني چارواکو وویل چې د روسیې یوه ډرون د اوکراین په شمال ختیځه سیمه سومي کې نهه کسان وژلي دي.

د سومي والي او د اوکراین ملي پولیس وايي چې دا حمله د روسیې سرحد ته نژدې په بیلوپیلیا سیمه کې وشوه چې په ترڅ کې اوه نور کسان هم ټپیان شول. پولیس زیاتوي چې د دریو ټپیانو حالت نازک دی.

د اوکراین ولسمشر ولودیمیر زیلینسکي پر ټلګرام شبکې په یوه بیان کې دا حمله د ملکي وګړو د وژنې یوه عمدي هڅه بللې ده.

د روسیې او اوکراین استازي د پرونیو خبرو پرمهال پر اوربند سره سلا نه شول. ښاغلي زیلینسکي وویل چې روسیه یوازې د خلکو د وژلو توان لري.

روسیې تراوسه په دې اړه څه نه دي ویلي.

د حماس ډلې چارواکي وايي، ۵۸ تنه فلسطینیان د غزې په تړانګه کې د اسراییلو د تېرې شپې په هوايي حملو کې وژل شوي دي.

دا حملې داسې مهال شوې دي چې ښکاري اسراییل په غزه کې د پراخو ځمکنیو عملیاتو په درشل کې دی.

د رویټرز خبري آژانس د راپور له مخې له تېرې پنجشنبې ورځې راهیسې د اسراییلو په بمباریو کې له ۳۰۰ ډېر کسان وژل شوي دي. د تېرې مارچ میاشتې د اوربند له ماتېدو وروسته دا پر غزې د اسراییلو تر ټولو مرګونې هوايي حملې دي او دا په داسې حال کې ده چې منځني ختیځ ته د ولسمشر ډونالډټرمپ سفر د اوربند د بیاټینګېدو لپاره له کوم مثبت اغېز پرته پرون پای ته ورسېد.

د اسراییلو پوځ نن اعلان وکړ چې د غزې د تړانګې پر ځینو برخو د عملیاتي ولکې د ټینګولو په هدف د پراخولو عملیاتو او د سرتېرو د چمتوکولو په حال کې دی.

د ملګروملتو کارپوهانو خبرداری ورکړی چې د اسراییل له خوا پر غزې د بشري مرستو پر بندولو د ۷۶ ورځو له اوښتو وروسته جدي قحطي سیمه ګواښي.

ولسمشر ټرمپ پرون په غزه کې د لوږې د بحران د حل او غزې ته د مرستو د بيا پیل پر اړتیا ټینګار وکړ.

د برتانیا پولیسو خبر ورکړی چې د تروریزم پرضد د پراخو عملیاتو په ترڅ کې یې درې ایراني وګړي له یو بهرني دولت سره د استخباراتي همکارۍ په تور نیولي دي.

د برتانیا د تروریزم ضد پولیسو نن په یوه بیان کې وویل چې مصطفی سپه وند، فرهاد جوادي منش او شاپور قلعه خاني نوري په دې تور نیول شوي دي چې د ۲۰۲۴ کال د اګست له ۱۴مې څخه یې د روان کال د فبروري تر ۱۶مې پورې احتمالا له یوې بهرنۍ استخباراتي ادارې سره د همکارۍ په فعالیتونو کې لاس درلود. پولیسو ویلي دي چې دا اشاره د ایران دولت ته ده.

د روانې مې میاشتې په لومړیو کې د اوو ایراني وګړو په ګډون اته نور کسان هم د جلا عملیاتو په ترڅ کې نیول شوي وو. د کورنیوچارو د وزیرې ایویټ کوپر دا د جاسوسۍ پرضد د تېرو څو کلونو بېساری عملیات بللي دي. د ځینو برتانوي رسنیو د راپورونو له مخې دا عملیات په لندن کې د اسراییل پر سفارت د برید له پلان سره تړاو لري خو چارواکو رسما په دې اړه څه نه دي ویلي.

د ایران د بهرنیوچارو وزیر عباس عراقچي په دې پلان کې د تهران د لاس لرلو اړوند راپورونه رد کړي او له نیول شویو کسانو سره یې له قونسلي لارو د تماس غوښتنه کړې ده.

د امریکا د لاس انجلس د المپیک کمېټه وايي، که دا ښار د ۲۰۲۸ کال المپیک لوبو ته غوره شو، د سیالیو نندارچیانو ته به د هوايي ټکسي اسانتیا برابره کړي.

دې کمېټې ویلي چې د «ارچر» د هوايي چلند له کمپنۍ سره یې په همکارۍ خبرې کړي څو د المپیک مینه‌وال د ښار له ترافیکي بیروباره خلاص کړي.

ټاکل شوې ده چې ارچر شرکت د المپیک او پارالمپیک لوبو لپاره د هوايي ټکسي خدمات برابر کړي.

دغه شرکت د پنجشنبې په ورځ (د مې ۱۵ مه) په خپلو هوايي ټکسیانو د لاس انجلس سپورتي سالونونو ته یو شمېر سپرلۍ ورسولې.

هوايي ټکسي، د عادي ټکسي موټرونو په شان څلور سپرلۍ وړلی او د هیلي کوپتر په شان هر خای کښېنستلی او ورڅخه الوتلی شی.

د اسراییل پوځ د جمعې په ورځ (د غويي په ۲۶مه) اعلان وکړ چې د یمن پر حدیده او الصلیف بندرونو یې، چې د حوثیانو تر کنټرول لاندې دي، بریدونه کړي دي.

د دغه پوځ په وینا په دې بریدونو کې یې د ایران پلوه حوثي یاغیانو تاسیسات یې له منځه وړي دي.

اسراییلي پوځ په یوه خبرپاڼه کې ویلي: «له دغو بندرونو څخه د وسلو د انتقال لپاره کار اخیستل کېږي، او دا له ملکي تاسیساتو څخه د حوثیانو د سیستماتیک او ناوړه استفادې یو بل مثال دی، چې د ترهګریزو فعالیتونو د پرمخ وړلو لپاره ترې کار اخلي.»

اسراییل دا برید دوه ورځې وروسته تر هغه وکړ چې پوځ یې د یادو بندرونو اوسېدونکو ته څو ځلې خبرداری ورکړی و.

د اسراییل صدراعظم بنیامین نتانیاهو، تر برید وروسته، حوثي یاغیانو ته ګواښ وکړ چې «د نورو بریدونو انتظار ولري.»

ښاغلي نتانیاهو دا هم وویل چې دوی چمتو نه دي چې یوازې ننداره وکړي او اجازه ورکړي چې حوثیان پرې بریدونه وکړي.

په غزې تړانګه کې د بیړنیو مرستو مسوولان وايي چې له تېرې شپې څخه د جمعې تر سهار پورې، د اسراییل په درنو بمباریو کې لږ تر لږه ۶۴ کسان وژل شوي دي.

اسوشیتید پریس خبري آژانس هم د غزې تړانګې له شمال، دیر البلح څخه خبر ورکړی چې خبریال یې تر جمعې سهاره لږ تر لږه د ۲۰ کسانو وژل تأیید کړي، د وژل شویو کسانو مړي یې شمېرلي دي.

د اسراییل بریدونه په شمالي غزه کې داسې مهال پراخېږي چې مخکې دا هیله موجوده وه چې منځني ختیځ ته د ډونالډ ټرمپ له سفر سره به د دې کړکېچ لپاره کومه حل‌لاره وموندل شي.

ښاغلي ټرمپ د جمعې په ورځ، چې منځني ختیځ ته د ده د سفر وروستۍ ورځ وه، وویل: «ډېر خلک په غزه کې د لوږي له سخت حالت سره مخامخ دي.»

د امریکا د بهرنیو چارو وزیر مارکو روبیو، وایي چې د سولې له هغو خبرو اترو، چې ټاکل شوې د اوکراین او روسیې ترمنځ په ترکیه کې وشي، ډېرې هیلې نه لري.

ده پرون (پنحشنبې) وویل چې د دې خبرو د پرمختګ لپاره باید د امریکا ولسمشر ډونالډ ټرمپ او د روسیې ولسمشر ولادیمیر پوتین له یو بل سره وویني.

هغه د ناټو د بهرنیو چارو وزیرانو تر غونډې وروسته، چې د ترکیې په جنوب کې ترسره شوه، وویل: «زما په باور تر هغه وخته به پرمختګ ونه شي، چې ټرمپ او پوتین دا موضوع په مستقیم ډول و نه څېړي.»

د اوکراین ولسمشر، ولودیمیر زیلینسکي، تأیید کړې چې هېواد به یې د خبرو لپاره استانبول ته یوه پلاوي واستوي، خو د مسکو له لوري د «ټیټې کچې» پلاوي پر استولو یې انتقاد کړی دی.

د روسیې له لوري تر ټولو لوړپوړی استول شوی غړی، ولادیمیر مدینسکي دی، چې د ولسمشر سلاکار بلل کېږي، او ټینګار کوي چې د کرملین له خوا استول شوی پلاوی «ټول لازم صلاحیتونه» لري.

د امریکا د بهرنیو چارو وزارت په یوې اعلامیه کې ویلي، ښاغلي روبیو له اسرایلو سره د سولې لپاره دسوریې د لیوالتیا، په دغه هېواد کې د ایران د نفوذ د پای ته رسولو د ، د هغو امریکايي وګړو د برخلیک د معلومولو په برخه کې چې سوریه کې وژل شوي یا ورک دي ، هڅو او همداراز د سوریې د ټولو کیمیاوي وسلو د له منځه وړلو د ژمنو هرکلی کړی دی.

د امریکا د بهرنیو چارو وزیر په دې لیدنه کې همداراز ټینګار کړی چې باید د سوریې د ټولو وګړو بشري حقونه، پرته له دې چې هغوی له کوم قوم یا مذهب څخه دي رعایت شي.

د سوریې رسمي خبري آژانس راپور ورکړی چې د سوریې او امریکا د بهرنیو چارو وزیرانو د واشنګټن له خوا د دمشق پر ضد د بندیزونو د لرې کولو، د دوه اړخیزو اړیکو د ښه والي او د ستراتیژیکو اړیکو د ټینګېدو پر لارو چارو هم غږیدلي دي.

ددې راپور پر بنسټ ښاغلي شیباني دا لیدنه "ګټوره او رغوونکې" بللې ده.

د پنجشنبې د ورځې دا لیدنه د ترکیې د بهرنیو چارو وزیر، هاکان فیدان، په کوربتوب وشوه. ترکیه د نوي سوريايي حکومت له اصلي ملاتړو څخه ګڼل کېږي.

د سوریايي او امریکايي مشرانو تر منځ وروستۍ لیدنې د سوریې او د امریکا ترمنځ له یو بل سره د مستقیم تعامل لپاره مهمې ګڼل شوي چې د سوریې د کورنۍ جګړې، د دغه هېواد د بشري حقونو د وضعیت په اړه د پراخو اندېښنو او د واشنګټن د سختو اقتصادي بندیزونو له امله، له څه باندې یوې لسیزې راهیسې یې اړیکې ترینګلې پاتې دي.

د امریکا ولسمشر ډونالډ ټرمپ د تېرې سې شنبې په ورځ، د ثور په ۲۳مه، اعلان وکړ چې پر دمشق لګول شوي بندیزونه به لېرې کړي. هغه یوه ورځ وروسته په سعودي عربستان کې د سوریې له موقتي ولسمشر احمد الشرع سره وکتل او خبرې یې ورسره وکړې.

د هند د بهرنیو چارو وزیر جی شنکر او د طالبانو د بهرنیو چارو وزارت سرپرست امیرخان متقي د دواړو خواوو ترمنځ د همکاریو د پیاوړتیا په تړاو ټیلیفوني خبرې کړې دي.

جی شنکر د پنجشنبې په ورځ، د ثور په ۲۵مه، پر خپله ایکس پاڼه لیکلي چې له امیرخان متقي سره "ښې ټیلیفوني خبرې" درلودې.
هغه زیاته کړې چې د هند او افغانستان ترمنځ د بې‌باورۍ د رامنځته کولو لپاره د "ناسمو او بې‌اساسه راپورونو" له لارې د وروستیو هڅو په وړاندې د متقي "قاطع دریځ" ته یې هرکلی ویلی دی.

د هند د بهرنیو چارو وزیر همداراز لیکلي، په دې ټیلیفوني مکالمه کې یې د افغان ولس سره د هند دودیزې دوستۍ او د افغانستان د پرمختیايي اړتیاوو پر دوامداره ملاتړ ټينګار کړی دی.

له بلې خوا، د طالبانو د بهرنیو چارو وزارت ویلي، دواړو خواوې " د دوو اړخیزو اړیکو پر پیاوړتیا، تجارت او د دیپلوماتیکو اړیکو د کچې پر لوړولو " غږېدلي دي.

له دې وړاندې، د روان لمریز میاشت په جریان کې، د هند د بهرنیو چارو وزارت د افغانستان، پاکستان او ایران د څانګې عمومي رئیس او ځانګړي استازي، انند پرکاش، کابل ته په سفر کې له امیرخان متقي سره لیدلي او خبرې یې کړې وې.

د هند د بهرنیو چارو وزیر له امیرخان متقي سره دغه ټیلیفوني خبرې څو ورځې وروسته له هغه ترسره شوې چې هند په پاکستان کې پر ځینو اهدافو بریدونه وکړل.